Lok me Poyo Wic pi Gure Madit

Cawa me Yub: Kibiyabo doggola cawa 2:00 me odiko. Keto wer bicakke cawa 3:20 me odiko nino adek-ki ducu. I cawa meno, wan ducu omyero wabedu piny wek yub ocakke i yo me woro dok ki mwolo. Wer ki lega me dolo te yub man bibedo cawa 10:50 me otyeno i Ceng Abic ki Ceng Abicel, ka dong cawa 9:45 me otyeno i Ceng Cabit.

‘Pak Jehovah ki Wer’: Jo pa Lubanga i kare macon onongo gipako Jehovah ki wer, dok wer pud pire tek i woro me ada wa i kareni. (Jab. 28:7) Bute acel acel me gurewa madit me rijon cakke ki keto wer. Man pe obedo mere wer me galowang mamwa, ento kiyubo me konyowa wek wapwony lok i kom Jehovah dok wawore. Pi man, ka wonkom omiyo lok angeya ni cawa me keto wer dong cok, meno aye kare ma myero wabed piny kun watero itwa me winyo wer, ma ka boko lok. Ka watimo kit meno ci binyuto pwocwa pi tute pa lugo wer me Watchtower. Kiryo mwaka ki mwaka, omege ki lumege magi ma gia ki i lobe mapatpat, giculo pi wotgi gin kikomgi ci gicito i Patterson, New York, pi goyo wer mamwonya ma watiyo kwede i worowa. I nge winyo wer ma kiketo i cawa me keto wer, dano ducu myero gunywak i pako Jehovah ki wero werwa me Ker.

Ka Gwoko Giwot: Ka ma kigwoko iye giwot maber bibedo tye i kabedo me gure ducu labongo cul mo, dok kibimiyone ma lubbe ki ngat ma okwongo bino wiati. Kit ma kabedone tye pi giwot manok keken-ni, bedo ber ka dano giwoto mapol i giwot acel. Lugoro keken aye kibiye ki gin me gwoko giwotgi i kabedo ma kiyubo pigi.

Gwoko Kabedo: Ka dong kiyabo kabedo odiko ki odiko, tim ber pe irune ka donyo calo wutye ka pyem apyema. Tim ber wutam pi jo mukene, kun wujalle pi luwotwu. Bedo ki cwiny me jalle ken binyuto bot jo mukene ni wan watye Lukricitayo me ada, dok biweko gimiyo pak bot Lubanga. (Jon 13:34, 35; 1 Kor. 13:4, 5; 1 Pet. 2:12) Iromo gwoko kabedo pi jo ma wuwoto kwedgi i mutoka acel nyo jo ma wubedo kwedgi i paco acel nyo lutino kwanwu me Baibul. Tim ber pe wuket jami i wi kabedo ma odong nono. Lubo lok man biweko jo mukene gineno ni kabedo tye ma twolo. Kibiyubo kabedo pi jo muteggi ki jo magoro. Kit ma kabedo magi nok, mitte ni ngat acel nyo aryo keken ma gibikonyo ngat meno aye myero gubed kwede.

Ruk Mupore: I kare me gure madit, omyero warukke maber ki mwolo, ento pe walub kit cital mogo maraco muywek i lobo-ni. (1 Tem. 2:9) Kadi wa i kare ma watye ka kato woko ki i otel, nyo ka namo ma peya yub ocakke nyo ka yub dong otum, myero wagwokke ki ruko bongo luriyo ma kelo lewic. Meno bimiyo wabedo ki awaka me ruko bajwa me gure madit kun wamiyo caden ka kare onen labongo lewic mo. Rukwa ki kitwa maber i kare me gure madito pe biywayo jo ma cwinygi atir me jolo kwena me larre ma tye i Baibul keken, ento bene bikelo yomcwiny bot Jehovah.​—Jep. 3:17.

Nyut Woro ka Itye ka Tic ki Jami Tet: Wanyuto woro i cawa me yub ka waketo cimwa nyo jami tet mukene ma watye ka tic kwede i yo ma pe yelo jo mukene. Ka watye ka tic ki kamera amera, kamera me vidio, nyo tet mukene me mako cal, myero wapar pi jo mukene kun pe wagengogi ki neno anyim. Wanyuto bene woro ka pe wabedo ka cwalo mecej nyo e-mail i kare ma nongo yub tye ka wot anyim.

