Gure Madit me Distrik pa Lucaden pa Jehovah pi Mwaka 2009
1. (a) Mot ango ma wabinongone ka ce wabedo tye i nino adek ducu i yub me gure madit me distrik? (b) Pulan ango ma myero wago kombeddi?
1 Wan ducu watye ka kuro yub me gure madit me distrik pi mwaka 2009 ki dok kare mukene manyen me ribbe kacel ki lupak Jehovah ma gin gubedo “lucan i lok me cwiny.” (Mat. 5:3) Kit macalo nino pa Jehovah tye ka bino oyotoyot-ti, walego jo ducu me bedo tye i yub me nino adek man ducu wek gunong ber pa ribbe kacel ki Lukricitayo luwotgi kacel ki cuko cwiny me cung matek i niye. (Jep. 1:14) Wek lupwonye ki ludito me dog tic gunge ni gure madit obedo but woroni ma pire tek mada. Go pulan-ni ki tekcwiny con kun itute me nongo laa pa Jehovah i kom yubbi; itwero bedo ki gen ni en bikonyo kori.—Ic. 50:10.
2. Kadi bed pe kilwongowa me cito i gure ma kwako lobe mapol-li ento ngo ma oromo timme i gure mogo?
2 Gure ma Kwako Lobe Mapol: Kit macalo gure magi bitimme i lobe kacel ki boma mogo manok-ki, jo ma kilwongogi keken aye myero gucit iye. Bedo ki winy i cik man ma kimiyo-ni bikonyo wek dano pe opong mukato kare woko. (1 Kor. 14:40; Ibru 13:17) Tye kono gire ni gure madito me distrik mapol bibedo bene calo gure ma kwako lobe mapol-li, kit macalo lumiconari, lubetel ki jo ma gitye ka miyo kony i lobe mukene mapol bene gibicito i gure man i lobegi.
3. Wan waromo nyutu cwiny me mar nining bot jo mogo i kacokkewa?
3 Konyo Jo Mukene me Cito Iye: Tye mono jo mogo i kacokkewu ma gimito kony me cito i gure? Ka ikonyo jo mukene me cito iye, ci nongo ‘pe itamo pi gin ma konyi keken, ento nongo itamo pi gin ma konyo jo mukene bene.’—Pil. 2:4.
4, 5. Omyero watim ngo ka wamito cito i gure mapatte ki ma kicimo pi kacokkewa?
4 Nongo Ngec: Me dwoko wel cim ma kigoyo i jang gang kal piny pi penyo nino dwe kacel ki kabedo me gure madito, tim ber ingii Watchtower me Marci 1, 2009, Ticwa Me Ker me Febuari 2009, nyo peny karan me kacokkewu pi ngec ma imito nongone.
5 Ka ce ibicito i gure mapatte ki ma kicimo pi kacokkewu, ci iromo coyo waraga bot jo ma doro gure meno pi penyo lok i kom kabuto kun itiyo ki adrec ma tye i nge fom me Special Needs Room Request me kare meno. Fom magi kibicwalogi bot karan me kacokke cokcok-ki. Omyero inen ni iketo i waragani-ni baaca ma nongo icoyo iye canduk nambani dok imwono iye citam wek obed yot bot jo ma gibidoro gure meno me dwoko wang waragani.
6. Yo ango ma myero kikwany ka latit kwena mo mito nongo kony pi kabuto?
6 Jo ma Mito Akonya: Ka latit kwena mo openyo pi kony me nongo kabuto, ci Komitti ma Neno Wi Tic i Kacokke omyero gunen ka ce pore me miyo latit kwena meno fom me Special Needs Room Request. Ma nongo peya karan me kacokke ocwalo fom man bot Jo ma Neno Lok me Kabuto, omyero kong gunen tam ma tye i fom man ki waraga ma kicoyo bot luelda i Decemba 14, 2008.
7. Yo ango ma myero wakwany ka wamito nongo kabuto i otel?
7 Nongo Kabuto Piri: Ka imito nongo kony ki bot Jo ma Neno Lok me Kabuto pi nongo kabuto i Otel, ci tim ber ico waraga con bot dipatmen man. Nyut wel cente ma itwero culone pi ngat acel acel pi nino acel acel, ka ce imito otel ma miyo kabuto ki cam ducu, kabuto ki angica keken, nyo kabuto keken.
