Lok pa Lubanga Konyo me Pwonyo Dano

1. Wi lok madit me gure me adwol pi mwaka me ticwa me 2014 tye ningo, dok lapeny ango ma kibigamone i yub man?

¹ Jehovah ‘Lapwonywa Madit’ aye pud dong lapwony maber loyo ducu. (Ic. 30:20, 21) Jehovah mono pwonyowa nining? En omiyowa Baibul, buk ma pe twero porre ki bukke mukene-ni. Pwony ma oa ki bot Lubanga twero gwoko komwa, tamwa ki watwa ki Lubanga i yo ma nining? Lagam me lapeny man kibinyamone i gurewa me adwol pi mwaka me ticwa me 2014. Wi lok madit me yub man tye ni “Lok pa Lubanga Konyo me Pwonyo Dano,” ma kikwanyo ki i 2 Temceo 3:16.

2. Wabiniang wi lok ma pigi tego ki gamo lapeny mene?

² Yeny Wi Lok ma Pigi Tego Magi: Wi lok ma pigi tego pi yub man kibinyamogi kun nongo kitiyo ki lapeny magi:

• Pwony pa Lubanga twero gudo kwowa i yo ango? (Ic. 48:17, 18)

• Ka watute me loko kwowa wek wati pi Jehovah pi kare malac, wabibedo ki gen ango? (Mal. 3:10)

• Ka wakemme ki pwony ma “welo” myero watim ngo? (Ibru 13:9)

• Waromo lubo ‘kit me pwony’ pa Yecu nining? (Mat. 7:28, 29)

• Pingo mitte ni lupwonye me kacokke kong gukwong pwonnye kekengi? (Rom. 2:21)

• Lok pa Lubanga konyowa nining? (2 Tem. 3:16)

• ‘Yengo’ rok ducu ma kiloko pire-ni gudo kwo pa dano nining? (Ag. 2:6, 7)

• Gen ango ma Jehovah tye kwede i komwa? (Ep. 5:1)

• Pingo omyero wati matek wek wamedde ki bedo i pwony pa Jehovah? (Luka 13:24)

3. Pingo pire tek ni myero wabed tye dok water itwa me lubo yub man?

³ Ma peya ocoyo tyeng ma wi lok madit ojenge iye-ni, Paulo otito i 2 Temceo cura 3 kit ma piny bibedo marac ma binyuto ni watye ka kwo i kare me agikki. Ocoyo ni: “Jo maraco ki jo ma lugoba gibimedde ki bedo rac makato kare, kun gibwolo dano, gin bene gibibwologi.” (2 Tem. 3:13) Wek pe kibwolwa, pud dong pire tek botwa me bedo luwiny ki keto pwony pa Lubanga i tic ya! Pi man myero dong wamok tamwa me bedo tye i yub man ki tero itwa me winyo pwony ducu.