NÍ KOMƐ NƐ MAA YE BUA MO

Mɛni Níhi Nɛ E Sa Nɛ O Kase Kekle?

Wɔ tsuo wa be be fuu nɛ waa kɛ maa kase ní ngɛ wa dɛ he. Se mɛni blɔ nɔ nɛ waa kɛ wa be ma nyɛ ma tsu ní saminya ke wa ngɛ ní kasee? Kekleekle ɔ, mo ná tsui kɛ kase ní. Ke o to o tsui si kɛ kase nɔ́ ko bɔɔ nɛ o nu sisi ɔ, o ma ná he se wawɛɛ pe nɛ o kɛ fo maa pee jã.

Moo le níhi nɛ a he hia wawɛɛ ɔ. (Efe. 5:​15, 16) Mo susu níhi nɛ nyɛɛ se ɔmɛ a he nɛ o hyɛ:

• Moo kane Baiblo ɔ daa ligbi. (La 1:⁠2) E maa hi wawɛɛ kaa o maa ngɔ daa otsi Baiblo kanemi nɛ ngɛ otsi kpɛti kpe ɔ mi ɔ kɛ je sisi.

• Dla o he kɛ ha Hwɔɔmi Mɔ ɔ Mi Ní Kasemi ɔ, kɛ nɔ́ nɛ a maa kase ngɛ otsi kpɛti kpe ɔ mi ɔ. Moo pee klaalo kaa o ma ha sane heto.​—La 22:⁠22.

• Moo bɔ mɔde hu kaa o maa kane womi kpahi. Womi nɛ ɔmɛ ekomɛ ji ma bi a Hwɔɔmi Mɔ ɔ, Awake! ɔ, kɛ níhi nɛ ngɛ jw.org ɔ nɔ ɔ, nɛ o hyɛ video ɔmɛ hulɔ.

• Mo hla níhi a mi. O ma nyɛ ma hla níhi a mi kɛ kɔ nyagba ko nɛ o kɛ ngɛ kpee, sane bimi ko nɛ o ngɛ, loo Baiblo mi munyu ko nɛ o suɔ nɛ o nu sisi saminya a he. Bɔ nɛ pee nɛ o le ní kpahi ɔ, moo ya “Baiblo Kasemi Níhi” blɔ he ɔ nɛ ngɛ jw.org ɔ nɔ ɔ.