Fiɛɛmi Yami Kpehi Nɛ Nuu Tso

1. Mɛni he je nɛ wa kpeɔ loko wa yaa fiɛɛmi ɔ?

¹ Be ko ɔ, Yesu kɛ e kaseli 70 pee kpe loko a gba nɛ a ya fiɛɛmi. (Luka 10:1-11) E de mɛ kaa pi mɛ pɛ nɛ a ngɛ ní ɔ tsue, ejakaa Yehowa nɛ ji ‘Ngmɔtsɛ ɔ’ kɛ mɛ ngɛ ní tsue. Jehanɛ hu ɔ, e ha mɛ blɔ tsɔɔmi ngɛ níhi nɛ maa ye bua mɛ konɛ a tsu ní ɔ he, nɛ lɔ ɔ se ɔ, e gba mɛ “enyɔɔnyɔ.” Mwɔnɛ ɔ hu ɔ, jamɛ a yi mi tomi ɔ nɔuu he je nɛ waa kpeɔ loko wa yaa fiɛɛmi ɔ nɛ. Jã a nɛ wa peeɔ ɔ woɔ wɔ he wami, nɛ e tsɔseɔ wɔ, nɛ wa peeɔ kake kɛ tsuɔ ní.

2. Hɛngmɛfia enyɛmɛ nɛ e sa nɛ a kɛ pee fiɛɛmi yami kpe ɔ?

² Amlɔ nɛ ɔ, waa kɛ hɛngmɛfia 10 kɛ ya si 15 lɛ peeɔ fiɛɛmi yami kpehi, nɛ ngɛ kpe nɛ ɔmɛ a sisi ɔ, a haa wɔ blɔ tsɔɔmihi, a tsɔɔ wɔ he nɛ wa maa fiɛɛ ngɛ, nɛ a sɔleɔ kɛ kpa a. Amlɔ nɛ ɔ, a pee tsakemi ngɛ be ɔ he. Kɛ je April 2015 kɛ yaa a, waa kɛ hɛngmɛfia enuɔ kɛ ya si kpaago lɛ maa pee fiɛɛmi yami kpehi. Se ke a ma kpa asafo mi kpe loko a maa pee ɔ, lɛɛ e sa nɛ e pee kpiti pe jã ejakaa nyɛmimɛ ɔmɛ a kase níhi fuu ngɛ Ngmami ɔ mi momo. Ke fiɛɛmi yami kpe ɔ pee kpiti ɔ, e ma ha nɛ wa ma ná be fuu kɛ fiɛɛ. Jehanɛ se hu ɔ, ke daa blɔ gbali loo fiɛɛli kpahi je fiɛɛmi sisi momo ɔ, lɔ ɔ be hae nɛ a ye be fuu loko a tsa fiɛɛmi ɔ nɔ.

3. Kɛ e sa nɛ a to fiɛɛmi yami kpehi a he blɔ nya ha kɛɛ konɛ fiɛɛli nɛ a ná he se?

³ E sa nɛ a to fiɛɛmi yami kpe ɔ he blɔ nya saminya konɛ fiɛɛli nɛ a ná he se. Asafohi fuu na kaa se nami ngɛ he kaa a ma ha nɛ nyɛmimɛ maa kpe ngɛ a fiɛɛmi yami kuuhi a mi mohu pe nɛ asafo ɔ tsuo maa kpe ngɛ he kake. Enɛ ɔ be hae nɛ nyɛmimɛ a nyɛɛ blɔ gagaa kɛ ya he nɛ a maa pee kpe ɔ ngɛ ɔ loo zugba kpɔ ɔ mi. E ha we nɛ a puɛ be kɛ gba fiɛɛli nɛ a ha mɛ zugba kpɔ nɛ a ma tsu mi ní, nɛ e he wɛ ha kuu nɔ hyɛli ɔmɛ kaa a maa hyɛ fiɛɛli ɔmɛ a nɔ hulɔ. Nikɔtɔmahi a kuu ɔ ma nyɛ maa hyɛ si fɔfɔɛ nɛ ngɛ asafo ɔ mi konɛ a to blɔ nya nɛ sa. Loko a maa sɔle kpiti kɛ kpa kpe ɔ, e sa nɛ nɔ tsuaa nɔ nɛ le nɔ nɛ e kɛ lɛ maa ya fiɛɛmi ɔ, kɛ he nɛ a ma tsu ní ngɛ.

