Gure Madit me Distrik—Obedo Kare me Woro ki Yomcwiny
1. Kwero kwer pa Luicrael-li onongo rom aroma ki gurewa madit me distrik me kare-ni nining?
1 Yucepu, Maliam, ki lutinogi onongo kare ki kare gicito i kwero kwer ma bedo mwaka ki mwaka i Jerucalem. I kare macalo man, gin kacel ki luworo luwotgi mukene onongo pe giparo pi pekogi me nino ducu ento giketo cwinygi i kwogi me cwiny calo gin ma pire tek. Kwero kwer man onongo minigi kare me tamo ki dok lok i kom ber pa Jehovah kun gilwodo Cikke. Gurewa madit me distrik ma tye ka bino-ni biminiwa kare marom aroma me woro Jehovah ki yomcwiny.
2. Ngo ma myero watim wek wayubbe pi gure madit ma tye ka bino-ni?
2 Yubbe Mitte: Wot me a ki i Najaret me cito i Jerucalem ki dong dok cen paco onongo tero lupaco pa Yecu-gi mail 120. Kadi bed pe wangeyo wel omegi ki lumegi Yecu, watwero tamo i kom yub kacel ki tute pa Yucepu gin ki Maliam. Mono dong iyubo jami ducu ma mitte wek ibed tye nino adek ducu i gure madit ma tye ka bino-ni? Man mitte ni myero i kwany yweyo ki i dog ticci nyo i lok ki ladit ticci nyo lapwony pa latinni. Mono dong inongo kabutoni i otel ka ce mitte? Tika iromo kwanyo kare me konyo ngat mo ki i kacokke ma mito kony wek en bene obed tye i gure madit?—1 Jon 3:17, 18.
3. Kwero kwer pa Luicrael-li miyo kare me ribbe pi cuko cwiny nining?
3 Ribbe pi Cuko Cwiny: Kwero kwer pa Lujudaya-ni onongo miyo kare me ribbe ki luworo mukene! Lupaco pa Yecu onongo gikuro kare man wek girwatte ki luremgi macon. Onongo bene gibedo ki kare me mako lurem manyen ki i kin Lujudaya ki jo ma gulokke i dini pa Lujudaya ma gibedo tye nyo giwire awira i Jerucalem.
4. Watwero nyutune nining ni ribbe pa utmegiwa i twok lobo ducu-ni tye gin ma pire tek?
4 Tyen lok acel mumiyo lagwok ot ma lagen dok maryek yubo ni myero wagure kacel ka winyo pwony i gure madit me distrik ma ka goyo ngec acel-li i bukke aye ni wek wacuk cwiny luwotwa. (Ibru 10:24, 25) Pi meno, ket yub me o con i kabedo me gure nino ducu wek inong mit pa ribbe ki jo mukene ma peya wonkom me yub omiyo ngec pi cakke pa wer ma nyutu ni cawa dong oromo me nongo kabedo. Ma ka weko kabedo me gure kun wacito ka yenyo cam i cawa me cam me dyeceng, kicuko cwinywa me kelo cam ma camone yot kun wabedo i kabedo me gure wek warwatte kun waboko lok ki jo ma gubedo cok kwedwa. Ribbe pa Utmegiwa i twok lobo ducu-ni obedo mic ma oa ki bot Jehovah ma myero water calo gin ma pire tek atika.—Mika 2:12.
5. Ngo ma bikonyowa me nongo adwogi maber ki i yub me gure?
5 Kare me Nongo Pwony: Cakke wa i ka tinone, Yecu otiyo maber ki kare me kwero kwer me pwonyo lok kom Wonne me polo. (Luka 2:41-49) Ngo ma bikonyowa kacel ki jo me odiwa wek wanong adwogi maber ki i pwony ma kibimiyogi? I cawa me yub, bed mot dok pe ibed ka lok atata. Pe iwek cimmi nyo jami ma cal kwede odwo tammi nyo pa jo mukene. Nen wang lalok, kun icoyo piny lok mogo macego cego. Wubed kacel macalo jo me ot me nenone-ni lutinowu bene gitye ka winyo pwony. I otyeno, wukwany kare me nyamo kacel lok mogo madongo ma ogudo cwinywu.
