Mɛni E Sa Kaa O Pee Ke A Yi Mo Loo Ni Kpahi Dami Sane?

1-2. Kɛ nihi fuu peeɔ a ní ngɛ dami sane nɛ a yi ɔ he ha kɛɛ, nɛ mɛni he wa ma susu?

MWƆNƐ Ɔ, nihi fuu yi dami sane ngɛ je ɔ mi. Nihi yeɔ ni kpahi sane yaya akɛnɛ a be sika, loo e slo wɛtso nɛ a je mi, loo a bɔ su, kɛ ní kpahi ɔ he je. Nihi fuu naa nɔ́ wawɛɛ, akɛnɛ sikatsɛmɛ loo ma hɛ mi nyɛɛli susuɔ sika nɛ a ma ná a pɛ he he je. Ní nɛ ɔmɛ kɛ ekpahi haa nɛ wɔ loo wa suɔli naa nɔ́ wawɛɛ ngɛ si himi mi.

² Akɛnɛ nihi yi dami sane kulaa ngɛ je ɔ mi he je ɔ, e be nyakpɛ kaa nihi fuu a mi mi fuɔ. Wɔ tsuo wa suɔ nɛ nihi kɛ wɔ nɛ hi si saminya, nɛ waa nu he kaa wa ngɛ slɔkee. Ni komɛ bɔɔ mɔde kaa a ma tsu nyagbahi nɛ ngɛ nɔ yae ngɛ a ma a mi, aloo ma kpahi a mi ɔ he ní. Enɛ ɔ haa nɛ a kpɛti ni komɛ teɔ si kɛ woɔ amlaalo ɔmɛ kɛ ma a mlaa amɛ. Aloo a fɔɔ sɔ kɛ hlaa nɔ yeli nɛ a woɔ mɛ si kaa a ma tsu a nyagba amɛ a he ní kɛ ha mɛ ɔ. Se akɛnɛ wa ji Kristofohi nɛ wa “piɛɛ we je ɔ he” he je ɔ, wa ngɔɔ wa hɛ kɛ fɔɔ Mawu Matsɛ Yemi ɔ pɛ nɔ. Lɔ ɔ pɛ nɛ e ma nyɛ ma je dami sane nɛ a yi ɔ tsuo kɛ je. (Yoh. 17:16) Se loloolo ɔ, ke wa na kaa a yi ni kpahi dami sane ɔ, e dɔɔ wɔ, nɛ be komɛ po ɔ, wa mi mi fuɔ. Eko ɔ, wa ma bi ke: ‘Ke a yi imi loo ni kpahi dami sane ɔ, mɛni ma nyɛ ma pee? Anɛ ma nyɛ ma pee nɔ́ ko ngɛ dami sane nɛ a yi ɔ he amlɔ nɛ ɔ lo?’ Bɔ nɛ pee nɛ waa na heto kɛ ha sane bimi nɛ ɔmɛ ɔ, nyɛ ha nɛ wa susu bɔ nɛ Yehowa kɛ Yesu nuɔ he ha ngɛ dami sane nɛ a yi ɔ he.

YEHOWA KƐ YESU YEƆ DAMI SANE BE FƐƐ BE

3. Mɛni he je nɛ sisi numi ngɛ he kaa wa mi mi fuɔ ngɛ dami sane nɛ a yi ɔ he ɔ? (Yesaya 5:7)

³ Baiblo ɔ tsɔɔ nɔ́ he je nɛ wa suɔ nɛ nihi kɛ wɔ nɛ hi si saminya, loo wa sume nɛ nihi kɛ ni kpahi nɛ ye ngɛ blɔ nɛ dɛ nɔ ɔ. Baiblo ɔ tsɔɔ kaa Yehowa bɔ wɔ ngɛ e subai nɔ, nɛ e “suɔ nɔ́ nɛ da kɛ dami sane yemi.” (La 33:5; 1 Mose 1:26) Yehowa yi nɔ ko sane yaya gblee, nɛ e sume nɛ nɔ ko kɛ ni kpahi nɛ ye ngɛ blɔ nɛ dɛ nɔ kɔkɔɔkɔ! (5 Mose 32:​3, 4; Mika 6:8; Zak. 7:9) Kaa nɔ hyɛmi nɔ́ ɔ, ngɛ gbalɔ Yesaya be ɔ mi ɔ, benɛ Israelbi kpahi wa mɛ nitsɛmɛ a nyɛmimɛ ɔmɛ yi mi nɛ ‘a fo ya nɛ a kpa ngmlaa’ kɛ tsɛ Yehowa a, Yehowa nu. (Kane Yesaya 5:7.) Nihi nɛ a gbo Yehowa Mlaa a nɔ tue si abɔ, nɛ a yi dami sane ɔ, Yehowa gbla a tue.—Yes. 5:​5, 13.

