Winy Lok ci Inong Pwony
1. Pingo myero watute matek wek wawiny lok ci wanong pwony i gure madit?
1 Cokcok-ki gure me distrik me mwaka 2013 bicakke. Dul pa Jehovah otiyo matek me yubo purogram me cobo miti pa dano me twok lobo-ni ducu i kareni. Mono dong iketo yub me bedo tye pi nino adek ducu me gure man? Gure madito twero bedo ki jami mapol ma wiro tam, pi meno myero watute matek me keto cwinywa i kom yub. Kit ma yub man tero cawa malac loyo cokke me cabit ki cabit, omyero waket cwinywa iye pi kare malac. Medo i kom meno, wot ki dok jami mukene twero kelo olo. Ngo ma bikonyowa me yubo cwinywa wek wawiny lok ci wanong pwony?—Nwo. 31:12.
2. Watwero yubo cwinywa nining pi gure madit?
2 Ma Gure Madit Peya Ocakke: I kabedowa me Intanet me www.pr2711.com, inongo kiketo iye yub me gure madit, ma nyuto wi pwony ducu kacel ki ginacoya acel nyo aryo pi pwony acel acel. Ka watye ki Intanet, nongo ngec man bikonyowa me yubo cwinywa pi jami ma bibedo tye i gure man. (Ejira 7:10) I otyeno me Woro pi Jo me Ot, tika wuromo nyamo yub me gure madit wek jo me otti ducu gudong miti pi gure man?
3. Ngo ma bikonyowa me lubo pwony maber?
3 I Kare me Yub Man: Romo bedo ber ka itiyo ki coron i cawa ma nongo yub peya ocakke. Ka oporre, nek cimmi woko wek pe okok nyo inong mesej ma dwoyo tammi, nyo gwok icak cwalo mesej bot jo mukene i cawa me yub. Ka mitte ni pe inek cimmi, ci dwok dwane piny wek pe okok ci odwo tam pa dano. Ka itiyo ki jami calo kompiuta i kare me yub, ti kwede i yo ma pe dwoyo tam pa dano. Gwokke ki cam nyo mat atata i kare me yub. (Latit. 3:1) Bed ka neno lalok wek ilub pwony maber. Ka kitye ka kwano ginacoya, lub ki i Baibul-li. Co lok manoknok piny.
4. Lunyodo gitwero konyo lutinogi me winyo lok kun ginongo pwony nining?
4 Wamito ni lutinowa bene guwiny ci gunong pwony. Carolok 29:15 wacci: “Ka itenyo latin liyak ma pe ipwonyo ci bikelo lewic i wi minne.” Pi meno, ber pi jo me odi me bedo kacel wek lunyodo gunen ni litinogi tye ka lubo pwony, me kaka boko lok, cwalo mesej nyo wot atata. Kadi bed lutino pud gitino mada ma pe giniang jami ducu ma kinyamo, kitwero pwonyogi me bedo laling dok ma wanggi twolo.
5. Pingo pire tek ni wunyam lok ma pigi tego me pwony, dok waromo timo man nining?
5 I Nge Tum pa Yub Nino ki Nino: Ka icito ka mo otyeno, pe igalle woko dok tutwal. Cit i ka buto con wek inong yweyo muromo. Ngiyo lok ma pigi tego me pwony ma iwinyo i nino meno bikonyi wek wi opo iye pi kare malac. Pi meno, twero bedo ber me tic ki dakika mo manok me nyamo yub man calo jo me ot otyeno ducu. Ka icito i ot cam kacel ki luwoti, pingo pe iting buk ma icoyo coc iye ci inyam kwedgi gin acel nyo aryo ma oyomo i? I nge gure madit ka wudok gang, bedo ber ka wukwanyo kare i otyenowu me Woro pi Jo me Ot pi nyamo kacel kit me keto i tic ngec ma wunongo. Wutwero bene kwanyo cawa mo cabit ki cabit me kwano kacel bukke ma pud kinyuto nyen.
6. Bedo tye-ni keken i gure madit mono romo? Tit kong.
6 Pe waromo nongo ber pa cam moni nikwanyo ka wacamo ci odonyo i komwa. Man rom aroma ki cam me cwiny ma wabinongo i gure me distrik. Dong watwero nongo adwogi maber loyo ka wabedo tye pi nino adek ducu, walubo pwony kikore, dok waketo jami ma wapwonyo i tic.