Gure Madit me Distrik pa Lucaden pa Jehovah pi Mwaka 2007 ma Wi Lokke Tye ni “Lub Kor Kricito!”
1, 2. (a) Moses ocuko cwiny jo Icrael me nongo ber ki i gure kacel nining? (b) Yubbe ango ma myero dong wacak woko i kare-ni?
1 Moses omiyo cik bot jo Icrael ducu kacel ki jo ma gubino abina me bedo i kingi me gure kacel inge mwaka abiro abiro wek kikwan Cik botgi. Pi tyen lok ango? “Wek guwiny ci gupwony.” (Nwo. 31:10-12) Jehovah oneno ni mitte ni omyero jone gugure kacel i wel madwong. Cok cok-ki, jo pa Jehovah dok gibibedo ki yub me nino adek me Gure Madit me Distrik ma wi lokke tye ni “Lub Kor Kricito!”
2 In dong mono icako yubbe pire? Nyo mitte ni omyero ipeny ladit ticci wek omini kare? Mono itwero konyo lutino kwanni me Baibul nyo jo me otwu ma pe gubedo jo muye me bedo i gure man kwedi? Nyo tye jo mogo i kacokkewu ma gimito kony wek gubed tye iye bene? Gwok nyo itye ki yub me cito i gure mapat ki ma kacokkeni bicito iye? Nyo ibimito ni kinongi kabuto? Ngec ma tye piny-nyi bikonyi me yubbe maber.
3. (a) Icaya 25:6 tye ka cobbe nining i kare-ni? (b) Ngo ma otyeko nen madok i kom wel dano, i gure me Ceng Abic, dok wan ki acel acel omyero watim ngo?
3 Bed Tye i Nino Adek-ki Ducu: Jehovah miyo cam me cwiny muromo pi jone. (Ic. 25:6) Man kwako wa cam me cwiny ma wanongo ki i gure madito ma bedo mwaka ki mwaka. Otyeko nen ni wel dano ma bedo tye i Ceng Abic bedo manok loyo me nino mukene-ni. Wek obed yubbi me bedo tye pi nino adek ducu me gure ma dul pa Jehovah oyubo piwa! Ka imito lego ladit ticci wek omini kare pi yub man, ket pire i lega. Dong ka teke kitito pi nino dwe me gure man nitap, lok bot ladit ticci ki ‘tekcwiny.’ (1 Tec. 2:2; Nek. 2:4, 5) Bedo ber ka itito bote ni gurewu ma bedo mwaka ki mwaka-ni obedo yo acel me woroni. Timo man con bot ladit ticci bimiye kare me keto yub wek tic omedde, man bimiyo en mini kare.
4. Wan watwero konyo jo me pacowa ma pe gubedo jo muye nyo lutino kwanwa me Baibul wek gubed tye i gure madit nining?
4 Yubo Lutino Kwanni me Baibul ki Luodi: Bibedo twon yomcwiny madit tutwal ka lutino kwanni me Baibul gubedo tye kacel kwedi i gure madit man kun gineno mar ma omego ki lumego ma gubedo Lukricitayo ginyuto i kingi “i dye lwak madwong ma gucokke kacel,” pi tyengi me acel! (Jab. 22:25) Nianggi con wek ominigi kare me yubbe me bedo tye i yub man. Tit botgi tyen lok mumiyo in imaro bedo i gure madito magi. Iromo cako yubo lutino kwanni ki nyuto kong vidio ma nyuto gure mogo ma gukato angec, tutwalle vidio calo United by Divine Teaching ka ce tye. Ka ma vidio man pe nonge iye, nyut botgi jami ma tye i brocuwa me Jehovah’s Witnesses—Unitedly Doing God’s Will Worldwide i pot karatac 18. Wek jo me pacowu ma pe gubedo jo muye bene gunge pi yubbi man. Gwok nyo gin bene giromo yubbe me neno tuko goga nyo bedo kacel kwedi i nino acel mo me gure man olo.
5, 6. (a) Wan waromo nyuto kodi cwiny ma kiloko pire i 1 Temceo 6:18 nining? (b) Yub ango ma tye me konyo jo mogo ma nongo kare mukene gimito kony me nongo kabuto?
