Kɛ to
Anɛ O Kɛ Womiyo Nɛ Ɔmɛ Ngɛ Ní Tsue Lo?
Spirit of the Dead
A pee konɛ nihi nɛ a he ye kaa ke adesa gbo ɔ, e yaa nɔ hiɔ si ngɛ he ko, kɛ nihi nɛ a he ye kaa blema nimeli nɛ a gbo ɔ a mumihi ngɛ ɔ a nɛ a bua nɛ jɔ he
Bɔnɛ wa ma plɛ nɛ waa kɛ womiyo nɛ ɔ ma ha nihi ha: “Wa suɔ nɛ waa le o juɛmi ngɛ nɔ́ nɛ a ngma ngɛ Baiblo ɔ mi kɛ kɔ ni gbogboe ɔmɛ a he ɔ he. [Kane Fiɛlɔ 9:5.] Anɛ o susu kaa ni gbogboe ɔmɛ ngɛ he wami nɛ a ma nyɛ maa ye bua wɔ loo a ma nyɛ maa hao wɔ? [Ngmɛɛ lɛ blɔ nɛ e ha heto.] Womiyo nɛ ɔ tsɔɔ níhi nɛ maa nɔ mi kaa e sɛ nɛ adesahi nɛ a ye ni gbogboe ɔmɛ gbeye.” O kɛ womiyo ɔ nɛ ha lɛ.
O ma nyɛ maa ka enɛ ɔ nɛ o hyɛ: Ke o kpale kɛ ya slaa lɛ ɔ, moo kane bafa 2 kɛ 3, nɛ o kɛ lɛ nɛ susu sanehi nɛ a bi ngɛ lejɛ ɔ a he. Lɔɔ se ɔ, moo kane ngmamihi nɛ ngɛ womiyo ɔ bafa 5 nɛ o tsɔɔ nya kaa ni gbogboe ɔmɛ be he wami ko. Moo hla munyuyi kake ngɛ bafa 3 nɛ o kɛ lɛ nɛ susu he ke o kpale kɛ ya slaa lɛ.
A Book for All People
A pee konɛ nihi nɛ a le womi mi se a li nɔ́ ko tsɔ ngɛ Baiblo ɔ he ɔ a bua nɛ jɔ he
Bɔnɛ wa ma plɛ nɛ waa kɛ womiyo nɛ ɔ ma ha nihi ha: Kane 2 Timoteo 3:16, 17. Lɔɔ se ɔ, mo de ke: “Anɛ o kplɛɛ munyu nɛ ɔ nɔ kaa Mawu lɛ e ha nɛ a ngma Baiblo ɔ lo? Aloo o susu kaa e ji womi kpakpa ko kɛkɛ? [Ngmɛɛ lɛ blɔ nɛ e ha heto.] E slo nihi fuu a juɛmi ngɛ sane bimi nɛ ɔ he, se wa na kaa a kpɛti nihi bɔɔ ko kane Baiblo ɔ. [Moo kane níhi a si kpami nɛ ngɛ munyuyi ɔ sisi ngɛ bafa 3 ɔ.] Womiyo nɛ ɔ tsɔɔ yi mi tomihi a heje nɛ e sa kaa nihi nɛ a je he tsuaa he, nɛ a hɛɛ hemi kɛ yemi slɔɔtoslɔɔtohi tsuo nɛ́ a susu munyuhi nɛ ngɛ Baiblo ɔ mi ɔ he.”
O ma nyɛ maa ka enɛ ɔ nɛ o hyɛ: Ke wetsɛ ɔ ngɔ womiyo ɔ, mo de ke: “Yi mi tomi kake heje nɛ nihi fuu susu kaa e he hia we nɛ a kane Baiblo ɔ ji kaa jami tsake Baiblo ɔ mi munyu ɔ kɛ e mi tsɔɔmi ɔmɛ a hɛ mi. Ke i ba ekohu ɔ, ma suɔ nɛ ma ba tsɔɔ mo nɔ hyɛmi nɔ́ kake ko nɛ tsɔɔ jã.” Ke o kpale kɛ ya a, o kɛ lɛ nɛ susu munyu nɛ ngɛ bafa 4-5 ɔ ekomɛ a he.
