Kit Mabeco Kelo Deyo Bot Lubanga

1. Pingo dano ngeyo Lucaden pa Jehovah woko ka gucito i gure me distrik?

¹ Ka wawoto i gure me distrik mo, pol kare dano ngeyowa woko. I boma mapol, redio ki telebijon gitito bot lwak kwena i kom gurewa-ni. Otel ki odi me cam pong ki welle, dok jo me boma man gineno dano mapol ma guruko baj. Kimiyowa lok me poyo wic kany ma twero konyowa me kelo deyo bot Lubanga ki nyuto kit mabeco ka watye i boma me gure madit.​—1 Pet. 2:12.

2. Rukwa mupore ka watye i boma me gure madit twero kelo deyo bot Jehovah i yo ango?

² Ruk Mupore: Ngene kene ni omyero rukwa obed mupore ka wawoto i yub me gure. Ento kit me rukwa i kare mukene​—calo ka wao i otel, ka wacito i ot cam, ka wil ki mukene​—romo gudo cwiny jo ma ginenowa. Kadi bed ni cik mo peke i kom cital me bongo ma waruko i kare ma kit meno, gin ma waruko myero obed mupore, ma nyuto woro, dok pe obed bongo luriyo ma kelo lewic. Jo ma nenowa myero gunen apokapoka i kinwa ki jo ma pe Lucaden. (Rom. 12:2) Medo i kom meno, myero bene waruk baj me gure madit, pien bimiyo ngec i kom gure man, miyowa kare me miyo caden dok weko welle ma gubino i yub man tugi ngeyowa cut.

3. Waromo nyuto woro ki kit me diyo cwiny nining?

³ Diyo Cwiny ki Woro: I kare man ma pol pa dano me lobo-ni gimaro komgi kengi dok pe gimiyo pwoc, diyo cwiny ki woro ma wanyuto kweyo cwiny jo ma nenowa, calo lutic me otel ki odi cam! (2 Tem. 3:1-5) Ka watye ka gwoko kabedo ki jo mukene nyo watye i lain pi nongo bukke ma okatti nyen, myero pe watam pi gin ma konyowa keken ento pi gin ma konyo jo mukene bene. (1 Kor. 10:23, 24) I nge cito i gure me distrik pi tyen mukwongo, laco mo owacci, “Wiya pe po i kom pwony mo ma kimiyo, ento kit Lucaden pa Jehovah aye gin ma odong i wiya pi kare malac.”

4. Pingo myero watam pi mine pi tic i kare me gure madit, ka ce twere?

⁴ Jo ma Gudyere pi Tic: Lukricitayo me ada gingene pi cwiny me dyere pi tic. (Jab. 110:3) Tika iromo mine me timo tic i gure madit? I gure madit acel mo, omege ki lumege 600 gumine me yubo kabedo wek obed maleng ma peya gure ocakke. Lutic me kabedo meno guwacci: “Man aye pud dong obedo gin me aura ma waneno ya! Pe iromo tamo ni joni ducu gumine amiya.” Watye ka kuro yub me gure madit me mwaka 2013, pe me winyo ki nongo pwony ki bot Lubanga keken ento bene keto deyo i kom nyinge.

[Buk i pot karatac 2-5]

Lok me Poyo Wic pi Gure Madit me Distrik me 2013

◼ Cawa me Yub: Dog ot bibedo twolo cakke cawa 2:00 me odiko. Wer me yabo yub kibiketone cawa 3:20 me odiko nino adek-ki ducu. Ka kimiyo ngec pi cako keto wer, omyero wabedu piny wek yub ocakke i yo me woro dok ki mwolo. Yub man bitum ki wer ki lega cawa 10:50 me otyeno i Ceng Abic ki Ceng Abicel ki dong cawa  9:35 me otyeno i Ceng Cabit.

◼ Ka Gwoko Giwot: Ka ma kigwoko iye giwot bibedo tye i kabedo me gure ducu labongo cul mo, dok kibimiyone ma lubbe ki ngat ma okwongo bino wiati. Pol kare ka gwoko giwot pe lac tutwal, dong ka twerre jo mapol myero gutii ki mutoka acel.

◼ Gwoko Kabedo: Iromo gwoko kabedo pi jo ma wuwoto kwedgi i mutoka acel nyo jo ma wubedo kwedgi i paco acel, ki jo ma wutye ka kwano Baibul kwedgi. Kabedo ma kigwoko pi jo mutii ki jo magoro nok, pi meno pe twerre pi jo me odigi ducu me bedo kacel kwedgi. Tim ber iwek kabedo magi pi jo mutii ki jo magoro kacel ki jo ma tye ka konyogi.​—1 Kor. 13:5.

