Yehowa Biɛ ɔ He Hia Wɔ Wawɛɛ

1-2. Kɛ wa plɛ kɛ le kaa Yehowa biɛ ɔ he hia Yesu ha kɛɛ?

YEHOWA biɛ ɔ ji nɔ́ nɛ he hia Yesu wawɛɛ. Yesu ji nɔ titli nɛ e bɔ mɔde wawɛɛ kaa e ma ha nɛ nihi nɛ a le Yehowa biɛ ɔ. Kaa bɔ nɛ ní kasemi nɛ sɛ hlami ɔ ha nɛ wa na a, Yesu pee klaalo kaa e ma gbo ngɛ Yehowa biɛ ɔ he je konɛ e kɛ ha nɛ nihi nɛ a le kaa Yehowa ngɛ klɔuklɔu, nɛ e blɔ ɔmɛ tsuo da. (Maak. 14:36; Heb. 10:​7-9) Jehanɛ hu ɔ, e pee klaalo kaa ngɛ Jeha Akpe Nɔ Yemi ɔ nyagbe ɔ, he blɔhi tsuo nɛ Yehowa kɛ ha lɛ ɔ, e maa ngɔ kɛ ha Yehowa ekohu, ejakaa e suɔ nɛ Yehowa nɛ ngɔ hɛ mi nyami ɔ tsuo. (1 Kor. 15:​26-28) Níhi tsuo nɛ Yesu pee ha Yehowa a haa nɛ wa naa kaa e suɔ Yehowa wawɛɛ nitsɛ.

² Yesu ba zugba a nɔ konɛ e ba tsɔɔ adesahi níhi tsuo nɛ Yehowa suɔ nɛ a le ɔ. (Yoh. 5:43; 12:13) E ha nɛ e se nyɛɛli ɔmɛ le e Tsɛ ɔ biɛ ɔ. (Yoh. 17:​6, 26) E tsɔɔ nihi ní, nɛ e pee nyakpɛ níhi fuu ngɛ Yehowa biɛ ɔ mi. (Yoh. 10:25) Ngɛ anɔkuale mi ɔ, Yesu bi Yehowa konɛ e hyɛ e kaseli ɔmɛ a nɔ ‘ngɛ lɛ nitsɛ e biɛ ɔ he je.’ (Yoh. 17:11) Lɔ ɔ ke kikɛ nɛ Yesu nu he ngɛ Yehowa biɛ ɔ he ɔ, lɛɛ kɛ nɔ ko ma plɛ kɛ de ke e ji Kristo kaselɔ nitsɛnitsɛ ha kɛɛ be mi nɛ e kɛ Yehowa biɛ ɔ tsu we ní aloo e li Yehowa biɛ ɔ po?

3. Mɛni he wa ma susu ngɛ ní kasemi nɛ ɔ mi?

³ Akɛnɛ wa ji anɔkuale Kristofohi he je ɔ, wa jeɔ suɔmi kɛ bumi nɛ mi kuɔ kpo kɛ haa Yehowa biɛ ɔ. (1 Pet. 2:21) Ngɛ ní kasemi nɛ ɔ mi ɔ, wa maa na bɔ nɛ Yehowa biɛ ɔ kadiɔ nihi nɛ a fiɛɛɔ ‘sane kpakpa a nɛ kɔɔ Matsɛ Yemi ɔ he ɔ’ ha. (Mat. 24:14) Jehanɛ se hu ɔ, wa maa hyɛ bɔ nɛ e sa kaa Yehowa biɛ ɔ he nɛ hia wa kpɛti nɔ fɛɛ nɔ ha.

‘E NGƆ NI KOMƐ KƐ HA E BIƐ Ɔ’

4. (a) Loko Yesu maa kpale kɛ ho hiɔwe ya a, mɛni e de e kaseli ɔmɛ kaa a pee? (b) Mɛni sane bimi he lɛ wa ma susu?

