Fiɛɛmi Munyuhi

Nɛ a kɛ maa je Baiblo mi ní kasemi sisi ngɛ kekleekle Hɔ nɛ ngɛ July nyɔhiɔ ɔ mi ɔ nɔ

“Ke wa sɔle ɔ, mɛni Mawu peeɔ ngɛ he? Ke o hyɛ ɔ, sɔlemi ɔ he hia lɛ loo e buɔ tue kɛkɛ?” Ngmɛɛ lɛ blɔ nɛ e ha heto. Moo ngɔ July 1 Hwɔɔmi Mɔ ɔ se ɔ kɛ tsɔɔ lɛ, nɛ o kɛ lɛ nɛ susu munyu nɛ ngɛ kekle sane bimi ɔ sisi ɔ he, nɛ ke e hí kulaa a, o kane ngmamihi nɛ a tsɛ se ɔ kake. Ha lɛ womi tɛtlɛɛ ɔmɛ, nɛ o to blɔ nya nɛ o kɛ lɛ nɛ ya susu sane bimi enyɔne ɔ he.

Hwɔɔmi Mɔ July 1

“Ke wa hyɛ je ɔ mi ɔ, ní yayami ngɛ nɔ yae ngɛ he tsuaa he. Akɛnɛ Mawu hu ji ope ɔ, anɛ wa ma nyɛ ma de ke lɛ nɛ e ha nɛ ní yayamihi ngɛ nɔ yae ngɛ je ɔ mi ɔ lo? [Ngmɛɛ lɛ blɔ nɛ e ha heto. Kɛkɛ ɔ, moo kane Yakobo 1:13.] Womi tɛtlɛɛ nɛ ɔ tsɔɔ nɔ́ he je nɛ ní yayahi baa kɛ nɔ́ nɛ Mawu maa pee kɛ po ní yayahi kɛ nɔ́ nami se.”

Awake! July

“Je ɔ nɛ wa ngɛ mi nɛ ɔ, wɔ tsuo waa kɛ haomi kpeɔ. Oslaa ma nyɛ maa ba wa nɔ, gbenɔ hiɔ ma nyɛ maa fia wɔ, loo wa suɔlɔ ko ma nyɛ ma gbo. Ke nɔ́ ko kaa kikɛ ba a, mɛni e sa kaa waa pee? [Ngmɛɛ lɛ blɔ nɛ e ha heto.] Nihi fuu na kaa Baiblo ɔ ye bua mɛ nɛ a nyɛ nɛ a da a haomihi a nya. [Kane Roma Bi 15:4.] Womi tɛtlɛɛ nɛ ɔ tsɔɔ bɔ nɛ Baiblo ɔ ma nyɛ maa ye bua wɔ ke haomi ko ba wa nɔ.”