In Mono Iyubbe pi Cam me Cwiny Madwong?
1. Kit yubbe ango ma mitte i yubo cam?
1 Yub mapol mitte pi yubo cam madwong. Omyero kinong jami me ateda, kited mamit, ka dong kikel inyim dano. Omyero bene kiyub kit ma poko cam biwot kwede. Medo i kom meno, omyero kiyub ka ma kibicamo iye. Wele omyero bene guyubbe, tutwalle mogo ma gia ki ka maboco. Kadi bed ni yubbe kit man kwako tic mapol, ento camo cam mamit kacel ki lurem ki jo me ot tye ki adwogi mabeco adada. Cokcok-ki Lucaden pa Jehovah i twok lobo ducu gibigure kacel i gurup mapat pat me nongo mit pa cam me cwiny ma gubedo ka kurone ma en aye Gure Madit me Distrik me ‘Wubed ma Wukiyo Piny!’ Kityeko timo tic mapol pi yubo gure man wek jami ducu obed atera. Wan ducu kilwongowa me bedo tye. Wek wabed tye kun wanongo adwogi maber, mitte ni wan ducu myero wayubbe.—Car. 21:5.
2. Ngo ma myero watim me bedo tye i nino me gure madit ducu?
2 Nong Adwogi Maber Loyo: Mono dong icobo yubbi ducu wek ibed tye i nino ducu me gure madit? Ka ce mitte, peny ladit ticci wek omini kare me bedo tye pi nino adek ducu me gure madit-ti, kadiwa nino me acel. Mono dong icobo yubbi i kom kit me wot ki ka ma ibibuto iye? Luelda omyero gunen ni jo muteggi kacel ki jo ma goro ki mukene ma gimito kony kikonyogi.—Jer. 23:4; Gal. 6:10.
3. Pingo omyero pe wacit i gure ma kwako lobe mapol ma pe kilwongowa iye?
3 Kabedo mogo bibedo ki gure ma kwako lobe mapol. Nge ni kacokke mogo kacel ki wele ma gia ki woko keken aye kilwongogi i yub man. Iyubo gure man, jang gang kal otyeko moko wel dano adi ma myero kilwonggi, ma lubbe ki wel kabedo kacel ki otel me buto ma tye. Dano romo pong makato kare woko ka ce lutit kwena gucito i gure ma kwako lobe ducu ma pe kilwongogi iye.
4. Lok me poyo wic ango ma bikonyowa me bedo atera pi cako yub me nino acel acel?
4 Yubbe nino ducu me o i kabedo me gure con wek inong kabedo ma nongo yub peya ocakke. Ti ki dakika mo manok ma peya yub ocakke me wot wiye wiye i karatac me yub. Man bikonyi me yubo cwinyi pi ngec ma kibimiyone. (Ejira 7:10) Ka won kom me yub omiyo ngec pi cakke pa wer, wot ki winyo wer kun iyubbe me nywako i wer ma bicako yub ki dong lega.
5. Jo me odiwa giromo nongo adwogi maber loyo ki i yub nining?
5 Ka jo me odi gibedo kacel i kare me gure madit, lunyodo gibinenone ni lutinogi gitye ka winyo pwony. (Nwo. 31:12) Kicuko cwiny dano ducu me lubu ki i Baibulgi ka kitye ka kwano ginacoya. Coyo lok macego cego piny romo konyi me keto cwinyi i pwony. Lacen, lok ma icoyogi pinyi bipoyo wi i kom lok ma pigi tego ma kimiyogi i pwony. Pe ibed ka lok ata nyo weko kabedoni ka ce yub tye ka wot anyim. Ka ce itye ki cim, pe iwek odwo tammi nyo tam pa jo mukene i cawa me yub. Inge yub me nino acel acel, itwero nyamo ki jo mukene jami ma oyomo cwinyi ki i yub?