4. Kɛ Yesu nu he ha kɛɛ benɛ a ye nɔ ko sane yaya a? (Hyɛ foni ɔ hulɔ.)

⁴ Kaa bɔ nɛ e ji ngɛ Yehowa blɔ fa mi ɔ, Yesu hu suɔ dami sane yemi, nɛ e hiɔ dami sane nɛ a yi ɔ kulaa. Benɛ Yesu ngɛ zugba a nɔ ɔ, ligbi ko ɔ, e na nyumu ko nɛ e nine gbo. Nyumu ɔ he pee Yesu mɔbɔ, nɛ Yesu suɔ nɛ e ye bua lɛ. Se benɛ jami hɛ mi nyɛɛli ɔmɛ na nɔ́ nɛ ya nɔ ɔ, a mi mi fu wawɛɛ. Jami hɛ mi nyɛɛli ɔmɛ pee kpɛii, nɛ a ngɔ a juɛmi kɛ ma He Jɔɔmi Ligbi ɔ he mlaa a pɛ nɔ, mohu pe nɛ a maa ye bua nyumu ɔ nɛ e ní ngɛ mɔbɔ ɔ. Kɛ Yesu nu he ngɛ a ní peepee ɔ he ha kɛɛ? E “ye aywilɛho ngɛ a tsui nɛ a kplii ɔ he je.”—Maak. 3:​1-6.

5. Mɛni he je nɛ e sɛ nɛ waa ya nɔ nɛ wa mi mi nɛ fu ke a ye wɔ loo ni kpahi sane yaya?

⁵ Ke nihi yi dami sane ɔ, Yehowa kɛ Yesu tsuo a mi mi fuɔ. Enɛ ɔ he ɔ, tɔmi ko be he kaa wɔ hu wa maa nu he jã. (Efe. 4:26) Se e sa nɛ wa nyɛ nɛ waa ye wa we abofu ɔ nɔ ejakaa ke wa mi mi fu kaa mɛni po ɔ, wa be nyɛe ma je dami sane nɛ a yi ɔ kɛ je. Anɔkuale sane ji kaa ke wa ya nɔ nɛ wa hɛɛ abofu ɔ mi be kɛkɛɛ ɔ, e ma nyɛ ma ha nɛ waa nu hiɔ loo waa hao wawɛɛ. (La 37:​1, 8; Yak. 1:20) Ke jã a, mɛni e sa nɛ waa pee ke a ye wɔ loo ni kpahi sane yaya? Wa ma nyɛ maa kase ní kɛ je Yesu nɔ hyɛmi nɔ́ ɔ mi.

BƆ NƐ YESU TSU DAMI SANE NƐ A YI Ɔ HE NÍ HA

6. Benɛ Yesu ngɛ zugba a nɔ ɔ, kɛ nihi kɛ ni kpahi ye ha kɛɛ? (Hyɛ foni ɔ hulɔ.)

⁶ Benɛ Yesu ngɛ zugba a nɔ ɔ, e na nihi fuu nɛ a yi mɛ dami sane. E na bɔ nɛ jami hɛ mi nyɛɛli ɔmɛ wa nimli gu ɔmɛ yi mi ha. (Mat. 23:​2-4) Jehanɛ hu ɔ, e na bɔ nɛ Roma nɔ yeli ɔmɛ wa a sisi bimɛ ɔmɛ a yi mi wawɛɛ ha. Yudabi babauu suɔ nɛ a ye a he ngɛ Romabi ɔmɛ a he. A kpɛti ni komɛ po to kuuhi a sisi kɛ te si kɛ wo Roma nɔ yemi ɔ. Se kɛ̃ ɔ, Yesu fĩ we kuuhi nɛ a to sisi konɛ a kɛ tsake nɔ yemi ɔ ekoeko se. Benɛ Yesu ná le kaa nihi ngɛ ga toe konɛ a wo lɛ matsɛ ɔ, e yu e he ngɛ a he.—Yoh. 6:15.