⁴ Benɛ e piɛ bɔɔ nɛ Yesu maa je kɛ ho hiɔwe ya a, e de e kaseli ɔmɛ ke: “Ke mumi klɔuklɔu ɔ ná ba nyɛ nɔ ɔ, nyɛ ma ná he wami nɛ nyɛ maa pee ye we odasefohi ngɛ Yerusalem, kɛ Yudea tsuo, kɛ Samaria, kɛ yaa su zugba a nɔ hehi nɛ a kɛ wawɛɛ ɔ.” (Níts. 1:8) Enɛ ɔ he ɔ, e sa nɛ kaseli ɔmɛ nɛ a fiɛɛ sane kpakpa a ngɛ he fɛɛ he, tsa pi Israel pɛ. Bɔɔbɔɔbɔɔ ɔ, nihi tsuo nɛ a ngɛ je ma amɛ a mi ɔ ma ná he blɔ konɛ a ba pee Yesu se nyɛɛli. (Mat. 28:​19, 20) Se Yesu de ke: “Nyɛ maa pee ye we odasefohi.” Anɛ e he maa hia nɛ kaseli ehe nɛ ɔmɛ nɛ a le Yehowa biɛ ɔ lo, aloo a maa pee Yesu we odasefohi pɛ kɛkɛ? Níhi nɛ ya nɔ nɛ a tu he munyu ngɛ Ní Tsumi yi 15 ɔ maa ye bua wɔ nɛ waa na sane bimi nɛ ɔ heto.

5. Mɛni blɔ nɔ nɛ bɔfo ɔmɛ kɛ nyumu nikɔtɔma amɛ nɛ a ngɛ Yerusalem ɔ ha nɛ e pee heii kaa e he hia nɛ nihi tsuo nɛ a le Yehowa biɛ ɔ? (Hyɛ foni ɔ hulɔ.)

⁵ Ngɛ jeha 49 ɔ mi ɔ, bɔfo ɔmɛ kɛ nyumu nikɔtɔma amɛ nɛ a ngɛ Yerusalem ɔ kpe konɛ a hyɛ kaa e he maa hia nɛ a po Ma Jeli ɔmɛ loko a ba pee Kristofohi lo. Benɛ a susu sane ɔ he ta a, Yakobo nɛ ji Yesu nyɛminyumu ɔ de ke: “[Petro] tu kekleekle be nɛ Mawu ngɔ e juɛmi kɛ ya je ma amɛ a nɔ, konɛ e ngɔ ni komɛ kɛ je a kpɛti kɛ ha e biɛ ɔ he munyu fitsofitso.” Mɛnɔ biɛ he munyu nɛ Yakobo ngɛ tue ɔ? Yakobo tsɛ gbalɔ Amos munyu ɔ se, nɛ e de ke: “Bɔ nɛ pee nɛ nihi nɛ a piɛ, kɛ nihi nɛ a je je ma amɛ tsuo a mi, kɛ nihi nɛ a kɛ ye biɛ ɔ tsɛɔ mɛ ɔ nɛ a hla Yehowa se blɔ kɛ hɛdɔ, Yehowa . . . lɛ de.” (Níts. 15:​14-18) Pi nɛ kaseli ehe nɛ ɔmɛ maa kase Yehowa he ní pɛ, se mohu ɔ, a kɛ ‘e biɛ ɔ ma tsɛ mɛ’ hulɔ. Enɛ ɔ tsɔɔ kaa Mawu biɛ ɔ maa hi a nɔ, nɛ a maa ngɔ e biɛ ɔ kɛ kadi mɛ hulɔ.

6-7. (a) Mɛni he je nɛ Yesu ba zugba a nɔ? (b) Mɛni ji nɔ́ kpa ko nɛ he hia pe kulaa he je nɛ Yesu ba zugba a nɔ ngɛ?

⁶ Nɔ́ nɛ Yesu biɛ ɔ sisi tsɔɔ ji “Yehowa Ji Yi Wami Helɔ,” nɛ ngɛ anɔkuale mi ɔ, Yehowa gu Yesu nɔ kɛ he nihi tsuo nɛ a ná hemi kɛ yemi ngɛ e kɛ e Bi ɔ mi ɔ a yi wami. Yesu ba zugba a nɔ nɛ e ba ngɔ e he kɛ ha ngɛ adesahi a he. (Mat. 20:28) Akɛnɛ Yesu ngɔ e he kɛ ha kaa kpɔmi nɔ́ he je ɔ, a ma nyɛ maa ngɔ adesahi a he yayami kɛ ke mɛ, nɛ a ma nyɛ maa hi si kɛ ya neneene.—Yoh. 3:16.

