Anɛ O Dla O He Kɛ To Mumi Mi Okplɔɔ Ngmɛmi ɔ Lo?
1. Mɛni ji blɔ nya nɛ e sa kaa a to kɛ ha okplɔɔ ngmɛmi?
1 Okplɔɔ ngmɛmi he nítsumi hiɛ. E sa nɛ a ya he niye ní nɛ a ba hoo saminya, nɛ a to okplɔɔ. E sa nɛ a to niye ní ɔ gbami hu he blɔ nya. Jehanɛ se ɔ, e sa nɛ a dla he nɛ a maa ye ní ɔ ngɛ ɔ. E sa kaa nihi nɛ a tsɛ mɛ ní yemi ɔ hu a dla a he, titli ke a maa hia blɔ gagaaga kɛ ya lejɛ ɔ. E ngɛ mi kaa okplɔɔ ngmɛmi he nítsumi he wa mohu lɛɛ, se huɛmɛ kɛ wekuli nɛ a kɛ mɛ maa pee kake kɛ ye ní ngɔngɔɛ nɛ he wami ngɛ mi ɔ se be kulaa. Yehowa Odasefoli ngɛ je ɔ mi tsuo bɔni a he nya buami kɛ je May nyɔhiɔ ɔ mi ngɛ kuu nguahi kɛ wawihi a mi nɛ́ a ye mumi mi niye ní ngɛ ‘Yaa Nɔ Nɛ O Hwɔɔ!’ Kpe Ngua a nɛ a hyɛ blɔ hluu ɔ sisi. A tsu blɔ nya tomi ɔ he nítsumi fuu momo konɛ a nyɛ nɛ a pee kpe ɔ. A fɔ wɔ tsuo nine. Se bɔnɛ pee nɛ wa nyɛ nɛ waa ya kpe ɔ nɛ wa ná he se kɛ pi si ɔ, e sa nɛ wɔ hu kaa ni kakaakahi wa dla wa he.—Abɛ 21:5.
2. Mɛni e sa kaa o pee konɛ o nyɛ nɛ o ya kpe ɔ ligbi ɔmɛ tsuo?
2 Mo Ná He Se Babauu: Anɛ o gbe o blɔ nya tomi ɔ nya konɛ o nyɛ nɛ o ya kpe ɔ ligbi ɔmɛ tsuo lo? Ke e he hia kaa o ya na o nítsumitsɛ nɛ o bi lɛ blɔ kaa o maa ya kpe ɔ ligbi ɔmɛ tsuo nɛ́ kekle ligbi ɔ hu piɛɛ he ɔ, moo pee jã. Anɛ o to hwɔ he kɛ lɔle he blɔ nya momo lo? E sa nɛ asafo mi nikɔtɔma amɛ nɛ hyɛ kaa a to blɔ nya ha nihi nɛ a wa ngɛ jeha mi, kɛ nihi nɛ gbɔjɔ, kɛ ni kpahi nɛ hia yemi kɛ buami ɔ.—Yer. 23:4; Gal. 6:10.
3. Mɛni heje nɛ e sɛ kaa waa ya mahi a kpɛti kpe nɛ a de we ke waa ya a?
3 A maa pee mahi a kpɛti kpehi ngɛ he komɛ. E sa nɛ e hi wa juɛmi mi kaa a fɔ asafohi pɔtɛɛ komɛ kɛ nihi nɛ a je ma se nine kɛ ba kpe nɛ ɔmɛ. Benɛ asafo nítsumi he ɔ ngɛ kpe ɔ he blɔ nya toe ɔ, a susu sɛhi nɛ a maa hi nɔ ɔ he loko a na nihi abɔ nɛ a maa fɔ mɛ nine ɔ nɛ. Ke fiɛɛli ya mahi a kpɛti kpe nɛ a de we ke a ya a, e ma ha nihi a he maa hiɛ tsɔ.
