“Bua Ma a Nya”
1. Mɛni blɔ nɔ kpe nguahi kɛ mahi a kpɛti kpehi nɛ wa yaa a kɛ Israel bi ɔmɛ a he nya buami ko nɛ ya nɔ benɛ a je Egipt pɛ ɔ kɔ ngɛ?
1 Benɛ Israel bi ɔmɛ je Egipt se bɔɔ pɛ ɔ, Yehowa fã Mose kaa e “bua ma a nya” ngɛ Sinai Yo ɔ he nɛ a bu nɔ́ nɛ E ma de mɛ ɔ tue, konɛ a ye lɛ gbeye nɛ a tsɔɔ a bimɛ ɔmɛ nɛ mɛ hu a ye lɛ gbeye. (5 Mose 4:10-13) E ngɛ heii kaa jamɛ a he nya buami ɔ wo a hemi kɛ yemi mi he wami nɛ a hɛ ji nɔ! Ngɛ nyɔhiɔ bɔɔ ko ngɛ wa hɛ mi ɔ mi ɔ, Yehowa we bi ma bua a he nya ngɛ kpe nguahi kɛ mahi a kpɛti kpehi a sisi konɛ Yehowa nɛ tsɔɔ mɛ ní. Mɛni nɛ e sa nɛ waa pee konɛ wa ná he se kɛ pi si?
2. Mɛni wa maa pee kɛ “dla” wa he kɛ ha kpe ngua a?
2 “Mo Dla O He”: Yehowa fã Israel bi ɔmɛ kaa “a dla a he” kɛ ha he nya buami ngɛ Sinai Yo ɔ he ɔ. (2 Mose 19:10, 11) Jã nɔuu kɛ̃ nɛ e sa kaa nihi nɛ a maa ya kpe ɔ tsuo nɛ a dla a he saminya, se pi nihi nɛ a ngɛ ní peemi ngɛ kpe ɔ sisi pɛ. Kaa nɔ hyɛmi nɔ ɔ, e ma bi nɛ nihi fuu nɛ a bi blɔ ngɛ a ní tsumi hehi. Eko ɔ, o si fɔfɔɛ ɔ ngɛ kaa Nehemia nɔ́ ɔ. E suɔ kaa e maa je e ní tsumi kaa Matsɛ Artaherhes da wolɔ ɔ he kɛ ya Yerusalem nɛ e ya ye bua nɛ a ma gbogbo ɔ, se e le kaa eko ɔ, matsɛ ɔ be e ní bimi ɔ nɔ kplɛɛe. Nehemia sɔle nɛ e kɛ kã ngɔ e ní bimi kɛ fɔ matsɛ ɔ hɛ mi. Matsɛ ɔ kplɛɛ nɔ kaa e ya, nɛ e ha lɛ níhi nɛ maa ye bua lɛ ngɛ tsu mami ɔ mi! (Neh. 2:1-9) Ngɛ be nɛ o ma bi ngɛ o ní tsumi tsɛ ɔ de ɔ se ɔ, anɛ o to blɔ hiami kɛ hwɔ he he blɔ nya lo? Asafo mi nikɔtɔma amɛ a bua maa jɔ kaa a maa ye bua nihi nɛ a hia yemi kɛ buami ɔ. Moo to he blɔ nya nɛ o su mla loko a je kpe ɔ sisi, nɛ o pee klaalo kaa o maa “pɛtɛ níhi nɛ o maa nu ɔ” he saminya.—Heb. 2:1.
3. Mɛni maa ye bua wɔ konɛ wa dla wa tsui kɛ ha kpe ɔ?
3 Wa tsui nɛ wa ma dla konɛ waa bu tue nɛ waa kase ní ɔ ji wa he dlami ɔ fã ko nɛ he hia. (Ezra 7:10) A kɛ kpe ɔ he blɔ nya tomi ɔ, kɛ munyuyihi tsuo nɛ a maa sɛsɛ he ɔ, kɛ a he ngmami oti kake loo enyɔ maa wo wa Intanɛti ní tsumi he ɔ nɔ ngɛ jw.org. Enɛ ɔ ba peeɔ nɔ́ nɛ wa ma nyɛ maa susu he ngɛ wa gbɔkuɛ Weku Mawu Jami ɔ mi ngɛ otsihi nɛ maa sɛ kpe ɔ hlami ɔ mi. Fiɛɛli komɛ fia kpe ɔ he blɔ nya tomi ɔ konɛ a ngma otihi ngɛ mi be mi nɛ kpe ɔ ngɛ nɔ yae.
4. Mɛni blɔ nɔ nɛ fɔli ma nyɛ maa gu kpe ɔ nɔ kɛ tsɔɔ a bimɛ ní?
4 ‘Kɛ Tsɔɔ O Bimɛ Ní’: Yi mi tomi he je nɛ a tsɔɔ kaa Israel bi ɔmɛ nɛ a bua a he nya ngɛ Sinai Yo ɔ he ɔ eko ji konɛ fɔli “nɛ a tsɔɔ a bimɛ ní.” (5 Mose 4:10) Kpe ngua a haa fɔli he blɔ nɛ se be konɛ a pee jã. E sa nɛ fɔli a ha nɛ a bimɛ ɔmɛ nɛ a hi si ngɛ a kasa mi ke kpe ɔ ngɛ nɔ yae ɔ, konɛ a ye bua mɛ nɛ a bu tue. Wekuhi ma nyɛ maa pee kake kɛ sɛsɛ níhi nɛ ya nɔ ngɛ kpe ɔ sisi ɔ he daa ligbi ke a je kpe ɔ kɛ ba, kɛ ngɛ a weku Mawu jami ɔ mi.
5. Ke wa ya kpe ɔ, mɛni se wa ma ná?
5 Kpe ngua nɛ a ya ngɛ Sinai Yo ɔ he ɔ ye bua Israel bi ɔmɛ nɛ a na kaa e ji he blɔ nɛ se be kaa Mawu we bi ji mɛ. (5 Mose 4:7, 8) Kpe ngua nɛ wa maa ya a maa ye bua wɔ jã a nɔuu. Satan je nɛ ɔ ngɛ kaa nga kplanaa nɛ e nɔ dɔ la, se ligbi etɛ kpe nɛ ɔ ma ha wa he maa jɔ wɔ, nɛ wa nyɛmimɛ nɛ waa kɛ mɛ maa bɔ ngɛ mumi mi paradeiso ɔ mi ɔ maa wo wɔ he wami. (Yes. 35:7-9) Akɛnɛ Yehowa ligbi ɔ su si ta he je ɔ, e ba mi kaa wa maa ya kpe nɛ haa wɔ he blɔ nɛ wa kpeɔ kɛ woɔ wa sibi he wami ɔ!—Heb. 10:24, 25.