Nino Adek me Cuko Cwiny

1. Gin ango ma watye ki gen me nongone ki i gurewa madit me distrik?

¹ I lobo man ma Catan aye loyo ma kec me cwiny tye ka neko dano matek tutwal-li, Jehovah tye ka medde ameda ki cuko cwiny luticce. (Ic. 58:11) Yo acel ma Jehovah tiyo kwede me medo kerowa aye gurewa madito me distrik ma bedo mwaka ki mwaka. Kit macalo gure me nino adek pi mwaka-ni dong tye cokcok-ki, yub ango ma watye ka ketone wek wanong ki dok wapok jami me cwiny?—Car. 21:5.

2. Kit yub ango ma mitte ni wacobi?

² Ka onongo peya icako yubbe, ci cak yubbe cut ki i dog ticci wek ibed tye pi nino adek ducu. In tika dong ingeyo cawa ma ibiterone me wot i kagure, me o con ki me nongo kabedo ma yub peya ocakke? Pe omyero wakeng cam me cwiny ma Jehovah oyubo piwa me jingowa! (Ic. 65:13, 14) Tika dong ityeko yubo ka ma ibibuto iye ki gin wot?

3. Tam ango ma twero konyowa kacel ki jo me odiwa me nongo adwogi maber loyo ki i yub man?

³ Gin ango ma bikonyi wek tammi pe obed ka wirre atata i kare me pwony? Ka twere, nong yweyo muromo i dyewor ducu i kare me gure. Ket tammi i kom lalok. Kwan ginacoya ducu ma kicimo. Co lok macego cego piny. Jo me odi myero gubed kacel wek lunyodo gukony lutinogi me keto cwinygi i yub. (Car. 29:15) Wuromo keto yub calo jo me ot me nyamo wiye wiye pwony ma kipwonyo i otyeno ducu. Me konyo jo me odi me nongo cuko cwiny kadi ka dong yub me gure madit otum, wuromo nongo cawa i otyeno me Woro pi Jo me Ot me nyamo ngec mogo ma jo me ot giromo tic kwede.

4. Watwero konyo jo ma i kacokkewa nining wek gin bene gunong cuko cwiny?

⁴ Kony Jo Mukene me Nongo Cuko Cwiny: Wamito ni jo mukene bene gunong cuko cwiny man. Mono tye lutit kwena mogo mutii ma gimito kony wek gibed tye i gure madit? Tika itye ki kero me konyogi? (1 Jon 3:17, 18) Luelda, tutwalle lunen wi gurup myero gunen ni gikonyo lutit kwena magi ki kony ma mitte.

5. Wabipoko karatac me lwongo pi gure madit man nining? (Nen bok ma tye i pot karatac man.)

⁵ Calo yam con, ma nongo pud odong cabit adek me cito i gure madit, wabibedo ki rwec me lwongo dano pi gure madit man. Kacokke myero guket yub me poko karatac me lwongo ma gunongo ducu dok myero gunen ni gutiyo i kabedo me wang ticgi ducu. Ento, ka jo me odi pud gitye ki karatac me lwongo i nge rwec man, wutim ber wukel karatac magi i ka gure. Kibitic kwede me lwongo jo ma wabimiyo caden botgi ma nongo pe wayubbe i boma me gure madit. Karatac me lwongo ma jo me odi pe gibitic kwede i taun ma gure tye ka timme iye omyero kimi bot lajol wele i kagure madit i Ceng Abic. Kit me tic ki karatac man me lwongo-ni kibinyutune i ka gure madit.

6. Waromo cuko cwiny dano ki nyutu ber kitwa nining?

⁶ Kit Mabeco Cuko Cwiny Dano: I kare ma nongo dano “bibedo ka maro komgi kengi” dok pe giparo kit ma dano mogo winyo kwede, pud dong kweyo cwinywa mada ka wabedo cok ki Lukricitayo luwotwa ma gitute me nyutu ber kitgi ya! (2 Tem. 3:2) Wanyutu ber kitwa ka wadonyo i kagure ki woro ka kiyabo doggola cawa 2:00 me odiko, dok ka wagwoko kabedo pi jo ma bedo i pacowa, jo ma wawoto kwedgi, ki lutino kwanwa me Baibul keken. Walubo lok pa wonkom me yub ka en okwayowa me bedo piny i kabedowa pi winyo wer ma kiketo i acakki me yub. Wanyutu ber kitwa ka waketo dwan cimwa piny i yo ma pe yelo dano. Wanyutu bene ber kitwa ka pe wabedo ka lok, cwalo lok ki cim, cam, nyo bedo ka wot atata i cawa ma nongo kitye ka miyo pwony.

