Mawu Munyu ɔ Hi Kɛ Ha Ní Tsɔɔmi
1. Mɛni ji kpe wayo nɛ wa maa pee ngɛ 2014 sɔmɔmi jeha a mi ɔ munyuyi, nɛ mɛni sane bimi a ma ha heto ngɛ kpe ɔ sisi?
1 Wa ‘Tsɔɔlɔ Kpanaa’ nɛ ji Yehowa a ji tsɔɔlɔ nɛ pe kulaa ngɛ je ɔ mi tsuo. (Yes. 30:20, 21) Mɛni blɔ nɔ Yehowa guɔ kɛ tsɔɔ wɔ ní? E ha wɔ e Munyu nɛ ji Baiblo ɔ, nɛ womi nɛ ɔ nɔ kuɔ pe womihi tsuo. Wa ma ná ní nɛ Mawu tsɔɔ wɔ ɔ he se ngɛ nɔmlɔtso mi, juɛmi mi, he numi mi, kɛ mumi mi ngɛ mɛni blɔ nɔ? A ma ha sane bimi nɛ ɔ heto ngɛ kpe wayo nɛ wa maa pee ngɛ 2014 sɔmɔmi jeha a mi ɔ sisi. Kpe wayo ɔ munyuyi ji, ‘Mawu Munyu ɔ Hi Kɛ Ha Ní Tsɔɔmi,’ nɛ a kɛ da 2 Timoteo 3:16 nɔ.
2. Mɛni sane bimihi nɛ jeɔ oti ɔmɛ kpo ɔ nɛ a ma ha a heto ngɛ kpe ɔ sisi?
2 Hyɛ Kaa O Maa Na Oti Nɛ Ɔmɛ Lo: A ma ha sane bimi nɛ ɔmɛ nɛ jeɔ kpe ɔ mi oti ɔmɛ kpo ɔ a heto:
• Mɛni he wami lɛ ní nɛ Mawu tsɔɔ wɔ ɔ náa ngɛ wa si himi nɔ? (Yes. 48:17, 18)
• Ke wa pee tsakemihi ngɛ wa si himi mi bɔnɛ pee nɛ waa kɛ wa be tsuo nɛ sɔmɔ Yehowa a, mɛni jɔɔmihi wa ma ná? (Mal. 3:10)
• Kɛ e sa kaa waa pee wa ní ha kɛɛ ngɛ “tsɔɔmi slɔɔtoslɔɔtohi” a he? (Heb. 13:9)
• Mɛni blɔ nɔ wa maa gu kɛ kase bɔnɛ Yesu “plɛ kɛ tsɔɔ ní” ha a? (Mat. 7:28, 29)
• Mɛni heje nɛ e sa kaa tsɔɔli nɛ a ngɛ asafo ɔ mi ɔ nɛ a tsɔɔ mɛ nitsɛmɛ a he ní ɔ? (Rom. 2:21)
• Mawu Munyu ɔ hi kɛ ha mɛni? (2 Tim. 3:16)
• Kɛ je ma amɛ a “mimiɛmi” ɔ sa nihi a he ha kɛɛ? (Hag. 2:6, 7)
• Mɛni hɛ kɛ nɔ fɔmi Yehowa ngɛ ngɛ wa mi? (Efe. 5:1)
• Mɛni heje nɛ e sa kaa waa bɔ mɔde wawɛɛ nɛ waa ya nɔ nɛ waa pɛtɛ ní nɛ Yehowa tsɔɔ wɔ ɔ he ɔ? (Luka 13:24)
3. Mɛni heje nɛ e he hia kaa waa ya kpe ɔ nɛ waa bu munyuhi nɛ a maa tu ɔ tue saminya a?
3 Loko Paulo maa ngma munyuhi nɛ a ngɔ wa kpe wayo ɔ kɛ da nɔ ɔ, e sɛ hlami nɛ e de ngɛ 2 Timoteo yi 3 ɔ mi kaa je ɔ mi maa wa, nɛ lɔɔ maa tsɔɔ kaa wa ngɛ nyagbe ligbi ɔmɛ a mi. E ngma ke: “Nimli yayamihi, kɛ nɔ sisili maa ya nɔ maa pee yayami kɛ be nɔ; a maa sisi nihi hluu kɛ yaa si a maa sisi mɛ nitsɛmɛ a he.” (2 Tim. 3:13) Bɔnɛ pee nɛ a ko sisi wɔ ɔ, e he hia nɛ waa bu níhi nɛ Mawu hii wɔ tsɔɔe ɔ tue nɛ wa kɛ tsu ní! Enɛ ɔ he ɔ, nyɛ ha nɛ waa mwɔ wa yi mi kpɔ kaa wa maa ya kpe wayo nɛ a to he blɔ nya ngɛ e be nya a, nɛ waa bu munyuhi nɛ a maa tu ɔ tue saminya.