7-8. Mɛni he je nɛ Yesu bɔɛ mɔde kaa e ma je dami sane nɛ a yi ɔ tsuo kɛ je benɛ e ngɛ zugba a nɔ ɔ? (Yohane 18:36)

⁷ Benɛ Yesu ngɛ zugba a nɔ ɔ, e bɔɛ mɔde kaa e kɛ e he maa wo ma kudɔmi sanehi a mi konɛ e kɛ tsu dami sane nɛ a yi ɔ he ní. Mɛni he je? Ejakaa e le kaa adesa be he blɔ loo nyɛmi nɛ e kɛ maa ye e nyɛmi adesa nɔ. (La 146:3; Yer. 10:23) Jehanɛ hu ɔ, e le kaa adesahi be nyɛe ma je nɔ́ titli nɛ haa nɛ nihi yi dami sane ɔ kɛ je kulaa. Satan Abosiami nɛ e ji yiwutsotsɛ ɔ lɛ e ngɛ je ɔ kudɔe, nɛ nihi fuu nɛ a ngɛ je ɔ mi ɔ kaseɔ lɛ wawɛɛ. (Yoh. 8:44; Efe. 2:2) Jehanɛ hu ɔ, akɛnɛ wa yi mluku he je ɔ, nimli kpakpahi nɛ a suɔ nɔ́ nɛ da peemi po be nyɛe maa ye dami sane be fɛɛ be.—Fiɛɛ. 7:20.

⁸ Yesu le kaa Mawu Matsɛ Yemi ɔ pɛ lɛ e ma nyɛ ma tsu dami sane nɛ a yi ɔ he ní kɛ pi si. Enɛ ɔ he ɔ, e ngɔ e be kɛ e he wami tsuo kɛ ‘fiɛɛ, nɛ e jaje Mawu Matsɛ Yemi ɔ he sane kpakpa a.’ (Luka 8:1) E ha nɛ ‘nihi nɛ nɔ́ nɛ da peemi he hwɔ kɛ kuma ngɛ mɛ yee ɔ’ ná nɔ mi mami kaa dami sane nɛ a yi ɔ tsuo se maa po kɛ̃. (Mat. 5:6 kɛ study note ɔ; Luka 18:​7, 8) Se kɛ̃ ɔ, pi adesa nɔ yemi ko nɛ ma tsu nɔ́ nɛ ɔ. Mohu ɔ, Mawu Matsɛ Yemi ɔ nɛ e “pi je nɛ ɔ mi nɔ́” ɔ pɛ lɛ e ma tsu dami sane nɛ a yi ɔ he ní kɛ pi si.—Kane Yohane 18:36.