⁷ Se mɛni he je nɛ e he hia nɛ a kpɔ̃ adesahi ɔ? E he hia nɛ a kpɔ̃ adesahi ngɛ nɔ́ nɛ ya nɔ ngɛ Eden abɔɔ ɔ mi ɔ he je. Kaa bɔ nɛ wa na ngɛ ní kasemi nɛ sɛ enɛ ɔ hlami ɔ mi ɔ, adesahi a kekleekle fɔli nɛ ji Adam kɛ Hawa a gbo Yehowa nɔ tue. Enɛ ɔ he ɔ, he blɔ nɛ a ngɛ kaa a maa hi si kɛ ya neneene ɔ bɔ mɛ. (1 Mose 3:​6, 24) Se kɛ̃ ɔ, Yesu ba zugba a nɔ konɛ e ba pee nɔ́ ko nɛ e he hia wawɛɛ pe adesahi pɛ nɛ e ma ba kpɔ̃ ɔ. Satan gbe Yehowa biɛ ɔ he guɛ. (1 Mose 3:​4, 5) Enɛ ɔ tsɔɔ kaa Adam kɛ Hawa sisi bimɛ nɛ a ma kpɔ̃ ɔ kɛ sane nɛ pe kulaa nɛ ji Yehowa biɛ ɔ he nɛ a ma tsɔ ɔ ngɛ tsakpa. Akɛnɛ Yesu ji Yehowa nane mi dalɔ, nɛ Yehowa biɛ ɔ ngɛ e nɔ he je ɔ, lɛ ji nɔ titli nɛ e ma nyɛ ma tsu ní tsumi nɛ ɔ.

8. Mɛni nɛ e sa kaa Yesu se nyɛɛli tsuo nɛ a kplɛɛ nɔ?

⁸ Ngɛ anɔkuale mi ɔ, e sa nɛ nihi tsuo nɛ a ma ná hemi kɛ yemi ngɛ Yesu mi ɔ nɛ a kplɛɛ nɔ kaa a yi wami hemi ɔ maa je Yesu Tsɛ nɛ ji Yehowa Mawu ɔ ngɔ, Yudabi jio, Ma Jeli jio. (Yoh. 17:3) Jehanɛ se hu ɔ, kaa bɔ nɛ e ji ngɛ Yesu blɔ fa mi ɔ, a kɛ Yehowa biɛ ɔ ma kadi nimli nɛ ɔmɛ. E he maa hia nɛ a le nɔ́ he je nɛ e sa kaa a tsɔ Yehowa biɛ ɔ he ɔ hulɔ, ejakaa a yi wami hemi daa si ngɛ lɔ ɔ nɔ. (Níts. 2:​21, 22) Enɛ ɔ he ɔ, e sa kaa Yesu se nyɛɛli anɔkualetsɛmɛ tsuo nɛ a kase Yehowa kɛ Yesu a he ní. E be nyakpɛ kaa yi mi tomi nɛ ɔ he je nɛ Yesu mwɔ sɔlemi nɛ e sɔle ngɛ Yohane yi 17 ɔ nya kaa kikɛ nɛ ɔ nɛ: “I ha nɛ a le o biɛ ɔ, nɛ ma ha nɛ a maa le, konɛ suɔmi ɔ nɛ o kɛ suɔ mi ɔ nɛ e hi a mi, nɛ i kɛ mɛ nɛ pee kake.”—Yoh. 17, 26.

‘NYƐ JI YE WE ODASEFOHI’

9. Mɛni wa ma nyɛ maa pee kɛ tsɔɔ kaa Yehowa biɛ ɔ he hia wɔ pe nɔ́ fɛɛ nɔ́?

⁹ E sa nɛ Yehowa biɛ ɔ he nɛ a ma tsɔ ɔ he nɛ hia Yesu se nyɛɛli anɔkualetsɛmɛ ɔmɛ. (Mat. 6:​9, 10) E sa nɛ Yehowa biɛ ɔ he nɛ hia mɛ pe nɔ́ fɛɛ nɔ́. Ngɛ anɔkuale mi ɔ, e sa nɛ a ngɔ a ní peepee kɛ tsɔɔ jã. Se mɛni wa ma nyɛ maa pee kɛ ha nɛ Yehowa biɛ ɔ he nɛ tsɔ konɛ wa kɛ tsɔɔ kaa Satan ji lakpatsɛ?

