Moo Ye Bua Nihi Konɛ A Bu Mawu Tue
1. Mɛni womiyohi lɛ a je kpo ngɛ “Mawu Matsɛ Yemi ɔ Nɛ Ba!” Kpe Ngua a sisi, nɛ mɛni heje nɛ a he ngɛ se nami?
1 Ngɛ “Mawu Matsɛ Yemi ɔ Nɛ Ba!” Kpe Ngua a sisi ɔ, a je womiyohi ehe enyɔ nɛ ji Bu Mawu Tue Nɛ́ O Hi Si Kɛ Ya Neneene, kɛ nɔ́ nɛ a po lɛ kpiti nɛ ji, Bu Mawu Tue ɔ kpo. Akɛnɛ womi ɔmɛ a mi ningma amɛ pi heje ɔ, e be yee kaa a maa tsɔɔ sisi mlamlaamla. Ngɛ anɔkuale mi ɔ, loko a ma je Bu Mawu Tue Nɛ́ O Hi Si Kɛ Ya Neneene ɔ kpo ngɛ Blɛfo gbi mi ɔ, a kplɛɛ nɔ kaa a tsɔɔ sisi kɛ ya gbihi 431 a mi.
2. Mɛnɔmɛ nɛ a ma ná womiyo nɛ ɔmɛ a he se?
2 Mɛnɔmɛ titli nɛ a ma ná womiyo nɛ ɔmɛ a he se? Mo susu si himihi nɛ nyɛɛ se nɛ ɔ nɛ pɔɔ bami ngɛ je kɛ wɛ ɔ he nɛ o hyɛ:
• Fiɛɛlɔ ko kɛ wetsɛ ko ngɛ ní sɛɛe, benɛ e ya e ngɔ kekleekle loo benɛ e kpale ya slaa lɛ ɔ, e yɔse kaa wetsɛ ɔ li ní kanemi kulaa loo e li ní kanemi saminya.
• Fiɛɛlɔ ko fiɛɛɔ kɛ haa nihi nɛ a tuɔ gbi nɛ a tsɔɔ wa womi ɔmɛ bɔɔ ko sisi kɛ ya mi ɔ mi, aloo ngɛ gbi nɛ a tsɔɔ we wa womi ɔ eko sisi kɛ yɛ mi ɔ mi. Aloo nihi hiɛhiɛɛ nɛ ngɛ zugba kpɔ ɔ mi ɔ nyɛ we nɛ a kaneɔ gbi nɛ a tuɔ ɔ saminya.
• Fiɛɛlɔ ko fiɛɛɔ kɛ haa mumui ko ngɛ mumuihi a gbi mi ngɛ e zugba kpɔ ɔ mi.
• Fɔlɔ ko suɔ kaa e maa tsɔɔ e bi wayoo ko nɛ e li ní kanemi lolo ɔ anɔkuale ɔ.
3. Kɛ a plɛ kɛ to níhi a he blɔ nya ngɛ Bu Mawu Tue womiyo ɔ mi ha kɛɛ?
3 Bɔnɛ A To Níhi Nɛ Ngɛ Mi ɔ A He Blɔ Nya Ha: Ningma bɔɔ ko pɛ nɛ ji munyuza kpokploo kɛ Ngmami nɛ a tsɛ se kɛ ma munyu oti ɔmɛ a nɔ mi ɔ nɛ ngɛ Bu Mawu Tue ɔ bafa tsuaa bafa mi. Mɛni heje? Moo ngɔ lɛ kaa nɔ ko ha mo womiyo ko nɛ a ngma ngɛ gbi nɛ o be nyɛe maa kane mi, nɛ́ eko ɔ, e mi ningma amɛ ngɛ kaa ma se ningma. Ke fonihi nɛ a ngɛ fɛu ngɛ mi po ɔ, anɛ o ma ná he se lo? Nihi fuu be he bua jɔmi náe. Jã kɛ̃ nɛ womihi nɛ a ngma ní ngɛ mi ɔ woɔ nihi nɛ a li ní kanemi ɔ a he gbeye. Enɛ ɔ he ɔ, fonihi nɛ a ngɛ fɛu ngɛ bafa tsuaa bafa, nɛ a pee okadi kɛ tsɔɔ bɔnɛ a ma susu foni ɔmɛ a he setsɔsetsɔ ha.
