Baiblo Kasemi He Blɔ Nya Tomi Kɛ Ha Nihi Tsuo

Nihi le Yehowa Odasefohi wawɛɛ ngɛ a fiɛɛmi ní tsumi ɔ he je. Se anɛ o le hu kaa wa to blɔ nya nɛ waa kɛ nihi kaseɔ Baiblo ɔ ngɛ je kɛ wɛ lo?

Nyumu ko nɛ a kɛ lɛ ngɛ Baiblo ɔ kasee ngɛ e ní tsumi he

Ngɛ jeha 2014 ɔ mi ɔ, Odasefohi nɛ a he hiɛ pe 8,000,000 nɛ a ngɛ ma slɔɔtohi 240 a nɔ ɔ kɛ nihi maa pee 9,500,000 kase Baiblo ɔ daa nyɔhiɔ.a Mahi 140 komɛ ngɛ nɛ nihi nɛ waa kɛ mɛ kaseɔ Baiblo ɔ a he hiɛ pe nihi abɔ nɛ a ngɛ ma nɛ ɔmɛ eko tsuaa eko mi!

Bɔ nɛ pee nɛ Yehowa Odasefohi a nyɛ nɛ a kɛ nihi nɛ kase Baiblo ɔ, daa jeha a, a peeɔ Baiblo, womihi, womiyohi, kɛ Baiblo kasemi ní kpahi maa pee ayɔ akpe kake kɛ fã ngɛ gbihi maa pee 700 mi! Womihi abɔ nɛ wa peeɔ ɔ yeɔ bua nihi nɛ a nyɛɛɔ kaseɔ Baiblo ɔ ngɛ mɛ nitsɛmɛ a je gbi mi.

“Be nɛ i ngɛ sukuu yae ɔ, i sume ní kasemi, se ní kasemi nɛ ɔ ngɛ bua jɔmi. Níhi nɛ i kase ɔ wo ye bua wawɛɛ!”—Katlego, e je South Africa.

“Ní kasemi ɔ ha ye sane bimihi kɛ sane bimi kpahi a heto.”—Bertha, e je Mexico.

“A kɛ mi kase Baiblo ɔ ngɛ ye we mi ngɛ be nɛ da mi mi. Mɛni lɛ pã enɛ ɔ!”—Eziquiel, e je Brazil.

“Be komɛ ngɛ nɛ waa kɛ hɛngmɛfia 15 kɛ yaa 30 nɛ kaseɔ ní ɔ, nɛ be komɛ hu ngɛ nɛ e be jã. A kɛ mi kaseɔ ní ɔ ngɛ be nɛ da mi mi.”—Viniana, e je Australia.

“A he we sika ko—e ngɛ nyakpɛ!”—Aimé, e je Benin.

“Nɔ nɛ kɛ mi kase Baiblo ɔ ngɛ tsui si tomi kɛ mi mi himi. Wa ba pee huɛmɛ.”—Karen, e je Northern Ireland.

“Nihi babauu kaseɔ Baiblo ɔ nɛ a pee we Odasefohi.”—Denton, e je England.

SANEHI NƐ NIHI PƆƆ BIMI NGƐ WA BAIBLO KASEMI BLƆ NYA TOMI Ɔ HE Ɔ A HETOHI

Kɛ wa to ní kasemi ɔ he blɔ nya ha kɛɛ?

Wa ngɔɔ Baiblo mi munyu slɔɔtohi, nɛ wa hlaa Ngmamihi nɛ kɔɔ jamɛ a munyu ɔ he ɔ mi. Kaa nɔ hyɛmi nɔ́ ɔ, Baiblo ɔ ha sane bimi nɛ ɔmɛ a heto: Mɛnɔ ji Mawu? Kɛ Mawu ngɛ kɛɛ? Anɛ e ngɛ biɛ lo? Jije e ngɛ? Anɛ wa ma nyɛ maa hɛ wɔ kɛ su e he lo? Se he nɛ o maa na heto ɔmɛ ngɛ Baiblo ɔ mi ɔ ji sane ɔ nɛ.

Bɔ nɛ pee nɛ nihi nɛ a ná sane bimi nɛ ɔmɛ a heto ɔ, waa kɛ nihi pɔɔ womi nɛ ji, Mɛni Tutuutu Ji Baiblo ɔ Tsɔɔmi? ɔ kasemi.b Womi nɛ ɔ hɛɛ ba fa 224. A pee womi nɛ ɔ konɛ e ye bua nihi nɛ a nu Baiblo mi sisije tsɔɔmi ɔmɛ a sisi. Sisije tsɔɔmi ɔmɛ ekomɛ kɔɔ Mawu, Yesu Kristo, adesahi a nɔ́ nami, gbogboe a si temi, sɔlemi, kɛ ní kpahi fuu he.

Mɛni be a kɛ kaseɔ ní ɔ, nɛ jije a kaseɔ ngɛ?

Waa kɛ mo maa kase ní ɔ ngɛ he nɛ o suɔ, kɛ be nɛ maa da mo.

Ngmlɛfia enyɛmɛ nɛ ní kasemi ɔ eko tsuaa eko yeɔ?

