Anga ma Bilaro Lutedero?—Gin Ango ma Baibul Waco?

Dul me United Nations owaco ni:

•  Nicakke i nino dwe 7 me Oktoba nio wa i nino dwe 23 me Oktoba, 2023, dano makato 6,400 dong guto dok dano 15,200 guwanne macalo adwogi me lweny ma tye ka timme i kin lobo Icrael ki Gaza, dok pol pa jo magi gubedo lutedero. Medo i kom meno, dano alip miya mapol guringo woko ki i gangigi.

•  Nio nino dwe 24 me Sektemba, 2023, lutedero ma romo 9,701 dong guto woko ki lutedero ma romo 17,748 gunongo awano macalo adwogi me lweny ma tye ka timme i kin lobo Russia ki Ukraine.

Gen ango ma Baibul miyo bot jo ma gitye ka deno can macalo adwogi me lweny?

Tyen lok me bedo ki gen

Baibul otito ni Lubanga ‘bijuko lweny woko i wi lobo ducu.’ (Jabuli 46:9) En bitic ki gamente me polo, nyo ker, me leyo kaka gamente ducu pa dano. (Daniel 2:44) Ker pa Lubanga bikelo kuc bot dano ducu.

Nen gin ma Yecu Kricito, Kabaka me Ker pa Lubanga, bitimone:

•  “En laro dano ma piny obwoyo ka okok bote, konyo lucan ki jo ma pe gitye ki ngat ma konyogi. Kica make i kom jo magoro ki ma piny obwoyogi, ci laro kwo pa jo ma piny oloyo. En kokogi ki i tim bwami ki i un ma gibedo ka unogi kwede; kwogi pire tek bote ma pe wacce.”—Jabuli 72:12-14.

Lubanga bitic ki Kerre me giko deno can ma obino macalo adwogi me lweny ki tim gero.

•  “En bijwayo pig wanggi woko ducu. To bene dong bibedo pe, kadi kumo nyo koko, nyo arem, pien gin macon dong ducu gurwenyo woko matwal.”—Niyabo 21:4.

Cokcok-ki, Ker pa Lubanga bikelo alokaloka madit i wi lobo. Baibul otito pi “pi mony, ki lok ma yweko pi mony” ma watye ka nenone i kare-ni. (Matayo 24:6) Jami magi ki mukene nyuto ni watye ka kwo i “kare me agikki” me loc pa dano.—2 Temceo 3:1.