4. Mɛni ji ní komɛ nɛ maa ye bua wɔ konɛ waa pee klaalo kɛ ha blɔ nya tomi ɔ sisi jemi daa ligbi?
4 Daa ligbi ɔ, bɔɔ mɔde nɛ o su kpe ɔ sisi mla konɛ o hla he ko nɛ o hi si ngɛ loko kpe ɔ nɛ je sisi. Ngɔɔ be bɔɔ kɛ hyɛ blɔ nya tomi womi ɔ mi loko kpe ɔ nɛ je sisi. Enɛ ɔ ma ha nɛ o dla o tsui kɛ ha munyu nɛ a maa tu ɔ. (Ezra 7:10, NW) Ke blɔ nya tomi ɔ sɛnɔhilɔ ɔ de ke a maa fia la a, bu tue konɛ o pee klaalo kaa o kɛ o he maa wo la nɛ a ma la kɛ je kpe ɔ sisi kɛ sɔlemi ɔ mi.
5. Mɛni blɔ nɔ wa weku ɔ ma nyɛ ma ná blɔ nya tomi ɔ he se kɛ pi si ngɛ?
5 Ke weku mi bi ɔmɛ tsuo hi he kake ngɛ kpe ɔ sisi ɔ, fɔli ɔmɛ ma nyɛ maa hyɛ konɛ a bimɛ ɔmɛ nɛ bu munyu ɔmɛ tue saminya. (5 Mose 31:12) Wa ngɛ nyɛ tsuo he wami woe nɛ nyɛɛ nyɛɛ ngmami tsuaa ngmami nɛ a maa kane ɔ se ngɛ nyɛ Baiblo ɔ mi. Otihi nɛ nyɛ maa ngma kpitikpiti kɛ pue si ɔ, maa ye bua nyɛ konɛ nyɛɛ bu munyu ɔmɛ tue saminya. Pee se ɔ, níhi nɛ nyɛ ngma a maa ye bua nyɛ konɛ nyɛ kai munyu ɔmɛ a mi oti ɔmɛ. Bɔɔ mɔde nɛ o ko tu munyu benɛ blɔ nya tomi ɔ ngɛ nɔ yae ɔ, loo koo te si kɛ je o sɛ ɔ nɔ. Ke o hɛɛ mobile phone ɔ, hyɛ nɛ e ko je o juɛmi loo ni kpahi a juɛmi kɛ je blɔ nya tomi ɔ nɔ. Daa ligbi ke a kpa kpe ɔ, o kɛ ni kpahi nɛ sɛɛ níhi nɛ o bua jɔ he ngɛ blɔ nya tomi ɔ mi ɔ he ní.
6. Mɛni ji wa kpe ɔ fa ko nɛ he hia, nɛ kɛ wa ma plɛ kɛ ná he se kɛ pi si kɛɛ?
6 Ngɛ kpe ɔ sisi ɔ, wa ma ná he blɔ nɛ waa kɛ wa nyɛmimɛ nyumuhi kɛ yihi ma ná huɛ bɔmi nɛ mi wa nɛ e ko be je ɔ mi ɔ mi blɔ fa mi nɔ́. (La 133:1-3; Mar. 10:29, 30) E sa nɛ o bɔ mɔde kaa o ma je o he si kɛ tsɔɔ nɔ nɛ ngɛ o kasa nya a nɛ́ o kɛ lɛ nɛ sɛɛ ní ngɛ piani he jɔɔmi be ɔ mi. Enɛ ɔ ji se nami kake heje nɛ e sa kaa waa ngɔ niye ní nɛ mi jiɔ we kɛ ba kpe ɔ sisi nɛ wa ba ye, mohu pe nɛ wa maa ya ma a mi nɛ wa ya ye ní. Ko ha nɛ he blɔ nɛ wa ma ná kɛ wo wa sibi he wami ɔ nɛ bɔ mo.—Rom. 1:11, 12.