4. Mɛni he je nɛ e sɛ nɛ waa bu fiɛɛmi yami kpehi kaa a he hia we tsɔ ɔ?

⁴ Fiɛɛmi Yami Kpehi A He Hia Kaa Bɔ Nɛ Asafo Mi Kpehi A He Hia a Nɔuu: Akɛnɛ nihi nɛ a maa ya fiɛɛmi nɛ a peeɔ fiɛɛmi yami kpe kɛ haa he je ɔ, eko ɔ, pi asafo mi bi ɔmɛ tsuo nɛ a maa ba kpe nɛ ɔ. Se enɛ ɔ tsɔɔ we kaa e sa nɛ waa bu fiɛɛmi yami kpe ɔ kaa e ba si pe asafo mi kpe kpa amɛ. Yehowa lɛ to fiɛɛmi yami kpehi a he blɔ nya konɛ wa kɛ wo wa sibi he wami ngɛ ní tsumi kpakpahi a he nɛ waa suɔ wa sibi kaa bɔ nɛ e to asafo mi kpehi a he blɔ nya a. (Heb. 10:24, 25) Enɛ ɔ he ɔ, e sa kaa nɔ nɛ maa hyɛ fiɛɛmi yami kpe ɔ nɔ ɔ nɛ dla e he saminya konɛ kpe ɔ nɛ wo Yehowa hɛ mi nyami, nɛ fiɛɛli hu a ná he se. Ke e maa hi ɔ, e sa nɛ nɔ tsuaa nɔ nɛ maa ya fiɛɛmi jamɛ a ligbi ɔ nɛ bɔ mɔde nɛ e ya kpe ɔ eko.

E sɛ nɛ waa bu fiɛɛmi yami kpe ɔ kaa nɔ́ nyafii aloo kaa e he hia we kaa bɔ nɛ asafo mi kpe kpa amɛ a he hia a

5. (a) Mɛni blɔ nya nɛ e sa nɛ sɔmɔmi ní tsumi nɔ hyɛlɔ ɔ nɛ to kɛ ha fiɛɛmi yami? (b) Ke nyɛmiyo lɛ maa hyɛ fiɛɛmi yami kpe ɔ nɔ ɔ, kɛ e sa nɛ e pee lɛ kɛɛ?