10. Mɛni sane lɛ Yesaya yi 42 kɛ ya si 44 ɔ tu he munyu? (Yesaya 43:9; 44:​7-9) (Hyɛ foni ɔ hulɔ.)

¹⁰ Yesaya yi 42 kɛ ya si 44 ɔ tsɔɔ nɔ́ nɛ wa ma nyɛ maa pee kɛ ha nɛ Yehowa biɛ ɔ he nɛ tsɔ. Ngɛ lejɛ ɔ, e ngɛ kaa nɔ́ nɛ a ngɔ sane nɛ kɔɔ nɔ nɛ ji Mawu nitsɛnitsɛ ɔ he ɔ kɛ ya okadi peemi kojomi he ko. Yehowa de mawu ɔmɛ tsuo kaa ke a ji mawuhi niinɛ ɔ, lɛɛ a ba je a nya. Jehanɛ hu ɔ, Yehowa fã kaa ke a ngɛ nihi nɛ a ma nyɛ ma ba ye odase ha mawu nɛ ɔmɛ ɔ, a ba pee jã. Se kɛ̃ ɔ, a nɛ nɔ ko nɔ ko!—Kane Yesaya 43:9; 44:​7-9.

11. Ngɛ Yesaya 43:​10-12 ɔ nya a, mɛni nɛ Yehowa de e we bi?

¹¹ Kane Yesaya 43:​10-12. Yehowa de ngɛ e we bi a he ke: ‘Nyɛ ji ye we odasefohi, nɛ imi ji Mawu.’ Yehowa suɔ nɛ a ha sane bimi ko heto. E bi mɛ ke: “Anɛ Mawu kpa ko ngɛ ngɛ ye se lo?” (Yes. 44:8) Ngɛ anɔkuale mi ɔ, e ji he blɔ ngua nɛ wa ná kaa wa ma ha sane bimi nɛ ɔ heto. Kɛ gu wa ní peepee kɛ wa munyu tutui nɔ ɔ, wa ma nyɛ maa tsɔɔ kaa Yehowa pɛ ji anɔkuale Mawu. E biɛ ɔ nɔ kuɔ pe biɛ kpahi tsuo. Ke Satan bɔ mɔde kaa e maa ngɔ haomihi kɛ ba wa nɔ kaa mɛni po ɔ, wa maa ngɔ wa ní peepee kɛ tsɔɔ kaa wa suɔ Yehowa pɛ, nɛ wa maa ye lɛ anɔkuale. Ke wa pee jã a, lɔ ɔ tsɔɔ kaa wa ngɛ Yehowa biɛ ɔ he tsɔe.

12. Mɛni blɔ nɔ nɛ gbami nɛ ngɛ Yesaya 40:​3, 5 ɔ ba mi?

¹² Ke wa ye bua kɛ ha nɛ Yehowa biɛ ɔ he tsɔ ɔ, lɔ ɔ tsɔɔ kaa wa ngɛ Yesu Kristo kasee. Yesaya hu gba kɛ fɔ si kaa nɔ ko ma ba ‘dla Yehowa blɔ ɔ!’ (Yes. 40:3) Mɛni blɔ nɔ nɛ gbami nɛ ɔ ba mi? Yohane Nɔ Baptisilɔ ɔ dla blɔ ɔ kɛ ha Yesu nɛ́ e ba ngɛ Yehowa biɛ mi, nɛ jehanɛ hu e tu munyu ngɛ Yehowa biɛ mi ɔ. (Mat. 3:3; Maak. 1:​2-4; Luka 3:​3-6) Gbami nɛ ɔ nɔuu de ke: “Yehowa hɛ mi nyami ɔ maa je kpo.” (Yes. 40:5) Ngɛ mɛni blɔ nɔ nɛ gbami nɛ ɔ hu ba mi? Benɛ Yesu ba zugba a nɔ ɔ, e pee e ní kaa e Tsɛ ɔ pɛpɛɛpɛ, kaa nɔ́ nɛ Yehowa nitsɛ lɛ ba zugba a nɔ.—Yoh. 12:45.

13. Mɛni blɔ nɔ wa maa gu kɛ kase Yesu?

¹³ Kaa bɔ nɛ Yesu pee ɔ, wɔ hu wa yeɔ Yehowa he odase. Yehowa biɛ ɔ ngɛ wa nɔ, nɛ wa deɔ nɔ fɛɛ nɔ nɛ waa kɛ kpeɔ ɔ nyakpɛ níhi Yehowa pee ɔ. Bɔ nɛ pee nɛ wa nyɛ nɛ waa ye Yehowa he odase kɛ pi si ɔ, e sa nɛ wa ha nɛ nihi nɛ a le níhi tsuo nɛ Yesu pee kɛ tsɔ Yehowa biɛ ɔ he ɔ. (Níts. 1:8) Yesu ji Yehowa we Odasefono nɛ e pe kulaa. Enɛ ɔ he ɔ, wɔ hu wa kaseɔ e nɔ hyɛmi nɔ́ ɔ. (Kpoj. 1:5) Se kɛ e sa nɛ Yehowa biɛ ɔ he nɛ hia wa kpɛti nɔ fɛɛ nɔ ha kɛɛ?