7. Mɛni blɔ nya e sa kaa waa to ngɛ tade nɛ wa maa wo ɔ he?
7 Tade Womi: E sa nɛ wa kadi kaa Yehowa fa Israelbi ɔmɛ nɛ a ngɔ kpa bluu kɛ kpɛ ngma kɛ wo a tade ɔmɛ a nya. (4 Mose 15:37-41) Enɛ ɔ kaiɔ mɛ kaa a ji nimli nɛ Yehowa hla mɛ kaa a ja lɛ. Mwɔnɛ ɔ, tadehi nɛ sa, nɛ bu ngɛ he nɛ wa woɔ kɛ baa kpe ɔ haa nɛ wa jeɔ muno ngɛ je ɔ he. Ke e ba kaa wa ma ya ye ní ngɛ ma a mi benɛ a kpa kpe ɔ, e peeɔ odase yemi agbo kɛ haa nihi. Enɛ ɔ he ɔ, mo susu tade nɛ o maa wo ɔ he saminya.
8, 9. Mɛni ji wa jami ɔ mi ní peemihi nɛ sɛ kaa wa ma wa hɛ ngɔ fɔ nɔ ngɛ wa he nya buamihi a sisi, nɛ kɛ wa ma plɛ kɛ tsɔɔ kaa wa buu mɛ kɛɛ?
8 Sɔlemi Kɛ La: Ní peemihi nɛ haa nɛ wa Mawu jami pii si ɔ a kpɛti kake ji yi jemi lahi nɛ wa laa ha Yehowa Mawu. E ngɛ kaa nɔ́ nɛ anɔkuale Kristofoli nɛ a hi si ngɛ kekle jeha lafa a mi ɔ pɔɔ lami ngɛ a jami mi. (1 Kor. 14:15) Se ni komɛ bui wa jami ɔ mi ní peemihi nɛ a he hia nɛ ɔmɛ. Ngɛ mɛni blɔ nɔ? A baa kpe ɔ benɛ a ngɛ sisije la lae, loo benɛ a ngɛ sɔlee, loo benɛ a la nɛ a sɔle ta. Nɛ ke e su kpami be hu ɔ, ni komɛ jee a hi he ɔmɛ, nɛ ni komɛ hu tuɔ munyu benɛ a ngɛ lae nɛ́ kpaako a maa sɔle. Mɛni heje?
9 Eko ɔ, ngɛ yi mi tomi kpakpahi komɛ a heje ɔ, ni komɛ maa pee jã ngɛ be kakaakahi a mi. Se ni komɛ kuaa lami kɛ sɔlemi bɔnɛ pee nɛ a ya sɛɛ ní aloo a ya sɛ a lɔle mi nɛ a je mla aloo a sɛ hlami kɛ ngɔ womi nɛ a ma je kpo ɔ. Benɛ wa ngɛ he jɔmi hlae ɔ, e sa nɛ waa hyɛ nɛ hi konɛ je ɔ su nɛ ji nɔ nitsɛ pɛ e nɔ́ mi fomi loo su yayahi kaa hɛkɔ kɛ kpɛle peemi nɛ ko gbla wɔ se ngɛ wa Mawu jami mi. Akɛnɛ wa ji Mawu jali ɔ, e sa nɛ waa bu sɔlemi kɛ lami nɛ wa ma la ha Yehowa kaa níhi nɛ a he hia wawɛɛ ngɛ wa jami ɔ mi.
10, 11. Mɛni ji nɔ́ nɛ e sɛ kaa fɔli nɛ pee, nɛ kɛ a ma plɛ kɛ ye bua a bimɛ ɔmɛ nɛ a ná blɔ nya tomi ɔ he se kɛ pi si kɛɛ?
