Gurewa me Distrik—Gimiyo Caden i kom Lok Ada
1. Nino madito pa Luicrael-li omiyogi kare me lwodo lok ada ma pigi tego ma dok i kom woro Lubanga nining?
1 Luicrael me kare macon onongo gigure kidek mwaka ki mwaka pi kwero nino madito. Kadi bed ni co keken aye onongo mitte ni gubed i kwer meno, pol kare jo me odi onongo giwoto kacel i Jerucalem pi gure madito me yomcwiny magi. (Nwo. 16:15, 16) Gure magi omiyogi kare me lwodo ki me lok i kom lok ada ma pigi tego. Lok ada mene ma gubedo ka lwodo? Lok ada acel aye ni Jehovah obedo Lami jami ma lamar, dok ma cinge yot. (Nwo. 15:4, 5) Mukene aye ni waromo geno tira ki gwok ma en miyo. (Nwo. 32:9, 10) Jo Icrael bene myero bed gulwodo ni kit ma gubedo jo ma tiyo ki nying Jehovah, omyero gunyut kit mere matir i kwogi. (Nwo. 7:6, 11) I kareni gurewa me distrik bene keliwa adwogi maber marom aroma.
2. Yub me gure me distrik bimenyo dero i kom lok ada nining?
2 Yub Man Bimenyo Dero i kom Lok Ada: I gurewa me distrik, wanongo mit pa pwony, goga, jami me apora, ki dong penyo dano, meno miyo waniang dok waketo lok ada me Baibul i tic. (Jon 17:17) Dong kityeko keto yub mapol pi gure madit ma tye ka bino-ni. Dul pa Jehovah tye ka keto yub me cobo miti mapatpat ma dano me twok lobo-ni ducu gitye kwede i kareni. (Mat. 24:45-47) Mono pe itye ki miti me neno ki me winyo jami ma bibedo tye i gure man?
3. Ngo ma omyero watim me nongo adwogi maber ki i yub me gure?
3 Adada, wabinongo adwogi maber loyo ka wabedo tye dok waketo cwinywa i yub pi nino adek man ducu. Ka onongo pud pe itito pi yub man bot ladit ticci, tim ber iwacce. Nen ni inongo yweyo muromo i dyewor ducu wek ibed ma wangi twolo i kare me yub. Jo mapol ginongo ni neno lalok ki coyo coc macego cego weko tamgi pe wirre atata. Pe iwek cimmi nyo jami mogo ma tye calo cim oyel jo mukene nyo in bene. Gwokke ki boko lok, cwalo lok ki cim, cam ki mat ka pe mitte, ma nongo kitye ka miyo pwony.
4. Lunyodo mono gitwero konyo lutinogi nining wek gunong ber pa pwony i gure madit?
4 I mwaka me abirone, nyo me Cabat, ka jo me odi pa Luicrael onongo gigure ka winyo kwano Cik i kare me kwero Kwer me Bolo, gin onongo giwoto kacel ki ‘litinogi,’ “wek guwiny ci gupwony.” (Nwo. 31:12) Bedo me cuko cwiny adada me neno jo me odi ma gibedo kacel i kare me gure madito kun nongo lutinogi pe ginino ento giketo tamgi me lubo pwony! Otyeno ducu, pingo pe wukwan gin ma wucoyo kun wunyamo kacel lok ma oyomo cwinywu ki i yub? “Mingo aye gin ma tye i cwiny latin matidi,” pi meno lunyodo myero gugwok lutinogi, kadiwa bulugi me mwaka apar ki wiye i kare me yweyo me dyeceng ki ka gitye i otel, me kaka ‘tenyogi liyak.’—Car. 22:15; 29:15.