You Can Be God’s Friend!
A pee konɛ nihi nɛ a sukuu yami yɛ hlami nɛ a nyɛ we ní kanemi kpakpa ko ɔ a bua nɛ jɔ he
Bɔnɛ wa ma plɛ nɛ waa kɛ womiyo nɛ ɔ ma ha nihi ha: “Anɛ o susu kaa wa ma nyɛ maa pee Mawu huɛmɛ lo? [Ngmɛɛ lɛ blɔ nɛ e ha heto. Lɔɔ se ɔ, kane Yakobo 2:23.] A pee womiyo nɛ ɔ konɛ e ye bua wɔ nɛ wa ba plɛ Mawu huɛmɛ kaa bɔnɛ Abraham pee Mawu huɛ ɔ.”
O ma nyɛ maa ka enɛ ɔ nɛ o hyɛ: Ngɛ kekleekle ligbi nɛ o ya na nɔ ɔ nɔ, aloo ke o kpale kɛ ya slaa lɛ ɔ, moo ngɔ nikasemi 1 ɔ tsuo aloo e fã ko kɛ tsɔɔ lɛ bɔnɛ waa kɛ nihi kaseɔ Baiblo ɔ ha.
Does God Really Care About Us?
A pee konɛ nihi nɛ níhi nɛ ngɛ nɔ yae mwɔnɛ ɔ haoɔ mɛ, nɛ a yi mi tɛ̃ mɛ kaa Mawu susuɔ adesa he ɔ a bua nɛ jɔ he
Bɔnɛ wa ma plɛ nɛ waa kɛ womiyo nɛ ɔ ma ha nihi ha: “Nihi nɛ a na kaa adesahi ngɛ nɔ nae nɛ nihi hu yi dami sane ngɛ je ɔ mi ɔ piaa Mawu. A susu kaa akɛnɛ Mawu ji ope ɔ heje ɔ, ke e susuɔ wa he ɔ, ji nɛ e sa nɛ e ko po nɔ́ nami se. Kɛ o susu ngɛ enɛ ɔ he kɛɛ? [Ngmɛɛ lɛ blɔ nɛ e ha heto.] La 72:12-14 tsɔɔ kaa Mawu susuɔ wa he wawɛɛ nitsɛ. Tsa pi lɛ nɛ e ha nɛ adesa ngɛ nɔ́ nae nɛ adesa yi dami sane. E wo si kaa e ma je yayami peeli kɛ je zugba a nɔ. Womiyo nɛ ɔ nɛ e yi ji, Does God Really Care About Us? ɔ tsɔɔ nɔ́ nɛ Mawu maa pee, kɛ bɔnɛ wa ma na he se ha.” O kɛ lɛ nɛ tsa ní sɛɛmi ɔ nɔ nɛ o tu níhi nɛ a ngma ngɛ bafa 27, kuku 22 a he munyu nɛ o kɛ womiyo ɔ nɛ ha lɛ.
O ma nyɛ maa ka enɛ ɔ nɛ o hyɛ: Ke wetsɛ ɔ kplɛɛ nɛ e ngɔ womiyo ɔ, mo de ke: “Nihi babauu he ye kaa Mawu ngɛ, se a be nɔ mi mami kaa e susuɔ wa he ngɛ wa nɔ́ nami si himi ɔmɛ a mi. Ke i ba be kpa mi ɔ, ma suɔ nɛ i kɛ mo nɛ susu yi mi tomi nɛ Mawu hɛɛ kɛ ha adesa a he.” O kɛ lɛ nɛ susu fã 1, kuku 3, 4; kɛ fã 2, kuku 1, 2 ɔ he.