E SA NƐ YEHOWA BIƐ Ɔ HE NƐ HIA WƆ WAWƐƐ

14. Kaa bɔ nɛ a tsɔɔ ngɛ La 105:3 ɔ, kɛ wa nuɔ he ngɛ Yehowa biɛ ɔ he ha kɛɛ?

¹⁴ Wa bua jɔ Yehowa biɛ ɔ he. (Kane La 105:3.) Yehowa bua jɔɔ wawɛɛ ke wa fĩaa ngɛ e biɛ ɔ mi. (Yer. 9:​23, 24; 1 Kor. 1:31; 2 Kor. 10:17) Ke a ke waa “fĩa ngɛ Yehowa mi” ɔ, nɔ́ nɛ e tsɔɔ ji kaa wa bua maa jɔ wawɛɛ kaa Yehowa ji wa Mawu. Wa naa lɛ kaa e ji he blɔ nɛ wa ná kaa wa maa wo Yehowa biɛ ɔ hɛ mi nyami nɛ wa ha nɛ e biɛ ɔ he nɛ tsɔ. E sɛ nɛ e pee wɔ zo kaa wa ma de nihi nɛ waa kɛ mɛ tsuɔ ní, nihi nɛ waa kɛ mɛ yaa sukuu, wa kpɔ mi bimɛ ɔmɛ, kɛ ni kpahi kaa wa ji Yehowa Odasefohi! Abosiami suɔ nɛ wa kpa Yehowa biɛ ɔ he munyu tumi kɛ tsɔɔ ni kpahi. (Yer. 11:21; Kpoj. 12:17) Ngɛ anɔkuale mi ɔ, Satan kɛ e gbali ɔmɛ suɔ kaa nihi a hɛ nɛ je Yehowa biɛ ɔ nɔ kulaa. (Yer. 23:​26, 27) Se akɛnɛ wa suɔ Yehowa biɛ ɔ he je ɔ, wa suɔ nɛ wa je e yi “ligbi ɔ tsuo.”—La 5:11; 89:16.

15. Mɛni nɛ Yehowa biɛ ɔ nɛ wa ma tsɛ ɔ tsɔɔ?

¹⁵ Wa tsɛɔ Yehowa biɛ ɔ be fɛɛ be. (Yoel 2:32; Rom. 10:​13, 14) Yehowa biɛ ɔ nɛ wa ma tsɛ ɔ biɔ babauu pe nɛ wa maa le biɛ ɔ nɛ waa kɛ ma tsu ní kɛkɛ. Mohu ɔ, e biɔ nɛ waa le nɔ tutuutu nɛ Mawu ji, konɛ waa ngɔ wa hɛ kɛ fɔ e nɔ, nɛ e ye bua wɔ nɛ e tsɔɔ wɔ blɔ. (La 20:7; 99:6; 116:4; 145:18) Jehanɛ hu ɔ, e biɔ nɛ waa jaje e biɛ ɔ kɛ e su ɔmɛ kɛ tsɔɔ ni kpahi, konɛ e wo mɛ he wami nɛ a tsake a tsui nɛ a ba sɔmɔ Yehowa, bɔ nɛ pee nɛ Yehowa nɛ kplɛɛ a nɔ.—Yes. 12:4; Níts. 2:​21, 38.