⁵ Bɔ Nɛ Nɔ Nɛ Maa Hyɛ Kpe ɔ Nɔ ɔ Ma Dla E He Ha: Loko nyɛmi ko ma nyɛ ma dla e he saminya nɛ a ba tsu ní tsumi ko ngɛ asafo mi kpe sisi ɔ, ja a kɛ ní tsumi ɔ ha lɛ mla. Jã nɔuu kɛ̃ nɛ e sa nɛ a ha nihi nɛ a maa hyɛ fiɛɛmi yami kpehi a nɔ ɔ lemi mla konɛ a nyɛ nɛ a dla a he saminya. Ke fiɛɛli maa kpe ngɛ kuuhi a mi ɔ, fiɛɛmi yami kuu nɔ hyɛli aloo a wali ɔmɛ maa hyɛ kpe ɔ nɔ. Se ke asafo ɔ tsuo maa kpe ngɛ he kake nɛ a ya fiɛɛmi ɔ, lɛɛ sɔmɔmi ní tsumi nɔ hyɛlɔ ɔ maa sɛ hlami maa hla nyɛminyumu ko konɛ e hyɛ kpe ɔ nɔ. Sɔmɔmi ní tsumi nɔ hyɛli komɛ ngmaa fiɛɛmi yami blɔ nya tomi ɔ ngɛ womi nɔ nɛ a gbaa kɛ haa nihi nɛ a hyɛɛ fiɛɛmi yami kpehi a nɔ ɔ, nɛ a kɛ eko mɛtɛɛ he nɛ a ngɔɔ asafo ɔ adafi fiami womihi kɛ mɛtɛɛ ɔ. Ke Sɔmɔmi ní tsumi nɔ hyɛlɔ ɔ ngɛ nyɛmimɛ nɛ a maa hyɛ fiɛɛmi yami kpehi a nɔ ní tsumi hae ɔ, e sa nɛ e kai kaa ke fiɛɛmi yami kpe ɔ maa nu tso ɔ, e daa si ngɛ nihi nɛ a le ní tsɔɔmi kɛ nihi nɛ a le níhi a he blɔ nya tomi saminya a nɔ. Ke asafo mi nɔkɔtɔma loo sɔmɔlɔ, loo nyɛminyumu nɛ a baptisi lɛ nɛ sa ko be nɛ e maa hyɛ fiɛɛmi yami kpe ɔ nɔ ngɛ ligbi komɛ a mi ɔ, sɔmɔmi ní tsumi nɔ hyɛlɔ ɔ ma nyɛ ma ha nɛ nyɛmiyo ko nɛ a baptisi lɛ nɛ e sa nɛ hyɛ nɔ.—Hyɛ munyuyi nɛ ji, “Ke Nyɛmiyo Lɛ Maa Hyɛ Nɔ” ɔ.

6. Mɛni he je nɛ e sa kaa nihi nɛ a maa hyɛ fiɛɛmi yami kpehi a nɔ ɔ nɛ a dla a he saminya a?

⁶ Ke a ha wɔ ní tsumi ngɛ Teokrase Sɔmɔmi Sukuu loo Sɔmɔmi Kpe ɔ mi ɔ, wa buu lɛ kaa ní tsumi nɛ hɛdɔ ngɛ he nɛ wa dlaa wa he saminya. Wa be mlɛe kɛ ya si be nɛ wa ngɛ blɔ nɔ kɛ yaa asafo mi kpe loko wa ma bɔni nɔ́ nɛ wa ma ya de ɔ he susumi. Ke a ha wɔ ní tsumi kaa waa hyɛ fiɛɛmi yami kpe nɔ ɔ, e sa kaa waa bu lɛ kaa ní tsumi nɛ hɛdɔ ngɛ he. Amlɔ nɛ ɔ nɛ a gbɔ be nɛ waa kɛ maa pee fiɛɛmi yami kpehi nɔ ɔ, e he hia nɛ nɔ nɛ maa hyɛ kpe ɔ nɔ ɔ nɛ e dla e he saminya bɔ nɛ pee nɛ kpe ɔ nɛ nu tso, nɛ a gbe nya ngɛ be nya. Wa he nɛ wa ma dla saminya a hu biɔ nɛ waa le zugba kpɔ nɛ wa ma tsu mi ní ɔ kɛ sɛ hlami.