Cam me Dyeceng: Tim ber ibin ki cam me dyeceng me kaka weko kagurre me cito ka cam woko i kare me yweyo me dyeceng. Ber me tic ki gin me mako cam matidi ma kiromo ketone i te kom. Jami madongo me mako cam ki dong jami ma obedo gilac pe mitte i kabedo me gure madit.

Miyo Mot: Watwero nyutu pwocwa pi yub me gure ki miyo motwa pi konyo tic ma mako wi lobo ducu ki i Ot me Kerwa nyo ki i gure madit. Mot ma kimiyo i kare me gure me distrik kun kitiyo ki cheque, omyero kicogi i nying dulwa.

Yat: Ka tye yat mo ma mitte ni myero ibed ka mwonyone, tim ber ibin kwede muromo, pien pe ibinongo mo i ka gure madit. Libira/pico pa lutwo cukari myero pe kibolgi i ka bolo yugi i ka gure madit nyo i otel, ento i kabedo mupore pi jami ma kit meno.

Gwokke ki i Awano: Tim ber wugwokke ki awano ma bino pi cer ki poto. Mwaka ki mwaka awano mapol timme ma lubbe ki war aruka, tutwalle war ma tere boco. Ma ka ruko war mogo ma tye calo cilipa nyo cital ma pud okati nyen, ber ni iyer war mupore, ma romo tyeni ma weko iwoto i citep nyo i kalo bwur labongo ayela.

Jami ma Ngwecgi Kur: Gure madito mogo oromo timme ki i ot ma doggi kiloro woko ma macin ma kiyo yamo aye cwalo yamo iye. Pi meno, bedo ki kica bimiyo pe watiyo ki moo nyo pafium ma ngwece tek tutwal ma twero kelo peko bot jo ma tye ki two ma mako ot yweyo ki mukene ma pe mito ngwec piny ma oculle liking​—1 Jo Kor. 10:24.

Fom me Lubu: Omyero wati ki fom me Please Follow Up (S-43) me miyo ngec i kom ngat mo ma onyutu miti i kare ma nongo watye ka miyo caden ma pe wayubbe pire i kare me gure. Lutit kwena myero gubin ki fom man acel nyo aryo mo i ka gure madit. Ka ipongo fom man ci iromo miyone bot Jo ma Gwoko Bukke nyo bot karan me kacokkewu ka ce idok gang.

Kabedo me Cam: Ket deyo i kom nying Jehovah ki bedo ki kit maber i kabedo me cam.

Kabedo me Buto:

Pe iwek kigwok ot buto mapol ma pe ibiromo tic kwedgi ducu, dok pe iwek wel dano gukat wel ma mitte me buto i ot moni.

Gwokke pe me kwero ot buto ma onongo kigwoki nikwanyo ka peko mo obino atura, ci mi ngecce bot wegi ot labongo galle.​—Mat. 5:37.

Bed ki ngec ni ka ce ibitic ki credit card ka itye ka culo pi otel, tye macalo cik ni wegi otel “gibigwoko” credit card meno pi tic ki cente ma iye me culo pi jami ducu ma itiyo kwede, kacel ki jami mogo ma nongo oballe i kare ma ibedo i otel. Pe ibitic ki cente meno nio wa i nino ma ibia iye ka ityeko cul ducu me otel.

Kwany lating ter pa wegi otel ka ce ibitiyo kwede keken, dok omyero idwok woko oyotoyot wek jo mukene bene guti kwede.

Ted i ot ma kiye tedo iye keken.

Nyut kit ma cwiny maleng nyako ka itye ka lok ki jo ma gitiyo i kabedo ma ibuto iye. Gitye ka gwoko welle mapol dok gipwoyo ka ce wanyutu cwiny me kica, diyo cwiny, ki dong niang.

Lunyodo myero gugwok lutinogi maber kare ducu ka gitye i kabedo mapatpat me otel calo ka kwang, ka namo, nyo ka rweyo kom-gu.

Ka peko mo ocakke ki ka ma ibuto iye, nen ni iniango Jo ma Neno Lok kom Kabuto i gure wek inong kony mo.

Jo ma Mito Mine pi Tic: Ngatti mo keken ma mito mine myero ocit i Dipatmen ma Loyo Lok me Mine me Tic i kabedo me gure (Volunteer Service Department). Lutino ma pud pe gitye ki mwaka 16 giromo bene miyo kony kun nongo gitiyo kacel ki lunyodogi, ngat ma gwokogi nyo dano mo madit ma gin gucimo.