MOO KASE YESU KE NIHI YI DAMI SANE

9. Mɛni lɛ ye bua mo nɛ o ná nɔ mi mami kaa Mawu Matsɛ Yemi ɔ pɛ lɛ ma nyɛ ma tsu dami sane nɛ a yi ɔ he ní kɛ pi si?

⁹ Wa ngɛ je nɛ ɔ “nyagbe ligbi ɔmɛ a mi.” Enɛ ɔ he ɔ, waa kɛ nyagbahi kpeɔ wawɛɛ pe bɔ nɛ e ji ngɛ Yesu be ɔ mi ɔ. Se kaa bɔ nɛ e ji ngɛ jamɛ a be ɔ mi ɔ, wa le kaa Satan kɛ yiwutsotsɛmɛ ji nihi nɛ a ha nɛ wa ngɛ nɔ́ nae wawɛɛ ɔ nɛ. (2 Tim. 3:​1-5, 13; Kpoj. 12:12) Kaa bɔ nɛ e ji ngɛ Yesu blɔ fa mi ɔ, wɔ hu wa le kaa Mawu Matsɛ Yemi ɔ pɛ lɛ ma je dami sane nɛ a yi ɔ kɛ je kulaa. Enɛ ɔ he ɔ, wa fĩɔ Mawu Matsɛ Yemi ɔ se kɛ wa tsui tsuo, nɛ wa pee we nɔ́ ko kɛ tsɔɔ kaa wa ngɛ si tee kɛ ngɛ nɔ yeli ɔmɛ woe akɛnɛ nihi yi dami sane ɔ he je. Mo susu nyɛmiyo ko nɛ a tsɛɛ lɛ ke Stacya ɔ níhi a si kpami ɔ he nɛ o hyɛ. Loko Stacy ma ba kase anɔkuale ɔ, e piɛɛɔ ma mi bi ɔmɛ a he kɛ tsɔɔ atuã ngɛ gbɛjegbɛ ɔmɛ a nɔ akɛnɛ a yi dami sane ɔ he je. Se e yi mi bɔni lɛ peemi enyɔɔnyɔ ngɛ nɔ́ nɛ e ngɛ pee ɔ he. E de ke: “Be komɛ ɔ, ke wa ngɛ gbɛjegbɛ ɔmɛ a nɔ ɔ, i biɔ ye he ke, anɛ nɔ́ nɛ i ngɛ pee ɔ da lo? Se amlɔ nɛ ɔ lɛɛ, i ngɛ nɔ mi mami kaa Mawu Matsɛ Yemi ɔ pɛ lɛ ma nyɛ ma tsu wa nyagba amɛ tsuo a he ní. I le kaa Yehowa lɛ maa po nɔ́ nami tsuo a se, se pi imi.”—La 72:​1, 4.

10. Kaa bɔ nɛ Mateo 5:​43-48 ɔ tsɔɔ ɔ, mɛni he je nɛ wa bɔɛ mɔde kaa wa ma tsake ma a mlaahi kɛ nɔ yeli ɔ? (Hyɛ foni ɔ hulɔ.)

¹⁰ Mwɔnɛ ɔ, nihi fuu ya piɛɛɔ kuu komɛ a he kɛ yi mi tomi ɔ kaa a ma tsake nɔ yeli ɔmɛ. Se a kpɛti nihi fuu kɛ abofu peeɔ jã, nɛ a yi ma mlaa amɛ a nɔ, nɛ a yeɔ ni kpahi awi hulɔ. Se, tsa pi jã kulaa nɛ Yesu tsɔɔ wɔ kaa waa pee. (Efe. 4:31) Nyɛminyumu ko nɛ a tsɛɛ lɛ ke Jeffrey ɔ de ke: “I le kaa ke nihi ngɛ demonstration pee ngɛ tue mi jɔmi mi po ɔ, e yi kulaa kaa a mi mi ma fu, nɛ lɔ ɔ haa nɛ a puɛɔ ní, a juɔ nihi a níhi, nɛ a yeɔ ni kpahi awi hulɔ.” Se kɛ̃ ɔ, Yesu tsɔɔ kaa e sa nɛ waa kɛ nɔ fɛɛ nɔ nɛ hi si ngɛ suɔmi mi, nɛ nihi nɛ waa kɛ mɛ kpa we gbi loo a waa wɔ yi mi ɔ po piɛɛ he. (Kane Mateo 5:​43-48.) Akɛnɛ wa ji Kristofohi he je ɔ, wa suɔ nɛ waa kɛ wa ní peepee nɛ tsɔɔ kaa wa ngɛ Yesu kasee.