7. Mɛni ji níhi nɛ nyɛ ma nyɛ ma susu a he ngɛ fiɛɛmi yami kpehi a sisi?

⁷ Nɔ́ Nɛ Nyɛ Ma Susu He: Akɛnɛ e slo si fɔfɔɛ nɛ ngɛ zugba kpɔ tsuaa zugba kpɔ mi he je ɔ, tsɔlɔ anɔkualetsɛ ɔ pee we fiɛɛmi yami kpe he munyu tumi womi. Munyu nɛ ji “Níhi Nɛ Nyɛ Ma Nyɛ Ma Susu A He Ngɛ Fiɛɛmi Yami Kpehi A Sisi” ɔ maa ye bua nyɛ. E sa nɛ nyɛɛ pee kpe ɔ kaa ní sɛɛmi. Se ngɛ be komɛ a mi hu ɔ, nyɛ ma nyɛ maa pee peemi kɛ tsɔɔ, aloo nyɛ ma nyɛ maa ngɔ jw.org video ko nɛ sa kɛ tsu ní. Ke o ngɛ o he dlae nɛ o ma ya hyɛ fiɛɛmi yami kpe nɔ ɔ, mo susu níhi nɛ maa wo fiɛɛli he wami, kɛ níhi nɛ maa ye bua mɛ ngɛ fiɛɛmi mi jamɛ a ligbi ɔ he.

Ke o ngɛ o he dlae nɛ o ya hyɛ fiɛɛmi yami kpe nɔ ɔ, mo susu níhi nɛ maa wo fiɛɛli he wami, kɛ níhi nɛ maa ye bua mɛ ngɛ fiɛɛmi mi jamɛ a ligbi ɔ a he

8. Mɛni ji níhi nɛ maa ye bua fiɛɛli nɛ nyɛ ma nyɛ ma susu a he ngɛ fiɛɛmi yami kpehi a sisi Hɔ kɛ Hɔgba?

⁸ Hɔ ji ligbi nɛ fiɛɛli fuu gbaa Hwɔɔmi Mɔ ɔ kɛ Awake! womi tɛtlɛɛ ɔmɛ. Nyɛmimɛ komɛ nyɛ we fiɛɛmi yami ngɛ otsi ɔ mi kaa ja Hɔ pɛ. Enɛ ɔ he ɔ, e he waa kɛ haa mɛ kaa a ma kai fiɛɛmi munyuhi nɛ a susu he ngɛ a gbɔkuɛ Weku Mawu Jami mi ɔ. Lɔ ɔ he ɔ, e maa hi kaa nɔ nɛ maa hyɛ fiɛɛmi yami kpe ɔ nɔ ɔ kɛ mɛ ma nylɔ fiɛɛmi munyuhi nɛ ngɛ Wa Matsɛ Yemi Sɔmɔmi ɔ nyagbe ba fa a mi ɔ mi. Jehanɛ hu ɔ, a ma nyɛ ma susu bɔ nɛ a kɛ níhi nɛ ngɛ nɔ yae ngɛ je ɔ mi ɔ maa je ní sɛɛmi sisi ha a he konɛ a ngɔ womi tɛtlɛɛ ɔmɛ kɛ ha, aloo a ma nyɛ ma susu bɔ nɛ fiɛɛli maa pee ha nɛ a maa kpale ya slaa nihi nɛ a bua jɔ munyu ɔ he ɔ he. Ke fiɛɛli komɛ kɛ womi tɛtlɛɛ ɔmɛ eko tsu ní ngɛ fiɛɛmi mi momo ɔ, kpe ɔ nɔ hyɛlɔ ɔ ma nyɛ ma ha nɛ a tsɔɔ bɔ nɛ a pee ha nɛ a kɛ womi ɔ ha, aloo a ma nyɛ ma de níhi a si kpami ko nɛ a ná. Ke Hɔgba nɛ a maa ya fiɛɛmi ɔ, kpe ɔ nɔ hyɛlɔ ɔ ma nyɛ kɛ fiɛɛli ma susu níhi nɛ maa ye bua mɛ konɛ a ngɔ womi nɛ waa kɛ ngɛ ní tsue ngɛ nyɔhiɔ ɔ mi ɔ kɛ ha a he. Fiɛɛli ma nyɛ maa ngɔ Baiblo kasemi womihi kaa Sane kpakpa kɛ Bu Mawu Tue womiyo ɔmɛ kɛ Baiblo Tsɔɔmi womi ɔ kɛ ha be tsuaa be. Enɛ ɔ he ɔ, nyɛ ma nyɛ ma susu bɔ nɛ a kɛ womi nɛ ɔmɛ ma ha ngɛ fiɛɛmi mi ɔ he ngɛ fiɛɛmi yami kpehi a sisi be komɛ.