A Satisfying Life—How to Attain It
A pee konɛ nihi nɛ a bua jɔɛ Mawu jami he ɔ a bua nɛ jɔ he
Bɔnɛ wa ma plɛ nɛ waa kɛ womiyo nɛ ɔ ma ha nihi ha: “Nihi fuu suɔ kaa a tsui nɛ nɔ a mi ngɛ si himi mi, se wɔ tsuo waa kɛ haomihi nɛ ha we nɛ wa ná bua jɔmi kpeɔ. Ke e ba jã a, wa biɔ ga womi kɛ jeɔ wa wekuno aloo wa huɛ ko nɛ wa he lɛ ye e ngɔ, aloo wa kaneɔ womihi aloo níhi ngɛ Internet ɔ nɔ kɛ kɔ he. Jije o náa ga womi kpakpa ngɛ? [Ngmɛɛ lɛ blɔ nɛ e ha heto.] E peeɔ ni komɛ nyakpɛ kaa a ná ga womi kpakpa kɛ je Baiblo ɔ mi. Nɔ hyɛmi nɔ́ ko ji nɛ ɔ nɛ. [O kɛ yi 2 ɔ nɛ tsɔɔ wetsɛ ɔ, nɛ o kane ngmamihi nɛ a tsɛ se ɔ kake.] A pee womiyo nɛ ɔ konɛ a kɛ tsɔɔ wɔ bɔnɛ wa maa pee nɛ wa tsui nɛ nɔ wa mi ngɛ si himi mi ha.”
O ma nyɛ maa ka enɛ ɔ nɛ o hyɛ: Ke wetsɛ ɔ ngɔ womiyo ɔ, mo de ke: “A deɔ nɛ nihi fuu nuɔ kaa Baiblo ɔ mi munyu ɔmɛ dɛ. Ke i ba ekohu ɔ, ma suɔ kaa ma tsɔɔ mo nɔ hyɛmi nɔ́ ko nɛ maa pee mo nyakpɛ nɛ tsɔɔ kaa munyu nɛ Baiblo ɔ tu kɛ kɔ je mi si kpami he ɔ da.” Ke o kpale kɛ ya slaa lɛ ɔ, o kɛ lɛ nɛ susu munyu nɛ ngɛ bafa 12, kuku 4 ɔ he ɔ he.
The Origin of Life—Five Questions Worth Asking
A pee konɛ a kɛ ye bua nihewi kɛ yihewi nɛ a ji Kristofoli nɛ a tsɔɔ mɛ su tsakemi tsɔɔmi ɔ ngɛ sukuu, nihi nɛ heɔ tsɔɔmi nɛ ɔ yeɔ, nihi nɛ a li kaa Mawu ngɛ loo e be, kɛ nihi nɛ he we Mawu yi (A pee we womiyo nɛ ɔ nɛ a kɛ ha nihi ngɛ wehi a mi.)
Bɔnɛ waa kɛ maa ye bua nihi nɛ a heɔ su tsakemi tsɔɔmi ɔ yeɔ loo nihi nɛ a he we Mawu yi ɔ ha: “Mwɔnɛ ɔ, je mi si kpami he womihi fuu tsɔɔ su tsakemi tsɔɔmi ɔ. Anɛ o he ye kaa su tsakemi tsɔɔmi ɔ ji nɔ́ ko nɛ a deɔ kɛkɛ, aloo nɔ́ ko nɛ piɔ lɛɛ nihi kplɛɛ nɔ kaa e ji anɔkuale lo? [Ngmɛɛ lɛ blɔ nɛ e ha heto.] I he ye kaa o maa suɔ nɛ wa susu munyu enyɔ nɛ ɔmɛ a he konɛ wa nyɛ nɛ waa kɛ nile nɛ mwɔ wa yi mi kpɔ. Womiyo nɛ ɔ tsɔɔ ní komɛ nɛ ha nɛ nihi fuu he ye kaa a bɔ níhi nɛ wami ngɛ a mi ɔ.”
O ma nyɛ maa ka enɛ ɔ nɛ o hyɛ: Ke o ya sukuu ɔ, mo si womiyo ɔ ngɛ o we okplɔɔ ɔ nɔ, nɛ o hyɛ kaa nihi nɛ o kɛ mɛ ngɛ sukuu tsu ɔ mi ɔ ma bi mo sane ko ngɛ he lo.