5. Ber kitwa ka watye i otel miyo ada nen mamwonya nining?
5 Ber Kitwa Miyo Lok Ada Nen Mamwonya: Ber kitwa ka watye i boma ma gure madit bedo iye miyo lok ada nen mamwonya. (Tito 2:10) Lutic me otel gineno ka jo me gurup moni lubo cik me otel, ginyuto kit me diyo cwiny, dok giloko lok mamit botgi. (Kol. 4:6) I kare ma jo ma gicwalogi ki i jang gang kal gubedo ka laro wel ki lamego ma loyo lok me cente i otel mo, lamego-ni owacci: “Cwinywa yom adada ka jowu gubedo i otelwa, pi kit ma ginyuto. Kitgi beco adada dok gin lukica, ginyuto woro pi luticwa ki kabedowa.”
6. Kit ma warukke kwede i boma me gure romo weko lok ada nen ma mwonya nining?
6 Ka waruko bajwa me gure, konyo me rweyo gure madit, miyo welle ma gubino i gure ngeyowa, dok bene miyo caden bot jo ducu ma nenowa. Jo ma gitye i boma me gure gibineno ni jo ma guruko baj-ji girukke maber ki mwolo dok mapat ki ruk atata me cital mogo maraco ma onya i loboni. (1 Tem. 2:9, 10) Pi man myero wanen ni waruko ruk mupore ka watye i boma me gure madit ki bene ka watye ka donyo i otel. Ka wabino ma waruko curuwal macek ki cati luriyo nongo pe wanyuto woro. Kadi bed kiyubo gure madit man i bar tuko, rukwa myero onyut woro. Ka watamo ni myero walok bongo i agikki me yub me nino moni wek wacit ka cam, wiwa myero opo ni pud watye welle ma gubino pi gure madit dok pe myero waruk bongo luriyo.
7. Yo acel ango ma waromo note kwede ki omegiwa ki lumegiwa i gure madit?
7 I kare me kwer pa jo Icrael gin onongo ginongo yomcwiny me ribbe kacel ki luworo ma gia ki i boma nyo lobbe mukene, dok man okelo note i kingi. (Tic 2:1, 5) I gurewa me distrik, mar ma watye kwede calo omege nen woko ka maleng. Yomcwiny ma watye kwede i paradicwa me cwiny-nyi, yomo cwiny jo ma ginenowa. (Jab. 133:1) Me ka a woko ki kabedo me gurewa me cito ka yenyo cam me dyeceng, bedo ber ka wakelo gin acama mo wek wanong kare me boko lok ki omege ki lumege ma gubedo cok kwedwa!
8. Watye ki tyen lok ango me mine pi tic ka watwero?
8 Jo ma ginenowa gibedo ki ur mada i kit ma kiyubo kwede gure madito, tutwalle ka guniang ni lutic ducu gubedo jo ma gudyere adyera. In mono itwero ‘mine keni’ me tic i gurewa mo? (Jab. 110:3) Jo ducu me ot acel moni giromo dyere me tic wek gupwony lutinogi me mine kengi pi konyo jo mukene. Ka ibedo ngat ma lewic mako oyot, tic i gure madit obedo yo maber me rwatte ki jo mukene. Lamego mo acel owacci: “Onongo pe angeyo jo mapol mapat ki jo me pacowa ki lurem mogo manok. Ento i kare ma amiyo kony me gwoko lengo, arwatte ki omege ki lumege mapol. Oyomo cwinya mada!” Yabo cwinywa malac bot jo mukene ma gimine me konyo tic i gure man bikeliwa yomcwiny madwong. (2 Kor. 6:12, 13) Ka onongo pud peya imine me konyo tic, peny luelda wek guwacci gin ma mitte.
9. Wabilwongo dano nining i gurewa madit?
9 Lwong Jo Mukene me Winyo Lok Ada: Calo mwaki mukato angec, ma nongo pud odong cabit adek me cito i gure madit, wabibedo ki rwec me lwongo dano pi gure madit man. Kacokke gibitute me tiyo kabedo me wang ticgi ducu. (Nen bok ma wi lokke tye ni “Wabipoko Karatac me Lwongo-ni Nining?”) Karatac me lwongo mudong myero kikel i gure madit. Kibitiyo kwedgi me miyo caden ma pe wayubbe iye i boma me gure madit.
