Gure Madit me Distrik pa Lucaden pa Jehovah pi Mwaka 2008
1. (a) Pingo lok pa Paulo me cuko cwiny Lukricitayo ma gubedo Luibru-ni rwatte tutwalle i kare-ni? (Kwan Jo Ibru 10:24, 25.) (b) Kare ango ma tye ka bino ma bimiyo waketo lok pa Paulo-ni i tic?
1 Lakwena Paulo ocuko cwiny Lukricitayo ma gubedo Luibru me gure kacel ki dok me cuko cwiny luwotgi “makatone kit macalo” onongo gineno nino maca tye ka nyiko cok-ki. (Ibru 10:24, 25) Lanyut ma nyutu ni “nino” ma Paulo oloko pire-ni tye cok tutwal ma tye ka medde ameda! Pi meno, watye ka kuro kare me gure kacel ki utmego ki lumegiwa pi nongo pwony me cwiny ma tirowa i “kare me agikki” man ma tye ka doko rac medde ameda-ni. (2 Tem. 3:1) Kare man bibedo i gure me distrik ma tye ka bino i mwaka 2008.
2. (a) Pingo pire tek me bedo tye i gure madit pi nino adek-ki ducu? (b) Omyero wacak yubbe me bedo tye iye nining?
2 Bed Tye i Nino Adek-ki Ducu: Wacuko cwinyi me bedo tye pi nino adek-ki ducu. Ka “pe waweko cokke kacel,” ci pe wabikeng cam me cwiny man. (Ibru 10:25) Cak yubbe woko con ka twere. Peny ladit ticci con wek en oket yub ma mitte me neno ni tic omedde anyim. Ka ce kare me gure bibedo i kare ma nongo lutinoni gitye i gang kwan, ci niang lupwonyegi pi yub ma itye kwede. Wek gunge ni gure obedo but worowa ma bedo kare ki kare. Bed ki gen ni Jehovah bigoyo laane i yelleni me keto pi Ker-ri bedo mukwongo.—Mat. 6:33.
3. I yo ango ma wan watwero nyutune ni watamo pi jo mukene?
3 Kony Jo Mukene me Bedo Tye: Paulo bene okok bot omegine me ‘tamo pi luwotgi.’ (Ibru 10:24) Mono tye omego ki lumego mogo i Cokkewu me Kwano Buk ma gimito kony pi cito i gure madit-ti? Tika itwero konyo lutino kwanni me Baibul wek gubed tye kwedi i gure madit-ti, kadi bed gitwero bedo pi nino acel keken? Ka itye ka tito pi yubbi me cito i gure madit-ti bot jo me otwu ma pe gubedo jo muye, penygi me wot kwedi. Tuteni me mar-ri romo kelo mot ma nongo pe iyubbe pire.
4. Waromo nongo ngec ma mako nino dwe kacel ki kabedo me gure madit me distrik nining?
4 Nongo Ngec: Mwaka ki mwaka, jang gang kal gigamo cim mapol ma kigoyo pi penyo nino dwe kacel ki kabedo me gure madito. Cim magi polle a ki bot omego ki lumego ma nongo dong gitye ki ngec me yub man.
5. Omyero watim ngo ka wamito nongo ngec ma dok i kom gure mapatte ki ma kicimo pi kacokkewa?
5 Ka ce imito cito i gure mapatte ki ma kicimo pi kacokkewu, ci iromo coyo waraga bot jo ma doro gure meno pi penyo lok i kom kabuto kun itiyo ki adrec ma tye i nge fom me Special Needs Room Request me kare meno. Fom magi kibicwalogi bot karan me kacokke cokcok-ki. Omyero inen ni iketo i waragani-ni, baaca ma nongo icoyo iye canduk nambani dok ityeko mwono iye citam woko wek obed yot bot jo ma gibidoro gure meno me dwoko wang waragani.
6. Lok mogo me poyo wic ango ma tye ma dok i kom fom me Special Needs Room Request?
6 Jo ma Mito Akonya: Ka latit kwena mo openyo pi kony me nongo kabuto, ci Komitti ma Neno Wi Tic i Kacokke omyero gunen ka ce pore me miyo latit kwena meno fom me Special Needs Room Request. Ma nongo peya karan me kacokke ocwalo fom man bot Jo ma Neno lok me Kabuto, omyero en kong onen tam ma tye i fom man ki ma tye i waraga ma kicoyo bot luelda i Decemba 14, 2007.
7. Watwero lubu yub ma kiketo pi nongo kabuto nining? (Nen bok me “Lok ma Mako Nongo Kabuto.”)
7 Nongo Kabuto i Otel: Ka imito nongo kabuto i otel mo kun imito ni Dipatmen ma loyo lok kom Kabuto gukonyi ki nongo otel maber i boma ma gure bibedo iye, ci tim ber ico waraga bot jo man con. Nyut wel cente ma ibiculone pi ngat acel acel pi nino acel acel. Dok inyut ka ce imito otel ma miyo kabuto ki cam ducu, kabuto ki angica keken, nyo kabuto keken.
