‘Ha Nɛ A Pee Mawu Suɔmi Nya Ní’
1. Ligbi kake kpe klɛdɛɛ nɛ a maa pee ngɛ sɔmɔmi jeha 2012 ɔ yi ji mɛni, nɛ mɛni heje nɛ e sa kaa wa susu jamɛ a munyu ɔ he?
1 Yehowa suɔmi nya nɛ e bɔ wɔ ngɛ. (Kpoj. 4:11) Enɛ ɔ he ɔ, ke wa kase we nɔ́ nɛ ji Mawu suɔmi nya ní konɛ waa pee ɔ, wa be nyɛe ma tsu yi mi tomi heje nɛ a bɔ wɔ ngɛ ɔ he ní. Enɛ ɔ peemi be gbɔjɔɔ kaa bɔnɛ eko ɔ wa susuɔ ɔ, ejakaa e sa nɛ waa hwu kɛ si “níhi nɛ wa nɔmlɔtso ɔ kɛ wa juɛmi suɔ ɔ,” loo waa hwu kɛ si “níhi nɛ ma jeli suɔ peemi” ɔ. (Efe. 2:3; 1 Pet. 4:3; 2 Pet. 2:10) Ke pi Mawu yemi kɛ buami nya a, jinɛ wa ma ya ‘nɔ klama nɛ Abosiami tsɔ ha wɔ kaa waa pee e suɔmi nya ní’ ɔ mi. (2 Tim. 2:26) Ligbi kake kpe klɛdɛɛ nɛ wa maa pee ngɛ sɔmɔmi jeha 2012 ɔ mi, nɛ maa je sisi ngɛ September 1, 2011 ɔ mi ɔ, maa ye bua wa ti nɔ tsuaa nɔ nɛ́ e tsu ní bimi etɛne nɛ he hia wawɛɛ nɛ Yesu tu he munyu ngɛ sɔlemi he nɔ hyɛmi nɔ́ nɛ e pee ɔ mi ɔ he ní, ní bimi nɛ ɔ ji, ‘Ha nɛ a pee o suɔmi nya ní.’—Mat. 6:9, 10.
2. A ma ha mɛni sane bimihi a heto ngɛ ligbi kake kpe klɛdɛɛ ɔ sisi?
2 Sane Bimihi Nɛ A Ma Ha Heto: Ke o ngɛ munyuhi nɛ a maa tu ngɛ kpe ɔ tue bue ɔ, moo hyɛ kaa o maa na sane bimi nɛ ɔmɛ a heto lo: Mɛni hu he hia kɛ piɛɛ Mawu Munyu ɔ tue bumi he? Ngɛ mɛni blɔ nɔ wa maa ya nɔ ma yɔse nɔ́ nɛ ji Mawu suɔmi nya ní nɛ waa pee? Mɛni heje nɛ e sa nɛ waa je wa tsui mi nɛ waa fiɛɛ kɛ tsɔɔ nihi tsuo ɔ? Mɛni blɔ nɔ wa maa gu kɛ ná bua jɔmi nitsɛ ngɛ si himi mi? Nihewi kɛ yihewi, mɛni e sa kaa nyɛ ha Yehowa nɛ e na kaa nyɛ ngɛ pee? Mɛni se namihi nɛ jeɔ Mawu suɔmi nya ní peemi mi kɛ baa? Mɛni heje nɛ e he hia nɛ waa fia nihi kɛ ma si nɛ waa wo mɛ he wami ɔ?
3. Kɛ o ma plɛ kɛ ná munyuhi nɛ a maa tu ngɛ ligbi kake kpe klɛdɛɛ ɔ he se ha kɛɛ?
3 Moo bɔ mɔde nɛ o ya kpe ɔ nɛ ke o ya hu ɔ, o bu munyuhi nɛ a maa tu ɔ tue saminya. Betel nane mi dalɔ ko aloo kpokpa nɔ hyɛlɔ ko maa ba kpe ɔ. Loko a maa je kpe ɔ sisi ɔ loo ke a kpa kpe ɔ, moo bɔ mɔde nɛ o kɛ Betel nane mi dalɔ ɔ loo kpokpa nɔ hyɛlɔ ɔ kɛ e yo ɔ (ke e ngɛ yo) nɛ sɛɛ ní faa. Ke o je kpe ɔ sisi kɛ ho we mi ya a, o hɛ nɛ ko je munyuhi nɛ o ya nu ɔ a nɔ, mohu ɔ, o kɛ o weku ɔ nɛ susu munyuhi nɛ nyɛ ya nu ɔ a he nɛ nyɛɛ hyɛ bɔnɛ nyɛɛ kɛ ma tsu ní ha konɛ nyɛ nyɛ nɛ nyɛɛ pee Mawu suɔmi nya ní kɛ pi si.—Yak. 1:25.
4. Mɛni heje nɛ e he hia kaa waa kɛ Mawu suɔmi nya ní maa pee nɔ́ titli ngɛ wa si himi mi ɔ?
4 E be kɛe nɛ a ma kpata nihi nɛ a dii mɛ nitsɛmɛ a suɔmi nya ní peemi se nɛ a kua kaa a maa ba a he si kɛ ha Yehowa suɔmi nya ní peemi ɔ a hɛ mi. (1 Yoh. 2:17) Wa bua jɔ kaa Yehowa dla munyu nɛ e ba ngɛ e be nya nɛ ɔ kɛ ha wɔ konɛ e ye bua wɔ nɛ waa ngɔ Mawu suɔmi nya ní peemi kɛ pee nɔ́ titli ngɛ wa si himi mi!