Anɛ O Le Nɔ́ Nɛ Nɔ Nɛ O Maa Kplɛɛ Lo?
Nɔ gbami loo operation nɛ a peeɔ nɛ a kɛ muɔ tsu we ní ɔ ngɛ nɔ yae ngɛ hiɔ tsami hehi fuu ngɛ je ɔ mi. Anɛ o le blɔ slɔɔtoslɔɔtohi a nɔ nɛ a guu kɛ tsaa nɔ nɛ a kɛ muɔ tsu we ní ɔ he sane fitsofitso lo? E he hia kaa o le, bɔnɛ pee nɛ o nyɛ nɛ o kɛ nile nɛ mwɔ o yi mi kpɔ ngɛ hiɔ tsami kɛ nɔ gbami he sanehi a he. Moo hyɛ video nɛ ji No Blood—Medicine Meets the Challenge ɔ. Lɔɔ se ɔ, moo sɔle ngɛ nɔ́ nɛ o kase ɔ he konɛ o ngɔ sane bimihi nɛ nyɛɛ se ɔ kɛ susu ní nɛ o kase ɔ a he.—Kadi: Akɛnɛ nyɛ maa na he kpitikpiti komɛ nɛ a ngɛ nihi gbae ngɛ ngɛ video ɔ mi heje ɔ, e he hia kaa fɔli nɛ a ngɔ nile kɛ tsu ní ke a kɛ a bimɛ tsɔwi ngɛ video ɔ hyɛe.
(1) Ngɛ mɛni yi mi tomi titli heje nɛ Yehowa Odasefoli ngɔɛ muɔ? (2) Mɛni Yehowa Odasefoli suɔ kaa a pee kɛ ha mɛ ngɛ hiɔ tsami blɔ fa mi? (3) Mɛni he blɔ lɛ hiɔtsɛmɛ ngɛ? (4) Mɛni heje nɛ nile ngɛ mi kaa wa maa kplɛɛ tsopahi nɛ a kɛ daa muɔ nane mi ɔ nɔ, nɛ mɛni heje nɛ e ji wa blɔ nya nítsumi kaa wa maa pee jã? (5) Ke nɔ ko muɔ ngɛ bee fuu ɔ, mɛni níhi enyɔ nɛ́ a he hia lɛ dɔkitahi kɛ oya yemi ma nyɛ maa pee? (6) Mɛni níhi eywiɛ lɛ tsopahi nɛ a kɛ daa muɔ nane mi ɔ tsuɔ? (7) Mɛni blɔhi a nɔ dɔkitahi ma nyɛ maa gu konɛ (a) a tsi muɔ nya nɛ e ko be fuu, (b) a baa wami yiblii tsutsu ɔmɛ a yi, (d) a ha nɔmlɔtso ɔ nɛ ná muɔ fuu, (e) a ha muɔ nɛ maa be ɔ nɛ ko dã? (8) Moo tsɔɔ bɔnɛ a kɛ hiɔ tsami blɔ nɔ tomi nɛ ɔmɛ tsuɔ ní ha a mi: (a) muɔ nɛ a kɛ tsopa futuɔ mi ngɛ nɔmlɔtso ɔ mi (hemodilution) kɛ (b) muɔ nɛ a haa nɛ e ya bɔleɔ si ngɛ klama mi (cell salvage). (9) Mɛni lɛ o maa suɔ kaa o maa le ngɛ tsopahi nɛ a kɛ daa muɔ nane mi ɔ eko tsuaa eko he? (10) Anɛ a ma nyɛ maa pee operation nguanguahi nɛ a kɛ muɔ be ní tsue lo? (11) Mɛni ji nɔ́ ko nɛ hi nɛ tsopa peeli ngɛ pee?
Nɔ tsuaa nɔ maa da e he nile nɛ e kɛ Baiblo ɔ tsɔse lɛ ɔ nɔ kɛ mwɔ e yi mi kpɔ keji e maa kplɛɛ hiɔ tsami blɔ nɔ tomi ɔ ekomɛ nɛ je kpo ngɛ video ɔ mi ɔ nɔ aloo e be nɔ kplɛɛe. Anɛ o mwɔ o yi mi kpɔ ngɛ hiɔ tsami kɛ hiɔ tsami blɔ nɔ tomihi nɛ mo nitsɛ kɛ o bimɛ maa kplɛɛ nɔ ɔ he, nɛ o ngma ngɛ DPA womi ɔ nɔ lo? Kɛ o ngɛ sane nɛ ɔmɛ a nya tsɔɔmi fitsofitso hlae ɔ, moo kane “Questions From Readers” nɛ ngɛ Watchtower nɛ je kpo ngɛ June 15, 2004, kɛ October 15, 2000 mi ɔ. Lɔɔ se ɔ, moo da “How Do I View Blood Fractions and Medical Procedures Involving My Own Blood?” (Kɛji Bɔnɛ I Naa Muɔ Mi Ní Nyafinyafihi Kɛ Nɔ Gbami Blɔ Nɔ Tomihi Nɛ A Kɛ Imi Nitsɛ Ye Muɔ Ma Tsu Ní Ngɛ Mi ɔ Ha Kɛɛ?) nɛ ngɛ December 2006 Our Kingdom Ministry ɔ kpɛti ɔ nɔ kɛ mwɔ o yi mi kpɔ ngɛ níhi nɛ o maa kplɛɛ nɔ loo o be nɔ kplɛɛe ɔ a he. Nyagbe ɔ, hyɛ nɛ o ngma o yi mi kpɔ mwɔmi ɔ pɛpɛɛpɛ kɛ fɔ o DPA womi ɔ nɔ. E sa nɛ o de nihi nɛ o hla kaa a da si ha mo ke o be he wami kɛ o wekuli nɛ a pi Odasefoli ɔ konɛ a le yi mi kpɔ nɛ o mwɔ ɔ saminya.