◼ Cam me Dyeceng: Tim ber ibin ki cam me dyeceng me kaka weko ka gure me cito ka cam woko i kare me yweyo me dyeceng. Ber me tic ki gin me mako cam matidi ma kiromo ketone i te kom. Jami madongo me mako cam ki dong jami ma obedo gilac pe mitte i kabedo me gure madit.

◼ Miyo Mot: Watwero nyutu pwocwa pi yub me gure madit ki miyo motwa pi konyo tic ma mako wi lobo ducu, i kare me gure madit. Mot ma kibimiyo kun kitiyo ki cheque, omyero kicogi i nying IBSA nyo nying ma dulwa ocone kwede i te cik i lobowu.

◼ Two ki Awano ma Bino Atura: Ka two mo ocakke atura i ka gure madit, tim ber itit ki lajol wele mo ma tye cok kwedi, en bimiyo ngec meno cutcut bot jo ma i ka ma Kimiyo iye Kony wek ngat ma ngeyo kit me miyo kony oyot onen lit pa twone dok omi kony. Ka ce mitte, ngat ma tye ki ngec me miyo kony-nyi bipenyo pi ambulance.

◼ Yat: Ka ce itye ka mwonyo yat, tim ber iwot ki yat ma ibitic kwede muromo, kit macalo yat bibedo peke i kabedo me gure madit. Ka bene itye ka tic ki libira pi two cukari, i ngeye nen ni ibolo jami magi ka mabor ma pe twero wano iye dano.

◼ War: Mwaka ki mwaka awano mapol timme ma lubbe ki war. Ber iyer war mupore, ma romo tyeni ma weko iwoto i citep nyo ikalo bur labongo ayela.

◼ Jami ma Ngwecgi Kur: Gure madito mogo oromo timme ki i ot ma doggi kiloro woko. Pi meno, bedo ki mar bimiyo pe watiyo ki moo nyo pafium ma ngwece tek tutwal ma twero kelo peko bot jo ma tye ki two ma mako ot yweyo ki mukene ma pe mito ngwec piny ma oculle liking.​—1 Kor. 10:24.

◼ Fom me Lubu: Omyero wati ki fom me Please Follow Up (S-43) me miyo ngec i kom ngat mo ma onyutu miti i kare ma nongo watye ka miyo caden ma pe wayubbe pire i kare me gure. Ka ipongo fom man ci iromo miyone bot Jo ma Gwoko Bukke nyo bot karan me kacokkewu ka idok gang.

◼ Kabedo me Cam: Ket deyo i kom nying Jehovah ki bedo ki kit maber i kabedo me cam. Rukki myero obed mupore pi Lakricitayo.

◼ Kabedo me Buto:

(1) Pe iwek kigwok ot buto mapol ma pe ibiromo tic kwedgi ducu, dok pe iwek wel dano okat wel ma mitte me buto i ot moni.

(2) Gwokke pe me kwero ot buto ma onongo kigwoki nikwanyo ka peko mo obino atura, ci mi ngecce bot wegi ot labongo galle.​—Mat. 5:37.

(3) Bed ki ngec ni ka ce ibitic ki credit card ka itye ka culo pi otel, tye macalo cik ni wegi otel “gibigwoko” credit card meno pi tic ki cente ma iye me culo pi jami ducu ma itiyo kwede, kacel ki jami mogo ma nongo oballe i kare ma ibedo i otel. Pe ibitwero tic ki cente meno nio wa i nino ma ibia iye ka ityeko cul ducu me otel.

(4) Kwany lating ter pa wegi otel ka ce ibitiyo kwede keken, dok omyero idwok woko oyotoyot wek jo mukene bene guti kwede.

(5) Ted i ot ma kiye tedo iye keken.

(6) Nyut kit ma cwiny maleng nyako ka itye ka lok ki jo ma gitiyo i kabedo ma ibuto iye. Gitye ka gwoko welle mapol dok gipwoyo ka ce wanyutu cwiny me kica, diyo cwiny, ki dong niang.

(7) Lunyodo myero gugwok lutinogi maber kare ducu ka gitye i kabedo mapatpat me otel calo ka kwang, ka namo, nyo ka rweyo kom-gu.

(8) Ka peko mo ocakke ki ka ma ibuto iye, nen ni iniango Jo ma Neno Lok kom Kabuto i gure wek inong kony mo.

◼ Jo ma Mine pi Tic: Ngat mo keken ma mito mine myero ocit i Dipatmen ma Loyo Lok me Mine me Tic i kabedo me gure (Volunteer Service Department). Lutino ma pud pe gitye ki mwaka 16 giromo bene miyo kony kun nongo gitiyo kacel ki lunyodogi, ngat ma gwokogi nyo dano mo madit ma gin gucimo.