Brocuwa Manyen ma Wabiterone!
1. Ngo ma wabiterone i dwe me Novemba, dok brocuwa meno kiyubo pi tyen lok ango?
1 I Gurewa Madit me Distrik me “Wubed ma Wukiyo Piny!” me mwaka 2009, kinyutu brocuwa manyen ma wi lokke tye ni The Bible—What Is Its Message? I dwe me Novemba, kacokke ducu me wi lobo gibiterone pi tyen mukwongo. Brocuwa man bikonyo jo ma i wang ticwa nining? Pol pa dano, tutwalle me dini pa jo ma pe Lukricitayo gitye ki ngec manok i kom Baibul. Pi meno, brocuwa man tito i pot karatac 3 ni kiyubo me miyo “lok macek cek i kom Baibul.”
2. Waromo nyuto brocuwa man nining?
2 Kit me Nyutune: Waromo waco ni: “Wamito niang tammi i kom wang Baibul man. [Kwan 2 Temceo 3:16.] Jo mapol ma waloko botgi giye lok meno; jo mukene gitamo ni Baibul obedo buk maber mamwa. In kono itamo nining i kom Baibul? [Mine kare wek ogam.] Kadi bed walubo pwony me dini mapat pat, watye ki tyen lok maber me ngiyo lok me Baibul piwa kenwa. [Kwan ngec ma kicoyo macek cek i acakki me pot karatac 3.] Ka iwoto ki kwano lok mamit ma kijungo macek i kom Baibul ma tye i brocuwa-ni, ibineno gin mo ma tugo mitini: Wi lok madit me Baibul ki dok ngec ma iye tye acel.”
3. Yo mukene ango ma waromo tic kwede me nyutune, tutwalle i wang tic ma pol pa dano gitye i dini mapat ki pa Lukricitayo?
3 Yo mukene me nyutune, tutwalle ka itye ka tito lok ka ma pol pa dano gitye i dini mapat ki pa Lukricitayo, aye me waco ni: “Wamito niang tammi i kom gin ma Ginacoya (nyo buk maleng) man waco. [Kwan Jabuli 37:11.] Itamo ni lobo bibedo nining ka lok pa lunebi man dong ocobbe? [Mine kare wek ogam.] Man labol acel me gen kacel ki kwe cwiny ma dano me dini ki tekwaro ducu giromo nongo ki i Baibul.” Kwan paragraf ma tye malo i pot karatac 3, ci imi bote brocuwa.
4. I yo ango ma waromo tic ki brocuwa man me cako kwano Baibul ki dano?
4 Cak Kwano Baibul ki Dano: Ka wadok cen ka lim, waromo poyo wi rwod ot i kom lok ma wanywako wi ati, ci dok waloko i kom paragraf acel nyo aryo me pwony ma onongo wanyamo ni, kun watiyo ki lapeny ma tye i agikki me pwony meno. Nyo ka wamito nyuto buk me Baibul Pwonyo cut cut, waromo kwano kacel kwede lok ma kicoyo i pok nge brocuwa man, ci wamiye buk meno bote, wapenye dul mene ma tugo mitine, dok wanyamo paragraf acel nyo aryo ki i dul meno kacel. Dong walego ni wan ducu watute me nywako i tero brocuwa man i dwe me Novemba!