Ngɔɔ “Níhi Nɛ Wa Ma Nyɛ Maa Kase Ngɛ Mawu Munyu ɔ Mi” Womi Wayo ɔ Kɛ Je Ní Sɛɛmi Sisi
1. Mɛni nɔ́ ehe nɛ a pee kɛ ha wɔ kaa wa kɛ tsu ní ngɛ fiɛɛmi mi?
1 A pee womi wayo ehe ko nɛ ji, “Níhi Nɛ Wa Ma Nyɛ Maa Kase Ngɛ Mawu Munyu ɔ Mi.” Mɛni blɔ nɔ wa maa gu nɛ wa kɛ tsu ní ke wa ngɛ wa he dlae kɛ ha fiɛɛmi? Akɛnɛ a to ngmamihi a nya kɛ wo Baiblo mi munyu slɔɔtohi a sisi ngɛ mi kaa bɔ nɛ a pee ngɛ Reasoning womi ɔ mi ɔ he je ɔ, e ma nyɛ maa ye bua wɔ nɛ waa je ní sɛɛmi sisi.
2. Kɛ wa ma plɛ kɛ ngɔ “Níhi Nɛ Wa Ma Nyɛ Maa Kase Ngɛ Mawu Munyu ɔ Mi” ɔ kɛ tsu ní kɛɛ?
2 Eko ɔ, o ma nyɛ maa hla sane bimi 8 ɔ, nɛ o ma de ke: “Wa ngɛ nihi slaae ngɛ kpɔ nɛ ɔ mi ejakaa nihi fuu susu kaa, ‘E sa nɛ wa pia Mawu ngɛ adesahi a nɔ́ nami he.’ [Ngɛ zugba kpɔ komɛ a mi ɔ, e maa hi kaa a ma bli womi ɔ mi nɛ a ngɔ sane bimi ɔ kɛ tsɔɔ wetsɛ ɔ.] Kɛ o susu kɛɛ? [Ngmɛɛ lɛ blɔ nɛ e ha heto.] Ke o na heto nɛ Baiblo ɔ kɛ ha a, o bua maa jɔ saminya.” Kane ngmami kake loo enyɔ nɛ a ngma ngɛ sane bimi ɔ sisi ɔ, nɛ nyɛ susu he. Ke o na kaa nɔ ɔ bua jɔ munyu ɔ he ɔ, o ma nyɛ maa ngɔ sane bimihi 20 nɛ ngɛ nya blimi munyu ɔ mi ɔ kɛ tsɔɔ lɛ nɛ e hla kake konɛ ke o ya be kpa a, o kɛ lɛ nɛ susu he. Aloo o ma nyɛ ma ha lɛ wa Baiblo kasemi womi nɛ kɔɔ jamɛ a sane ɔ he ɔ eko.
3. Mɛni blɔ nɔ nɛ waa kɛ “Níhi Nɛ Wa Ma Nyɛ Maa Kase Ngɛ Mawu Munyu ɔ Mi” womi wayo ɔ ma nyɛ maa je ní sɛɛmi sisi ngɛ hehi nɛ nihi nɛ a pi Kristofohi hiɛ ngɛ?
3 Sane bimi 4 kɛ 13 kɛ ya si 17 ɔ maa hi kɛ ní tsumi ngɛ hehi nɛ nihi nɛ a pi Kristofohi fuu ngɛ ɔ. Kaa nɔ hyɛmi nɔ́ ɔ, o ma nyɛ maa ngɔ sane bimi 17 ɔ kɛ tsu ní ngɛ blɔ nɛ ɔ nɔ. O ma nyɛ ma de ke: “Wa ngɛ wekuhi slaae konɛ waa ye bua mɛ. Anɛ o yɔse kaa wekuhi kɛ nyagbahi fuu ngɛ kpee ligbi etɛ nɛ ɔ lo? [Ngmɛɛ lɛ blɔ nɛ e ha heto.] Munyu ko ngɛ nɛ e ngɛ hunomɛ kɛ a yihi ye buae wawɛɛ: “Yogbayo tsuaa yogbayo nɛ bu e huno.” [E he hia we nɛ o de lɛ kaa nɔ́ nɛ o ngɛ dee ɔ ngɛ Efeso Bi 5:33. Ke yo nɛ o kɛ ngɛ ní sɛɛe ɔ, lɛɛ mo de lɛ munyu nɛ ngɛ Efeso Bi 5:28.] Anɛ o susu kaa ke huno kɛ e yo ngɔ ga womi nɛ ɔ kɛ tsu ní ngɛ a gba si himi mi ɔ, e maa ye bua mɛ lo?”
4. Ke o kɛ nɔ ko nɛ pi Kristofo no ji lɛ sɛɛ ní ta a, mɛni o ma nyɛ maa pee loko o maa je?
4 Ke nyɛ gbe ní sɛɛmi ɔ nya a, o kɛ wetsɛ ɔ nɛ to blɔ nya nɛ nyɛ tsa nɔ be kpa. Eko ɔ, o ma nyɛ nɛ o kɛ lɛ ma ya susu ngmami kpa nɛ ngɛ sane bimi ɔ sisi ɔ he. Ngɛ be nɛ sa mi ɔ, o ma nyɛ ma ha nɛ wetsɛ ɔ nɛ le kaa munyuhi nɛ nile ngɛ mi nɛ o kɛ lɛ susu he ɔ je Baiblo ɔ mi. Ní nɛ nyɛ sɛɛ ɔ kɛ bɔ nɛ wetsɛ ɔ buu Baiblo ɔ ha a maa ye bua mo nɛ o maa le womi nɛ e bua maa jɔ he konɛ o ha lɛ eko.—Hyɛ munyu nɛ ngɛ December 2013 Wa Matsɛ Yemi Sɔmɔmi ɔ kpɛti ba fa a mi.