9. Ke nyɛ ngɛ womi klɛdɛɛ ko gbae ngɛ Hɔ kɛ Hɔgba nɔ ɔ, mɛni ji níhi nɛ nyɛ ma nyɛ ma susu a he ngɛ fiɛɛmi yami kpe ɔ sisi?

⁹ Ke nyɛ ngɛ womi klɛdɛɛ ko gbae ngɛ Hɔ loo Hɔgba nɔ ɔ, kpe ɔ nɔ hyɛlɔ ɔ ma nyɛ maa tsɔɔ bɔ nɛ a maa pee ha nɛ a kɛ womi tɛtlɛɛ ehe ɔmɛ maa piɛɛ dɛ womi loo nine fɔmi womi ɔ he konɛ a kɛ ha, kɛ nɔ́ nɛ e sa nɛ fiɛɛli nɛ a pee ke wetsɛ ɔ bua jɔ munyu ɔ he. Aloo a ma nyɛ ma de níhi a si kpamihi nɛ a ná ngɛ womi klɛdɛɛ ko nɛ a gba a mi kɛ tsɔɔ bɔ nɛ e he hia ha kaa e sa nɛ a ya nɔ nɛ a pee jã.

10, 11. Mɛni he je nɛ ke fiɛɛli dla a he saminya loko a ya fiɛɛmi yami kpe ɔ, e haa nɛ níhi yaa nɔ saminya a?

¹⁰ Bɔ Nɛ Fiɛɛli Ma Dla A He Ha: Níhi ngɛ nɛ nyɛmimɛ nɛ a maa ya fiɛɛmi yami kpe ɔ hu maa pee kɛ ye bua nɛ níhi nɛ ya nɔ saminya. Ke fiɛɛli ngɔ a gbɔkuɛ weku Mawu jami be ɔ eko kɛ dla a he kɛ ha fiɛɛmi ɔ, a maa na nɔ́ ko nɛ a ma de kɛ wo nyɛmimɛ he wami. Wa he nɛ wa ma dla saminya a biɔ nɛ waa sɛ hlami nɛ waa ngɔ womihi nɛ waa kɛ maa ya fiɛɛmi ɔ loko waa ya kpe ɔ, konɛ nɔ tsuaa nɔ nɛ je kɛ ho zugba kpɔ ɔ mi ya nɔuu ke a kpa kpe ɔ.