10. Tit kong jami mutimme ma nyuto ni rwec me lwongo dano pi gurewa kelo adwogi maber.
10 Dano mono giwinyo rwec man ma bedo mwaka ki mwaka-ni? I gure madit acel, lajol wele okonyo luot mo me nongo kabedo. Luot man guwacce ni gunongo karatac me lwongo ci “gutamo ni nen mwonya mada.” Pi meno gin gudwoyo mutoka pi mairo 200 wek gubed tye iye! I kabedo mukene, lamego ma onongo tye ka tito kwena i ot ki ot omiyo karatac me lwongo bot laco mo ma tye ki lapeny i kom gure madit. En okwanyo kare me nyamo lok i kom karatac man kwede. I nge nino manok ma lamego-ni tye i gure madit, oneno laco-ni kacel ki lawote mo ma bene obino i gure, dok onongo gutingo bukke ma pud okatti nyen.
11. Pingo bedo tye i gurewa me distrik ma bedo mwaka ki mwaka-ni pire tek?
11 Kwer me nino madito magi onongo obedo mic me mar ma oa ki bot Jehovah pi konyo jo Icrael me tic “bote ki lengcwiny ki gen madwong.” (Yoc. 24:14) I yo acel-lu, bedo tyewa i gurewa me distrik ma bedo mwaka ki mwaka-ni konyowa me ‘lubo lok ada’ dok tye but worowa ma pire tek adada. (3 Jon 3) Walego ni Jehovah ogo laane i kom jo ducu ma gimaro ada wek gubed tye i yub me gure dok gunong adwogi maber!
[Boro buk i pot karatac 3]
Ber kitwa ka watye i boma ma gure madit bedo iye miyo lok ada nen mamwonya
[Boro buk i pot karatac 4]
Ma nongo pud odong cabit adek me cito i gure madit, wabibedo ki rwec me lwongo dano pi gure madit man
[Bok i pot karatac 3-6]
Lok Me Poyo Wic Pi Gure Madit Me Distrik Me 2012
◼ Cawa me Yub: Yub bicakke cawa 3:20 me odiko nino adek-ki ducu. Ka ce kimiyo ngec pi cako keto wer, omyero wabedu piny wek yub ocakke i yo me woro dok ki mwolo. Yub man bitum cawa 10:55 me otyeno i Ceng Abic ki Ceng Abicel ka dong cawa 9:40 me otyeno i Ceng Cabit.
◼ Ka Gwoko Giwot: Ka ma kigwoko iye giwot bibedo tye i kabedo me gure ducu labongo cul mo, dok kibimiyone ma lubbe ki ngat ma okwongo bino wi ati.
◼ Gwoko Kabedo: Iromo gwoko kabedo pi jo ma wuwoto kwedgi i mutoka acel nyo jo ma wubedo kwedgi i paco acel, ki jo ma wutye ka kwano Baibul kwedgi.—1 Kor. 13:5.
◼ Cam me Dyeceng: Tim ber ibin ki cam me dyeceng me kaka weko ka gure me cito ka cam woko i kare me yweyo me dyeceng. Ber me tic ki gin me mako cam matidi ma kiromo ketone i te kom. Jami madongo me mako cam ki dong jami ma obedo gilac pe mitte i kabedo me gure madit.
◼ Miyo Mot: Watwero nyutu pwocwa pi yub me gure madit ki miyo motwa pi konyo tic ma mako wi lobo ducu ki i gure madit. Mot ma kibimiyo i kare me gure me distrik kun kitiyo ki cheque, omyero kicogi i nying “International Bible Students Association.” Nyo nying ma dulwa ocone kwede i te cik i lobowu.
◼ Two ki Awano ma Bino Atura: Ka two mo ocakke atura i kagurre madit, tim ber itit ki lajol wele mo ma tye cok kwedi, en bimiyo ngec meno cut ka ma Kimiyo iye Kony wek ngat ma tye ki ngec i miyo kony oyot onen lit pa twone dok omi kony. Ka ce mitte, ngat ma tye ki ngec me miyo kony-nyi bipenyo pi ambulance.
