Gure Madit me Distrik pa Lucaden pa Jehovah me Mwaka 2006 ma Wi Lokke Tye ni “Larre Dong Tye Cok”
1. Jo pa Lubanga ma i kare macon gunyuto pwocgi pi woro me ada nining, dok wan kono watye ki kare me timo ngo i kare-ni?
1 Kabaka Kejekia me lobo Juda yam con ooro lukwena me tero waraga me lwongo bot dano me bino i gure i Jerucalem. (2 Tekwaro 30:6, 13) Kit ma dano gutero kwede lwongo man onyuto cwiny ma onongo gitye kwede pi woro me ada. (2 Tekwaro 30:10-12) I dwe manok ma tye anyim, lutic pa Jehovah me kare-ni bene gibibedo ki kare macalo meno me nyuto pwocgi pi mot me gure kacel i woro Jehovah. Dong kityeko cwalo waraga bot kacokkewu me lwongowu me bino i Gure Madit me Distrik ma wi lokke tye ni “Larre Dong Tye Cok.” In ibitero lwongo man nining?
2. Ngo ma watwero timone i kare-ni wek wanong ber pa yub me gure madit-ti?
2 Cak Yubo Yub i Kare-ni: Wek wanong ber pa yub man me cwiny ma kitye ka yubone-ni, omyero komwa obed tye pi kare meno ducu. Pi meno, cak yubo yub i kare-ni wek in kacel ki jo me odi wubed kunnu pi nino adek-ki ducu. (Car. 21:5) Yub man oromo bedo penyo ladit ticci me mini kare, nyo penyo luoti ka ce en pe obedo Lacaden, yubo yub i kom kabuto, ki dong nyo konyo lutino kwanni me Baibul wek gin bene gubed tye i nino-ni ducu. Pe ikur ma nongo dong kare odic woko. Leg Jehovah kun igeno ni “en bikonyi.”—Jab. 37:5.
3. Pingo omyero walub yub ma nongo kiketo madok i kom kabuto?
3 Dul pa Jehovah oketo tek me neno ni yub me kabuto obedo muromo i boma ma gure madito bibedo iye. Me nyuto ni watye ki pwoc pi tic matek ma omegiwa gitimo me yubo kabedo magi, ki pi wele luwotwa ma nongo gibino i gure man calo wan, ki dok pi woro yub me tiokraci, omyero walub tam ma kimiyo i pwony man i yo ducu.—1 Kor. 13:5; 1 Tec. 5:12, 13; Ibru 13:17.
4-6. Lok ma pigi tego ango ma myero wiwa opo iye ka ce wamito ni kigwok botwa kabuto i otel, dok pingo?
4 Nongo Kabuto i Otel: Ka ce imito buto i otel, ci Jo ma Neno lok kom kabuto gitwero konyi me nongo otel mo maber ma tye i boma ma gure madit bibedo iye-ni. Tim ber ico waraga con bot Jo ma Neno lok kom kabuto kun inyuto wel cente ma itwero culone pi ngat acel acel i nino ducu. Ka ilubo tam man ci biweko kinongo otel mo ma wele ber ma tye cok ki ka ma gure madit bibedo iye-ni.—1 Kor. 14:40.
5 Pire tek ni omyero iwek kigwok ot buto ma ibiromo tic kwedgi ducu i kare me gure man. Pe wabimito ni wegi otel gugwok ot pi wele me gure madit kun nongo pe kibitic kwede. Omyero kigwok ot ki nying ngat moni ma nongo bibuto iye-ni.
6 Wek kigwok ot mo piri, oromo bedo ni omyero kong icul nucu cente mo pire. Ka pe ci wegi otel guromo miyo kabutoni-ni bot ngat mukene. Ka ce nucu cente mo bimitte, ci Jo ma Neno lok kom kabuto gibiwacci.
7, 8. Waromo miyo kony bot jo ma mito akonya nining?