7. Watwero nongo nyo konyo me cuko cwiny ka watye kacel ki utmego nining?

⁷ Ribbe ma Cuko Cwiny: Gure madit miniwa kare me ribbe kacel macalo Lukricitayo ki yomcwiny i kin omego ki lumege. (Jab. 133:1-3) Pingo pe in aye ikwany kare me ‘yabo cwinyi’ malac wek irwatte ki omego ki lumego mogo ma gua ki i kacokke mukene? (2 Kor. 6:13) Iromo ketone macalo yubbi me ngeyo dano acel manyen nyo ngeyo jo me odi manyen nino ducu. Cawa me yweyo me dyeceng obedo kare maber me timo meno. Pi man, kel cam me dyeceng mo manok wek wucam kacel ki jo ma gitye i kagure ma ka cito ka cam woko. Man obedo kare maber me moko lirem manyen.

8. Pingo myero wamine me timo tic i kagure madit, dok watwero timo man nining?

⁸ Watwero cuko cwinywa pud dong ya ka watiyo tic pa Lubanga kacel! Iromo mine me konyo tic i dipatmen mo nyo konyo kacokkeni ki gwoko lengo? (Jab. 110:3) Ka onongo peya imine me timo tic mo, tim ber ipeny Dipatmen ma Loyo Lok me Mine me Tic i kagure madit. Ka kitoro cing kacel weko tic bedo yot dok kelo yomcwiny.

9. Pingo myero wagwok kitwa ki kit ma wanen kwede i kare me gure madit?

⁹ Kitwa Cuko Cwiny Jo ma Ginenowa: Watye welle i gure madit pi nino adek-ki ducu, ento pe i kare me yub me gure keken. Jo ma ginenowa ka watye i boma me gure madit myero gunen apokapoka i kit ma wacuko kwede cwiny ka kiporo ki kit pa jo ma pe gin Lucaden. (1 Pet. 2:12) Rukwa ki kit ma wanen kwede i kagure madit, i kabedo me buto, ki i ka cam myero okel deyo bot Jehovah. (1 Tem. 2:9, 10) Ka waruko baj me gure, man bimiyo jo ma ginenowa giniang anga ma wan wabedo dok bimiyo botwa kare me tito pi gure madit ki miyo caden botgi.

10. Waromo timo ngo wek lutic me otel ki ka cam gubed ki miti i yub me gurewa madit?

¹⁰ Watwero cuko cwiny lutic me otel ki ka cam nining? Pe omyero wawek kigwok ot buto mapol ma pe wabitiyo kwedgi ducu pien meno bimiyo wele mukene pe ginongo ot buto dok miyo otel rwenyo cente. Ka wanongo ni lutic me otel gitye ki tic mapol i cawa ma nongo watye ka mito gin mo, bedo ber ka kong wanyuto kit me diyo cwiny ki kit me mwolo. (Kol. 4:6)

11. Gin mutimme ango ma omiyo caden ma nyutu ber kitwa macalo Lukricitayo?

¹¹ Tam maber ango ma ber kitwa kelo i wi jo mukene i kare me gure madit? Ma lubbe ki lok me karatac mo acel, ladit tic ma loyo kabedo mo ma yub me gure madit obedo iye owacci: “Man jo ma luworo. Wabedo ki yomcwiny me jologi kany mwaka ki mwaka.” I mwaka mukato-ni dano mo ma pe Lacaden orwenyo walet mere ki i otel ka ma welle ma gubino i gure madit gubedo iye. I kare ma kinongo walet meno ki jami ma iye ducu ladit tic ma loyo otel meno owaco bot rwod walet-ti ni: “Obedo ber mada ni Lucaden pa Jehovah gubino i yubgi me gure madit cok kenyo, gin aye gitye mapol i otel. Kono onongo pe kidwoko walet-ti.”

