Bu Tue Nɛ́ O Kase
1. Mɛni heje nɛ e biɔ mɔde bɔmi loko nɔ ko ma nyɛ maa bu tue nɛ e kase ní ngɛ kpe ngua a sisi ɔ?
1 E be kɛe nɛ 2013 kpe ngua amɛ maa je sisi. A ngɛ dengme gboe kɛ ngɛ kpe nɛ ma tsu níhi nɛ hia adesahi ngɛ je ɔ mi tsuo mwɔnɛ ɔ a he ní ɔ he blɔ nya toe. Anɛ o to blɔ nya kaa o maa ya kpe ɔ ligbi etɛ ɔ tsuo lo? Níhi fuu gblaa nɔ juɛmi ngɛ kpe nguahi a sisi, enɛ ɔ he ɔ, e biɔ nɛ waa bu ní peemi ɔ tue saminya. Akɛnɛ ní peemi ɔmɛ ngɔɔ be fuu pe asafo mi kpehi heje ɔ, e sa nɛ waa pee totooto be kɛkɛɛ. Jahanɛ se hu, blɔ hiami kɛ ní kpahi ma nyɛ ma ha nɛ pɔ maa tɔ wɔ. Mɛni maa ye bua wɔ konɛ waa pee totooto nɛ waa bu munyu ɔ tue nɛ waa kase ní?—5 Mose 31:12.
2. Mɛni blɔ nɔ nɛ wa ma nyɛ maa dla wa tsui kɛ to kpe ɔ?
2 Loko Kpe ɔ Maa Su: A kɛ kpe ɔ he blɔ nya tomi ɔ, kɛ munyuyihi tsuo nɛ a maa sɛsɛ a he ɔ, kɛ ngmami oti kake loo enyɔ wo wa Internet nítsumi he ɔ nɔ ngɛ www.jw.org. Ke wa ngɛ Internet ɔ eko nɛ wa sɛ hlami nɛ wa susu munyu nɛ ɔmɛ a he ɔ, e maa ye bua wɔ konɛ wa dla wa tsui kɛ to munyuhi nɛ a maa tu ɔmɛ. (Ezra 7:10) Ke nyɛ ngɛ nyɛ gbɔkuɛ Weku Mawu Jami ɔ pee ɔ, anɛ nyɛ ma nyɛ maa ngɔ be bɔɔ kɛ susu kpe ɔ blɔ nya tomi ɔ he konɛ weku ɔ mi bi tsuo nɛ a hyɛ kpe ɔ blɔ kɛ bua jɔmi lo?
3. Mɛni maa ye bua wɔ konɛ waa bu tue saminya?
3 Ke Kpe ɔ Ngɛ Nɔ Yae: Ke e maa hi ɔ, moo ya niase yami he ɔ loko a je kpe ɔ sisi. E sa nɛ nikɔtɔmahi nɛ a piɛɛ jokuɛwi a he ke a maa ya niase yami he ɔ be mi nɛ kpe ɔ ngɛ nɔ yae ɔ. Moo gbe o mobile phone ɔ konɛ e ko je o juɛmi kɛ je blɔ nya tomi ɔ nɔ kɛ gu nihi nɛ a ma tsɛ mo, loo sɛ gbi nɛ a maa ngma kɛ mane mo, loo sɛ gbi nɛ o maa ngma kɛ mane nɔ ko ɔ nɔ. Ke e sa kaa o su o phone ɔ, mo kɛ fɔ he nɛ ke nɔ ko tsɛ ɔ, e be nihi haoe. Ke o kɛ computer nɛ a hɛɛɔ ngɛ dɛ mi ma tsu ní be mi nɛ kpe ɔ ngɛ nɔ yae ɔ, moo hyɛ nɛ e ko je nihi a juɛmi kɛ je kpe ɔ nɔ. Mo ko ye ní loo o nu ní be mi nɛ kpe ɔ ngɛ nɔ yae. (Fiɛlɔ 3:1) Moo hyɛ munyu tulɔ ɔ hɛ mi totooto. Ke e tsɛ ngmami ko ɔ, mo bli o Baiblo ɔ nɛ o kane kɛ nyɛɛ e se. Moo ngma munyu oti ɔmɛ.
