Bɔ Nɛ Waa Kɛ Sane Kpakpa Womiyo ɔ Maa Tsɔɔ Nihi Ní Ha
1. Kɛ a pee Sane Kpakpa womiyo ɔ kɛɛ?
1 Kaa bɔ nɛ wa susu he ngɛ July Wa Matsɛ Yemi Sɔmɔmi ɔ mi ɔ, Sane Kpakpa Nɛ Je Mawu Ngɔ! womiyo ɔ ji níhi nɛ waa kɛ tsɔɔ nihi ní ɔ a kpɛti kake nɛ he hia. A ngmɛ́ ngmamihi nɛ a tsɛ se ɔmɛ a mi munyu, bɔ nɛ pee nɛ nihi nɛ waa kɛ mɛ kaseɔ ní ɔ nɛ a kase ní kɛ je Baiblo ɔ mi tɛɛ. A ngma womihi nɛ waa kɛ nihi kaseɔ ɔ nɛ a mi wɛ bɔ nɛ pee nɛ ke nihi kane ngɛ a dɛ he po ɔ, a nu anɔkuale ɔ sisi. Se womiyo nɛ ɔ lɛɛ e be jã. A pee lɛ konɛ tsɔɔlɔ ɔ, kɛ kaselɔ ɔ nɛ a susu he. Enɛ ɔ he ɔ, ke o kɛ womiyo nɛ ɔ ma ha nɔ ko ɔ, tsɔɔ lɛ bɔ nɛ waa kɛ nihi peeɔ ní kasemi ɔ ha, konɛ e bua nɛ jɔ he kaa e maa kase sane kpakpa a kɛ je Baiblo ɔ mi.—Mat. 13:44.
2. Ke o ya na nɔ ko ɔ, mɛni blɔ nɔ o maa gu nɛ o kɛ lɛ maa je Sane Kpakpa womiyo ɔ kasemi sisi nɔuu?
2 Ke O Ya Na Nɔ Ko ɔ: O ma nyɛ ma de lɛ ke: “I ba slaa mo ejakaa, nihi fuu pee yeyeeye ngɛ bɔ nɛ hwɔɔ se si himi ma ji ha a he. Anɛ o susu kaa si himi ɔ ma ba hi ligbi ko lo? [Ngmɛɛ lɛ blɔ nɛ e ha heto.] Sane kpakpa ko ngɛ Baiblo ɔ mi nɛ haa nɔ hɛ kɛ nɔ fɔmi. A ha sane bimi nɛ ɔmɛ a heto ngɛ Baiblo ɔ mi.” Mo ha wetsɛ ɔ womiyo ɔ kake, nɛ e hla sane bimihi nɛ ngɛ womi ɔ se ɔ kake. Lɔ ɔ se ɔ, o kɛ lɛ nɛ susu kekle kuku ɔ he, nɛ o kɛ tsɔɔ lɛ bɔ nɛ waa kɛ nihi peeɔ ní kasemi ɔ ha. O ma nyɛ ma bi wetsɛ ɔ sane bimi ɔ kake nɛ o susu kaa e bua maa jɔ he, nɛ o tsɔɔ lɛ bɔ nɛ womiyo ɔ ma nyɛ maa ye bua lɛ konɛ e ná heto ɔ ngɛ Baiblo ɔ mi. Ke video ko ngɛ jw.org nɛ kɔɔ nɔ́ nɛ o kɛ lɛ ngɛ he susue ɔ he ɔ, o ma nyɛ ma je kɛ tsɔɔ lɛ.
3. Moo tsɔɔ bɔ nɛ waa kɛ nihi maa kase Sane Kpakpa womiyo ɔ ha.
3 Bɔ Nɛ O Maa Pee Ní Kasemi ɔ Ha: (1) Moo kane sane bimi nɛ a ngma lɛ agboagbo ɔ kɛ tsɔɔ wetsɛ ɔ konɛ e juɛmi nɛ hi oti ɔmɛ a nɔ. (2) Lɔ ɔ se ɔ, kane kuku nɛ nyɛɛ se ɔ. (3) Kane ngmamihi nɛ a kpɛ̃ mɛ ɔ, nɛ o ngɔ sane bimihi nɛ sa kɛ ye bua wetsɛ ɔ nɛ e nyɛ nɛ e na bɔ nɛ ngmami ɔmɛ haa sane bimi nɛ je ní kasemi ɔ sisi ɔ heto ha. (4) Ke kuku kpa ko hu ngɛ sane bimi ɔ sisi ɔ, ngɔɔ blɔ tsɔɔmi 2, kɛ 3 kɛ tsu he ní. Ke video ko ngɛ nɛ kɔɔ sane bimi ɔ he, se o je we ha lɛ lolo ɔ, mo je ha lɛ ngɛ nyɛ ní sɛɛmi ɔ mi. (5) Ke o gbe ní kasemi ɔ nya a, mo bi wetsɛ ɔ nɛ e ha sane bimi nɛ a ngma lɛ agboagbo ɔ heto, konɛ o hyɛ kaa e nu sisi lo.
4. Mɛni maa ye bua wɔ konɛ waa kɛ womiyo nɛ se be nɛ ɔ nɛ tsu ní saminya?
4 Bɔɔ mɔde nɛ o kase níhi nɛ ngɛ womiyo ɔ mi ɔ saminya. Moo ngɔ kɛ tsu ní ngɛ be nɛ sa mi. Loko o kɛ nɔ ko ma ya kase womiyo ɔ, moo sɛ hlami nɛ o susu ní kaselɔ ɔ he, nɛ o hla blɔ nɛ hi nɛ o maa gu nɔ nɛ o kɛ lɛ ma susu ngmamihi nɛ ngɛ ní kasemi ɔ mi ɔ he. (Abɛ 15:28; Níts. 17:2, 3) Ke o kɛ womiyo nɛ ɔ tsu ní saminya a, o maa na kaa e ji níhi nɛ waa kɛ tsɔɔ nihi anɔkuale ɔ a kpɛti kake nɛ e se be!