Sɛ Womi Nɛ Je Nɔyemi Kuu ɔ Ngɔ
Wa Nyɛmimɛ Yehowa Odasefoli Nɛ Wa Suɔ:
E ji he blɔ ngua nɛ wa ná kaa a kɛ Yehowa nɛ ji je Mluku ɔ Matsɛ ɔ biɛ tsɛɛ wɔ! Biɛ nɛ ɔ ngɛ kɛ yaa neneene, e se pui, nɛ biɛ ko biɛ ko be nɛ kɛ lɛ sɔ. Yehowa ji nɔ nɛ ngɔ biɛ nɛ ɔ kɛ wo wɔ, nɛ titli ɔ, a le wɔ kɛ biɛ nɛ ngɛ slɔɔto nɛ ɔ kɛ je jeha 1931. (Yes. 43:10) E pee we wɔ zo kaa wa ma je wa he kpo kaa wa ji Yehowa Odasefoli.
Abosiami ngɛ nɔ yae nɛ e ngɛ mɔde bɔe kaa e maa laa Mawu biɛ ɔ nɔ. E ha nɛ jema amɛ kua Yehowa biɛ ɔ. Babilon Ngua a nɛ ji je ɔ mi lakpa jami blɔ nya tomi ɔ sume Mawu biɛ ɔ, nɛ enɛ ɔ ha nɛ a je Mawu biɛ ɔ kɛ je Baiblo sisi tsɔɔmihi fuu a mi. Se Yesu wo e Tsɛ ɔ biɛ ɔ hɛ mi nyami, nɛ e tu lɔɔ he munyu kekle ngɛ sɔlemi he nɔ hyɛmi nɔ́ nɛ e tsɔɔ e se nyɛɛli ɔmɛ ɔ mi. E de ke: “Lɔɔ he nyɛɛ sɔle kaa kikɛ nɛ ɔ: ‘Wa Tsɛ nɛ ngɛ hiɔwe; O biɛ ɔ he nɛ tsɔ.’” (Mat. 6:9) Pee se ɔ, e je e tsui mi nɛ e sɔle kɛ ha e Tsɛ ɔ nɛ e de lɛ ke: “I je o biɛ ɔ si ngɔ tsɔɔ nimli nɛ o ngɔ kɛ je je ɔ mi ha mi ɔ.” (Yoh. 17:6, NW) Akɛnɛ wa suɔ nɛ waa nyɛɛ Yesu nɔ hyɛmi nɔ́ kpakpa a se heje ɔ, wa mwɔ wa yi mi kpɔ wawɛɛ kaa waa kɛ gɛjɛmi maa fia Yehowa biɛ ɔ he adafi ngɛ je ɔ mi tsuo.
Jeha 2009 ngmami nɛ ji, ‘Ye sane kpakpa a he odase kɛ pi si’ ɔ wo wɔ he wami konɛ wa tsu wa sɔmɔmi nítsumi ɔ kɛ pi si. (Níts. 20:24, NW) Atsinyɛ jemi ko be he kaa Yehowa jɔɔ wa mɔde bɔmi nɔ ngɛ sɔmɔmi jeha nɛ be ɔ mi saminya. A ye odase ngua ngɛ je kɛ wɛ kɛ wo Yehowa biɛ ɔ hɛ mi nyami. Fiɛɛli a yibɔ ehe nɛ su 7,313,173 pee kake kɛ fiɛɛ kɛ ha nihi tsuo, nɛ a tsɔɔ nihi nɛ a ngɛ anɔkuale ɔ he bua jɔmi nɛ a ngɛ bɔnɛ a maa pee kɛ tsu haomihi nɛ a kɛ kpeɔ daa ligbi ɔ a he ní ɔ ní. Nimli 18,168,323 nɛ́ a ba Kristo gbenɔ ɔ Kaimi ɔ sisi ɔ hu tsɔɔ kaa loloolo ɔ, nimli ayɔhi abɔ ngɛ nɛ a ma tsɛ Yehowa biɛ ɔ loko je yaya nɛ ɔ nyagbe ɔ maa ba.
Be abɔ nɛ Yehowa ngmɛ blɔ ɔ, wa maa ya nɔ maa fiɛɛ Matsɛ Yemi ɔ he sane kpakpa a kɛ kã; wa maa gu blɔ slɔɔtohi a nɔ kɛ su nihi nɛ a ngɛ wa zugba kpɔ ɔ mi ɔ a ngɔ. (Mat. 24:14; Mar. 13:10) Wa ngɛ fiɛɛe ngɛ sinyahi a nya jio, gbɛjegbɛ nɔ jio, sɛ womi kɛ tɛlifoo waa kɛ ngɛ odase yee jio, tlukaa odase nɛ wa ngɛ yee jio ɔ, nyɛ ha nɛ waa bɔ mɔde nɛ wa je Yehowa biɛ ɔ kɛ e yi mi tomi ɔ kpo kɛ tsɔɔ nihi babauu.
Wa ngɛ yi mi tomi kpakpa heje nɛ sa kaa wa he ye kaa e be kɛe nɛ Yehowa ma tsɔ e biɛ ɔ he. (Ezek. 36:23) Be nɛ e kɛ ma kpata nihi nɛ gbeɔ e biɛ ɔ he guɛ ɔ a hɛ mi ɔ su si ta. Moo hyɛ bɔnɛ jamɛ a ligbi ɔ maa pee bua jɔmi ligbi kɛ ha Yehowa sɔmɔli anɔkualetsɛmɛ nɛ a je Yehowa biɛ ɔ kpo kɛ tsɔɔ nihi, nɛ a wo je mluku ɔ matsɛ nɛ e ji ɔ hɛ mi nyami ɔ ha!
Suɔmi nɛ Yehowa ngɛ ha e webi ɔ je kpo heii ngɛ ‘Yaa Nɔ Nɛ O Hwɔɔ!’ Kpe Ngua kɛ Mahi A Kpɛti Kpehi nɛ a pee ngɛ je ɔ mi hehi fuu ngɛ jeha 2009 ɔ sisi. Kpe nɛ ɔmɛ peeɔ hɛ mi yami titli ngɛ wa teokrase yinɔ sane mi. Kpe nɛ ɔmɛ wo wɔ he wami konɛ wa hɛ nɛ hi wa he nɔ kaa wa maa hwɔɔ kɛ mlɛ Yehowa ligbi ɔ.—Mar. 13:37; 1 Tes. 5:1, 2, 4.
Ngɛ anɔkuale mi ɔ, Yehowa peeɔ ní kpakpahi kɛ haa wɔ; e haa nɛ wa náa bua jɔmi. E haa nɛ wa jɔɔ wa he ngɛ nga mumu nɔ nɛ e ngɔɔ wɔ kɛ yaa takuhi kɛ a mi nyu jɔjɔɛ he.—La 23:1, 2; 100:2, 5.
Nyɛ ná nɔ mi mami kaa Yehowa maa ya nɔ nɛ e maa jɔɔ nyɛ be mi nɛ nyɛɛ kɛ nyɛ he woɔ Matsɛ Yemi nítsumi ɔ mi vii ngɛ nyɔhiɔhi nɛ maa ba a mi ɔ!
Waa kɛ Kristofoli a suɔmi biɔ wa je kɛ wɛ nyɛmimɛ ɔmɛ,
Nyɛ nyɛmimɛ,
Yehowa Odasefoli A Nɔyemi Kuu ɔ