6. But yub ma pire tek me gurewa madito obedo ngo, dok waromo nongo adwogi maber loyo ki iye nining?
6 I gure madit me distrik, watye ki kare me bedo ki wat macok ki omegiwa ki lumegiwa ma dok pat ki ma nonge i lobo. (Jab. 133:1-3; Mar. 10:29, 30) In mono itwero keto tek me tucu nyingi bot jo ma bibedo cok kwedgi kun iboko lok kwedgi i cawa me cam me dyeceng? Man aye ber pa kelo cam ma camone yot kun ibedo i kabedo me gure ma ka cito i odi me cam. Pe iwek kare me cuko cwinywa kekenwa ma kit man okati.—Rom. 1:11, 12.
7. Yub ango ma myero wabed kwede ma lubbe ki bongi ma wabiruko?
7 Ruk: Pire tek ni Jehovah ociko jo Icrael me kwoyo jira i twok dog bongigi, kun giketo iye tol ma bulu. (Wel 15:37-41) Man onongo poyo wigi ni gin jo ma kipokogi pat pi woro Jehovah. I kareni, wapokke woko ki lobo ka warukke i yo me woro dok ma wanen maber ka watye i gure madit. Man miyo caden magwar bot jo ma nenowa kadiwa ka wacito ka cam i nge yub. Pi meno, tam matut i kom bongo ma ibiruko.
8. Waromo miyo caden bot jo mukene i taun ma gure madit tye iye nining?
8 Mi Caden: Ka watamo con, waromo miyo caden bot dano i taun ma gure madit tye iye. Omego mo ma gucito gin ki dakone i kabedo me cam inge yub onyutu bajje me gure madit bot latic acel ci openye ni: “Tika ineno dano mapol ma gitye ki baj man i korgi?” Laticci owacci enenogi dok ebedo ka tamo pingo dano mapol gitye ki baj meno. Man oyabo yo me leyo tam, dong ingeye omego ni olwongo laticci me bino i gure madit.
9. Wan waromo nyutu pwocwa bot Ngat ma Olwongowa Jehovah nining?
9 Kadi bed utmego gibimiyo pwony, penyo dano, ki nyutu lapor ducu, ento Wonwa me polo, Jehovah, en aye lami cam man me cwiny ma bedo mwaka ki mwaka-ni. (Ic. 65:13, 14) Wanyutu pwocwa bot Ngat ma Olwongowa-ni ki bedo tye nino ducu kun wacamo cam me cwiny ducu ma kiketo inyimwa. Mono dong icobo yubbi ducu me timo meno?
[Box on page 4]
Lok me Poyo Wic pi Gure Madit me Distrik
◼ Cawa me Yub: Yub bicakke cawa 3:20 me odiko nino adek-ki ducu. Kibiyabo doggola cawa 2:00 kikome me odiko. Ka ce kimiyo ngec pi cako keto wer, omyero wabedu piny wek yub ocakke i yo me woro dok ki mwolo. Yub man bitum cawa 10:55 me otyeno i Ceng Abic ki Ceng Abicel, ka dong cawa 10:00 me otyeno i Ceng Cabit. Pi gure ma kwako lobe mapol, yub me ceng agwen bicakke cawa 7:20 me otyeno, ci tum cawa 10:55 me otyeno.
◼ Ka Gwoko Giwot: Ka ma kigwoko iye giwot maber bibedo tye i kabedo me gure ducu labongo cul mo, dok kibimiyone ma lubbe ki ngat ma okwongo bino wi ati. Lugoro keken aye kibiye ki gin me gwoko giwotgi i kabedo ma kiyubo pigi. Kit macalo ka gwoko giwot romo bedo matidi mo-ni bibedo ber ka dano giwoto mapol i giwot acel.
◼ Gwoko Kabedo: Iromo gwoko kabedo pi jo ma wuwoto kwedgi i mutoka acel nyo jo ma wubedo kwedgi i paco acel.