12. Kit macalo gure madit tye ka nyiko cok-ki, gin ango ma myero obed i tamwa dok pingo?

¹² Kare me yub me gure madit tye ka nyiko cok. Wek gure man obed me cuko cwiny, kitiyo matek dok kicwalo cawa mapol i yubone. Tute matek wek ibed tye pi nino adek-ki ducu, dok ibed atera kun ikuro jami mabeco ma Jehovah ki dulle guyubo piri. Wumok tamwu me cuko cwiny jo mukene ki kitwu mabeco, ribbe kacel ki yomcwiny, ki dong ticwu mabeco. Ci in kacel ki jo mukene wubibedo calo welo mo me mwaka mukato ma ocoyo ni, “Pe tye gin mo ma atwero poro kwede yengo ma an anongo!”

[Boro buk i pot karatac 4]

Calo yam con, ma nongo pud odong cabit adek me cito i gure madit wabibedo ki rwec me lwongo dano pi gure madit man

[Boro buk i pot karatac 6]

Rukwa ki kit ma wanen kwede i kagure madit, i kabedo me buto, ki i ka cam myero okel deyo bot Jehovah

[Boro buk i pot karatac 7]

Wumok tamwu me cuko cwiny jo mukene ki kitwu mabeco, ribbe kacel ki yomcwiny, ki dong ticwu mabeco

[Bok i pot karatac 4]

Lok Me Poyo Wic Pi Gure Madit Me Distrik Me 2011

◼ Cawa me Yub: Yub bicakke cawa 3:20 me odiko nino adek-ki ducu. Kibiyabo doggola cawa 2:00 kikome me odiko. Ka ce kimiyo ngec pi cako keto wer, omyero wabedu piny wek yub ocakke i yo me woro dok ki mwolo. Yub man bitum cawa 10:55 me otyeno i Ceng Abic ki Ceng Abicel ka dong cawa 9:40 me otyeno i Ceng Cabit.

◼ Ka Gwoko Giwot: Ka ma kigwoko iye giwot bibedo tye i kabedo me gure ducu labongo cul mo, dok kibimiyone ma lubbe ki ngat ma okwongo bino wi ati. Lugoro aye kibitamo pigi mukwongo.

◼ Gwoko Kabedo: Iromo gwoko kabedo pi jo ma wuwoto kwedgi i mutoka acel nyo jo ma wubedo kwedgi i paco acel, ki jo ma wutye ka kwano Baibul kwedgi. 1 Kor. 13:5.

◼ Cam me Dyeceng: Tim ber ibin ki cam me dyeceng me kaka weko kagurre me cito ka cam woko i kare me yweyo me dyeceng. Ber me tic ki gin me mako cam matidi ma kiromo ketone i te kom. Jami madongo me mako cam ki dong jami ma obedo gilac pe mitte i kabedo me gure madit.

◼ Miyo Mot: Watwero nyutu pwocwa pi yub me gure madit ki miyo motwa pi konyo tic ma mako wi lobo ducu ki i Ot me Kerwa nyo ki i gure madit. Mot ma kibimiyo i kare me gure me distrik kun kitiyo ki cheque, omyero kicogi i nying Dulwa ma ocone i te cik i lobowu.

◼ Two ki Awano ma Bino Atura: Ka two mo ocakke atura i kagurre madit, tim ber itit ki lajol wele mo ma tye cok kwedi, en bimiyo ngec meno cut ka ma Kimiyo iye Kony wek ngat ma tye ki ngec i miyo kony oyot onen lit pa twone dok omi kony. Ka ce mitte, ngat ma tye ki ngec me miyo kony-nyi bipenyo pi kony mukene.

◼ Yat: Ka ce itye ka mwonyo yat, tim ber iwot ki yat ma ibitic kwede muromo, kit macalo yat bibedo peke i kabedo me gure madit.

◼ War: Mwaka ki mwaka awano mapol timme ma lubbe ki war. Ber iyer war mupore, ma romo tyeni ma weko iwoto i citep nyo ikalo bur labongo ayela.

◼ Kom ma Kicoro Acora: Kom ma kicoro acora pe myero kikelgi i gure madit. Ento kitwero kelo kom pa lutino me gwokogi i kabedo acel, ka twene liking i kom mukene i ka nget lunyodone.

