Moo Ye Bua Nɔ Nɛ O Kɛ Lɛ Ya Fiɛɛmi ɔ
1. Ke waa kɛ nɔ ko ya fiɛɛmi ɔ, mɛni se wa náa ngɛ mi?
1 Be ko ɔ, Yesu tsɔ e kaseli 70 ɔmɛ “enyɔɔnyɔ” konɛ a ya fiɛɛ. (Luka 10:1, NW) Atsinyɛ jemi ko be he kaa enɛ ɔ nɛ e pee ɔ ha nɛ e kaseli ɔmɛ ye bua a sibi nɛ a wo a sibi he wami ngɛ a fiɛɛmi nítsumi ɔ mi. Ke waa kɛ nɔ ko ya fiɛɛmi ɔ, kɛ wa ma plɛ kɛ ye bua lɛ kɛɛ?
2. Ke nɔ nɛ waa kɛ lɛ ya fiɛɛmi ɔ ngɛ fiɛɛe kɛ ngɛ nɔ ko tsɔɔe ɔ, mɛni wa maa pee kɛ tsɔɔ kaa wa ngɛ tue bue, nɛ mɛni heje e sa kaa waa pee jã?
2 Kɛ Gu Tue Nɛ Wa Maa Bu ɔ Nɔ: Ke nɔ nɛ o kɛ lɛ ya fiɛɛmi ɔ ngɛ fiɛɛe kɛ ngɛ nɔ ko tsɔɔe ɔ, moo bu tue saminya. (Yak. 1:19) Ke e ngɛ ngmami ko kanee kɛ ha nɔ ko ɔ, moo kane kɛ nyɛɛ e se ngɛ o Baiblo ɔ mi. Ke nɔ nɛ o kɛ lɛ ya fiɛɛmi ɔ lɛ ngɛ munyu tue jio, wetsɛ ɔ lɛ ngɛ munyu tue jio ɔ, moo hyɛ nɔ nɛ ngɛ munyu tue ɔ hɛ mi. Ke o bu ní sɛɛmi ɔ tue saminya a, lɔɔ maa wo wetsɛ ɔ he wami nɛ lɛ hu e maa bu tue.
3. Ke waa kɛ nɔ ko ya fiɛɛmi nɛ e ngɛ odase yee ɔ, mɛni be wa ma nyɛ maa tu munyu?
3 Kɛ Gu Lemi Nɛ Wa Maa Le Be Nɛ́ E Sa Kaa Waa Tu Munyu ɔ Nɔ: Ke nɔ nɛ waa kɛ ya fiɛɛmi ɔ ngɛ fiɛɛe kɛ tsɔɔ nɔ ko, nɛ wa ngmɛ lɛ blɔ nɛ e tu munyu ɔ, lɔɔ tsɔɔ kaa wa ngɛ bumi kɛ ha lɛ. (Rom. 12:10) E sɛ nɛ waa po e munyu ɔ mi. Ke nɔ nɛ waa kɛ lɛ ya fiɛɛmi ɔ hɛ je nɔ́ nɛ e ma de ɔ nɔ, aloo wetsɛ ɔ bi sane ko nɛ nɔ nɛ waa kɛ lɛ ya fiɛɛmi ɔ de wɔ ke wa ha heto ɔ, e sa kaa waa bɔ mɔde nɛ waa tu munyu kɛ fi nɔ nɛ waa kɛ lɛ ya fiɛɛmi ɔ munyu ɔ se, mohu pe nɛ wa maa tu nɔ́ kpa he munyu. (Abɛ 16:23; Fiɛlɔ 3:1, 7) E sa nɛ munyu nɛ wa maa tu ɔ nɛ fi odase nɛ nɔ nɛ waa kɛ lɛ ya fiɛɛmi ɔ ngɛ yee ɔ se.—1 Kor. 14:8.
4. Mɛni ma ha nɛ wa ma ná bua jɔmi nɛ wa maa ye manye ngɛ wa sɔmɔmi nítsumi ɔ mi?
4 Benɛ kaseli 70 ɔmɛ gbe a fiɛɛmi nítsumi ɔ nya a, a “kpale kɛ ba kɛ bua jɔmi.” (Luka 10:17, NW) Ke waa kɛ nɔ ko ya fiɛɛmi nɛ wa bu tue nɛ wa le be nɛ sa kaa waa tu munyu kɛ ye bua lɛ ɔ, wɔ hu wa ma ná bua jɔmi nɛ wa maa ye manye ngɛ wa sɔmɔmi nítsumi ɔ mi.