8. I yo ma nining ma watwero tic kwede kacel ki Jo ma Neno Lok me Kabuto?
8 Tim ber pe ipeny pi kabuto ma pe ibitiyo kwede nyo ikwer tic ki kabuto ma ipenyo pire ma nino nongo dong cok romo pi tic ki otel mukene. Ka ilubu yub ma kiketo, ci ibikonyo dano ducu me nongo kabuto i wel mupore.—1 Kor. 10:24.
9. Gin ango ma pire tek ma myero watam pire ka watye ka yubbe me cito i gure madit me distrik pi mwaka 2009?
9 Tic ma Keto Deyo i kom Lubanga: Ka wanyutu kit ma nyak pi cwiny maleng i jami ducu ma watimo, kun wangiyo kitwa ki kit ma watero kwede lutic me otel ki jo mukene ma gitye i boma nyo taun me gure madit, ci man konyo me medo nying maber ma jo pa Jehovah tye kwede kun pe wadoko ariya bot jo mukene. (1 Kor. 10:31; 2 Kor. 6:3, 4) Walego ni bedo tyeni kacel ki kiti okel deyo i kom Lubanga i yo magi i gure madit me distrik pi mwaka 2009!—1 Pet. 2:12.
[Box on page 5]
Yub ma Mako Cawa:
Ceng angwen (Gure ma Kwako Lobe Mapol Keken)
7:20 me otyeno – 10:55 me otyeno
Ceng Abic ki Ceng Abicel
3:20 me odiko – 10:55 me otyeno
Ceng Cabit
3:20 me odiko - 10:00 me otyeno
Yo me Akwanya pi Nongo Kabuto i Otel:
1. Go cim bot wegi otel i cawa me tic kun itiyo ki namba cim ma kiketo i karatac-ci wek kidwok boti wel.
2. Niang wegi otel ni in ibibedo i gure pa Lucaden pa Jehovah.
3. Tit nino dwe ma ibicito iye ki dok ma ibia iye ki i otel meno.
4. Ka ce ot odoko pe i otel moni, peny wegi otel mukene ma nyinggi tye i karatac-ci.
5. Peny pi ot ma imito, ci ipeny bene pi namba ma moko ni kityeko gwoko mo.
6. Cul nucu pa centeni kun itiyo ki check, nyo money order me cwalo cente, ma nongo odong kine nino apar. Pe icwal kom cente. Ka icwalo nucu centeni ki check nyo money order me cwalo cente, co namba ma moko pi gwoko ot-ti i kome.
[Box on page 4]
Lok ma Mako Nongo Kabuto:
◼ Pe igo cim pi kabuto ma nongo peya Cokke me Ticwa me cabit ma bicakke i Januari 5, 2009 okato.
◼ Ka ce twere, peny pi kabuto i otel i dwe me Januari. Pe ipeny kun itiyo ki Intanet, kit macalo wan pe watiyo ki yo meno-ni.
◼ Bed i otel ma Kicoyo Nyinggi-ni keken.
◼ Pe iye wel ma kato ma kinyutu i karatac ca.
◼ Ot buto acel acel ma kigwoko omyero obed i nying ngat ma bibuto iye.
◼ Pi lubu cik ma mako lok kom wang pa ot, dano mapol makato wel jo madongo ma mitte pe myero obut i ot acel, kit ma kinyutu kwede i karatac ca.
◼ Pe ilok tammi i kom ot buto ma ipenyo pire.—Mat. 5:37.
◼ Pe igo cim me penyo wegi otel ma nyinggi pe i karatac ca pi niang ka ce gudwoko welgi pi jo me gurewa.
◼ Ka dong pe inongo kabuto i yo nge penyo wegi otel DUCU ma nyingi tye i karatac-ci nyo itye ki peko mo ki otel mo i kingi-ni, ci niang karan me kacokkewu. En omyero oniang Dipatmen me Kabuto kun tiyo ki namba cim nyo adrec ma tye ka wi nying otel ma kicoyogi-ni.
◼ Ka dong pe imito ot ma ipenyo pigi-ni, ci niang wegine con. Ibinongo namba ma nyutu ni kityeko ngolo nyingi woko.