4. Mɛni blɔ nɔ fɔli ma nyɛ maa gu kɛ ye bua a bimɛ ɔmɛ konɛ a bu tue nɛ a kase ní?
4 Wa suɔ nɛ wa bimɛ ɔmɛ hu nɛ a bu tue nɛ a kase. Abɛ 29:15 deɔ ke: “Ke a ngmɛɛ jokuɛ je mi he ha lɛ ɔ, e pueɔ e nyɛ hɛ mi si.” Enɛ ɔ he ɔ, e hi kaa wekuhi maa hi he kake konɛ fɔli a hyɛ nɛ a bimɛ ɔmɛ a bu ní peemi ɔ tue nɛ a ko hi munyu tue, loo a hi sɛ gbi ngmae kɛ hi manee, loo a hi nyɛɛe kɛ hi yae kɛ hi bae. E sa nɛ waa pee jã be tsuaa be, kɛ be nɛ a maa pee drama a. Ke jokuɛwi ɔmɛ a wɛ nɛ́ a maa nu munyu nɛ a maa tu ɔ tsuo sisi po ɔ, a ma nyɛ ma tsɔse mɛ nɛ a hi si dii nɛ a be mahe hwɔe.
5. Mɛni heje nɛ se nami ngɛ he kaa wa ma nylɔ munyuhi nɛ wa nu ngɛ kpe ɔ sisi ɔ mi ɔ, nɛ mɛni blɔ nɔ wa maa gu kɛ pee jã?
5 Daa Ligbi Ke A Kpa Kpe ɔ: Moo hwɔ si mla konɛ o ná mahe kpakpa ko nɛ o hwɔ. Ke o nylɔ munyuhi nɛ o ya nu ɔmɛ a mi ɔ, e maa tlɔ o yi mi be kɛkɛɛ. Enɛ ɔ he ɔ, ke waa kɛ be bɔɔ susu munyuhi nɛ wa ya nu ɔmɛ a he daa gbɔkuɛ kaa weku ɔ, wa ma na he se. Ke o kɛ o huɛmɛ nyɛ ya ní yemi he ko ɔ, o ma nyɛ maa ngɔ níhi nɛ o ngma a kɛ ya nɛ o kɛ mɛ nɛ susu oti kake loo enyɔ nɛ o bua jɔ he ɔ a he. Ke nyɛ gbe kpe ɔ nya nɛ nyɛ ho we mi ya a, nyɛ ma nyɛ maa ngɔ nyɛ Weku Mawu Jami be ɔ bɔɔ kɛ susu bɔnɛ nyɛ weku ɔ maa ngɔ níhi nɛ nyɛ kase ɔ kɛ tsu ní ha a he. Nyɛ ma nyɛ maa to be konɛ daa otsi ɔ, nyɛɛ kase womihi nɛ a je kpo ɔ bɔɔ.
6. Anɛ kpe ɔ sisi nɛ wa maa ya a kɛkɛ ɔ hiɛ lo? Moo tsɔɔ nya.
6 Loko okplɔɔ ngmɛmi ko he maa ba se nami ɔ, ja nihi nɛ a ba okplɔɔ ngmɛmi ɔ sisi ɔ ye niye ní ɔ. Wa ma nyɛ ma de jã a nɔuu ngɛ mumi mi okplɔɔ nɛ Yehowa maa ngmɛ ngɛ kpe ngua a sisi ɔ he. E ba mi kaa wa ma ná kpe ɔ he se kɛ pi si kɛ gu kpe ɔ tsuo nɛ wa maa ya, nɛ waa bu tue, nɛ waa kɛ ní nɛ wa kase ɔ ma tsu ní ɔ nɔ.