10 Fɔli Kɛ Bimɛ: Wa bimɛ ɔmɛ je ekpa kulaa ngɛ je nɛ ɔ nɛ nihewi kɛ yihewi be jemiba ngɛ mi ɔ mi, nɛ enɛ ɔ haa nihi jeɔ Yehowa yi, nɛ a tuɔ asafo ɔ he munyu kpakpa. Be komɛ ɔ, haomi baa ke fɔli hyɛ we a bimɛ ɔmɛ a nɔ saminya. (Abɛ 29:15) E sɛ nɛ fɔli nɛ ngmɛɛ a bimɛ ɔmɛ a he, nɛ a hi bee kɛkɛ ngɛ he nɛ a maa to ɔ loo ngɛ kpe ɔ sisi.
11 Fɔli komɛ na kaa ke a kɛ a bimɛ ɔmɛ susu bɔnɛ sa nɛ a ba a jemi ha a he loko a ya kpe ɔ, e yeɔ bua. (Efe. 6:4) A yeɔ bua a bimɛ ɔmɛ nɛ a nuɔ sisi kaa anɔkuale Kristofoli a suɔmi “pee we níhi nɛ sɛ” aloo “e fo we lɛ nɔ kake too e nɔ mi.” (1 Kor. 13:5) Kpe ngua a ji be nɛ a to nɛ Yehowa kɛ ma tsɔse wɔ, nɛ kɛ gu jemiba kpakpa nɛ jokuɛwi kɛ nikɔtɔmahi tsuo ma je kpo ngɛ kpe ɔ sisi kɛ he kpahi nɔ lɛ maa tsɔɔ kaa wa ngɛ bumi kɛ ha blɔ nya tomi nɛ ɔ.—Yes. 54:13.
12. Kɛ wa ma plɛ kɛ ye nihi odase ngɛ ma nɛ a ngɛ kpe ɔ pee ngɛ mi ɔ mi kɛɛ?
12 Moo Ye Odase: Ke wa dla wa he kɛ to ɔ, wa ma nyɛ maa ye nihi odase ngɛ ma nɛ a ngɛ kpe ɔ pee ngɛ mi ɔ mi. Nyɛminyumu ko nɛ e kɛ e yo ya ní yemi he benɛ a kpa kpe ɔ se ɔ ngɔ kpe ɔ kadimi nɔ́ nɛ ngɛ e gugue nya a kɛ tsɔɔ ní jualɔ ɔ, nɛ e bi ke: “Anɛ o na kadimi nɔ́ nɛ ɔ ngɛ nihi fuu a gugue nya lo?” Ní jualɔ ɔ de ke e na, se e li nɔ́ nɛ ji. Enɛ ɔ tle ní sɛɛmi si, nɛ nyɛminyumu ɔ fɔ ní jualɔ ɔ nine kɛ ya kpe ɔ.
13. Mɛni blɔ nɔ wa maa gu kɛ tsɔɔ kaa wa ngɛ hɛsa ha Yehowa, Nɔ nɛ fɔ wɔ nine ɔ?
13 E ngɛ mi kaa wa nyɛmimɛ ji nihi nɛ a ma tsu munyu tumi, munyu bimi, kɛ peemi kɛ tsɔɔ ɔmɛ a he ní mohu lɛɛ, se wa hiɔwe Tsɛ Yehowa ji nɔ nɛ jee suɔmi mi kɛ toɔ mumi mi niye ní nɛ ɔ he blɔ nya daa jeha. (Yes. 65:13, 14) Ke wa ya kpe ɔ ligbi ɔmɛ tsuo nɛ wa ye mumi mi niye ní nɛ a ma gba ha wɔ ɔ kɛ bua jɔmi ɔ, wa tsɔɔ kaa wa ngɛ hɛsa kɛ ha Nɔ nɛ fɔ wɔ nine ɔ. Anɛ o gbe o blɔ nya tomi ɔ nya konɛ o nyɛ nɛ o pee jã lo?
