Ti Maber ki Bukkewa ma
Gijenge i Baibul
1, 2. Pol dano gineno bukkewa nining, dok man kelo lapeny ango?
1 “Abedo ka kwano bukkewu cakke wa i mwaka 1965. Atiyo ki Baibul ka atye ka kwanone, dok jami ducu ma tye i bukkewu rwatte ki lok ma i Baibul. An onongo amito ngeyo lok ada i kom Lubanga ki Yecu tutwal. Adada, dong atwero waco ni an atye ka nongo lagam me ada ki i bukkewu kacel ki Baibul.” Man aye obedo gin ma laco mo ocoyo bot gang kal madit pa Lucaden pa Jehovah. I waraga acel-lu, en bene openyo kony me kwano Baibul.
2 Dano milion mapol i wi lobo ducu gitye ka nyuto yomcwinygi pi bukke akwana me Baibul ma “lagwok ot ma lagen dok maryek” gicoyo, calo laco-ni. (Mat. 24:45) Mwaka ki mwaka, kicoyo bukke mapol me konyo jo ma cwinygi tye atir wek gunong ‘ngec me lok me ada.’ (1 Tem. 2:4) Wan waromo tic ki bukke me Baibul ma watye kwedgi i yo maber nining?
3. Yo ango ma watwero gengo kwede balo bukke abala?
3 Pe Ibal Abala: Oromo bedo ni pi kare mo, wanongo ni wacoko bukke mapol ma nongo bene pe watiyo kwedgi. Gin ango ma watwero timone wek pe waballu bukkewa ma pire tek-ki abala? Myero watiyu ki ryeko ka watye ka gamo bukke pi ticwa me pwony. Ma ka ka kwanyo bukke mapol me terogi bot dano, myero wakwany acel nyo aryo keken ka dok wadwog me gamo mukene ka maca-ni otum. Man biweko pe waduru bukke mapol i gangiwa. I yo acel-lu bene, ka watye ki magajin mapol ma pe wamiyogi bot dano, bedo ber ka wadwoko wel magajin ma wagamo piny.
4. Ngo ma kitwero timone kace kacokke moni ogwoko bukke mapol okato woko?
4 Gwoko Bukke Mapol dok Tutwal: Ka kacokke moni tye ki bukke mogo ma kigwokogi mapol dok okato woko, ci omego ma neno lok kom bukke oromo penyo kacokke mogo ma gitye cok cok kace giromo gamo bukke mukene ki botgi. Lutit kwena giromo tero bukke mukene murii ma gitye kwede bot wadigi ma pe gubedo jo muye, lutino kwan me Baibul, ki jo mukene-ni. Jo mogo ma nongo pud gudonyo i kacokke nyen bene guromo bedo ki miti me nongo bukke magi me akwanagi ki me agwoka i kin bukkegi me tiokraci.
5. Wan waromo nyuto pwoc pi bukkewa nining?
5 Wamito ni bukkewa omyero ocob gin ma kiyubbe pire, ma obedo konyo jo ma gitye ki miti me ngeyo lok ada i kom yub pa Jehovah. Kit macalo Yecu pe obalo ngidingidi cam ma odong abala i yo nge timo tango me pito dano mapol, wan bene omyero watiyu ki bukke me Baibul ma kimiyowa-ni maber. (Jon 6:11-13) Kwena me laro kwo pa dano ma tye i bukke magi pe romo gudo cwiny jo ma kitgi tye atir ka ce waweko gibedo i gangiwa nyo i kicaa me tingo bukkewa. Pi meno, omyero wabedu jo ma niang ka watye ka kwanyo bukke pi ticwa me pwony dok omyero wati kwedgi maber wek okony jo mukene bene.—Pil. 4:5.