Nihi fuu ngɔɔ ngmlɛfia kake loo nɔ́ daa otsi nɛ a kɛ kaseɔ Baiblo ɔ. Ní kasemi ɔ nya kɛmi daa si ngɛ ní kaselɔ ɔ nɔ. Waa kɛ mo maa kase ní ɔ ngɛ be nɛ maa da mo. O ma nyɛ maa ngɔ hɛngmɛfia 10 loo 15 kɛ kase ní ɔ daa otsi.

Enyɛmɛ a heɔ ngɛ Baiblo mi ní kasemi kake he?

A he we sika, nɛ a jua we Baiblo kasemi womi ɔ. Enɛ ɔ kɛ blɔ tsɔɔmi nɛ Yesu kɛ ha a kɔ. E de ke: “Nyɛ ná lɛ yaka gu nɛ nyɛ wui he hiɔ; nyɛ hu nyɛ ngɔ ha nɛ nyɛ ko he hiɔwo.”—Mateo 10:8.

Mɛni be a kɛ gbeɔ ní kasemi ɔ tsuo nya?

Be abɔ nɛ waa kɛ kaseɔ Baiblo ɔ daa si ngɛ ní kaselɔ ɔ nɔ. Mɛni Tutuutu ji Baiblo ɔ Tsɔɔmi? womi ɔ hɛɛ yi kakaaka 19. O ma nyɛ maa kase womi ɔ tsuo loo e fã ko bɔ nɛ e maa da mo.

Anɛ e sa kaa ma ba pee Yehowa Odasefo no lo?

Dɛbi. Wa le kaa nɔ tsuaa nɔ ngɛ he blɔ nɛ e hlaa nɔ́ nɛ e suɔ kaa e ma he ye. Se ke nihi le Baiblo ɔ sisije tsɔɔmi ɔ, e ma nyɛ maa ye bua mɛ konɛ a muɔ a yi mi kpɔ ngɛ blɔ nɛ da nɔ.

Jije ma na ní kasemi ɔ he sanehi fuu ngɛ?

Nihi guu blɔ slɔɔtohi a nɔ kɛ biɔ nɛ a kɛ mɛ nɛ ba kase Baiblo ɔ: intanɛti nɔ, womi ngmami, kɛ tɛlifoo nɔ

O ma nyɛ maa na níhi nɛ Yehowa Odasefohi heɔ yeɔ kɛ a ní tsumi ɔ he ní fuu ngɛ Intanɛti ní tsumi he nɛ ji, jw.org/ada nɔ.

Mɛni blɔ nɔ nɛ ma gu kɛ bi nɛ a kɛ mi nɛ ba kase Baiblo ɔ?

Mo bi kɛ gu www.jw.org/ada nɔ.
Moo ngma kɛ ya adrɛs nɛ ngɛ womi tɛtlɛɛ nɛ ɔ ba fa enyɔ ɔ mi nɔ́ nɛ kɛ o he kɛ we.
Mo hla Yehowa Odasefohi nɛ a ngɛ o kpɔ ɔ mi ɔ a se blɔ. Mo hla “Yehowa Odasefohi” a tɛlifoo nɔma nɛ o fia mɛ.

a Behi fuu ɔ, waa kɛ ni kakaakahi loo kuuhi kaseɔ Baiblo ɔ.

b Yehowa Odasefohi nɛ a pee. A fia womi nɛ ɔ ayɔ 230 kɛ se, ngɛ gbihi nɛ hiɛ pe 260 mi.

NƆ́ NƐ MAA YE BUA WEKUHI

“Benɛ ye yo ɔ bɔni Baiblo ɔ kasemi ɔ, i yɔse kaa e pee tsakemihi ngɛ e si himi mi. Bua jɔmi ba wa weku ɔ mi. Akɛnɛ i suɔ kaa ma le nɔ́ nɛ e ngɛ kasee he je ɔ, imi hu i bɔni kasemi. Nɔ́ nɛ i kase ɔ ha nɛ i pee nɔmlɔ kpakpa. Baiblo ɔ kasemi ha nɛ wa weku ɔ pee kake.”—Eziquiel.

“Benɛ i bɔni Baiblo ɔ kasemi ɔ, i kpa tsopa yaya kɛ ní tsumi, i kpa dã demi, nɛ i kase he nɔ yemi. I dla ye we ɔ mi, nɛ e mi tsɔ nyaii. Amlɔ nɛ ɔ, i ba suɔ ye weku ɔ wawɛɛ, nɛ i suɔ kaa ma pee níhi nɛ ma ha nɛ a bua nɛ jɔ. Ye bua jɔ wawɛɛ nitsɛ.”—Karen.

“Benɛ i bɔni Baiblo ɔ kasemi ɔ, ni komɛ tu munyu kɛ si mi. Se ye huno fĩ ye se, nɛ e de ke: ‘Nɔ́ nɛ nihi ngɛ dee ɔ gba we ye nya. Tsakemi nɛ o ngɛ pee ɔ ji nɔ́ nɛ he hia. Moo ya nɔ nɛ o kase Baiblo ɔ.’ Wa weku si himi ɔ hi pe sa a!”—Viniana.