Waraga Mua ki Bot Lukiko Madit

‘Myero wubed lupwonye’ (Ibru 5:12) Go kong! Jehovah​—lapwony ma pud dong ber loyo ducu i polo ki lobo—​lwongowa me pwonyo jo mukene lok madok i kome! Tic mo keken ma kimini me pwonyo lok ada i kom Jehovah​—bot jo me ot, i kacokke, nyo i tic me pwony—​obedo twon mot madit ki tic ma pire tek adada. Watwero cobone nining?

Lagamme twero nonge i lok ma lakwena Paulo ocoyo bot Temceo ni: “Mi kareni me kwano coc ma yam gicoyo i nyim lwak, i tito lok.” Paulo omedde ni: “Ka itimo kumeno, in kikomi ibilarre ki jo ma winyi bene.” (1 Tem. 4:13, 16) Itye ki kwena ma myero inywaki ma twero laro kwo pa dano. Pi man, pire tek ni itute matek me dongo dironi me kwan ki pwony. Brocuwa man kiyubo me konyi timo meno. Nen kong jami manok nok ma tye iye.

Wang Baibul ma kiketo i pot karatac acel acel obedo cik ma iye lac ma kubbe ki diro pwony meno nyo obedo labol me diro pwony meno ma kiketo i tic

Jehovah aye ‘Lapwony Madit.’ (Ic. 30:20) Kadi bed brocuwa man bikonyi me dongo dironi me kwan ki pwony, wii pe myero owil ni Jehovah aye Wang it me kwenawa dok en aye nyiko dano cok bote. (Jon 6:44) Pi meno, leg kare ducu pi cwiny maleng. Ti ki Lok pa Lubanga tere tere. Lok tam pa dano i kom Jehovah, ento pe i komi. Tute matek me dongo mar matut pi Lubanga i cwiny jo ma winyi.

Kimini kare me pwonyo lok me kwena ma pud dong pire tek loyo bot dano. Watye ki gen ni ka ijenge i kom ‘teko ma Lubanga miyo,’ ci ibicobo ticci maber.​—1 Pet. 4:11.

Wan lupwonye luwotwu,

Lukiko Madit pa Lucaden pa Jehovah