[Daka ngɛ ba fa 4]
Kpe Ngua a He Kaimihi
◼ Blɔ Nya Tomi Be Ɔmɛ: Ngɛ ligbi etɛ ɔ tsuo mi ɔ, a maa je blɔ nya tomi ɔ sisi mɔtu 9:20. Ke a fia adafi kaa a ma bɔni la fiami ɔ, e sa nɛ wɔ tsuo wa ya hi si konɛ waa je blɔ nya tomi ɔ sisi ngɛ blɔ nɛ sa nɔ. Ngɛ Soha kɛ Hɔ ɔ, a ma kpa kpe ɔ gbɔkuɛ 4:55, nɛ Hɔgba hu a ma kpa gbɔkuɛ ngmlɛ 4. Ngɛ mahi a kpɛti kpe ɔ blɔ fa mi ɔ, a maa je sisi So piani 1:20, nɛ a ma kpa gbɔkuɛ 4:45. A ngɛ nyɛ tsuo he wami woe nɛ nyɛɛ piɛɛ he kɛ la la amɛ tsuo; nɛ la nɛ a ma la kɛ kpa kpe ɔ ligbi tsuaa ligbi ɔ hu piɛɛ he.
◼ Lɔle Mami He: Ke pi hiɔ sane aloo si fɔfɔɛ kpa ko nɛ biɔ esɔ yemi ɔ, lɛɛ be tsuaa be ɔ, e maa hi kaa wa maa hi si ngɛ he nɛ wa ma nyɛ maa bu munyu ɔ tue, mohu pe nɛ wa ma ya hi lɔle mi, ejakaa wa juɛmi ma nyɛ maa je munyu ɔ nɔ, loo wa maa hwɔ mahe. Ke wa hi kpe ɔ sisi, nɛ wa bu munyu ɔmɛ tue saminya a, lɔɔ tsɔɔ kaa wa ngɛ hɛsa kɛ ha mumi mi niye ní kpakpahi nɛ Yehowa to he blɔ nya ha wɔ ɔ. Akɛnɛ lɔle mami he ɔmɛ klee we heje ɔ, e sa nɛ nihi nɛ pee kake kɛ hi lɔle kake mi kɛ ba kpe ɔ.
◼ Sɛ Nɛ A Maa Nu Kɛ Fɔ Si: Nyɛ ma nyɛ maa nu blɔ kɛ ha nihi nɛ nyɛɛ kɛ mɛ sɛ lɔle kake mi loo nihi nɛ nyɛɛ kɛ mɛ je we kake mi pɛ.
◼ Piani Niye Ní: Wa kpa nyɛ pɛɛ nɛ nyɛɛ ngɔ ní nɛ nyɛ maa ye piani kɛ ba, mohu pe nɛ nyɛ maa je kpe ɔ sisi kɛ ya he niye ní ngɛ he jɔɔmi be ɔ mi. Nyɛ ko ngɔ ní nguahi nɛ a kɛ niye ní woɔ mi, loo níhi nɛ ma nyɛ maa ywia kɛ ba kpe ɔ. Ngɛ nihi nɛ maa ya kpe ɔ ngɛ stadium blɔ fami ɔ, a be nyɛe maa ngɔ nɔ́ ko nɔ́ ko, e kle jio e klee we jio, kɛ wo a sɛ ɔmɛ a sisi.