4. Kɛ a plɛ kɛ to níhi nɛ ngɛ Bu Mawu Tue Nɛ́ O Hi Si Kɛ Ya Neneene womiyo ɔ mi ɔ he blɔ nya ha kɛɛ?
4 Fonihi nɛ ngɛ Bu Mawu Tue Nɛ́ O Hi Si Kɛ Ya Neneene ɔ mi ɔ nɔuu kɛ̃ lɛ ngɛ Bu Mawu Tue ɔ mi ɔ nɛ. A pee konɛ a kɛ ye bua nihi nɛ a nyɛ we nɛ a kaneɔ ní saminya loo a ngɛ bɔnɛ a kaneɔ ní ha a kasee ɔ. Ke fiɛɛlɔ ko kɛ nɔ ko ngɛ Bu Mawu Tue womiyo ɔ kasee ɔ, fiɛɛlɔ ɔ ma nyɛ maa hyɛ Bu Mawu Tue Nɛ́ O Hi Si Kɛ Ya Neneene womiyo nɛ ɔ nɔ konɛ e kɛ nɔ ɔ nɛ kase ní ɔ. Ngɛ bafa enyɔ tsuaa bafa enyɔ nɛ hɛɛ nikasemi kake mi ɔ, o maa na nikasemi ɔ he sane bimi nɛ a ma ha heto ngɛ bafa amɛ a mi ɔ ngɛ yinɔ ngɛ muɔ nɔ blɔ. Munyuhi kɛ ngmamihi nɛ a tsɛ se hu piɛɛ foni ɔmɛ a he. Kɛ ma bafahi fuu a sisi ngɛ kɔnya a, daka ko nɛ a ngma oti kɛ Baiblo ngmami kpahi ngɛ mi ɔ ngɛ lejɛ ɔ nɛ a ma nyɛ maa da ní kaselɔ ɔ nyɛmi nɔ nɛ a kɛ lɛ nɛ susu he.
5. Mɛni be waa kɛ womiyo nɛ ɔmɛ ma nyɛ ma ha nihi, nɛ mɛni blɔ nɔ wa maa gu kɛ ha?
5 Bɔnɛ Waa Kɛ Womiyo Ɔmɛ Ma Tsu Ní Ha: Ke tsa pi womiyohi nɛ a ma ha ngɛ nyɔhiɔ ɔ mi po ɔ, o ma nyɛ ma ha womiyo nɛ ɔmɛ eko tsuaa eko be tsuaa be nɛ o ngɛ fiɛɛe ngɛ wehi a mi nɛ o na kaa e he hia kaa o ha nihi. (Hyɛ daka nɛ e yi ji “Bɔnɛ A Ma Plɛ Kɛ Ha Womiyo Ɔmɛ Ha.”) Ke o kpale ya slaa nɔ ko nɛ ngɛ munyu ɔ he bua jɔmi ɔ, o ma nyɛ ma de lɛ kaa o suɔ nɛ o kɛ nɔ́ ko nɛ tsɔɔ lɛ, lɔɔ se ɔ, o kɛ womiyo ɔ nɛ ha lɛ.
6. Mɛni blɔ nɔ wa maa gu nɛ waa kɛ womiyo nɛ ɔmɛ nɛ pee Baiblo mi nikasemi?
6 Akɛnɛ sane bimihi be Bu Mawu Tue womiyo ɔ mi heje ɔ, e sɛ nɛ nikasemi ɔ nɛ pee sane bimi kɛ heto hami kaa bɔnɛ wa pɔɔ peemi ke waa kɛ nɔ ko ngɛ Baiblo Tsɔɔmi womi ɔ kasee ɔ. Ngɛ ma tsuaa ma nɔ ɔ, nihi suɔ nɛ a bu sanehi tue. Enɛ ɔ he ɔ, moo da foni ɔmɛ a nɔ kɛ tsɔɔ nihi Baiblo ɔ mi sanehi. Moo tsɔɔ nɔ́ nɛ ngɛ foni ɔ mi ɔ sisi. Mo je bua jɔmi kpo. Ha nɛ ní kaselɔ ɔ nɛ de mo ní nɛ e na, kɛ bɔnɛ e susu ha. Kane ngmami ɔmɛ nɛ ngɛ bafa a sisi ɔ, nɛ o kɛ lɛ nɛ susu nɔ́ nɛ ngmami ɔ de ɔ he. Mo bi lɛ sanehi nɛ ma ha nɛ e kɛ e he maa wo ní sɛɛmi ɔ mi konɛ o kɛ le keji e nu níhi a sisi loo e nui sisi. Ke o kɛ lɛ ngɛ Bu Mawu Tue Nɛ́ O Hi Si Kɛ Ya Neneene womiyo ɔ kasee ɔ, o kɛ lɛ tsuo nɛ kane munyuhi nɛ a ngma kɛ ngmamihi nɛ a tsɛ se ngɛ mi ɔ konɛ nyɛ susu foni tsuaa foni he.
