Yub Manyen me Gure me Nino Acel

Ki teko pa cwiny maleng, Lukricitayo macon gutiyo ki mit kom me tito lok me kwena maber-ri i kabedo malac adada. (Tic 1:8; Kol. 1:23) Gure me nino acel me mwaka 2007, ma wi lokke tye ni, ‘Ti Matek i Tic me Tito Lok,’ bikonyowa me poro lanengi.—Tic 18:5.

Kabaka Daudi oloko i kom Lok pa Lubanga ni: “Gin ma Rwot [Jehovah] ociko tye me ada, miyo ryeko bot luming.” (Jab. 19:7) Pwony ma kiyubogi ki diro pi gure me nino acel pi mwaka 2007 binyuto kit ma Ginacoya pire tek kwede “me tiro kit pa dano,” dok bicuko cwinywa me tic ki Lok pa Lubanga i tito kwena kacel ki pwony kun nongo wiwa po ni kare dong odic woko. (2 Tem. 3:16, 17) Yub manyen man binyuto kit ma wan waromo gwokke kwede ki i owic ki kit ma waromo nongo kwede adwogi mabeco i tic ki cik me Baibul i kwowa me nino ducu. Bikonyowa bene me tic ki Lok pa Lubanga me konyo bulu kacel ki jo manyen me dongo i yo me cwiny.

Tutte matek me bino con ma nongo yub peya ocakke, dok iket cwinyi i winyo pwony ducu. Co jami ma pigi tego ma imito ni iti kwedgi i kwoni. Nyut pwocci pi pwony ma kipwonyo, dok itam i kom kit ma ibiketo kwede jami ma ipwonyo i tic.

Yub me gurewa me nino acel-li bimedo pwocwa i kom Lok pa Lubanga, bipoyo wiwa me medde anyim ki tito lok me kwena maber me Ker-ri ki mit kom, dok bene binyutiwa kit me konyo jo mukene wek gin bene gutim kumeno. Dong mok tammi pe me keng pwony me cwiny ma Jehovah miyowa i yo ma kit man!—Ic. 30:20b, 21.