The Pathway to Peace and Happiness
A pee konɛ nihi nɛ a ngɛ Buddha jami mi ɔ a bua nɛ jɔ he
Bɔnɛ wa ma plɛ nɛ waa kɛ womiyo nɛ ɔ ma ha Buddha jami ɔ mi nɔ ko nɛ wa ngɛ jeha mi: “Bɔnɛ nihi a je mi bami puɛ wawɛɛ amlɔ nɛ ɔ ha nɛ enɛ ɔ ngɛ wa bimɛ ɔmɛ a he sae ɔ haoɔ mi, nɛ eko ɔ, mo hu e jã nɔuu nɛ e haoɔ mo. Mɛni o susu kaa lɔɔ nɛ ha nɛ nihewi kɛ yihewi kɛ a he ngɛ je mi bami yaya mi woe wawɛɛ jã? [Ngmɛɛ lɛ blɔ nɛ e ha heto.] Anɛ o le kaa a gba nɔ́ nɛ ɔ kɛ fɔ si ngɛ womi ko nɛ a ngma momoomo loko Kristo jami, Hindu jami, kɛ Klamɔ jami je sisi ɔ mi lo? [Kane 2 Timoteo 3:1-3.] Mo kadi kaa ngɛ níhi nɛ adesa ngɛ nɔ yae ngɛ kasee ɔ tsuo se ɔ, si himi nɛ ɔmɛ ngɛ nɔ yae loloolo. [Kane kuku 7.] Níhi nɛ ngɛ womi nɛ ɔ mi ɔ ye bua mi nɛ i nu anɔkualehi nɛ nihi babauu kase we hyɛ ɔ a sisi. Anɛ mo hu o maa suɔ nɛ o kane lo?”
O ma nyɛ maa ka enɛ ɔ nɛ o hyɛ: Ke wetsɛ ɔ ngɛ Baiblo ɔ he bua jɔmi nɛ o kpale ya slaa lɛ hwɔɔ se ɔ, o kɛ sane bimihi nɛ ngɛ womiyo ɔ se ɔ nɛ tsɔɔ lɛ, nɛ o tsɔɔ lɛ Baiblo Tsɔɔmi womi ɔ nɛ a tɛni ngɛ womiyo ɔ se ɔ. Mo ha nɛ e le kaa o hɛɛ eko, nɛ ke e suɔ kaa e maa hyɛ ɔ, o kɛ maa tsɔɔ lɛ. Moo tsɔɔ lɛ he nɛ a to munyuhi nɛ ngɛ womi ɔ mi ɔ a nya ngɛ ɔ, nɛ o kɛ lɛ nɛ susu kuku kake loo enyɔ he ngɛ yi nɛ e maa hla a mi.
Our Problems—Who Will Help Us Solve Them?
A pee konɛ nihi nɛ a ngɛ Hindu jami mi ɔ a bua nɛ jɔ he
Bɔnɛ wa ma plɛ nɛ waa kɛ womiyo nɛ ɔ ma ha nihi ha: “Nihi fuu ngɛ haoe ngɛ ní yayahi nɛ ngɛ nɔ yae ngɛ je ɔ mi ɔ heje. Anɛ be ko maa ba nɛ Mawu maa po haomihi a se lo? [Ngmɛɛ lɛ blɔ nɛ e ha heto.] Gbami nɛ ɔ ha nɛ wa ná hɛ kɛ nɔ fɔmi. [Kane La 37:11.] Nɔ́ nɛ i kane piɔ ɔ ngɛ Baiblo ɔ mi. Baiblo ɔ ji womi ko nɛ nihi nui sisi nɛ a kɛ pɔɛ nítsumi ngɛ blɔ kpakpa nɔ. Pi Amerika aloo Europabi a womi; e wui mahi nɛ a ngɛ he wami ɔ he wami kaa a ye mahi nɛ a be he wami ɔ a nɔ, nɛ e tsɔɔ we kaa ma ko nɔ kuɔ pe ma ko. Mohu ɔ, e ha wɔ hɛ kɛ nɔ fɔmi kaa e be kɛe nɛ Mawu maa po wa haomi ɔmɛ a se. Sisi tomi mlaahi hu ngɛ Baiblo ɔ mi nɛ ma nyɛ maa ye bua wɔ nɛ waa da wa haomi ɔmɛ a nya amlɔ nɛ ɔ. Womiyo nɛ ɔ tsɔɔ níhi fuu nɛ maa ye bua wɔ.”