7. Mɛni blɔ nɔ wa maa gu kɛ ye bua wa Baiblo kaseli konɛ a ya a hɛ mi?
7 Moo Ye Bua Ní Kaselɔ ɔ Nɛ E Ya E Hɛ Mi: Wa ngɛ hɛ kɛ nɔ fɔmi kaa níhi nɛ o kɛ o Baiblo kaselɔ ngɛ kasee ɔ maa wo lɛ he wami nɛ e bua maa jɔ kaa e maa kase bɔnɛ a kaneɔ ní ha konɛ lɛ nitsɛ e nyɛ nɛ e kase Yehowa he ní ngɛ e dɛhe. (Mat. 5:3; Yoh. 17:3) Enɛ ɔ he ɔ, ke o kɛ lɛ ngɛ Bu Mawu Tue womiyo ɔ kasee ɔ, kɛ yaa kɛ yaa a, o ma nyɛ maa tsɔɔ lɛ bɔnɛ a kaneɔ ní ha konɛ eko ɔ, o kɛ lɛ nɛ tsa nikasemi ɔ nɔ ngɛ Bu Mawu Tue Nɛ́ O Hi Si Kɛ Ya Neneene womiyo ɔ mi. Ke o kɛ nɔ ɔ kase womiyo ɔ eko tsuaa eko ta a, a be nyɛe maa baptisi lɛ. E sa nɛ o kɛ lɛ nɛ tsa nikasemi ɔ nɔ ngɛ Baiblo Tsɔɔmi womi ɔ loo womi kpa nɛ ma ha nɛ e nu Baiblo ɔ mi anɔkuale ɔ sisi saminya a mi.
8. Mɛni heje nɛ o bua jɔ kaa a pee womiyo ehe nɛ ɔmɛ konɛ wa kɛ tsu ní ngɛ fiɛɛmi nítsumi ɔ mi ɔ?
8 Loko nihi ma ná neneene wami ɔ, ja a bu je mluku ɔ Nɔ Yelɔ ɔ tue. (Yes. 55:3) Yehowa suɔ kaa “nimli tsuo” nɛ nihi nɛ a li ní kanemi ɔ hu piɛɛ he ɔ nɛ a kase bɔnɛ a buɔ Mawu tue ha. (1 Tim. 2:3, 4) Wa bua jɔ kaa wa nine su womiyo ehe nɛ ɔmɛ nɛ wa ma nyɛ ma kɛ tsɔɔ nihi bɔnɛ a ma plɛ kɛ bu Mawu tue ha a nɔ!
[Daka ngɛ bafa 3]
Bɔnɛ A Ma Plɛ Kɛ Ha Womiyo Ɔmɛ Ha
Moo ngɔ bafa 2-3 kɛ tsɔɔ wetsɛ ɔ, nɛ o de ke: “Anɛ o maa suɔ kaa o hi je ko nɛ mi ngɛ kikɛ ɔ mi lo? [Ngmɛɛ lɛ blɔ nɛ e ha heto.] Ngmami ɔ [aloo, womi klɔuklɔu nɛ ɔ] wo si kaa Mawu maa pee je ɔ ehe, nɛ tue mi jɔmi maa hi mi, nɔ ko be ohia yee nɛ nɔ ko hu be hiɔ nue. Mo kadi nɔ́ nɛ wa maa pee nɛ wa ma nyɛ maa sɛ je ehe ɔ mi. [Kane Yesaya 55:3 nɛ a tsɛ se ngɛ bafa 3 ɔ.] Ngmami ɔ ngɛ wɔ dee ke ‘waa ba’ Mawu ngɔ nɛ waa bu lɛ tue. Se mɛni blɔ nɔ wa guɔ kɛ buɔ Mawu tue?” Mo bli kɛ ya bafa 4-5 ɔ nɛ o kɛ wetsɛ ɔ nɛ susu heto ɔ he ngɛ lejɛ ɔ. Ke e be deka a, mo si womiyo ɔ kɛ ha lɛ nɛ o to blɔ nya nɛ o kpale ya slaa lɛ nɛ o kɛ lɛ nɛ susu heto ɔ he.