16. Mɛni wa ma nyɛ maa pee kɛ ha nɛ Satan nɛ pee lakpatsɛ?

¹⁶ Wa pee klaalo kaa wa maa na nɔ́ ngɛ Yehowa biɛ ɔ he je. (Yak. 5:​10, 11) Ke wa ngɛ nɔ́ nae, se wa ya nɔ nɛ wa ye Yehowa anɔkuale ɔ, lɔ ɔ haa nɛ Satan ba peeɔ lakpatsɛ. Ngɛ Hiob be ɔ mi ɔ, Satan po nihi tsuo nɛ a sɔmɔɔ Yehowa a nya ke: “Nɔ́ fɛɛ nɔ́ nɛ ngɛ nɔ ko dɛ ɔ, e maa ngɔ kɛ ha, konɛ e yi nɛ ná wami.” (Hiob 2:4) Satan tsɔɔ kaa nihi sɔmɔɔ Yehowa ke níhi a mi hi kɛ ha mɛ pɛ. Se ke a kɛ haomihi ngɛ kpee ɔ, a ma kua Yehowa. Se Hiob ha nɛ Satan nya pomi ɔ pee lakpa. Jã kɛ̃ nɛ wɔ hu wa ngɛ he blɔ kaa wa ma ha nɛ Satan nɛ pee lakpatsɛ ngɛ si fɔfɔɛ fɛɛ si fɔfɔɛ nɛ e kɛ maa ba wa nɔ ɔ mi. Ke wa pee jã a, wa ma nyɛ ma ná nɔ mi mami nɛ mi wa kaa Yehowa maa ya nɔ maa hyɛ wa nɔ ngɛ e biɛ ɔ he je.—Yoh. 17:11.

17. Kaa bɔ nɛ 1 Petro 2:12 ɔ tsɔɔ ɔ, mɛni blɔ kpa nɔ wa ma nyɛ maa gu kɛ wo Yehowa biɛ ɔ hɛ mi nyami?

¹⁷ Wa jeɔ bumi kpo kɛ tsɔɔ Yehowa biɛ ɔ. (Abɛ 30:9; Yer. 7:​8-11) Akɛnɛ Yehowa biɛ ɔ ngɛ wa nɔ, nɛ wa daa e nane mi he je ɔ, wa ní peepee ma nyɛ maa wo e biɛ ɔ hɛ mi nyami loo e gbe e biɛ ɔ he guɛ. (Kane 1 Petro 2:12.) Enɛ ɔ he ɔ, wa suɔ nɛ waa pee nɔ́ fɛɛ nɔ́ nɛ wa ma nyɛ konɛ wa munyu tutui kɛ wa je mi bami nɛ wo Yehowa hɛ mi nyami. E ngɛ mi kaa wa yi mluku mohu lɛɛ, se ke wa pee jã a, wa maa wo Yehowa hɛ mi nyami.

18. Mɛni blɔ kpa ko nɔ nɛ wa ma nyɛ maa gu kɛ tsɔɔ kaa Yehowa biɛ ɔ he hia wɔ wawɛɛ? (Hyɛ sisi ningma a hulɔ.)

¹⁸ Yehowa biɛ ɔ he hia wɔ wawɛɛ pe wɔ nitsɛmɛ wa biɛ. (La 138:2) Mɛni he je? Ejakaa suɔmi nɛ wa ngɛ kɛ ha Yehowa biɛ ɔ ma nyɛ ma ha nɛ ni kpahi nɛ a bɔle wɔ ɔ nɛ a puɛ wa biɛ.a Loko Yesu ma gbo ɔ, nihi bu lɛ kaa ojo fialɔ. Se Yesu pee klaalo kaa e ma gbo hɛ mi si puemi gbenɔ nɛ ɔ konɛ e kɛ wo Yehowa biɛ ɔ hɛ mi nyami. E yi tsui, nɛ e ha we nɛ nɔ́ nɛ nihi ma de ngɛ e he ɔ nɛ ‘pee lɛ zo.’ (Heb. 12:​2-4) Mohu ɔ, e ngɔ e juɛmi kɛ ma Mawu suɔmi nya ní nɛ e maa pee ɔ nɔ.—Mat. 26:39.

19. Kɛ o nuɔ he ha kɛɛ ngɛ Yehowa biɛ ɔ he, nɛ mɛni he je?

¹⁹ Wa bua jɔ Yehowa biɛ ɔ he wawɛɛ, nɛ e ji he blɔ ngua nɛ wa ná kaa a ma tsɛ wɔ ke Yehowa Odasefohi. Enɛ ɔ he ɔ, wa suɔ nɛ waa ya nɔ nɛ wa je Yehowa yi ke nihi ma pue wa hɛ mi si po. Yehowa biɛ ɔ he hia wɔ wawɛɛ pe wɔ nitsɛmɛ wa biɛ po. Enɛ ɔ he ɔ, nyɛ ha nɛ waa fia wa pɛɛ si kaa wa maa ya nɔ ma je Yehowa biɛ ɔ yi ngɛ nɔ́ nɛ Satan maa pee ɔ tsuo se. Ke wa pee jã a, lɔ ɔ tsɔɔ kaa Yehowa biɛ ɔ he hia wɔ wawɛɛ kaa bɔ nɛ e ji ngɛ Yesu Kristo blɔ fa mi ɔ.