Fiɛɛmi Munyuhi

Nɛ a kɛ maa je Baiblo mi nikasemi sisi ngɛ kekleekle Hɔ nɛ ngɛ August nyɔhiɔ ɔ mi ɔ nɔ

“Lɔɔ ji kaa nɔ tsuaa nɔ sɔleɔ be tsuaa be. Nihi nɛ a he we yi kaa Mawu ngɛ ɔ po sɔleɔ ke a ngɛ haomi mi. Anɛ o susu kaa Mawu buɔ sɔlemihi tsuo tue lo?” Ngmɛɛ lɛ blɔ nɛ e ha heto. Ngɔɔ munyu nɛ ngɛ August 1 Hwɔɔmi Mɔ ɔ se ɔ kɛ tsɔɔ lɛ, nɛ o kɛ lɛ nɛ susu munyu nɛ ngɛ kekle sane bimi ɔ sisi ɔ he, nɛ ke e hí kulaa a, o kane ngmamihi nɛ a tsɛ se ɔ kake. O kɛ womi tɛtlɛɛ ɔmɛ nɛ ha lɛ nɛ o to blɔ nya nɛ o kpale ya slaa lɛ konɛ nyɛ susu sane bimi nɛ nyɛɛ se ɔ he.

Kadi: E sa nɛ a pee peemi kɛ tsɔɔ nɛ ɔ ngɛ fiɛɛmi yami kpe nɛ a maa pee ngɛ August 3 nɔ ɔ.

Hwɔɔmi Mɔ August 1

“Wa ba slaa mo konɛ waa sɛɛ ní kpiti. Nihi fuu ngɛ tsui yee ngɛ bɔnɛ bɔmi nami he foni hyɛmi pɔhe ha a he. Se nihi fuu susu kaa bɔmi nami he foni hyɛmi ji hɛja jemi ko nɛ yi nɔ awi. Kɛ o susu kɛɛ? [Ngmɛɛ lɛ blɔ nɛ e ha heto.] Yesu tsɔɔ kaa yibli nɛ nɔ́ ko woɔ ɔ nɛ waa kɛ maa le kaa e ji nɔ́ kpakpa aloo nɔ́ yaya. [Kane Mateo 7:17.] Womi tɛtlɛɛ nɛ ɔ tsɔɔ yibli nɛ bɔmi nami he foni hyɛmi woɔ. Jehanɛ hu, e tsɔɔ blɔ nɛ hi nɛ nɔ ko maa gu nɔ kɛ kpa bɔmi nami he foni hyɛmi.”

Awake! August

“Wa ti nihi fuu suɔ nɛ waa hi wami mi be kɛkɛɛ. Anɛ o susu kaa bɔnɛ je mi si kpami ya hɛ mi ha a ma ha nɛ wa ná neneene wami lo? [Ngmɛɛ lɛ blɔ nɛ e ha heto.] Mo kadi si womi nɛ ngɛ bua jɔmi nɛ ɔ. [Kane 1 Korintobi 15:26.] Mɛni blɔ nɔ Mawu maa gu kɛ pee enɛ ɔ—anɛ e maa pee enɛ ɔ kɛ gu je mi si kpami nɔ aloo blɔ kpa ko nɔ? Mɛni heje nɛ mwɔnɛ ɔ, wa bwɔ ɔ nɛ wa gboɔ ɔ? Womi tɛtlɛɛ nɛ ɔ tsɔɔ bɔnɛ Baiblo ɔ ha sane bimi nɛ ɔmɛ a heto ha a mi.”