11. Mɛni ma nyɛ ma ha nɛ e he nɛ wa ha wɔ be komɛ kaa wa maa kase Yesu nɔ hyɛmi nɔ́ ɔ?

¹¹ Wa le kaa Mawu Matsɛ Yemi ɔ pɛ lɛ ma nyɛ maa po dami sane nɛ a yi ɔ se. Se ke a ye wɔ sane yaya nɛ wa hyɛ we nɛ hi ɔ, e he ma nyɛ maa wa ha wɔ kaa wa maa kase Yesu. Mo susu nɔ́ nɛ ba Janiya nɛ a ye lɛ sane yaya akɛnɛ e slo e he womi nɔ su ɔ he nɛ o hyɛ. E de ke: “Ye mi mi fu wawɛɛ. Dɔdɔɛ ɔ ha nɛ i nu he kaa e sa nɛ a gbla nihi nɛ a ye mi sane yaya a tue. Enɛ ɔ ha nɛ i susu kaa e sa nɛ ma ya piɛɛ kuu ko nɛ a ngɛ mɔde bɔe kaa a maa po nɔ hɛ mi hyɛmi se ɔ a he. I nu he kaa jã nɛ ma pee ɔ ma ha nɛ níhi maa ya nɔ saminya.” Pee se ɔ, Janiya yɔse kaa e sa nɛ e pee tsakemi ngɛ e si himi mi. E de ke: “Be mi nɛ e sa kaa ma ngɔ ye hɛ kɛ fɔ Yehowa nɔ ɔ, i ngmɛ blɔ nɛ ni kpahi a susumi ná ye nɔ he wami. Enɛ ɔ he ɔ, i ma ye juɛmi nya si kaa ma yu ye he ngɛ kuu nɛ ɔmɛ a he kulaa.” Ke a ye wɔ sane yaya nɛ wa mi mi fu po ɔ, e sa nɛ waa bɔ mɔde kaa wa maa yu wa he ngɛ je ɔ he be fɛɛ be.—Yoh. 15:19.

12. Mɛni he je nɛ nile ngɛ mi kaa wa maa hyɛ saminya ngɛ níhi nɛ wa hyɛɔ, níhi nɛ wa kaneɔ, kɛ munyuhi nɛ wa buɔ tue ɔ he ɔ?

¹² Mɛni ma nyɛ maa ye bua wɔ konɛ wa mi mi nɛ ko fu kɛ be nɔ ke a ye wɔ sane yaya? Nɔ́ ko nɛ ma nyɛ maa ye bua wɔ ji nɛ wa maa hyɛ níhi nɛ wa hyɛɔ, kɛ níhi nɛ wa kaneɔ loo wa buɔ tue ɔ saminya. Ni komɛ ngɔɔ munyu komɛ kɛ fɔɔ Intanɛti ɔ nɔ konɛ ke nihi na a, a nya nɛ kpɛ a he, nɛ a tu munyu kɛ si nɔ yeli ɔmɛ. Behi fuu ɔ, nihi nɛ a fiaa adafi ɔ deɔ níhi nɛ mɛ nitsɛmɛ a suɔ, se pi sane nɛ ya nɔ ɔ tutuutu. Ke wa nu amaniɛ bɔmi nɛ tsɔɔ kaa nihi yi dami sane niinɛ po, nɛ wa ya nɔ nɛ wa susu he ɔ, wa be nyɛe maa pee nɔ́ ko ngɛ he. Ke wa ya nɔ nɛ wa puɛ be ngɛ jamɛ a sane ɔ he ɔ, lɔ ɔ ma nyɛ ma ha nɛ waa hao, nɛ wa kɔni mi ma jɔ̃. (Abɛ 24:10) Ke wa hyɛ we nɛ hi ɔ, lɔ ɔ ma nyɛ ma ha nɛ wa hɛ maa je nɔ kaa Mawu Matsɛ Yemi ɔ pɛ lɛ e ma nyɛ maa po dami sane nɛ a yi ɔ tsuo se.

