Blɔ Nɔ Nɛ Wa Maa Gu Kɛ Ye Odase Ngɛ Ma Nɔ

Atsɛ̃se kɛ okplɔɔhi nɛ wa toɔ womihi ngɛ a nɔ nɛ waa kɛ yeɔ odase ɔ ngɛ tsui kpakpatsɛmɛ gblae kɛ ngɛ anɔkuale ɔ mi bae. (Yoh. 6:44) Enɛ ɔ he ɔ, a wo asafo mi nikɔtɔmahi he wami kaa ke nihi pɔɔ bemi wawɛɛ ngɛ he komɛ ngɛ a zugba kpɔ ɔ mi ɔ, e sa nɛ a bɔ mɔde nɛ a to ma nɔ odase yemi he blɔ nya. Akɛnɛ wa be atsɛ̃se ɔ loo okplɔɔ ɔ he jee ngɛ he nɛ waa kɛ ma tsu ní ngɛ ɔ he je ɔ, behi fuu ɔ, e he be hiae nɛ wa bi blɔ ngɛ amlaalo ɔ ngɔ loko wa kɛ ma he ko. Mɛnɔmɛ nɛ a ma nyɛ maa ngɔ a he kɛ wo odase yemi nɛ ɔ mi? Fiɛɛli nɛ a hɛ mi ka si nɛ a kɔɔ nɔ́ se, nɛ a dlaa a he saminya, nɛ a le bɔ nɛ a kɛ nihi sɛɛɔ ní ha a ji nihi nɛ a ma nyɛ ma ha mɛ he blɔ nɛ ɔ. Níhi nɛ nyɛɛ se nɛ ɔmɛ maa ye bua fiɛɛli konɛ a nyɛ nɛ a ye odase ngɛ ma nɔ saminya.

Moo Pee Ní Nɛ Ɔmɛ:

Mo je huɛ bɔmi su kpo, nɛ o tsɔ o hɛ mi ha nihi nɛ a maa be ngɛ okplɔɔ he ɔ, nɛ o hɛ mo kɛ su a he nɛ o ye bua mɛ. Fiɛɛli komɛ muɔɔ hɛlii kɛ tsɔɔ ni ɔmɛ, a nyaa a he, nɛ a ngaa mɛ kɛ bua jɔmi. Ke nɔ ko bee nɛ e ngɛ womihi nɛ a to ɔ hyɛe ɔ, o ma nyɛ ma de ke, “I kpa mo pɛɛ o ma nyɛ ma wo eko tsuaa eko nɛ o suɔ.”
Ha nɛ blɔ bɔɔ nɛ hi o kɛ atsɛ̃se ɔ kpɛti. Ngɛ he komɛ ɔ, ke fiɛɛli hɛ mɛ kɛ je atsɛ̃se ɔ he kɛ ya se bɔɔ ɔ, nihi baa womi ɔmɛ a he. Fiɛɛli komɛ hu na kaa ke a pee jã a, nihi bɛ womi ɔmɛ a he. Enɛ ɔ he ɔ, a yaa se bɔɔ kɛ ya siɔ benɛ nɔ ko maa ba womi ɔmɛ a he. Ke o na kaa nɔ ko ma womi ɔmɛ a he ɔ, hɛɛ mo kɛ su e he, nɛ o bɔ mɔde kaa o kɛ lɛ maa sɛɛ ní. O ma nyɛ ma bi lɛ ke, “Anɛ o susu sane bimi nɛ ɔ he hyɛ lo?”
Moo ngɔ Baiblo ɔ kɛ tsu ní be tsuaa be.
Ke nɔ ko ngɔ Baiblo Tsɔɔmi womi ɔ, aloo wa Baiblo kasemi womi ɔmɛ eko ɔ, moo tsɔɔ lɛ bɔ nɛ waa kɛ nihi kaseɔ Baiblo ɔ ha a. Lɔ ɔ se ɔ, mo de lɛ kaa o suɔ nɛ o ma je video nɛ ji Mɛni He Je Nɛ E Sa Kaa Waa Kase Baiblo ɔ? kɛ tsɔɔ lɛ ngɛ o mobile phone ɔ nɔ.
Ke e maa hi ɔ, moo ngɔ nɔ ɔ tɛlifoo nɔma kɛ e adrɛs. Ke nɔ ɔ be nyɛ zugba kpɔ ɔ mi ɔ, moo ngma Please Follow Up (S-43) womi ɔ nɔ ní nɛ o kɛ ha nyɛ asafo mi womi ngmalɔ ɔ mla.

Koo Pee Ní Nɛ Ɔmɛ:

Ko ná ni ɔmɛ a he abofu, koo nyɛ a nɔ kaa a ngɔ womi ɔ eko, nɛ koo da si ngɛ okplɔɔ ɔ he haa kaa polisi.
Koo bu odase yemi nɛ ɔ kaa he blɔ nɛ o kɛ ma gba womihi fuu kɛkɛ. Ke wa ya fiɛɛmi ɔ, wa suɔ nɛ waa kɛ nihi maa je Baiblo mi ní kasemi sisi. Lɔ ɔ he ɔ, e sa nɛ o bɔ mɔde nɛ o kɛ nihi nɛ sɛɛ ní.
Koo da si ngɛ atsɛ̃se ɔ hɛ mi, ke pi jã a, o maa tsi nihi a hɛ mi, nɛ o kɛ fiɛɛlɔ nɛ piɛɛ o he ɔ kó hi ní sɛɛe kpamisaa. Ke e he hia nɛ o kɛ nɔ ko nɛ tu munyu ngɛ mobile phone nɔ ɔ, e maa hi kaa o maa ya se konɛ o ya tu munyu.
O kɛ nihi nɛ a bua jɔɛ wa he ɔ ko je atsinyɛ. Ke nɔ ko kaa jã ngɛ hlae nɛ e kɛ mo maa pɛ ɔ, e maa hi kaa o maa ngɔ atsɛ̃se ɔ loo okplɔɔ ɔ kɛ ya ma he kpa mohu.