Bɔnɛ O Ma Plɛ Nɛ O Kɛ Please Follow Up (S-43) Womi ɔ Ma Tsu Ní Ha

Ke o na nɔ ko nɛ e bua jɔ munyu ɔ he se pi o zugba kpɔ ɔ mi nɛ e ngɛ aloo o na nɔ ko nɛ e tuɔ ma se gbi ɔ, e sa nɛ o ngma womi nɛ ɔ nɔ ní. E ngɛ mi kaa be ko nɛ be ɔ, wa ngmaa womi nɛ ɔ nɔ ní ke waa kɛ nɔ ko nɛ tuɔ ma se gbi kpe, nɔ ɔ bua jɔ munyu ɔ he jio, e bua jɔɛ he jio, se amlɔ nɛ ɔ lɛɛ, ja nɔ ɔ bua jɔ munyu ɔ he pɛ loko wa maa ngma womi nɛ ɔ nɔ ní. Se ke mumui ji nɔ ɔ lɛɛ, e sa nɛ waa ngma womi nɛ ɔ nɔ ní. Ke waa kɛ mumui ko kpe, e bua jɔ munyu ɔ he jio, e bua jɔɛ he jio ɔ, e sa nɛ waa ngma S-43 womi ɔ nɔ ní.

Ke wa ngma womi ɔ nɔ ní ta a, mɛni e sa kaa waa pee? E sa nɛ wa kɛ ha asafo ɔ mi womi ngmalɔ ɔ. Ke e le asafo nɛ e sa kaa e ngɔ womi ɔ kɛ mane mɛ ɔ, e ma nyɛ ma kɛ mane asafo mi nikɔtɔmahi nɛ a ngɛ jamɛ a asafo ɔ mi ɔ tɛɛ nɛ a nyɛ nɛ a to blɔ nya nɛ a ye bua nɔ nɛ e bua jɔ munyu ɔ he ɔ. Ke e li asafo nɛ e maa ngɔ womi ɔ kɛ mane ɔ, e ngɔ kɛ mane asafo ɔ nítsumi he kɔni ɔ.

Ke nɔ nɛ e tuɔ ma se gbi se e bua jɔ munyu ɔ he ɔ ngɛ o zugba kpɔ ɔ mi ɔ, o ma nyɛ maa ya nɔ maa slaa lɛ konɛ o ha nɛ e bua jɔmi ɔ nɛ ya hɛ mi kɛ ya si benɛ fiɛɛlɔ nɛ e tuɔ je gbi ɔ ma ba slaa lɛ.—Hyɛ April 2010 Wa Matsɛ Yemi Sɔmɔmi ɔ, bafa 6.