Wa Ma Gba Matsɛ Yemi He Sane Nɛ To Nɔ 38 Ngɛ December Nyɔhiɔ ɔ Mi!
1. Mɛni ji sanehi nɛ nihi biɔ ngɛ gbogboehi a he, nɛ mɛni blɔ nɔ wa maa gu kɛ ha sane bimi nɛ ɔmɛ a heto ngɛ December nyɔhiɔ ɔ mi?
1 Ngɛ hemi kɛ yemihi nɛ nihi ngɛ ɔ tsuo se ɔ, gbenɔ ji nihi tsuo a he nyɛlɔ. (1 Kor. 15:26) Nihi babauu susuɔ he nɛ ni gbogboe ɔmɛ ngɛ, kɛ jehanɛ ɔ hu keji a maa na mɛ ekohu ɔ he. Enɛ ɔ he ɔ, asafohi ngɛ je kɛ wɛ ɔ tsuo kɛ nyɔhiɔ kake ma gba Matsɛ Yemi He Sane nɛ to nɔ 38, nɛ e yi ji, Anɛ Gbogboehi Maa Kpale Kɛ Ba Wami Mi Ekohu Niinɛ Lo? Nítsumi klɛdɛɛ nɛ ɔ maa je sisi ngɛ December 1 nɔ. Ke wa gbe nítsumi klɛdɛɛ nɛ ɔ nya a, waa kɛ Matsɛ Yemi He Sane nɛ to nɔ 38 ɔ ma tsu ní ngɛ fiɛɛmi mi kaa dɛ womi.
2. Kɛ a pee Matsɛ Yemi He Sane nɛ to nɔ 38 ɔ ha kɛɛ?
2 Bɔnɛ A Pee Lɛ Ha: A pee Matsɛ Yemi He Sane nɛ to nɔ 38 ɔ konɛ ke a dɔ mi ɔ, e munyuyi nɛ tleɔ nɔ bua jɔmi si ɔ kɛ munyuhi nɛ ji, “Anɛ o ma ha heto ke . . . ee? dɛbi? eko ɔ?” ɔ nɛ ba je hɛ mi. Ke nɔ nɛ maa kane Matsɛ Yemi He Sane ɔ bli mi ɔ, e maa na bɔnɛ Baiblo ɔ ha sane bimi nɛ ji munyuyi ɔ heto ha, kɛ nɔ́ nɛ si womi nɛ ngɛ Baiblo ɔ mi ɔ tsɔɔ kɛ ha lɛ. E maa na nɔ́ heje nɛ e sa kaa e he Baiblo ɔ ye hulɔ. A ngma sane bimi ko nɛ ngɛ bua jɔmi ngɛ Matsɛ Yemi He Sane ɔ se konɛ nɔ ɔ nɛ susu he, nɛ e maa wo lɛ he wami nɛ e kase babauu kɛ piɛɛ he.
3. Kɛ wa ma gba Matsɛ Yemi He Sane nɛ to nɔ 38 ɔ ha kɛɛ?
3 Bɔnɛ Wa Ma Gba Lɛ Ha: Wa ma gba dɛ womi nɛ ɔ kaa bɔnɛ wa gbaa Kaimi ɔ kɛ kpe ngua he nine fɔmi womi ɔmɛ ɔ nɔuu. Asafo mi nikɔtɔma amɛ maa tsɔɔ bɔnɛ a ma tsu asafo ɔ zugba kpɔ ɔ mi ní ha kaa bɔnɛ sɛ womi nɛ a ngma ngɛ April 1, 2013 kɛ ha nikɔtɔma amɛ ɔ tsɔɔ ɔ. Asafohi nɛ a zugba kpɔ klee we ɔ ma nyɛ ma bi konɛ a ye bua asafohi nɛ kɛ a he kɛ we nɛ a zugba kpɔhi kle ɔ. Ke o yaa ngɔ Matsɛ Yemi He Sane nɛ to nɔ 38 ɔ, mo kai nɛ o ngɔ nɔ́ nɛ o kɛ ma ha ngɛ otsi ɔ mi ɔ pɛ. Ke wa gba dɛ womi ɔ ngɛ wehi nɛ a ha ke waa fiɛɛ ngɛ a mi ɔ mi ta a, wa ma nyɛ maa gba ngɛ ma nɔ odase yemi mi. Ke nyɔhiɔ ɔ gbo we, nɛ dɛ womi ɔ tsuo ta a, lɛɛ e sa kaa waa kɛ womi nɛ a kɛ ma ha ngɛ nyɔhiɔ ɔ mi ɔ nɛ ha. Ngɛ kekleekle Hɔ ɔ nɔ ɔ, waa kɛ wa juɛmi maa ma dɛ womi ɔ gbami nɔ mohu pe nɛ wa maa je Baiblo mi nikasemi sisi. Ke wa ngɛ dɛ womi ɔ gbae Hɔ loo Hɔgba a, e sa nɛ wa ha womi tɛtlɛɛ ɔmɛ hu kɛ piɛɛ he ngɛ be nɛ sa mi. Anɛ o ngɛ blɔ nya toe konɛ o kɛ o he nɛ wo nítsumi klɛdɛɛ nɛ ɔ mi kɛ pi si lo?