O ma nyɛ maa ka enɛ ɔ nɛ o hyɛ: Ke o kpale ya slaa wetsɛ ɔ nɛ o ha nɛ e ná munyu ɔ he bua jɔmi ɔ, o kɛ fonihi nɛ ngɛ Baiblo Tsɔɔmi womi ɔ bafa 4-5 nɛ tsɔɔ lɛ. Ke e hí kulaa a, moo kane ngmamihi nɛ a tsɛ se ɔ kake nɛ o kɛ womi ɔ nɛ ha lɛ.
Will There Ever Be a World Without War?
A pee konɛ Yudabi a bua nɛ jɔ he
Bɔnɛ wa ma plɛ nɛ waa kɛ womiyo nɛ ɔ ma ha nihi ha: “Ngɛ yi nɔ sane mi tsuo ɔ, adesahi na nɔ́ wawɛɛ ngɛ ta hwumi heje. Ngɛ tue mi jɔmi nɛ nihi deɔ ke a suɔ kaa a ná a tsuo se ɔ, mɛni o susu kaa lɔɔ nɛ ha nɛ ta hwumi ngɛ nɔ yae wawɛɛ ngɛ? [Ngmɛɛ lɛ blɔ nɛ e ha heto.] Gbami nɛ ɔ nɛ a gba ngɛ Yesaya womi ɔ mi ɔ ha wɔ hɛ kɛ nɔ fɔmi. [Kane Yesaya 2:4.] Se enɛ ɔ ha nɛ nihi bi sanehi fuu: Mɛni be, nɛ mɛni blɔ nɔ Yesaya gbami ɔ maa ba mi ngɛ? Mɛni heje nɛ wa ma nyɛ ma ná hɛ kɛ nɔ fɔmi ngɛ Baiblo ɔ mi? Womiyo nɛ ɔ ha sane bimi nɛ ɔmɛ a heto.”
O ma nyɛ maa ka enɛ ɔ nɛ o hyɛ: Ke wetsɛ ɔ kplɛɛ nɛ e ngɔ womiyo ɔ, ha nɛ e hyɛ bafa 16-17 ɔ, nɛ o de ke: “Nihi babauu susuɔ níhi gbeyegbeye nɛ yaa nɔ kaa oplɛmi nɛ kpataa nimli babauu a hɛ mi ɔ he, nɛ a biɔ ke, ‘Ke Mawu ngɛ ɔ, lɛɛ mɛni heje mɔ nɛ e ngmɛ blɔ nɛ wa ngɛ nɔ́ nae?’ Ke i ba slaa mo ekohu ɔ, wa ma nyɛ ma susu enɛ ɔ he.”
The Guidance of God—Our Way to Paradise
A pee konɛ Klamɔ jali nɛ a ma nyɛ maa kase Baiblo ɔ ngɛ he nɛ a ngɛ faa a, a bua nɛ jɔ he
Bɔnɛ wa ma plɛ nɛ waa kɛ womiyo nɛ ɔ ma ha nihi ha: “I ná le kaa Klamɔ jali he ye kaa anɔkuale Mawu kake pɛ lɛ ngɛ, nɛ a he gbali ɔmɛ tsuo ye. Anɛ e ji anɔkuale lo? [Ngmɛɛ lɛ blɔ nɛ e ha heto.] I suɔ nɛ i kɛ mo nɛ susu gbami ko nɛ a gba kɛ je blema nɛ tsɔɔ kaa a maa pee zugba a paradeiso ɔ he. Ma nyɛ ma kane nɔ́ nɛ gbalɔ ɔ ngma a kɛ ha mo lo? [Kane Yesaya 11:6-9.] E peeɔ nihi fuu nyakpɛ kaa mɛni blɔ nɔ nɛ Mawu maa gu kɛ ha nɛ tsakemi nɛ ɔmɛ nɛ ba zugba a nɔ. Womiyo nɛ ɔ tsɔɔ nɔ́ nɛ gbalɔ ɔ de ngɛ munyu nɛ ɔ he.”
O ma nyɛ maa ka enɛ ɔ nɛ o hyɛ: Ke wetsɛ ɔ ngɔ womiyo ɔ, mo de ke: “Mawu womi nɛ ɔ tsɔɔ nya kaa sisije ɔ, adesa hi paradeiso mi. Ke i ba slaa mo be kpa a, i suɔ nɛ ma ha mo sane bimi nɛ nyɛɛ se nɛ ɔ heto, ‘Kɛ ba kɛɛ nɛ adesa ha we nɛ Mawu nɛ kudɔ lɛ hu nɛ paradeiso ɔ bɔ lɛ?’” Ke o kpale ya slaa lɛ ɔ, o kɛ lɛ nɛ susu womiyo ɔ yi nɛ je sisi ngɛ bafa 6 he.
