Sane Bimi 3: Mɛni Heje Nɛ Mawu Ha Nɛ I Ngɛ Nɔ́ Nae?

IAN papa nuɔ dã wawɛɛ nitsɛ. E ngɛ mi kaa helo nya nɔ́ ko he hia we Ian mohu lɛɛ, se e papaa je we suɔmi kpo kɛ tsɔɔ lɛ, enɛ ɔ he ɔ, e be bua jɔmi. Ian de ke, “Ngɛ bɔnɛ ye papaa nuɔ dã ha kɛ bɔnɛ e peeɔ ye mami ha heje ɔ, i sume e sane.” Benɛ Ian ngɛ wae ɔ, e ba ná susumi kaa Mawu be. E bi e he ke, “Ke Mawu ngɛ ɔ, lɛɛ mɛni heje mɔ nɛ e ha nɛ adesahi ngɛ nɔ́ nae?”

Mɛni heje e sa nɛ wa bi sane kaa jã?

Ke o kɛ haomi ko kpi ngɛ o si himi mi po ɔ, eko ɔ, ke o na nihi nɛ a pee we nɔ́ ko nɛ a ngɛ nɔ́ nae ɔ, e dɔɔ mo wawɛɛ. Se ke mo nitsɛ o kɛ haomihi ngɛ kpee, aloo o suɔlɔ ko be he wami, aloo e gbo ɔ, lɔɔ ma ha nɛ o maa suɔ wawɛɛ kaa o le nɔ́ heje nɛ o ngɛ nɔ́ nae ɔ kaa bɔnɛ Ian hu suɔ nɛ e le ɔ.

Mɛni heto nɛ nihi ha?

Ni komɛ susu kaa Mawu ngmɛ blɔ nɛ wa ngɛ nɔ́ nae konɛ lɔɔ nɛ ha nɛ waa ba wa he si nɛ wa mi mi nɛ sã wɔ ngɛ nihi a he. Ni kpahi hu susu kaa nihi ngɛ nɔ́ nae ngɛ yayami komɛ nɛ a pee kɛ be ɔ heje.

Mɛni heto nɛ a ha a tsɔɔ?

E tsɔɔ kaa nɔ́ nɛ adesahi ngɛ nae ɔ si we Mawu kpu, enɛ ɔ he ɔ, e maa ye ha wɔ kaa wa maa suɔ lɛ. E tsɔɔ hu kaa Mawu yi mi wa.

Mɛni Baiblo ɔ tsɔɔ?

Baiblo ɔ tsɔɔ heii kaa e sɛ nɛ wa pia Mawu ngɛ nɔ́ nɛ adesahi ngɛ nae ɔ he. “Ke a ka nɔ ko ɔ, e ko de ke Mawu lɛ ka lɛ. Ejakaa nɔ ko be nyɛe maa ka Mawu kaa e maa pee yayami lo. Pohu Mawu nitsɛ kɛ́ nɔ.” (Yakobo 1:13) Ngɛ anɔkuale mi ɔ, nihi piaa Mawu ngɛ nɔ́ nɛ adesahi ngɛ nae ɔ heje, se enɛ ɔ kɛ suhi nɛ Baiblo ɔ tsɔɔ kaa Mawu ngɛ ɔ kɔ we. Mɛni heje?

Suhi titli nɛ Mawu ngɛ ɔ a kpɛti kake ji suɔmi. (1 Yohane 4:8) Bɔnɛ pee nɛ waa nu enɛ ɔ sisi saminya a, Baiblo ɔ tsɔɔ kaa Mawu suɔ wɔ kaa bɔnɛ binyɛ suɔ e bi nɛ ngɛ nyɔ nya a. Mawu bi ke: “Anɛ binyɛ hɛ maa je lɛ nitsɛ e bi nɛ ngɛ nyɔ nya nɔ lo? Anɛ e be suɔmi kpo jee kɛ tsɔɔ e bi ɔ lo?” E de ke: “Ke binyɛ hɛ maa je e bi nɔ po, imi lɛɛ ye hɛ be o nɔ jee kɔkɔɔkɔ.” (Yesaya 49:15) Anɛ binyɛ ko nɛ ngɛ suɔmi maa je blɔ maa ye e bi awi lo? Binyɛ nɛ ngɛ suɔmi ɔ be e bi awi yee, mohu ɔ, e maa ye bua e bi ɔ konɛ e ko na nɔ́ tsɔ. Jã nɔuu kɛ̃ nɛ pi Mawu nɛ ha nɛ nihi nɛ a pee we nɔ́ ko ɔ ngɛ nɔ́ nae.—1 Mose 18:25.

Ke Mawu susuɔ wa he po ɔ, nihi nɛ a pee we nɔ́ ko ɔ ngɛ nɔ́ nae. Enɛ ɔ he ɔ, eko ɔ, o ma bi ke, ‘Ke Mawu susuɔ wa he nɛ e ngɛ he wami pe nɔ tsuaa nɔ ɔ, mɛni heje mɔ nɛ e pui nɔ́ nami se?’

Yi mi tomi kpakpahi a heje nɛ Mawu pui nɔ́ nami se kɛ ba si piɔ ɔ nɛ. Mo susu yi mi tomi nɛ ɔmɛ a kpɛti kake he nɛ o hyɛ: Behi fuu ɔ, nihi lɛ a haa nɛ ni kpahi naa nɔ́. Yiwutsotsɛmɛ kɛ yi mi wali fuu nɛ a haa nɛ nihi naa nɔ́ ɔ sume kaa a ma tsake a je mi bami. Enɛ ɔ he ɔ, loko Mawu maa po nɔ́ nami se ɔ, e ma bi nɛ e kpata nimli yayami ɔmɛ a hɛ mi.

Bɔfo Petro tsɔɔ nɔ́ heje nɛ Mawu kpataa we nimli yayami ɔmɛ a hɛ mi lolo ɔ. E ngma ke: “Nɔ́ nɛ Nyɔmtsɛ ɔ wo he si ke e maa pee ɔ, pi tsle nɛ e ngɛ toe ngɛ he kaa bɔnɛ ni komɛ ngɛ susue ɔ; e tsui si kɛkɛ lɛ e ngɛ toe ha nyɛ. Ejakaa e sume nɛ nɔ ko nɔ ko hɛ mi nɛ kpata, se mohu nɔ tsuaa nɔ nɛ tsake e tsui.” (2 Petro 3:9) Suɔmi kɛ mɔbɔ nami nɛ Yehowa Mawu ngɛ ɔ heje nɛ e ngɛ e tsui si toe ɔ nɛ.

Se e be kɛe nɛ Yehowa Mawu ma kpata nimli yayami ɔmɛ a hɛ mi. ‘Nihi nɛ a ngɛ nihi nɛ pee we nɔ́ ko ɔ haoe ɔ, Mawu maa hao mɛ ngɔ to nane mi. A maa gbla nihi nɛ a waa nihi a yi mi ngɛ blɔ nɛ dɛ nɔ ɔ a tue, nɛ a hɛ mi ma kpata pɛsɛpɛsɛ kɛ maa ya neneene.’—2 Tesalonikabi 1:6-9.

Ian nɛ wa tu e he munyu kɛ sɛ hlami ɔ ná hetohi nɛ haa nɛ nɔ tsui nɔɔ nɔ mi ngɛ sanehi nɛ e bi kɛ kɔ nɔ́ nami he ɔ he. Nɔ́ nɛ e kase ɔ ha nɛ e tsake bɔnɛ e peeɔ e ní ha.