◼ Womihi Nɛ A Ma Je Kpo: Mawu Munyu ɔ wo wɔ ga ke “nyɛɛ kɛ suɔmi nɛ pee nɔ́ tsuaa nɔ́.” (1 Kor. 16:14) Akɛnɛ wa ngɛ suɔmi nɛ wa susuɔ ni kpahi a he heje ɔ, ke a je womi ko kpo ngɛ kpe sisi ɔ, e sɛ nɛ waa tu fo, nɛ wa tsitsɛɛ nihi bɔnɛ pee nɛ wa nine nɛ su womi ɔmɛ a nɔ kekle. Nɔ ko nɔ ko nɛ́ ko te si kɛ je e hi he ɔ kɛ ya wo zã kɛ ha womi ngɔmi, be mi nɛ a la we nyagbe la nɛ́ a sɔle. Ke a sɔle ta a, nɔ tsuaa nɔ nɛ nyɛɛ blɛuu kɛ ya wo zã kɛ ha womi ngɔmi. Ke wa ye wa he nɔ, nɛ wa to wa tsui si ɔ, lɔɔ tsɔɔ kaa wa ji Kristofoli nɛ wa nane pi si ngɛ Mawu jami mi, nɛ wa suɔ wa sibi.—Yoh. 13:35.
◼ Yemi Kɛ Buami: Wa ma nyɛ ma ha yemi kɛ buami ngɛ wa Matsɛ Yemi Asa a nɔ loo ngɛ kpe ɔ konɛ a kɛ fi je kɛ wɛ nítsumi ɔ se kɛ tsɔɔ kaa wa ngɛ hɛsa ha kpe ɔ blɔ nya tomi ɔ. Ke nyɛ maa gu check nɔ kɛ ha yemi kɛ buami ɔ, nyɛɛ ngma “Watch Tower” ngɛ nɔ.
◼ Oslaahi Kɛ Hiɔ Nɛ Fiaa Nɔ Tlukaa: Ke nɔ ko plaa loo hiɔ fia nɔ ko tlukaa ngɛ kpe ɔ, wa kpa nyɛ pɛɛ nɛ nyɛ de nibwɔhi a kpeeli ɔmɛ a kpɛti nɔ kake, konɛ e ya wo nyɛmimɛ nɛ tsuɔ ní ngɛ Tsopa Ngɔmi He ɔ a tue nɔ amlɔ, nɛ a ba hyɛ nɛ a tsu haomi ɔ he ní.
◼ Falifali Peemi: Nɔ tsuaa nɔ nɛ ba kpe ɔ blɔ nya nítsumi ji kaa e ma dla he nɛ e hi ɔ ke e ye ní ta. Akɛnɛ a ngɔ níhi nɛ a kɛ dɔmi woɔ mi kɛ ma kpe ɔ sisi heje ɔ, wa kpa nyɛ pɛɛ nɛ nyɛɛ ngɔ paper, niye ní, rɔba nɛ a kɛ fiɔ nyu, kɛ dɔmi kpahi kɛ wo ní ɔmɛ a mi. Ke wa pee jã a, lɔɔ tsɔɔ kaa wa ji nihi nɛ a he tsɔ.
◼ Foni Pomi: Wa kpa nyɛ pɛɛ, ke kpe ɔ ngɛ nɔ yae nɛ nyɛ maa po foni ɔ, e sɛ nɛ nyɛɛ ngɔ klama nɛ kpɛɛ la kɛ tsu ní. Akɛnɛ wa sume nɛ wa yeɔ jua ngɛ teokrase he nya buami sisi heje ɔ, e sɛ kaa wa poɔ foni nɛ wa heɔ sika. Jã kɛ̃ wa be nihi nɛ a poɔ foni nɛ a heɔ sika nine fɔe kɛ ba kpe ɔ sisi nɛ a ba po nyɛmimɛ foni.—w84 7/1 bf. 25; hyɛ Organized, bafa 142, kuku 3 hulɔ.
◼ Weku Mi Bimɛ Nɛ A Maa Hi He Kake: E sa kaa fɔli kɛ a bimɛ nɛ hi he kake benɛ kpe ɔ ngɛ nɔ yae, pe nɛ a maa ngmɛ blɔ nɛ́ a bimɛ, nɛ́ nihewi kɛ yihewi hu piɛɛ he, kɛ nihewi loo yihewi kpa amɛ ma ya hi he kake. Ke fɔli kɛ a bimɛ hi he kake ɔ, a maa wo mɛ he wami konɛ a ngma otihi kɛ pue si benɛ kpe ɔ ngɛ nɔ yae ɔ.