¹¹ E he hia nɛ wa ya su he nɛ a maa pee fiɛɛmi yami kpe ɔ ngɛ ɔ mla loko a je sisi. Ngɛ anɔkuale mi ɔ, wa bɔɔ mɔde kaa wa maa ya asafo mi kpehi tsuo mla. Se ke wa kpɛ se kɛ ya fiɛɛmi yami kpe ɔ, e ma nyɛ ma gba nyɛmimɛ a nya. Ngɛ mɛni blɔ nɔ? Kpe ɔ nɔ hyɛlɔ ɔ susuɔ níhi fuu a he loko e gbaa fiɛɛli ɔmɛ nɛ e haa mɛ zugba kpɔ. Ke fiɛɛli bɔɔ pɛ lɛ a ba kpe ɔ, eko ɔ, e ma ha nɛ a ya tsu ní ngɛ zugba kpɔ nɛ a tsu we mi ní tɛ mi. Ke fiɛɛli komɛ nyɛɛ kɛ ba kpe ɔ, nɛ zugba kpɔ nɛ a ma tsu mi ní ɔ ngɛ tsitsaa a, eko ɔ, kpe ɔ nɔ hyɛlɔ ɔ ma ha nɛ jamɛ a nyɛmimɛ ɔmɛ kɛ nyɛmimɛ nɛ a ngɛ lɔle ɔ maa ya. Ke awi yeli ngɛ zugba kpɔ ko mi ɔ, eko ɔ, kpe ɔ nɔ hyɛlɔ ɔ ma ha nɛ nyumuhi kɛ yihi tsuo ma tsu ní ngɛ zugba kpɔ kake mi, aloo e ma ha yi ɔmɛ zugba kpɔ ngɛ nyumu ɔmɛ a kasa nya. Eko ɔ, e ma ha nɛ nihi nɛ a be nɔmlɔ tso mi he wami ɔ hu nɛ a fiɛɛ ngɛ gbɛjegbɛhi a he ngɛ he nɛ yokuhi be, loo ngɛ wehi nɛ a be atlaakpe fuu kuɔe ɔ a mi. A ma nyɛ ma ha nɛ fiɛɛli ehehi kɛ fiɛɛli nɛ a ngɛ níhi a si kpami ma tsu ní. Se ke fiɛɛli komɛ kpɛ se kɛ ba a, lɔ ɔ maa sa blɔ nya nɛ a to ɔ he, nɛ e ma bi nɛ a pee tsakemi konɛ a hyɛ nihi nɛ a kpɛ se ɔ hulɔ. Ngɛ anɔkuale mi ɔ, be komɛ ngɛ nɛ eko ɔ, wa maa kpɛ se kɛ ya fiɛɛmi ngɛ si fɔfɔɛ komɛ nɛ a he hia he je. Se ke e ba pee wa su ɔ, e sa nɛ wa bi wa he ke: ‘Anɛ i ngɛ bu kɛ ha fiɛɛmi yami kpe ɔ lo, nɛ mɛni ma pee kɛ to ye níhi a he blɔ nya saminya konɛ ma jɔɔ se kpɛmi?’

12. Ke o pɔɔ mo nitsɛ o fiɛɛmi yami blɔ nya tomi ɔ, mɛni he nɛ e sa kaa o susu?

¹² Fiɛɛli nɛ a ba kpe ɔ ma nyɛ maa to blɔ nya kaa a kɛ nɔ ko maa ya fiɛɛmi loko kpe ɔ maa je sisi, aloo a maa mlɛ nɛ a ha mɛ nɔ ko nɛ a kɛ lɛ maa ya. Ke behi fuu ɔ, o toɔ mo nitsɛ o blɔ nya a, bɔɔ mɔde nɛ o ‘bli o suɔmi ɔ mi’ nɛ o kɛ fiɛɛli kpahi hu nɛ tsu ní ngɛ fiɛɛmi mi mohu pe nɛ o kɛ nihi pɔtɛɛ komɛ pɛ maa ya daa. (2 Kor. 6:11-13) Anɛ o ma nyɛ maa to blɔ nya konɛ o kɛ fiɛɛli ehehi nɛ tsu ní ngɛ fiɛɛmi mi konɛ o ye bua mɛ nɛ a ya a hɛ mi lo? (1 Kor. 10:24; 1 Tim. 4:13, 15) Moo bu blɔ tsɔɔmihi nɛ a kɛ ma ha ngɛ fiɛɛmi yami kpe ɔ sisi ɔ tue saminya konɛ o le he nɛ nyɛ ma tsu ní ngɛ. Ke kpe ɔ ba nyagbe ɔ, ko tsake blɔ nya nɛ a to ha nyɛ ɔ, mohu ɔ, nyɛɛ je nɔuu.