6. Ngo ma myero obed i wiwa ma lubbe ki rukwa ki kit ma wanen kwede?
6 Rukwa ki Kit ma Wanen Kwede: Lucat wil me lobe mukene ma giwoto i yo onongo gingeyo lupaco pa Yecu ki Lujudaya mukene ma gin luworo ma gicito nyo gidwogo ki i kwero kwer oyot adada pien nongo gukwoyo jira i twok dog bongigi kacel ki tol ma bulu. (Nam. 15:37-41) Kadi bed Lukricitayo pe giruko bongo ma dok nen pat, kingeyowa pien warukke i yo mupore, maleng dok mamwonya. Omyero watam matut i kom kit ma wanen kwede ka wacito nyo waa ki i kabedo me gure madit ki dong ka watye i taun ka ma gure tye ka timme iye. Kadi bed waloko bongiwa i nge yub, omyero rukwa oket deyo i kom Jehovah dok waruk baj me gure. I yo ma kit man, wabinen pat ki jo ma pe gin Lucaden dok miyo jo ma nenowa giloko maber i komwa.
7. Pingo omyero watam me mine me tic i kabedo me gure madit?
7 Kimito Jo ma Giromo Mine: Lutic mapol mitte wek yub me gure owot mapwot. Mono iromo mine me miyo kony? (Jab. 110:3) Tic ma kitiyo i kabedo me gure madit obedo but tic maleng dok miyo caden maber. Ladit ma loyo kabedo mo ma gure madit obedo tye iye cwinye obedo yom pi kit ma jo ma gumine guyubo kabedo meno maleng kwede mumiyo en ocoyo ni: “Amito apwowu pi yub man ma pud dong obedo ber atika ma onongo peya aneno-ni. Pol kare abedo ka winyone-ni Lucaden pa Jehovah dok gipat pi ber kitgi, ma ka gupango kabedo moni, giweko dong maleng loyo kit ma gunongo kwede. Wun kacel ki dulwu-ni wumiyo kabedo man odoko maber atika pi jo ma gikwo kany dok wutiyo ki jo ma gin lukica ma watye ki yomcwiny madit atika me ngeyogi.”
8. Kare me miyo caden ango ma bibedo tye i kabedo me gure madit?
8 Kare me Miyo Caden: Jo ma gikwo i taun me gure madit gibineno welle ma gurukke maber, maleng dok gitye ki baj me gure, ma bimiyo gibedo ki miti, dok biminiwa kare me tittigi lok i kom gure madit. Latin mo me mwaka angwen ocito ki bukke ma pud kinyutu manyen i ot me cam inge yub ci onyutu bot dako mo ma tiyo kunu. Man omiyo kare ki lunyodo pa awobi man me lwongo dako-ni i gure madit.
9. Waromo lubu lanen ma lupaco pa Yecu gubedo kwede nining ma lubbe ki nyutu pwoc pi mic me jami me cwiny?
9 Kwero kwer me kare ca obedo kare me yomcwiny ma Lujudaya ma gitamo pi jami me cwiny onongo gikuro. (Nwo. 16:15) Lupaco pa Yecu onongo cwinygi yom me timo gin mo keken wek gibed tye iye kun ginongo adwogi maber. Watye ki pwoc acel-lu pi gurewa madit me distrik, kun wanenogi calo mic ma oa ki bot Wonwa me polo ma lamar. (Yak. 1:17) Man aye dong kare me yubbe pi gure man ma bedo mwaka ki mwaka-ni kun waworo Jehovah ki yomcwiny!
[Bok i pot karatac 4]
Lok me Poyo Wic pi Gure Madit me Distrik
◼ Cawa me Yub: Yub bicakke cawa 3:20 me odiko nino adek-ki ducu. Kibiyabo doggola cawa 2:00 kikome me odiko. Ka ce kimiyo ngec pi cako keto wer, omyero wabedu piny wek yub ocakke i yo me woro dok ki mwolo. Yub man bitum cawa 10:55 me otyeno i Ceng Abic ki Ceng Abicel, ka dong cawa 9:40 me otyeno i Ceng Cabit.
◼ Ka Gwoko Giwot: Ka ma kigwoko iye giwot bibedo tye i kabedo me gure ducu labongo cul mo, dok kibimiyone ma lubbe ki ngat ma okwongo bino wi ati.
