Tyen Lok Apar Wiye Aryo me Tito Kwena

Ngo mumiyo watito kwena i ot ki ot dok wapwonyo dano Baibul? Man mono aye gin ma pire tek me konyo jo ma mwol me wot i yo me kwo? (Mat. 7:14) Meno aye tyen lok mukwongo ma kiketo piny kany, ento pe en aye ma pire tek loyo. I kin tyen lok apar wiye aryo me tito kwena-ni, mene aye ma pire tek loyo?

1. Laro kwo pa dano.​—Jon 17:3.

2. Pwonywa konyo me ciko lutim maraco.​—Ejek. 3:18, 19.

3. Tito kwena cobo lok pa lunebi me Baibul.​—Mat. 24:14.

4. Nyuto kit matir pa Lubanga. Omiyo pe tye dano mo ma biwacci Jehovah ojwero jo ma maraco labongo miyogi kare me ngut pi balgi.​—Tic 17:30, 31; 1 Tem. 2:3, 4.

5. Miyo wacobo banya ma watye kwede me konyo dano i yo me cwiny, pien kiwilogi ki remo pa Yecu.​—Rom. 1:14, 15.

6. Miyo alii me to pa dano mo pe bibedo i wiwa.​—Tic 20:26, 27.

7. Man obedo gin ma mitte pi larrewa.​—Ejek. 3:19; Rom. 10:9, 10.

8. Nyuto mar ma watye kwede pi jiraniwa.​—Mat. 22:39.

9. Nyuto ni wan walubo cik pa Jehovah ki Wode.​—Mat. 28:19, 20.

10. Obedo but worowa.​—Ibru 13:15.

11. Nyuto ni wan wamaro Lubanga.​—1 Jon 5:3.

12. Lonyo nying Jehovah maleng.​—Ic. 43:10-12; Mat. 6:9.

Ento, magi keken pe obedo tyen lok mumiyo watiyo tic me pwony. Me labolle, tito kwena jingo niyewa dok bene miniwa mot me bedo lutic kacel ki Lubanga. (1 Kor. 3:9) Ento, tyen lok ma dong pire tek loyo mumiyo wanywako i tic me pwony aye me namba 12. Kadi bed dano winyowa nyo pe, ticwa me pwony konyo me lonyo nying Lubanga dok miyo Jehovah bedo ki lagam bot ngat ma yete. (Car. 27:11) Adada, watye ki tyen lok mabeco mada me ‘medde ki pwonyo dano ki tito lok me kwena maber-ri.’​—Tic 5:42.