8. (a) Wan watwero kelo deyo i kom Jehovah nining ka watye i gure madit? (b) Luloc me otel guloko ningo pi kit maber ma omegiwa ginyutu?
8 Tic Mabeco: Lubu cik pa Jehovah me gure kacel pi miyo woro konyowa me ‘nongo adwogi maber.’ Ma dong pire tek loyo aye ni, miniwa kare me keto deyo i kom nying Jehovah. (Ic. 48:17) Ticwa “maber bene nen woko ka maleng” bot jo mapol i ka gure madit me distrik, dok man omiyo jo mukene guwaco tamgi iye. (1 Tem. 5:25) I boma mo acel ma gurewa dong obedo iye pi mwaki mapol, ladit me otel mo owacci: “Dano mapol ma i boma man giloko i kom Lucaden pa Jehovah ki kit ma gurewu pire tek kwede botwa. Wangeyo kit ma jowu giyubo kwede kabedo pa lwak calo bar odilo me bedo maleng, ki dok ka gwoko giwotgi-gu. Cwinywa yom me bedo kwedwu. Wageno ni pud wabimedde ki bedo ki wat maber i kare me anyim.” I yo nge tito peko ma gin gunongo ki bot gurup mukene ki lugal wang-gu, ladit me otel mo oloko pi cwiny me ribbe kacel ki diyo cwiny ma omegiwa gunyutu i kare ma gubedo i otelgi. En owacci, “Ka onongo welewa ducu gibedo calo Lucaden pa Jehovah kono ber!” Kit pa utmegiwa ma okelo lok maber magi ki mukene mapol yomo cwiny Lubangawa, Jehovah!
9. Matayo 4:4 nyutu ni pire tek me keto cwinywa i winyo pwony ducu ki acel acel nining?
9 Yecu owaco ni kwowa jenge i winyo “lok ducu ma a ki i dog [Jehovah].” (Mat. 4:4) I gurewa madito ma bedo mwaka ki mwaka, Jehovah miniwa cam me cwiny ma “lagwok ot ma lagen dok maryek” miyo “i kare ma mitte” kikome. (Mat. 24:45) Kitimo tic mapol me yubo ki dok miyo cam me cwiny man. Pi meno, wanyutu pwocwa pi gwok pa Jehovah me mar ki bedo tye ki dok keto cwinywa me winyo pwony ducu ki acel acel.
[Box on page 3]
Yub ma Mako Cawa:
Ceng Abic ki Ceng Abicel
3:20 me odiko - 10:55 me otyeno.
Ceng Cabit
3:20 me odiko - 10:00 me otyeno.
[Box on page 4]
Lok ma Mako Nongo Kabuto:
◼ Pe igo cim pi kabuto ma nongo peya Cokke me Ticwa me cabit ma bicakke i Januari 7, 2008 okato.
◼ Ka ce twere, peny pi kabuto i otel i dwe me Januari. Pe ipeny kun itiyo ki Intanet, kit macalo wan pe watiyo ki yo meno-ni.
◼ Bed i otel ma Kicoyo Nyinggi-ni keken.
◼ Pe iye wel ma kato ma kinyutu i karatac ca.
◼ Ot buto acel acel ma kigwoko omyero obed i nying ngat ma bibuto iye.
◼ Pi lubu cik ma mako lok kom wang pa ot, dano mapol makato wel jo madongo ma mitte pe myero obut i ot acel, kit ma kinyutu kwede i karatac ca.
◼ Pe ilok tammi i kom ot buto ma ipenyo pire.—Mat. 5:37.
◼ Pe igo cim me penyo wegi otel ma nyinggi pe i karatac ca pi niang ka ce gudwoko welgi pi jo me gurewa.
◼ Ka dong pe inongo kabuto i yo nge penyo wegi otel DUCU ma nyingi tye i karatac-ci nyo itye ki peko mo ki otel mo i kingi-ni, ci niang karan me kacokkewu. En omyero oniang Dipatmen me Kabuto kun tiyo ki namba cim nyo adrec ma tye ka wi nying otel ma kicoyogi-ni.
◼ Ka dong pe imito ot ma ipenyo pigi-ni, ci niang wegine con. Ibinongo namba ma nyutu ni kityeko ngolo nyingi woko.
Yo me Akwanya pi Nongo Kabuto i Otel:
1. Go cim bot wegi otel i cawa me tic kun itiyo ki namba cim ma kiketo i karatac-ci wek kidwok boti wel.
2. Niang wegi otel ni in ibibedo i gure pa Lucaden pa Jehovah.
3. Tit nino dwe ma ibicito iye ki dok ma ibia iye ki i otel meno.
4. Ka ce ot odoko pe i otel moni, peny wegi otel mukene ma nyinggi tye i karatac-ci.
5. Peny pi ot ma imito, ci ipeny bene pi namba ma moko ni kityeko gwoko mo.
6. Cul nucu pa centeni kun itiyo ki check, nyo money order me cwalo cente, ma nongo odong kine nino apar. Pe icwal kom cente. Ka icwalo nucu centeni ki check nyo money order me cwalo cente, co namba ma moko pi gwoko ot-ti i kome.