Blɔ Ehe Nɛ Ngɛ Bua Jɔmi Nɛ A Kɛ Yeɔ Odase Ngɛ Ma Nɔ
1. Mɛni nɛ a wo asafohi he wami kaa a pee ke nihi pɔɔ bemi wawɛɛ ngɛ a zugba kpɔ ɔ mi he ko?
1 A wo asafohi nɛ a ngɛ hehi nɛ nihi pɔɔ bemi wawɛɛ ngɛ ngɛ a zugba kpɔ ɔ mi ɔ he wami kaa a bɔ mɔde nɛ a ngɔ okplɔɔhi loo atsɛ̃sehi kɛ ma blɔhi a he konɛ a to womihi ngɛ a nɔ nɛ a kɛ ye odase ngɛ ma nɔ. Ke atsɛ̃se nɛ a kɛ ma tsu ní ɔ, lɛɛ ke e hí kulaa, e sa nɛ fiɛɛlɔ kake nɛ e hyɛ nɔ. Se ke okplɔɔ a kɛ ma tsu ní ɔ, lɛɛ e sa nɛ fiɛɛli enyɔ nɛ a hyɛ nɔ. E sa nɛ nihi nɛ a maa hyɛ nɔ ɔ nɛ a tsɔ a hɛ mi, nɛ a je huɛ bɔmi su kpo konɛ e ko ye ha nihi kaa a maa hɛ kɛ su a he. Ke nɔ ko plɛ nɛ e hyɛ womi ɔmɛ ɔ, a ti nɔ kake kɛ nɔ ɔ ma nyɛ maa je ní sɛɛmi sisi, nɛ eko ɔ, e ma bi lɛ ke: “Anɛ o susu Baiblo mi sane nɛ ɔ he hyɛ lo?” Fiɛɛlɔ kpa a hu ma nyɛ maa hi odase yee ngɛ he ko nɛ e kɛ okplɔɔ ɔ he kɛ we.
2. Mo de níhi a si kpami ko nɛ tsɔɔ se nami nɛ ngɛ womihi nɛ a toɔ ngɛ okplɔɔ nɔ nɛ a kɛ yeɔ odase ngɛ ma nɔ ɔ he.
2 Ma nɔ odase yemi nɛ ɔ ha nɛ wa ná Baiblo mi ní kaseli ehehi babauu. Kɔleji sukuu no ko to kaa e maa ngma womi kɛ kɔ Yehowa Odasefohi a he, se e nɛ́ Matsɛ Yemi Asa ko. Otsi kake se ɔ, e na okplɔɔ ko nɛ a to wa womi ɔmɛ ngɛ nɔ ngɛ e sukuu ɔ mi. A kɛ lɛ je Baiblo mi ní kasemi sisi, nɛ amlɔ nɛ ɔ a baptisi lɛ, nɛ lɛ hu e ngɛ odase yee ngɛ ma nɔ.
3. Mɛni fiɛɛli komɛ de ngɛ ma nɔ odase yemi nɛ ɔ he?
3 Nyɛmiyo ko nɛ e ngɔ e he kɛ wo ma nɔ odase yemi nɛ ɔ mi ɔ de ke: “Ni komɛ baa okplɔɔ ɔ he, nɛ a ba ngɔɔ womi tɛtlɛɛ ehe ɔmɛ. Ni komɛ po lɛɛ a nui Yehowa Odasefohi a he gblee. I na kaa kɛ gu jamɛ a blɔ nɛ ɔ nɔ ɔ, nihi fuu ma nyɛ maa nu sane kpakpa a.” Nyɛmiyo ko hu de ke: “E ji blɔ ehe nɛ ngɛ bua jɔmi nɛ waa kɛ yeɔ odase ngɛ ma nɔ, ejakaa ke nihi ba okplɔɔ ɔ he ɔ, i naa kaa a suɔ nɛ a le níhi fuu.”
4. Mɛni he je nɛ se nami ngɛ he kaa wa maa to womihi ngɛ okplɔɔ nɔ ngɛ he pɔtɛɛ ko ngɛ ligbi pɔtɛɛ komɛ a nɔ, kɛ be pɔtɛɛ ko mi ɔ?
4 Se nami ngɛ he kaa a kɛ okplɔɔ nɛ to womihi ngɛ nɔ ɔ maa ma he pɔtɛɛ ko ngɛ ligbi pɔtɛɛ komɛ a nɔ, kɛ be pɔtɛɛ ko mi. Ke nihi pɔɔ okplɔɔ loo atsɛ̃se kɛ e nɔ womi ɔmɛ nami ɔ, e he be wae ha mɛ kaa a maa hɛ kɛ su wa he konɛ a bi sanehi loo a ngɔ womihi. Anɛ nyɛ asafo ɔ to blɔ nya kɛ ha ma nɔ odase yemi lo? Ke jã a, lɛɛ mo hu o ma nyɛ maa ngɔ o he kɛ wo odase yemi nɛ ngɛ bua jɔmi nɛ ɔ mi konɛ ‘o fiɛɛ Mawu matsɛ yemi ɔ he sane ɔ.’—Luka 9:60.