13. Mɛni blɔ nɔ nɛ Baiblo ɔ nɛ wa maa kane daa ligbi ɔ maa ye bua wɔ konɛ wa ná juɛmi nɛ da ngɛ dami sane nɛ a yi ɔ he?

¹³ Ke wa kaneɔ Baiblo ɔ daa, nɛ wa pueɔ wa yi mi tɛ ngɛ he be fɛɛ be ɔ, e ma nyɛ maa ye bua wɔ konɛ waa da dami sane nɛ a yi ɔ nya. Nyɛmiyo ko nɛ a tsɛɛ lɛ ke Alia a ye aywilɛho wawɛɛ benɛ e na nɛ a ye ni komɛ sane yaya ngɛ e kpɔ ɔ mi ɔ. E pee kaa nɔ́ nɛ nihi nɛ a pee jamɛ a yiwutso ní ɔ ye a he, nɛ a ná we tue gblami ko. Alia de ke: “Ke i he ye niinɛ kaa Yehowa ma tsu nyagba nɛ ɔmɛ a he ní kɛ ha wɔ ɔ, lɛɛ e sa nɛ ma tsake ye susumi. Jamɛ a be ɔ mi ɔ, i kane Hiob 34:​22-29 ɔ. Ngmami nɛ ɔ kai mi kaa Yehowa naa nɔ́ fɛɛ nɔ́. Nɛ lɛ pɛ nɛ e kojoɔ ngɛ dami mi, nɛ lɛ pɛ nɛ e ma nyɛ ma tsu adesahi a nyagbahi tsuo a he ní.” Se be mi nɛ wa ngɛ mlɛe nɛ Mawu Matsɛ Yemi ɔ nɛ ba tsu dami sane nɛ a yi ɔ he ní kɛ ha wɔ ɔ, e ma bi nɛ waa da dami sane nɛ a yi ɔ nya. Ngɛ mɛni blɔ nɔ?

MƐNI WA MA NYƐ MAA PEE AMLƆ NƐ Ɔ?

14. Mɛni wa ma nyɛ maa pee amlɔ nɛ ɔ? (Kolose Bi 3:​10, 11)

¹⁴ Anɔkuale sane ji kaa wa be nyɛe ma kudɔ nihi nɛ a yi wɔ dami sane ɔ a ní peepee, se wa ma nyɛ ma kudɔ bɔ nɛ wa maa pee wa ní ha ke a ye wɔ sane yaya. Kaa bɔ nɛ wa na kɛ sɛ hlami ɔ, wa ma nyɛ maa kase Yesu nɔ hyɛmi nɔ́ ɔ nɛ wa je suɔmi kpo. Suɔmi maa ye bua wɔ konɛ wa je bumi kpo kɛ tsɔɔ nɔ fɛɛ nɔ, nɛ nihi nɛ a yeɔ wɔ sane yaya a po piɛɛ he. (Mat. 7:12; Rom. 12:17) Yehowa bua jɔɔ wawɛɛ ke waa kɛ nɔ fɛɛ nɔ hi si saminya ngɛ mi mi jɔmi mi.—Kane Kolose Bi 3:​10, 11.

15. Ke wa tsɔɔ nihi Baiblo mi anɔkualehi ɔ, kɛ lɔ ɔ maa ye bua mɛ ha kɛɛ?

¹⁵ Blɔ nɛ se be nɛ wa ma nyɛ maa gu nɔ kɛ da dami sane nɛ a yi ɔ nya ji kaa wa maa tsɔɔ nihi Yehowa he ní. Mɛni he je nɛ wa de jã a? Ejakaa “Yehowa nile” ɔ ma nyɛ ma tsake nɔ ko nɛ e peeɔ yiwutso ní nɛ e hɛ mi jɔɛ ɔ je mi bami, nɛ jamɛ a nɔ ɔ ma ba pee nɔ ko nɛ e jeɔ mi mi jɔmi kɛ suɔmi kpo. (Yes. 11:​6, 7, 9) Loko nyumu ko nɛ a tsɛɛ lɛ ke Jemal ma ba kase anɔkuale ɔ, e ya piɛɛ kuu ko he, nɛ a te si kɛ wo nɔ yemi ɔ. E pee jã ejakaa e susu kaa nɔ yemi nɛ ɔ ha nɛ ma mi bi ɔmɛ ngɛ nɔ́ nae. E de ke: “O be nyɛe maa nyɛ nɔ ko nɔ kaa e pee tsakemi. Nɔ ko nyɛ we ye nɔ kaa ma pee tsakemi, se benɛ i ba ngɛ Baiblo mi anɔkuale ɔ kasee, i pee tsakemihi ngɛ ye si himi mi.” Nɔ́ nɛ Jemal kase ɔ ye bua lɛ nɛ e kpa kunɔ nɔmi. Ke wa ya nɔ nɛ wa tsɔɔ nihi anɔkualehi nɛ ngɛ Baiblo ɔ mi ɔ, wa ma nyɛ maa ye bua mɛ konɛ a kpa níhi nɛ a peeɔ kɛ yeɔ ni kpahi awi ɔ peemi.