7 Jo ma Mito Akonya: Carolok 3:27 waco ni: “Pe ikwer tiyo gin maber bot dano ma mito ni ikonye, ma nongo itye ki twero me tiyone.” In itwero tiyo gin maber bot jo mukene nining ma lubbe ki gure madit-ti? Lutit kwena ma dong guti, lugoro, jo ma gitye macalo lutit kwena pi cawa malac, kacel ki jo mukene guromo mito kony i lok ma dok i kom kit me wot nyo kabuto. Wadi pa jo ma kit magi aye omyero gunge ni tic ma dit me gwoko kodi joni tye i wigi. (1 Tem. 5:4) Ento ka pe gitwero timo man, ci jo muye mukene-ni giromo miyo kony. (Gal. 6:10) Jo ma gineno wi Cokke me kwano buk omyero guniang i kom jo ma mito kony ki i cokkegi wek guyub yub pigi con ma nongo nino me gure madit peya oromo.
8 Fom me Special Needs Room Request tye pi lutit kwena ma wadigi nyo jo ma i kacokkegi pe twero konyogi keken. Komitti ma Neno wi Tic i kacokke omyero gunen ka ce latit kwena moni pore me nongone kun nongo gitiyo ki tam ma kimiyo i fom man. Yub man tye pi lutit kwena ma lok mo marac pe i komgi kacel ki lutinogi ma gitye ki kit mabeco keken.
9. (a) Pingo omyero wacit i gure madit i kabedo ma kicimo pi kacokkewa? (b) Ngo ma omyero itim, ka gwok pi tyen lok mo oweko ibicito i gure madit mukene?
9 Cito i Gure Madit i Kabedo Mukene: Kicuko cwinywa me cito i gure madit i kabedo ma nongo kicimo ni kacokkewa myero ocit iye wek kabedo, bukke, kabuto, ki jami mukene mapol ata, pe orem dano. Ka gwok pi tyen lok mo oweko ibicito i gure madit i kabedo mukene, ci tim ber ilok bot karan me kacokkewu wek en omini namba me canduk posta me kagurre madit ma ibicito iye-ni.
10. Yo acel ango ma wan waromo weko gure madit ma tye ka bino-ni bedo me yomcwiny?
10 Mine me Tic: Ngene kene ni jo ducu ma gibibedo i gure madit gibinongo adwogi maber ma a ki i cam me cwiny ki rwatte ki lurem-gu, dok bene gibibedo ki yomcwiny madit tutwal. Wabibedo ki yomcwiny madit ka ce wamine me miyo kony me timo tic mogo ma mito atima me wek gure man owot mapwot. (Tic 20:35) Komitti ma Neno wi Gure Madit gibicako lego dano me miyo kony i tic man. In ibimine me timo man?—Jab. 110:3.
11. Ngo ma in imaro ki i gure madit me distrik ma bedo mwaka ki mwaka, dok omyero imok tammi me timo ngo?
11 I kare mo ma awobi mo onongo tye i gure madit me distrik, en owacci: “Gure madit me distrik aye obedo yo me woro Jehovah ma pud dong amaro loyo.” Lok meno konyowa me niang kit ma wan bene wamaro kwede bedo tye i gurewa madito me distrik ma bedo mwaka ki mwaka. Adada, bedo calo kit ma laco Jabuli owero kwede ni: “Bedo i dyekalli pi nino acel keken ber kato bedo ka mukene pi nino alip.” (Jab. 84:10) Daudi onyuto mitine me ‘bedo i ot pa Jehovah pi kare me kwone ducu wek emi pwocce pi ot pa Jehovah’ ki wer. (Jab. 27:4) Bedo i kin jo ma woro Jehovah onongo yomo cwiny Daudi tutwal. Wan bene omyero wanyut miti madit i kom woro me ada ki bedo tye i Gure Madit me Distrik ma wi lokke tye ni “Larre Dong Tye Cok” pi nino adek-ki ducu.
[Bok i pot karatac 3]
Yub ma Mako Cawa
Ceng Abic ki Abicel
3:30 me odiko - 11:05 me otyeno
Ceng Cabit
3:30 me odiko - 10:10 me otyeno