◼ Yat: Ka ce itye ka mwonyo yat, tim ber iwot ki yat ma ibitic kwede muromo, kit macalo yat bibedo peke i kabedo me gure madit. Ka bene itye ka tic ki libira, i ngeye nen ni ibolo jami magi ka mabor ma pe twero wano iye dano.
◼ War: Mwaka ki mwaka awano mapol timme ma lubbe ki war. Ber iyer war mupore, ma romo tyeni ma weko iwoto i citep nyo ikalo bur labongo ayela.
◼ Jami ma Ngwecgi Kur: Gure madito mogo oromo timme ki i ot ma doggi kiloro woko. Pi meno, bedo ki mar bimiyo pe watiyo ki moo nyo pafium ma ngwece tek tutwal ma twero kelo peko bot jo ma tye ki two ma mako ot yweyo ki mukene ma pe mito ngwec piny ma oculle liking.—1 Kor. 10:24.
◼ Fom me Lubu: Omyero wati ki fom me Please Follow Up (S-43) me miyo ngec i kom ngat mo ma onyutu miti i kare ma nongo watye ka miyo caden ma pe wayubbe pire i kare me gure. Lutit kwena myero gubin ki fom man acel nyo aryo i ka gure madit. Ka ipongo fom man ci iromo miyone bot Jo ma Gwoko Bukke nyo bot karan me kacokkewu ka idok gang.—Nen Ticwa Me Ker me Mai 2011, pot karatac 3.
◼ Kabedo me Cam: Ket deyo i kom nying Jehovah ki bedo ki kit maber i kabedo me cam.
◼ Kabedo me Buto:
(1) Pe iwek kigwok ot buto mapol ma pe ibiromo tic kwedgi ducu, dok pe iwek wel dano okat wel ma mitte me buto i ot moni.
(2) Gwokke pe me kwero ot buto ma onongo kigwoki nikwanyo ka peko mo obino atura, ci mi ngecce bot wegi ot labongo galle.—Mat. 5:37.
(3) Bed ki ngec ni ka ce ibitic ki credit card ka itye ka culo pi otel, tye macalo cik ni wegi otel “gibigwoko” credit card meno pi tic ki cente ma iye me culo pi jami ducu ma itiyo kwede, kacel ki jami mogo ma nongo oballe i kare ma ibedo i otel. Pe ibitic ki cente meno nio wa i nino ma ibia iye ka ityeko cul ducu me otel.
(4) Kwany lating ter pa wegi otel ka ce ibitiyo kwede keken, dok omyero idwok woko oyotoyot wek jo mukene bene guti kwede.
(5) Ted i ot ma kiye tedo iye keken.
(6) Bed ki kit ma cwiny maleng nyako ka itye ka lok ki jo ma gitiyo i kabedo ma ibuto iye. Gitye ka gwoko welle mapol dok gipwoyo ka ce wanyutu cwiny me kica, diyo cwiny, ki dong niang.
(9) Lunyodo myero gugwok lutinogi maber kare ducu ka gitye i kabedo mapatpat me otel calo ka kwang, ka namo, nyo ka rweyo kom-gu.
(10) Ka peko mo ocakke ki ka ma ibuto iye, nen ni iniango Jo ma Neno Lok kom Kabuto i gure wek inong kony mo.
◼ Jo ma Mito Mine me Tic: Ngatti mo keken ma mito mine myero ocit i Dipatmen ma Loyo Lok me Mine me Tic i kabedo me gure (Volunteer Service Department). Lutino ma pud pe gitye ki mwaka 16 giromo bene miyo kony kun nongo gitiyo kacel ki lunyodogi, ngat ma gwokogi nyo dano mo madit ma gin gucimo.
[Bok i pot karatac 6]
Wabipoko Karatac me Lwongo-ni Nining?
Me tyeko wang ticwa ducu, myero walok macek. Waromo wacci: “Irii maber. Watye ka nywako i tic ma kwako wi lobo ducu me poko karatac me lwongo man. Kopi ma megi en. Ibinongo ngec me lwongo man ki iye.” Lok ki mit kom. Ka itye ka nywako i poko karatac me lwongo i tum pa cabit, itwero bene miyo magajin ka ineno ni opore.