“Cok Lwak Kacel”
1. Gure madito me distrik ki gure ma kwako lobe mapol girom ki cokke ma jo Icrael gubedo kwede i nge weko Ejipt nining?
1 Cutcut i nge weko Ejipt, Jehovah omiyo cik bot Moses ni ‘ocok lwak kacel’ i wi got Cinai wek guwiny Lokke dok gulwor En kun gipwonyo lutinogi me lubo yo pa Lubanga. (Nwo. 4:10-13) Meno pud dong obedo kare me jingo niyegi ya! I dwe ma bino-ni, jo pa Jehovah gibicokke kacel i gure madito me distrik ki gure ma kwako lobe mapol wek Jehovah opwonygi. Ngo ma omyero watim wek wanong adwogi maber loyo?
2. Ngo ma myero watim wek ‘wabed ma wayubbe’ pi gurewa madit?
2 ‘Wubed ma Wuyubbe’: Jehovah ociko jo Icrael me bedo ma “guyubbe” pi cokke i wi got Cinai. (Nia 19:10, 11) I yo acel-lu, yubbe maber bene mitte pi jo ducu ma gibibedo i gure madito, pe pi jo ma myero gumi pwony keken. Me labolle, jo mapol myero gupeny wek kiminigi yweyo ki i dog ticgi me cito i gure madito. Gwok nyo in bene ikemme ki ariya calo pa Nekemia i dog ticci. En onongo mito weko ticce macalo lamak kikopo kongo vino pa Kabaka Aritakcec wek ecit i Jerucalem ka gero celle, ento onongo ngeyo ni kabaka romo kwerone woko. Nekemia olego pi tekcwiny ci openyo kabaka ki mwolo. Kabaka oye ni ociti dok omiyo bote kony ma mitte pi cobo gedo meno! (Nek. 2:1-9) Medo i kom penyo ladit tic-ci pi yweyo, dong ityeko moko kit me wot kacel ki ka ma ibibuto iye? Luelda gibibedo ki yomcwiny me konyo jo ducu i yo ma mitte. Yubbe me o con nino ducu, dok ibed atera me ‘keto cwinyi’ i jami ma ibiwinyone.—Ibru 2:1.
3. Ngo ma bikonyowa me yubo cwinywa pi gure madit?
3 Gin mukene ma pire tek ma kwako bedo ma wayubbe en aye yubo cwinywa wek wawiny lok dok wanong pwony. (Ejira 7:10) Yub me gure man kibiketone i kabedowa me Intanet me jw.org dok kiryeyo iye wi lok me pwony ducu kacel ki ginacoya acel nyo aryo pi pwony acel acel. Man obedo gin maber adada me anyama i otyeno me Woro pi Jo me Ot i cabit ma nongo gurewa cok. Lutit kwena mukene girudo purogram man ci gitiyo kwede pi coyo coc macek cek i kare me gure madit.
4. Lunyodo mono gitwero tic ki gure madit me pwonyo lutinogi nining?
4 ‘Wupwony ki Lutinowu’: Tyen lok acel ma kimiyo pi gure madit ma obedo i wi got Cinai aye wek lunyodo ma Luicrael “gupwony ki litinogi.” (Nwo. 4:10) Gure madit bene miyo kare ki lunyodo me timo kit meno. Lunyodo myero gunen ni lutinogi obedo kacel kwedgi i kare me yub dok gukonygi me lubo pwony. Nino ki nino i agikki me yub ki dok lacen i kare me worogi pi jo me ot, jo me odi twero nyamo yub man kacel.
5. Adwogi maber ango ma wabinongo ki i cito i gure madit?
5 Gure madit ma obedo i wi got Cinai okonyo Luicrael me bedo ki pwoc pi mot madit me bedo jo pa Lubanga. (Nwo. 4:7, 8) Gurewa madit ma tye ka bino-ni kiyubo me konyowa i yo acel-lu. Pi nino adek wabibedo calo dong waa woko ki i lobo marac pa Catan kun wadonyo i paradic me cwiny ka ma wanongo yomcwiny pi pwonyo lok pa Lubanga kacel ki lurem mabeco. (Ic. 35:7-9) Kit ma nino pa Jehovah dong tye cok-ki, pe omyero wawek kare man me bedo kacel pi cuko cwinywa okatwa!—Ibru 10:24, 25.