Real Faith—Your Key to a Happy Life
A pee konɛ Klamɔ jali nɛ a ma nyɛ maa kase Baiblo ɔ ngɛ he nɛ a ngɛ faa a, a bua nɛ jɔ he
Bɔnɛ wa ma plɛ nɛ waa kɛ womiyo nɛ ɔ ma ha nihi ha: Moo ngɔ foni nɛ ngɛ bafa 16-17 ɔ kɛ tsɔɔ lɛ nɛ o de ke: “Foni nɛ ɔ je ekpa ngɛ bɔnɛ je ɔ mi ngɛ ha mwɔnɛ ɔ he. Anɛ o susu kaa ligbi ko maa ba nɛ je ɔ mi maa pee kaa bɔnɛ e ngɛ ngɛ foni nɛ ɔ mi ɔ lo? [Ngmɛɛ lɛ blɔ nɛ e ha heto.] Moo hyɛ sihi nɛ a wo ngɛ womi nɛ ɔ nɛ je Mawu ngɔ ɔ mi. [Moo kane ngmamihi nɛ a tsɛ se ɔ kake kɛ je o Baiblo ɔ mi.] Womiyo nɛ ɔ maa ye bua mo konɛ o ná hemi kɛ yemi nitsɛnitsɛ kaa si womi nɛ ɔmɛ maa ba mi.”
O ma nyɛ maa ka enɛ ɔ nɛ o hyɛ: Ke o kɛ wetsɛ ɔ gbe ní sɛɛmi ɔ nya kekleekle be nɛ o ya slaa lɛ ɔ, mo bi lɛ ke e hla sane bimihi nɛ a ngɛ womi ɔ se ɔ kake. Lɔɔ se ɔ, mo de lɛ kaa ke o ba slaa lɛ ekohu ɔ, o kɛ lɛ ma susu jamɛ a sane bimi ɔ he.
Lasting Peace and Happiness—How to Find Them
A pee konɛ Chinabi a bua nɛ jɔ he
Bɔnɛ wa ma plɛ nɛ waa kɛ womiyo nɛ ɔ ma ha nihi ha: “Mwɔnɛ ɔ, waa kɛ haomihi fuu kpeɔ ngɛ si himi mi nɛ ma nyɛ ma ha nɛ wa be bua jɔmi náe. Ngɛ haomihi nɛ o kɛ ngɛ kpeɔ tsuo se ɔ, mɛni yeɔ bua mo nɛ o náa bua jɔmi? [Ngmɛɛ lɛ blɔ nɛ e ha heto.] Baiblo ɔ mi ga womi nɛ nihi fuu kɛ tsu ní ɔ ha nɛ a ná bua jɔmi. [Kane La 119:1, 2.] Ni komɛ deɔ kaa Baiblo ɔ ji Amerika kɛ Europabi a womi. Se mo kadi munyu nɛ ɔ. [Nyɛ susu bafa 17 ɔ kuku 16 he.] A susu bɔnɛ wa ma plɛ kɛ ná tue mi jɔmi kɛ bua jɔmi nɛ hiɔ si kɛ yaa neneene ɔ he ngɛ womiyo nɛ ɔ mi.”
O ma nyɛ maa ka enɛ ɔ nɛ o hyɛ: Ke wetsɛ ɔ ngɔ womiyo ɔ, o kɛ lɛ nɛ kane munyuza etɛ nɛ je kuku 18 ɔ sisi ngɛ bafa 17 ɔ, nɛ e o de ke: “Ke i kpale kɛ ba slaa mo ɔ, ma suɔ nɛ ma tsɔɔ mo nɔ́ nɛ Baiblo ɔ de kaa wa ma nyɛ maa hyɛ blɔ.” Ke o ya slaa lɛ ekohu ɔ, nyɛ susu otihi nɛ ngɛ bafa 30 kuku 6 kake he.