◼ Jami ma Ngwecgi Kur: Gure madito mogo oromo timme ki i ot ma doggi kiloro woko. Pi meno, bedo ki mar bimiyo pe watiyo ki moo nyo pafium ma ngwece tek tutwal ma twero kelo peko bot jo ma tye ki two ma mako ot yweyo ki mukene ma pe mito ngwec piny ma oculle liking.—1 Kor. 10:24.

◼ Fom me Lubu: Omyero wati ki fom me Please Follow Up (S-43) me miyo ngec i kom ngat mo ma onyutu miti i kare ma nongo watye ka miyo caden ma pe wayubbe pire i kare me gure. Lutit kwena myero gubin ki fom man acel nyo aryo i ka gure madit. Ka ipongo fom man ci iromo miyone bot Jo ma Gwoko Bukke nyo bot karan me kacokkewu ka idok gang.—Nen Ticwa Me Ker me Novemba 2009 pot 4.

◼ Kabedo me Cam: Ket deyo i kom nying Jehovah ki bedo ki kit maber i kabedo me cam.

◼ Kabedo me Buto:

(1) Pe iwek kigwok ot buto mapol ma pe ibiromo tic kwedgi ducu, dok pe iwek wel dano okat wel ma mitte me buto i ot moni.

(2) Gwokke pe me kwero ot buto ma onongo kigwoki nikwanyo ka peko mo obino atura, ci mi ngecce bot wegi ot labongo galle.—Mat. 5:37.

(3) Kwany lating ter pa wegi otel ka ce ibitiyo kwede keken, dok omyero idwok woko oyotoyot wek jo mukene bene guti kwede.

(4) Ted i ot ma kiye tedo iye keken.

(5) Pe iti ki jami me angica ma kimini i yo me alany, magi obedo jami ma welle ma gibedo i otel gitiyo kwede.

(6) Bed ki kit ma cwiny maleng nyako ka itye ka lok ki jo ma gitiyo i kabedo ma ibuto iye. Gitye ka gwoko welle mapol dok gipwoyo ka ce wanyutu cwiny me kica, diyo cwiny, ki dong niang.

(7) Wel ma Mitte ma kiculo ki ot buto pi nino acel acel nongo kiryeyo piny, labongo mucoro mo iye. Ka kimito ni icul wel ma lamal makato, nyo kimito ni icul pi jami mogo ma in pe ipenyo pire kwer woko ci iniang Dipatmen ma Neno Lok kom Kabuto cut.

(8) Ka peko mo ocakke ki ka ma ibuto iye, nen ni iniango Jo ma Neno Lok kom Kabuto i gure wek inong kony mo.

(9) Bed ki ngec ni ka ce ibitic ki credit card ka itye ka culo pi otel, tye macalo cik ni wegi otel “gibigwoko” credit card meno pi tic ki cente ma iye me culo pi jami ducu ma itiyo kwede, kacel ki jami mogo ma nongo oballe i kare ma ibedo i otel. Pe ibitic ki cente meno nio wa i nino ma ibia iye ka ityeko cul ducu me otel.

◼ Jo ma Mito Mine me Tic: Yomcwiny ma wanongo ki i bedo tye i gure madit, bibedo dit adada ka ce wamine me konyo i tic mogo ma mitte. (Tic 20:35) Ngatti mo keken ma mito mine myero ocit i Dipatmen ma Loyo Lok me Mine me Tic i kabedo me gure. (Volunteer Service Department) Lutino ma pud pe gitye ki mwaka 16 giromo bene miyo kony kun nongo gitiyo kacel ki lunyodogi, ngat ma gwokogi nyo dano mo madit ma gin gucimo.

[Bok i pot karatac 5]

Wabipoko Karatac me Lwongo-ni Nining?

Me tyeko wang ticwa ducu, myero walok macek. Waromo wacci: “Irii maber. Watye ka nywako i tic ma kwako wi lobo ducu me poko karatac me lwongo man. Kopi ma megi en. Ibinongo ngec me lwongo man ki iye.” Pok nge karatac me lwongo man kiyubo mamwonya, pi man mi bot rwod ot i yo ma weko en neno. Lok ki mit kom. Ka itye ka nywako i poko karatac me lwongo i tum pa cabit, itwero bene miyo magajin ka ineno ni pore.