13. Ke wɔ tsuo wa bɔ mɔde nɛ wa tsu wa blɔ fa mi nɔ́ ngɛ fiɛɛmi yami kpehi a he ɔ, kɛ wa ma ná he se ha kɛɛ?

¹³ Benɛ kaseli 70 nɛ Yesu tsɔ mɛ ɔ ya fiɛɛ ta a, a “kpale kɛ ba kɛ bua jɔmi babauu.” (Luka 10:17) E ngɛ heii kaa tsɔsemi nɛ Yesu kɛ ha mɛ ngɛ kpe nɛ e kɛ mɛ pee ɔ sisi ɔ lɛ ye bua mɛ nɛ a fiɛɛmi ɔ ye manye ɔ nɛ. Jã kɛ̃ nɛ wɔ hu wa náa fiɛɛmi yami kpehi nɛ a peeɔ mwɔnɛ ɔ he se. Ke wɔ tsuo wa bɔ mɔde nɛ wa tsu wa blɔ fa mi nɔ́ ɔ, wa ma ná tsɔsemi, kɛ he wami womi munyuhi nɛ maa ye bua wɔ konɛ waa pee kake kɛ fiɛɛ nɛ ‘je ma amɛ tsuo nɛ a nu.’—Mat. 24:14.

Ke Nyɛmiyo Lɛ Maa Hyɛ Nɔ

Ke nyɛmiyo lɛ maa hyɛ fiɛɛmi yami kpe ɔ nɔ ɔ, e sa nɛ e ha e yi nɔ, nɛ e hi si. Munyuhi nɛ a tsɔɔ kaa nyɛmimɛ nyumuhi nɛ a da nɔ kɛ pee fiɛɛmi yami kpe ɔ nɔuu nɛ lɛ hu e kɛ ma tsu ní. E ma nyɛ maa pee lɛ kaa ní sɛɛmi, se e sɛ nɛ e pee kaa nɔ́ nɛ e ngɛ ni ɔmɛ ní tsɔɔe. Ke e tsɛ nyɛmiyo ko nɛ a baptisi lɛ kaa e sɔle ɔ, e sa nɛ jamɛ a nyɛmiyo ɔ hu nɛ ha e yi nɔ. Ke e je kpe ɔ sisi loko nyɛminyumu ko nɛ a baptisi lɛ ba su ɔ, nyɛmiyo ɔ maa ngɔ he blɔ ɔ kɛ ha lɛ konɛ e tsa nɔ. Sɔmɔmi ní tsumi nɔ́ hyɛlɔ ɔ nɛ susu níhi a he kɛ ya tsitsaa nɛ e ha nyɛmimɛ blɔ tsɔɔmi kɛ sɛ hlami konɛ níhi ko pee basaa. Kaa nɔ hyɛmi nɔ́ ɔ, nyɛminyumu nɛ a baptisi lɛ nɛ e yi jeha 13 lolo ma nyɛ maa ba kpe ɔ, se ke asafo mi nikɔtɔma amɛ susu kaa e wɛ nɛ e ma nyɛ maa hyɛ kpe ɔ nɔ ɔ, a ma nyɛ ma ha nɛ nyɛmiyo ko nɛ hyɛ nɔ. Ke e ba jã a, sɔmɔmi ní tsumi nɔ hyɛlɔ ɔ ma nyɛ ma de nyɛmiyo ɔ kaa e hyɛ kpe ɔ nɔ, nɛ nyɛminyumu wayo ɔ nɛ sɔle kɛ kpa kpe ɔ. E ma nyɛ maa ba kaa nyɛminyumu ko nɛ a tsi e nya kaa e ko hyɛ kpehi a nɔ loo e ko sɔle ngɛ asafo mi kpehi a sisi maa ba kpe ɔ eko. Asafo mi nikɔtɔma amɛ maa hyɛ nɛ a be nyɛmi ɔ laami sane ko kpo jee, se a ma nyɛ ma de nyɛmiyo ɔ kaa e sɔle ke nyɛminyumu ɔ ba kpe ɔ po. Asafo mi nikɔtɔma amɛ ma nyɛ ma ha nɛ nyɛminyumu kaa jã a maa le behi nɛ nyɛmimɛ yihi maa hyɛ fiɛɛmi yami kpehi a nɔ ɔ.

