Anɛ O Pee Bɔnɛ Waa Kɛ Nihi Kaseɔ Baiblo ɔ Ha a He Nɔ Hyɛmi Nɔ́ Kɛ Tsɔɔ Benɛ O Ya Kekleekle ɔ Lo?

Ke wa de nihi kaa wa suɔ nɛ waa kɛ mɛ nɛ kase Baiblo ɔ, a ti nihi fuu deɔ ke a bua jɔɛ he, loo mɛ hu a kaseɔ Baiblo ɔ ngɛ a sɔlemi ɔmɛ a mi. Akɛnɛ eko ɔ, a li kaa e slo bɔnɛ wa plɛɔ kɛ kaseɔ Baiblo ɔ ngɛ sɔlemi kpa amɛ a he heje ɔ, a li kaa ke waa kɛ mɛ kase Baiblo ɔ, a maa le ní nɛ a bua hu maa jɔ. Enɛ ɔ he ɔ, ngɛ be mi nɛ wa ma de nɔ ɔ kɛkɛ kaa wa suɔ nɛ waa kɛ lɛ nɛ e kase Baiblo ɔ, mɛni heje mohu nɛ waa kɛ hɛngmɛfia bɔɔ ko tsɔɔ we lɛ bɔnɛ wa plɛɔ nɛ waa kɛ nihi kaseɔ Baiblo ɔ ha? Nɔ hetomi nɔ́: Mo ko de mɛ kɛkɛ kaa o le ní hoomi saminya, lɔɔ he ɔ, ke o ma ekohu ɔ, o maa ngɔ niye ní ɔ eko ba ha mɛ; mo ha mɛ niye ní ɔ eko nɛ a sa a nya amlɔ nɔuu! Bɔnɛ o ma plɛ kɛ ngɔ ga womi nɛ ngɛ March 2006 Our Kingdom Ministry ɔ bafa 6 a kɛ pee enɛ ɔ he nɔ hyɛmi nɔ́ ji nɛ ɔ nɛ:

“Anɛ o susu kaa ligbi ko maa ba nɛ munyu nɛ ɔ maa ba mi niinɛ lo? [Kane Yesaya 33:24, nɛ o ngmɛ lɛ blɔ nɛ e ha heto.] Mo ha nɛ ma tsɔɔ mo nɔ́ ko nɛ ngɛ bua jɔmi ngɛ munyu nɛ ɔ he.” Moo ngɔ Baiblo Tsɔɔmi womi ɔ kɛ wo wetsɛ ɔ dɛ mi nɛ o ha nɛ e bli kɛ ya bafa 36, kuku 22 ɔ. Moo kane sane bimi nɛ ngɛ womi ɔ sisi ɔ, nɛ o de wetsɛ ɔ nɛ e hla heto ɔ ngɛ kuku ɔ mi benɛ o ngɛ kanee ɔ. Ke o kane ta a, mo bi sane ɔ ekohu nɛ o bu heto nɛ wetsɛ ɔ ma ha a tue. O kɛ lɛ nɛ bla kɛ kane ngmami kpa nɛ ngɛ kuku ɔ mi. Mo bi lɛ sane nɛ ke be kpa o ya e ngɔ ɔ, o kɛ lɛ ma susu he, nɛ́ o to lɛ be pɔtɛɛ ko konɛ o kpale kɛ ya slaa lɛ. Baiblo mi nikasemi sisi nɛ o je ji lɔɔ nɛ!