◼ Tokota: Daa jeha a, nihi nɛ a plaa a fuu jee tokota nɛ a woɔ. E hi wawɛɛ kaa wa maa wo tokota nɛ sa konɛ wa nyɛ nɛ waa kuɔ atlaakpeehi, loo wa nyɛ nɛ waa nyɛɛ dadehi nɛ puɔ ngɛ a mi nɛ a kɛ tsiɔ muɔhi a nya a nɔ, kɛ he kpahi slɔkee.
◼ Munyu Numi Kɛ Wo Klamahi A Nɔ: Nyɛ ko ngɔ klamahi nɛ́ a kɛ nuu munyu ɔ kɛ́ tsa oslabai he wami kpa amɛ loo munyu tumi klama a eko, se nyɛ ma nyɛ maa ngɔ kɛ tsu ní bɔnɛ e be ni kpahi haoe.
◼ Womi Nɛ A Kɛ Hlaa Nɔ Se Blɔ: Ke wa ya kpe ɔ nɛ wa ye nɔ ko nɛ ngɛ munyu ɔ he bua jɔmi tlukaa odase ɔ, e sa nɛ waa ngɔ womi nɛ ji Please Follow Up (S-43) kɛ ngma e he sanehi. E sa nɛ fiɛɛli nɛ ngɔ Please Follow Up womi ɔ kake loo enyɔ kɛ ba kpe ɔ. Ke o ngma womi ɔ nɔ ní ta a, o ma nyɛ maa ngɔ kɛ ya Womi Ngɔmi He ɔ konɛ a tsu he ní, aloo o ma nyɛ maa ngɔ kɛ ha nyɛ asafo mi womi ngmalɔ ɔ ke nyɛ kpale nyɛ se.—Hyɛ March 2005 Our Kingdom Ministry, bafa 4.
◼ Hwɔ He: (1) Ke nyɛ ya ba he ko nɛ nyɛ maa wo he hiɔ ɔ, wa kpa nyɛ pɛɛ nyɛ ko ha nɛ nihi fuu nɛ hi tsu ɔ mi pe bɔnɛ a ngmɛ blɔ. (2) Ke nyɛ ya to ni komɛ a we mi ɔ, nyɛɛ pee falifali, nyɛɛ pee nyɛ ní pɛpɛɛpɛ nɛ nyɛ je hɛsa kpo ngɛ níhi nɛ a ma ha nyɛ ɔ a he. (3) E sɛ nɛ nyɛmimɛ nyumuhi kɛ yihi nɛ hwɔ tsu kake mi, ja a je weku kake mi. (4) Nyɛɛ ko hoo ní ngɛ tsu nɛ a ha we nyɛ he blɔ ɔ mi. (5) Bɔnɛ pee nɛ waa tsɔɔ kaa wa ngɛ jemiba kpakpa a, nyɛ ko du nyɛ he ngɛ kpo nɔ. Ke hedu he be ɔ, nyɛ ma nyɛ maa ngɔ sa loo bo kɛ pee hedu he. (6) Kaa Kristofoli ɔ, e sɛ nɛ waa ngɔ níhi nɛ a to he blɔ nya ha nibwɔhi kɛ be nɔ. (7) Nyɛ je mumi ɔ yiblii ɔ kpo ngɛ bɔnɛ nyɛɛ kɛ nítsuli ngɛ nibwɔhi a to he loo weku nɛ nyɛ ya to ɔ mi bi ɔmɛ maa hi si ha a mi. (8) Ke haomi ko ba ngɛ he nɛ nyɛ ya to ɔ, nyɛɛ bɔ mɔde kaa nyɛ ma wo Nítsumi He Nɛ Hyɛɛ Hwɔ He nɔ ɔ a tue nɔ.