Níhi Nɛ Nyɛ Ma Nyɛ Ma Susu A He Ngɛ Fiɛɛmi Yami Kpehi A Sisi:

Fiɛɛmi munyu ko nɛ ngɛ Wa Matsɛ Yemi Sɔmɔmi ɔ mi.
Video ko nɛ ngɛ jw.org nɛ a ma nyɛ ma kɛ tsu ní ngɛ fiɛɛmi mi.
Bɔ nɛ a kɛ nihi maa je ní sɛɛmi sisi ha ngɛ fiɛɛmi mi, loo bɔ nɛ a maa to blɔ nya nɛ a maa kpale ya slaa nihi nɛ a bua jɔ munyu ɔ he, loo bɔ nɛ wa ma plɛ kɛ tsɔɔ wetsɛ ɔmɛ yemi kɛ buami kɛ ha je kɛ wɛ ní tsumi ɔ ke wa ha mɛ womi.
Ngmami ko nɛ maa wo nyɛmimɛ he wami, loo nɛ a ma nyɛ ma kɛ tsu ní ngɛ fiɛɛmi mi.
Níhi a si kpami ko nɛ fiɛɛli ná ngɛ zugba kpɔ ɔ mi loo níhi a si kpami nɛ ngɛ wa womi ɔmɛ eko mi.
Munyu ko nɛ je kpo ngɛ Wa Matsɛ Yemi Sɔmɔmi ɔ eko mi.
Munyu ko nɛ wa susu he ngɛ Sɔmɔmi Kpe ɔ eko sisi.
Munyu ko nɛ kɔɔ fiɛɛmi he nɛ je kpo ngɛ Hwɔɔmi Mɔ ɔ mi.
Munyu ko nɛ kɔɔ fiɛɛmi he nɛ ngɛ Ministry School womi ɔ kɛ “Ba Nyɛɛ Ye Se” womi ɔ mi.
Nɔ́ ko nɛ ngɛ jw.org nɛ wa ma nyɛ ma kɛ tsu ní ngɛ fiɛɛmi mi.
Nɔ́ ko nɛ ngɛ “Níhi Nɛ Wa Ma Nyɛ Maa Kase Ngɛ Mawu Munyu ɔ Mi” ɔ mi.
Bɔ nɛ waa kɛ nihi nɛ a he we yi kaa Mawu ngɛ, kɛ nihi nɛ a heɔ su tsakemi tsɔɔmi ɔ yeɔ, kɛ nihi nɛ a ngɛ Hindu jami kɛ Buddha jami mi maa sɛɛ ní ha.
Nɔ́ nɛ wa maa pee ke wetsɛ ko suɔ nɛ e maa tsi ní sɛɛmi ɔ nya.
Bɔ nɛ wa maa ye bua nɔ nɛ waa kɛ lɛ maa ya fiɛɛmi ɔ ha konɛ e ní tsɔɔmi nɛ nu tso.
Bɔ nɛ wa maa pee ha kɛ ye nihi nɛ a tuɔ gbi kpa odase.
Bɔ nɛ wa maa pee ha kɛ hla nihi nɛ a tuɔ gbi pɔtɛɛ ko nɛ waa fiɛɛ kɛ ha mɛ, aloo nɛ waa ye nihi odase ngɛ tɛlifoo nɔ, aloo nɛ wa maa ye odase ngɛ ma nɔ, aloo nɛ wa ma ya slaa nihi nɛ a bua jɔ munyu ɔ he, aloo nɛ wa maa pee Baiblo mi ní kasemi.
Blɔ tsɔɔmihi nɛ kɔɔ wa he nɔ nɛ wa maa hyɛ saminya, aloo wa tsui si nɛ wa maa to kɛ ha nihi, aloo su kpakpa kpo nɛ wa maa je, aloo nihi a he juɛmi kpakpa nɛ wa ma ná, aloo níhi kaa jã a he.