16. Mɛni he je nɛ o bua jɔ he kaa o maa fiɛɛ Matsɛ Yemi ɔ he hɛ kɛ nɔ fɔmi ɔ kɛ tsɔɔ nihi ɔ?

¹⁶ Kaa bɔ nɛ Yesu pee ɔ, wɔ hu wa pee klaalo kaa wa ma de nihi kaa Mawu Matsɛ Yemi ɔ pɛ lɛ e ma nyɛ ma je dami sane nɛ a yi ɔ kɛ je kulaa. Hɛ kɛ nɔ fɔmi nɛ ɔ ma nyɛ maa ye bua nihi nɛ a ye mɛ sane yaya a. (Yer. 29:11) Stacy nɛ wa tu e he munyu kɛ sɛ hlami ɔ de ke: “Anɔkuale ɔ nɛ i ba kase ɔ ye bua mi nɛ i nyɛ nɛ i da dami sane nɛ a yi imi kɛ ni kpahi ɔ nya. Yehowa guɔ sɛ gbi nɛ ngɛ Baiblo ɔ mi ɔ nɔ kɛ woɔ nɔ bua.” Loko o ma nyɛ maa fiɛɛ sɛ gbi nɛ woɔ nɔ bua nɛ tsɔɔ kaa a maa po dami sane nɛ a yi ɔ se ɔ, e ma bi nɛ o dla o he saminya. Ke o le nɔ́ nɛ Baiblo ɔ de kɛ kɔ nɔ́ nami he ɔ saminya a, lɔ ɔ ma ha nɛ o ma ná nɔ mi mami nɛ mi wa ngɛ níhi nɛ Baiblo ɔ tsɔɔ ɔ mi. Ke o ngɛ sukuu jio, o ngɛ ní tsumi he jio, o ma nyɛ maa tsɔɔ ni kpahi nɔ́ he je nɛ Yehowa ngmɛ nɔ́ nami blɔ, kɛ nɔ́ nɛ Yehowa maa pee ngɛ he hwɔɔ se.b

17. Mɛni blɔ nɔ Yehowa yeɔ buaa wɔ ke a ye wɔ sane yaya?

¹⁷ Aywilɛho sane ji kaa akɛnɛ Satan nɛ ji “je nɛ ɔ nɔ yelɔ ɔ” ngɛ nɔ yee loloolo he je ɔ, nihi maa ya nɔ maa ye wɔ sane yaya. Se kɛ̃ ɔ, wa ma nyɛ maa hyɛ si himi kpakpa blɔ ejakaa Yehowa wo si kaa e maa ye bua wɔ amlɔ nɛ ɔ, nɛ e ma je Satan kɛ yiwutso ní peepeehi tsuo kɛ je. (Yoh. 12:31) Yehowa gu Baiblo ɔ nɔ kɛ tsɔɔ wɔ nɔ́ he je nɛ e ngmɛ blɔ nɛ nihi yeɔ wɔ sane yaya. Se pi lɔ ɔ pɛ, e ha nɛ wa na bɔ nɛ e nuɔ he ha ke wa ngɛ nɔ́ nae hulɔ. (La 34:​17-19) Yehowa gu e bi Yesu nɔ kɛ tsɔɔ wɔ bɔ nɛ e sa nɛ waa pee wa ní ha ke nihi ye wɔ sane yaya. Jehanɛ hu ɔ, e ha nɛ wa na kaa e be kɛe nɛ e Matsɛ Yemi ɔ maa po dami sane nɛ a yi wɔ ɔ se. (2 Pet. 3:13) Enɛ ɔ he ɔ, nyɛ ha nɛ wɔ tsuo waa ya nɔ nɛ waa fiɛɛ sane kpakpa nɛ kɔɔ Mawu Matsɛ Yemi ɔ he ɔ kɛ kã, nɛ waa hyɛ be nɛ “dami sane yemi kɛ dami” ní peepee ma hyi zugba a nɔ ɔ blɔ.—Yes. 9:7.