Tika Ibilubo Mit Kom pa Jehovah ki Yecu i Kare me Nipo Man?

1. Ngo ma Lucaden pa Jehovah gitute matek me timone i kare me Nipo?

¹ Jehovah cobo yubbe ki mit kom. I kare ma tye ka lok i kom mot me Ker pa Lubanga, Icaya 9:7 owaco ni: “Arima pa Rwot [Jehovah] bimiyo man cobbe.” Rom aroma ki kare ma Yecu tye ka tiyo ticce me pwony i lobo, en onyuto miti madwong pi woro me ada. (Jon 2:13-17; 4:34) Mwaka ki mwaka i kare me Nipo, lutit kwena milion mapol i but lobo ducu gitute matek me lubo lanen me mit kom pa Yecu ki Jehovah, ki medo cawa ma gicwalo i tic me pwony. In tika ibibedo dano acel i kingi?

2. Cakke i Ceng Abicel me Marci 14, mit komwa bitugo cwinywa me timo gin ango?

² Rwec me Nipo: I mwaka-ni rwec me lwongo dano pi Nipo bicakke i Ceng Abicel me Marci 14. Ket yub kombeddi me nywako i tic man ki mit kom. Kacokke mapol gibibedo ki yomcwiny madwong i kare me rwec man ka gitute matek me tyeko wang tic ma kimiyogi. Myero waket tek me lwongo lutino kwanwa me Baibul, jo ma wadok cen ka limogi, lutic luwotwa, wadiwa ki lutino kwan luwotwa, kun wamiyo botgi karatac me lwongo nyo wanyutigi Kabedowa me jw.org.

3. Watwero medo cawa ma wacwalo i tic me pwony i dwe me Marci ki April nining?

³ Tic Calo Painia pi Tutunu: Bedo ki mit kom bitugo cwinywa bene me medo cawawa i tic me pwony. Labongo akalakala mo, pien waromo yero me tic pi cawa 30 keken, bibedo yot pi dano mapol me tic calo painia pi tutunu i dwe me Marci ki April. I yub me worowu pi jo me ot nyo kwan piri keni, wunyam kun wuketo i lega kit ma wutwero timo kwede man? (Car. 15:22) Mit komi i kare me rwec man bitugo cwiny jo mukene me medo ticgi. Ka iketo alokaloka i yubbi wek imed cawani i tic man, ci nongo itye ka lubo mit kom pa Yecu.—Mar. 6:31-34.

4. Adwogi maber ango ma bino ka walubo lanen me mit kom pa Jehovah ki Yecu?

⁴ Lubo lanen pa Jehovah ki Yecu me nyuto mit kom i kare me Nipo bikelo mot mapol. Wabimiyo caden bot dano mapol ma i wang ticwa. Wabinongo yomcwiny ki yengo ma bino pi tic bot Jehovah ki miyo mic bot jo mukene. (Tic 20:35) Ma pire tek loyo, wabiyomo cwiny Lubangawa ma lamit kom kacel ki Wode.