Níhi Etɛ Nɛ Ma Ha Nɛ O Ní Tsɔɔmi Maa Pi Si
1. Mɛni heje nɛ e sa nɛ wa ha nɛ wa ní tsɔɔmi nɛ pi si ɔ?
1 Kristofoli tsuo a ji tsɔɔli. Ke kpaako wa ya na nɔ ɔ jio, wa kpale ya slaa lɛ konɛ bua jɔmi nɛ e ná a mi nɛ wa jio, ní nɛ wa ngɛ lɛ tsɔɔe ɔ nɛ. Nɛ pi nɔ́ ko gu ko kɛkɛ nɛ wa ngɛ mɛ tsɔɔe. Wa tsɔɔ nihi “ngmami klɔuklɔu ɔ,” nɛ enɛ ɔ ma nyɛ ma ha nɛ a maa ‘le ní konɛ a he a yi wami.’ (2 Tim. 3:15) E ji he blɔ ngua nitsɛnitsɛ nɛ wa ná! Níhi etɛ nɛ a nyɛɛ se nɛ ɔ ma nyɛ ma ha nɛ wa ní tsɔɔmi maa pi si.
2. Mɛni blɔ nɔ wa ma nyɛ maa gu nɛ waa kɛ munyuhi nɛ a sisi numi yi nɛ tsɔɔ ní?
2 Munyuhi Nɛ A Sisi Numi Yi: Ke wa le nɔ́ ko saminya a, wa hɛ ma nyɛ maa je nɔ kaa e mi ma nyɛ maa wa ha nihi nɛ a li he nɔ́ ko ɔ. Enɛ ɔ he ɔ, ke o ngɛ Baiblo mi nikasemi pee ɔ, koo tu níhi nɛ a he hia we tsɔ ɔ a he munyu fuu. Mohu ɔ, moo ma oti ɔmɛ a nɔ mi. Munyu fuu nɛ o maa tu ɔ tsɔɔ we kaa ní tsɔɔmi ɔ pi si. (Abɛ 10:19) Behi fuu ɔ, e hi kaa o maa kane ngmami oti ɔmɛ pɛ. Ke o kane ngmami ko ta a, moo tu ngmami ɔ fã nɛ kɔɔ munyu nɛ nyɛ ngɛ he susue ɔ pɛ he munyu. Níhi nɛ Yesu tu a he munyu ngɛ Yoku ɔ Nɔ Fiɛɛmi nɛ a bɔ he amaniɛ ngɛ Mateo yi 5 kɛ ya si 7 ɔ mi ɔ, ji anɔkuale munyuhi nɛ a mi kuɔ mohu lɛɛ, se Yesu tui munyu fuu, nɛ munyuhi nɛ e tu ɔ hu a sisi numi yi.
3. Mɛni ji se nami nɛ ngɛ nɔ́ hetomi níhi a he, nɛ behi fuu ɔ, a kpɛti te nɛ hi wawɛɛ nɛɛ?
3 Nɔ́ Hetomi Níhi: Nɔ́ hetomi níhi haa nɛ nɔ susuɔ níhi a he, e haa nɛ e bua jɔɔ nɔ́ nɛ a ngɛ lɛ dee ɔ he, nɛ e yeɔ bua lɛ nɛ e kaiɔ nɔ́ nɛ e nu ɔ. Ko susu kaa ja o le nyazia siami loko o kɛ nɔ́ hetomi níhi ma nyɛ ma tsu ní. Behi fuu ɔ, Yesu kɛ nɔ́ hetomi ní kpitikpitihi nɛ a sisi numi yi tsuɔ ní. (Mat. 7:3-5; 18:2-4) Fonihi nɛ a tɛni ngɛ womihi a nɔ ɔ hu ma nyɛ maa ye bua wawɛɛ. Ke o sɛ hlami nɛ o susu níhi a he bɔɔ ɔ, o ma nyɛ maa na nɔ́ hetomi ní kpakpahi nɛ o kɛ ma tsu ní.
4. Mɛni blɔ nɔ waa kɛ sane bimihi ma nyɛ ma tsu ní saminya ngɛ?
4 Sane Bimi: E biɔ nɛ nɔ nɛ o kɛ lɛ ngɛ ní kasee ɔ nɛ susu sane nɛ o bi lɛ ɔ he nɛ e ha heto. Enɛ ɔ he ɔ, ke o bi sane ɔ, moo to o tsui si. Ke mo nitsɛ o kɛ oya yemi haa sanehi nɛ o biɔ ɔ a heto ɔ, lɔɔ be hae nɛ o le keji nɔ ɔ nɛ o kɛ lɛ ngɛ ní kasee ɔ nu nɔ́ nɛ o ngɛ lɛ tsɔɔe ɔ sisi loo e nui sisi. Ke heto nɛ e ha a dɛ ɔ, e maa hi wawɛɛ kaa o ma bi lɛ sane kpahi konɛ e da lɔ ɔmɛ a nɔ kɛ na heto ɔ mohu pe nɛ o maa tsɔɔ lɛ. (Mat. 17:24-27) Ngɛ anɔkuale mi ɔ, wa ti nɔ ko be nɛ e ji tsɔɔlɔ nɛ ye mluku. Enɛ ɔ heje ɔ, Baiblo ɔ woɔ wɔ he wami konɛ be tsuaa be ɔ, wa hɛ nɛ hi wa ní tsɔɔmi he saminya. Ke wa peeɔ jã a, lɔɔ ma ha nɛ waa kɛ nihi tsuo nɛ buɔ wɔ tue ɔ ma ná he se kɛ ya neneene.—1 Tim. 4:16.