◼ Cam me Dyeceng: Tim ber ibin ki cam me dyeceng me kaka weko kagurre me cito ka cam woko i kare me yweyo me dyeceng. Ber me tic ki gin me mako cam matidi ma kiromo ketone i te kom. Jami madongo me mako cam ki dong jami ma obedo gilac pe mitte i kabedo me gure madit.
◼ Miyo Mot: Watwero nyutu pwocwa pi yub me gure ki miyo motwa pi konyo tic ma mako wi lobo ducu ki i Ot me Kerwa nyo ki i gure madit. Mot ma kimiyo i kare me gure me distrik kun kitiyo ki cheque, omyero kicogi i nying dulwa.
◼ Two ki Awano ma Bino Atura: Ka two mo ocakke atura i kagure madit, tim ber itit ki lajol wele mo ma tye cok kwedi, en bimiyo ngec meno cut ka ma Kimiyo iye Kony wek ngat ma tye ki ngec i miyo kony oyot onen lit pa twone kacel ki mine kony. Ka ce mitte, ngat ma tye ki ngec me miyo kony-nyi bipenyo pi kony mukene.
◼ War Aruka: Mwaka ki mwaka awano mapol timme ma lubbe ki war aruka. Ma ka ruko war mogo ma tye calo cilipa nyo cital ma pud okati nyen, ber iyer war mupore, ma romo tyeni ma weko iwoto i citep nyo i kalo bwur labongo ayela.
◼ Mako Dwan Kit lamak dwan mo keken omyero pe kikub i kom mac alektrik nyo waya me lakub dwan i gure, gin lamak dwan omyero kiti kwede i yo ma pe yelo jo mukene.
◼ Kom me Loro Lutino ki me Bedo Gang: Kom me loro lutino nyo kom mogo me bedo gang omyero pe kikelgi i kabedo me gure madit. Kono do, kom me gwoko lutino ma lunyodo giromo ketone cok kwedgi aye giromo bino kwede.
◼ Jami ma Ngwecgi Kur: Gure madito mogo oromo timme ki i ot ma doggi kiloro woko ma macin ma kiyo yamo aye cwalo yamo iye. Pi meno, bedo ki kica bimiyo pe watiyo ki moo nyo pafium ma ngwece tek tutwal ma twero kelo peko bot jo ma tye ki two ma mako ot yweyo ki mukene ma pe mito ngwec piny ma oculle liking.—1 Kor. 10:24
◼ Fom me Lubu Kor Dano: Omyero wati ki fom me Please Follow Up (S-43) me miyo ngec i kom ngat mo ma onyutu miti i kare ma nongo watye ka miyo caden ma pe wayubbe pire i kare me gure. Lutit kwena myero gubin ki fom man acel nyo aryo mo i ka gure madit. Ka ipongo fom man ci iromo miyone bot Jo ma Gwoko Bukke nyo bot karan me kacokkewu ka ce idok gang.—Nen Our Kingdom Ministry me Febuari 2005, pot 6.
◼ Kabedo me Cam: Ket deyo i kom nying Jehovah ki bedo ki kit maber i kabedo me cam.
◼ Kabedo me Buto: (1) Pe iwek kigwok ot buto mapol ma pe ibiromo tic kwedgi ducu, dok pe iwek wel dano gukat wel ma mitte me buto i ot moni. (2) Ka dong pe imito ot ma ipenyo pigi-ni, ci mi ngecce bot wegi ot labongo galle. (3) Pe ited i ot buto ka pe kimini twero. (4) Pe iti ki jami me angica ma kimini i yo me alany alany, magi obedo jami ma welle ma gibedo i otel gitiyo kwede. (5) Bed ki kit ma cwiny maleng nyako ka itye ka lok ki jo ma gitiyo i kabedo ma ibuto iye. Gin gwoko welle mapol dok gipwoyo ka ce wanyutu cwiny me kica, diyo cwiny, ki dong niang. (6) Ka peko mo ocakke ki ka ma ibuto iye, nen ni iniango Jo ma Neno Lok kom Kabuto i gure.