Mo Gbɔjɔ O Ní Tsɔɔmi ɔ Mi
1. Mɛni ji oti nɛ haa nɛ ní tsɔɔmi mi tɛɛ nɛ e nuu tso?
1 Ní nɛ a tsɔɔ nɛ́ e sisi numi wɛ ɔ ji nɔ́ titli nɛ haa ní tsɔɔmi nuu tso. Bɔnɛ Tsɔɔlɔ Ngua Yesu plɛ kɛ tsɔɔ ní ɔ he nɛ wa ma susu ɔ maa ye bua wɔ konɛ wa ‘ní tsɔɔmi’ nɛ nu tso.—2 Tim. 4:2; Yoh. 13:13.
2. Mɛni ní tsɔɔmi nɛ a ma gbɔjɔ mi ɔ tsɔɔ, nɛ mɛni jee mi kɛ baa?
2 Mo Gbɔjɔ O Munyu ɔ Mi: Wa naa anɔkuale munyu komɛ nɛ a mi kuɔ nɛ adesa tu hyɛ ɔ ngɛ Yoku Nɔ Fiɛɛmi ɔ mi. A tu munyu ɔ tsuo ngɛ blɔ nɛ sisi numi wɛ kulaa nɔ. (Mat. yi 5-7) Nimli babauu nɛ bu Yesu tue ɔ, “a nya kpɛ a he ngɛ bɔnɛ e plɛ kɛ tsɔɔ ní ɔ he.” Nihi nɛ a tsɔ kaa a ya nu lɛ ɔ a he mi po nɛ a de ke: “Bɔnɛ nɔmlɔ nɛ ɔ tuɔ munyu ɔ, nɔ ko tu we munyu ja gblee.” (Mat. 7:28, 29; Yoh. 7:46) E he hia we kaa waa ngɔ munyungu nguanguahi nɛ a sisi numi yee loo nɔhyɛ nɔ́ gagaagahi kɛ tsu ní loko nihi nɛ nu anɔkuale ɔ sisi. Wa ma nyɛ maa ngɔ munyuhi nɛ ni ɔmɛ le kɛ tsɔɔ mɛ anɔkuale ɔ nya.
3. Mɛni ha ni komɛ tsɔɔ a tue buli níhi fuu ke a ngɛ ní tsɔɔe, nɛ mɛni ma ha wa be jã pee?
3 Moo Le Níhi Abɔ Nɛ Sa Kaa O Tsɔɔ: Yesu susu e tue buli ɔmɛ a he nɛ e na níhi abɔ nɛ sa kaa e tsɔɔ mɛ ngɛ be pɔtɛɛ ko mi. (Yoh. 16:12) E sa nɛ waa to nihi nɛ waa kɛ mɛ sɛɛɔ ní ɔ a he hɛ, konɛ wa nyɛ nɛ wa gbɔjɔ munyu ɔ mi bɔnɛ maa hi ha mɛ, titli benɛ wa ngɛ wa wekuli, nihi nɛ kpaako a ná munyu ɔ he bua jɔmi, loo jokuɛwi odase yee. E biɔ kaa waa hyɛ nɛ hi konɛ wa ko tu níhi fuu a he munyu, keji wa na kaa ni ɔmɛ ngɛ tue bue saminya po. Nihi nɛ hɛɛ tsui kpakpa a maa ya nɔ maa kase Yehowa, anɔkuale Mawu ɔ he ní.—Yoh. 17:3; 1 Kor. 3:6.
4. Mɛni heje nɛ se nami ngɛ he kaa wa maa tu oti ɔmɛ pɛ a he munyu?
4 Moo Tu Oti Ɔmɛ Pɛ A He Munyu: Yesu tsɔɔ we níhi a nya gagaaga nɛ ma ha nɛ e ní tsɔɔmi sisi numi maa ye. Benɛ e de ke: ‘Nihi tsuo nɛ ngɛ yɔkɔ ɔmɛ a mi maa je kpo’ ɔ, e ngɔɛ níhi a nya tsɔɔmi fuu nɛ kɔɔ kuu enyɔ nɛ a ma tle mɛ si ɔ he kɛ ha we ngɛ jamɛ a be ɔ mi. (Yoh. 5:28, 29) Ke wa ngɛ Baiblo mi nikasemi pee ɔ, e sa kaa waa tu oti ɔmɛ pɛ a he munyu, nɛ́ waa hyɛ konɛ wa ko ngɔ ní kpahi nɛ piɛɛ we nikasemi ɔ he kɛ wo mi.
5. Mɛni jɔɔmi wa ma ná ke wa gbɔjɔ wa ní tsɔɔmi ɔ mi?
5 Wa bua jɔɔ kaa Yehowa tsɔɔ wɔ níhi nɛ hia kaa waa le ɔ ngɛ blɔ nɛ sisi numi wɛ kulaa nɔ! (Mat. 11:25) Nyɛ ha nɛ wa gbɔjɔ wa ní tsɔɔmi ɔ mi konɛ wa fiɛɛmi nítsumi ɔ nɛ wo yiblii nɛ wa ná bua jɔmi.