5 Konyo Utmegiwa ki Lumegiwa: Lakwena Paulo omiyo tam bot Lukricitayo ma onongo gitye ki lonyo i yo me jami me kom ni “myero guti tic mabeco, gubed lulonyo i timo ber bot dano, i poko jami.” (1 Tem. 6:17, 18) Wan bene watwero nyuto kodi cwiny ma Paulo oloko pire-ni ka wabedo ka tamo pi jo muti, lugoro, jo ma gumiyo kwogi macalo lutic me tito kwena keken, jo me paco ma gitye ki lanyodo acel keken, nyo jo mukene me kacokke ma nongo guromo mito kony wek gucit i gure. Konyo jo ma kit magi, me acel obedo tic pa wadigi ma gitye i niye, ento luelda ki jo mukene-ni bene omyero gunyut niango i konyo jo magi ka ce mitte.—Gal. 6:10; 1 Tem. 5:4.
6 Ka ngat mo ki i kacokke mito kony me nongo kabuto, ci Komitti ma Neno Wi Tic i Kacokke omyero gunen ka ce latit kwena meno pore me miyo fom me Special Needs Room Request.
7. Ngec ango ma kimiyo pi jo ma gimito cito i gure mapat ki ma kicimo pi kacokke-gi?
7 Cito i Gure Madit Mukene: Kibiryeyo nying kabedo ma gure madito bibedo iye i East Africa i Ticwa Me Ker me Febuari 2007. Ka imito nongo ngec mukene madok i kom gure mapat ki ma kacokkeni bicito iye, ci itwero coyo waraga bot jo ma gibidoro gure meno kun nongo itiyo ki bok namba ma karan me kacokkewu binongone i nge fom me Special Needs Room Request me kare meno. Omyero inen ni iketo i waragani-ni, baaca ma nongo icoyo iye canduk nambani dok ityeko mwono iye citam woko wek obed yot bot jo ma gibidoro gure meno me dwoko wang waragani.
8. Yo ango ma omyero wakwany ka wamito ni wanong kabuto i otel?
8 Nongo Kabuto i Otel: Ka imito nongo kabuto i otel mo kun imito ni Dipatmen ma loyo lok kom Kabuto gukonyi ki nongo otel maber i boma ma gure bibedo iye, ci tim ber ico waraga bot jo man con. Nyut wel cente ma ibiculone pi ngat acel acel pi nino acel acel. Dok inyut ka ce imito otel ma miyo kabuto ki cam ducu, kabuto ki angica keken, nyo kabuto keken.
9, 10. (a) Yubbe ango ma nongo kibedo ka timone piwa ma nongo peya wao i kabedo me gure madit? (b) Watwero nyuto pwocwa nining pi tic mabeco mapol ma nongo kitimo piwa? (Kwan Jo Ibru 13:17.)
9 Lub Yub Ducu ma Kiketo: Ka dong wao i kabedo me gure madit kikome, wabinongo ni kitimo tic matek me yubbe pi binowa. Omego ma lumar ma nongo gitiyo macalo lujol wele gibimotowa, giminiwa karatac me yub, dok gikonyowa me nongo kabedo. Omego ki lumego nongo guyubo kabedo man me bedo maleng ki dok deyo wi abam-gu. Tic mukene ma pigi tego me yubo pwony, penyo wegi otel-gi, ki mukene mapat pat bene nongo otimme.
10 Dano mapol nongo gubedo ka tic matek pi dwe mapol me yubo yub ducu ma mitte pi gure acel acel, dok jo me odigi bene nongo guminigi kare muromo me tic pi yub man ma pire tek-ki. Wan tika wabinyuto pwoc pi tic me dyere ducu ma nongo kitimo piwa? Watwero nyuto pwocwa ki lubo cik ducu ma kicoyogi kany kacel ki mukene ma wabinongogi ma nongo peya wacito i gure madit. (Ibru 13:17) Cwiny me mine ken ma ngat acel acel tye kwede biweko jami ducu ‘timme maber dok woto kore ki kore.’—1 Kor. 14:40.
11. (a) Pingo cokke pa jo pa Jehovah kacel obedo gin ma pire tek tutwal i karewa-ni? (b) Ngo ma wan ki acel acel watwero timone kombeddi?
11 Kit macalo ‘waneno nino maca dong tye ka nyiko cok-ki,’ cokke pa jo pa Lubanga kacel obedo gin ma pire tek atika. (Ibru 10:25) I gure madito pa Lukricitayo, lagwok ot ma lagen miniwa ngec ma konyowa me ‘gwokke me lubo lok ducu me cik’ ma Jehovah mito ni walubi. (Nwo. 31:12) Cak goyo pulan kombeddi me bedo tye pi nino adek ducu me Gure Madit me Distrik ma wi lokke bibedo ni “Lub Kor Kricito!” wek inong mit pa cam me cwiny man!
[Box on page 3]
Yub ma Mako Cawa
Ceng Abic ki Ceng Abicel
3:20 me odiko - 11:05 me otyeno.
Ceng Cabit
3:20 me odiko - 10:10 me otyeno.