◼ Gwoko Kabedo: Iromo gwoko kabedo pi jo ma wuwoto kwedgi i mutoka acel nyo jo ma wubedo kwedgi i paco acel, ki jo ma wutye ka kwano Baibul kwedgi i kare ni.—1 Kor. 13:5.
◼ Cam me Dyeceng: Tim ber ibin ki cam me dyeceng me kaka weko kagurre me cito ka cam woko i kare me yweyo me dyeceng. Ber me tic ki gin me mako cam matidi ma kiromo ketone i te kom. Jami madongo me mako cam ki dong jami ma obedo gilac pe mitte i kabedo me gure madit.
◼ Miyo Mot: Watwero nyutu pwocwa pi yub me gure ki miyo motwa pi konyo tic ma mako wi lobo ducu ki i Ot me Kerwa nyo ki i gure madit. Mot ma kimiyo i kare me gure me distrik kun kitiyo ki cheque, omyero kicogi i nying Dulwa ma ocone ite cik i lobowu.
◼ Two ki Awano ma Bino Atura: Ka two mo ocakke atura i kagure madit, tim ber itit ki lajol wele mo ma tye cok kwedi, en bimiyo ngec meno cut ka ma Kimiyo iye Kony wek ngat ma tye ki ngec i miyo kony oyot onen lit pa twone kacel ki mine kony. Ka ce mitte, ngat ma tye ki ngec me miyo kony-nyi bipenyo pi kony mukene.
◼ War: Mwaka ki mwaka awano mapol timme ma lubbe ki war. Ber iyer war mupore, ma romo tyeni ma weko iwoto i citep nyo i kalo bur labongo ayela.
◼ Mako Dwan: Kit lamak dwan mo keken omyero pe kikub i kom mac alektrik nyo waya me lakub dwan i gure, gin lamak dwan omyero kiti kwede i yo ma pe yelo jo mukene.
◼ Jami ma Ngwecgi Kur: Gure madito mogo oromo timme ki i ot ma doggi kiloro woko. Pi meno, bedo ki mar bimiyo pe watiyo ki moo nyo pafium ma ngwece tek tutwal ma twero kelo peko bot jo ma tye ki two ma mako ot yweyo ki mukene ma pe mito ngwec piny ma oculle liking.—1 Kor. 10:24.
◼ Fom me Lubu: Omyero wati ki fom me Please Follow Up (S-43) me miyo ngec i kom ngat mo ma onyutu miti i kare ma nongo watye ka miyo caden ma pe wayubbe pire i kare me gure. Lutit kwena myero gubin ki fom man acel nyo aryo i ka gure madit. Ka ipongo fom man ci iromo miyone bot Jo ma Gwoko Bukke nyo bot karan me kacokkewu ka idok gang.—Nen Ticwa me Ker me Novemba 2009, pot 4.
◼ Kabedo me Cam: Ket deyo i kom nying Jehovah ki bedo ki kit maber i kabedo me cam.
◼ Kabedo me Buto: (1) Pe iwek kigwok ot buto mapol ma pe ibiromo tic kwedgi ducu, dok pe iwek wel dano gukat wel ma mitte me buto i ot moni. (2) Ka dong pe imito ot ma ipenyo pigi-ni, ci mi ngecce bot wegi ot labongo galle. (3) Pe ited i ot buto ka pe kimini twero. (4) Pe iti ki jami me angica ma kimini i yo me alany alany, magi obedo jami ma welle ma gibedo i otel gitiyo kwede. (5) Bed ki kit ma cwiny maleng nyako ka itye ka lok ki jo ma gitiyo i kabedo ma ibuto iye. Gin gwoko welle mapol dok gipwoyo ka ce wanyutu cwiny me kica, diyo cwiny, ki dong niang. (6) Ka peko mo ocakke ki ka ma ibuto iye, nen ni iniango Jo ma Neno Lok kom Kabuto i gure.
◼ Jo ma Mito Mine me Tic: Yomcwiny ma wanongo ki i bedo tye i gure bibedo dit adada ka ce wamine me konyo i tic mogo ma mitte. (Tic 20:35) Ngatti mo keken ma mito mine myero ocit i Dipatmen ma Loyo Lok me Mine me Tic i kabedo me gure (Volunteer Service Department). Lutino ma gitye mwaka 16 giromo bene miyo kony kun nongo gitiyo kacel ki lunyodogi, ngat ma gwokogi nyo dano mo madit ma gin gucimo.