Guu Blɔ Nɛ Maa Wo Yiblii Nɔ Kɛ Fiɛɛ Munyu ɔ
1. Mɛni wa ma nyɛ maa kase kɛ je blɔ slɔɔtohi a nɔ nɛ kekle jeha lafa a mi Kristofoli ɔmɛ gu kɛ fiɛɛ ɔ mi?
1 Kekle jeha lafa a mi Kristofoli ɔmɛ fiɛɛ sane kpakpa a kɛ ha nimli munomunohi ngɛ jami slɔɔtohi a mi. (Kol. 1:23) E ji anɔkuale kaa Mawu Matsɛ Yemi ɔ he sɛ gbi kake ɔ nɔuu nɛ a fiɛɛ, se e slo blɔ nɛ a gu nɔ kɛ tu he munyu kɛ tsɔɔ a tue buli ɔmɛ. Kaa nɔ hyɛmi nɔ́ ɔ, benɛ Petro tu munyu kɛ tsɔɔ Yudabi nɛ a ngɛ bu kɛ ha Ngmami ɔ, e tsɛ gbalɔ Yoel munyuhi a se kɛ je sisi. (Níts. 2:14-17) Jehanɛ, mo kadi blɔ nɛ Paulo gu nɔ nɛ e kɛ Helabi ɔmɛ susu níhi a he ha a nɛ a ngma ngɛ Bɔfo Ɔmɛ A Nítsumi 17:22-31 ɔ. Mwɔnɛ ɔ, nihi ngɛ zugba kpɔ komɛ a mi nɛ a ngɛ bu kɛ ha Ngmami ɔ, nɛ wa ma nyɛ maa tu Baiblo ɔ he munyu faa kɛ tsɔɔ mɛ be mi nɛ wa ngɛ fiɛɛe ngɛ wehi a mi ɔ. Se ke waa kɛ nihi nɛ a be Baiblo ɔ loo jami he bua jɔmi, loo a pi Kristofoli ngɛ munyu tue ɔ, e sa kaa waa kɛ nile nɛ tsu ní.
2. Kɛ wa maa pee ha kɛɛ konɛ waa ngɔ womi nɛ waa kɛ ngɛ ní tsue ɔ kɛ ye bua nihi nɛ a bua jɔ Baiblo ɔ he kɛ nihi nɛ a bua jɔe he ɔ?
2 O Kɛ Womi Nɛ A Kɛ Ma Ha a Nɛ Tsu Ní Saminya: Wa ma tsake womihi nɛ waa kɛ ma ha ngɛ sɔmɔmi jeha nɛ ɔ mi ɔ mi daa nyɔhiɔ enyɔ, nɛ womi tɛtlɛɛhi, dɛ womihi, kɛ womiyohi nɛ waa kɛ ma tsu ní. Ke nihi nɛ ngɛ wa zugba kpɔ ɔ mi ɔ a bua jɔɛ Baiblo ɔ he po ɔ, wa ma nyɛ ma de mɛ nɔ́ ko kɛ̃ nɛ a bua maa jɔ he. Nɛ ke wetsɛ ko ná munyu ɔ he bua jɔmi ngɛ kekleekle be ɔ nɔ, nɛ wa tsɛ we ngmami ko se loo wa kane we Baiblo ɔ tɛɛ po ɔ, wa ma nyɛ maa kpale kɛ ya e ngɔ nɛ waa ye bua lɛ konɛ e ná hemi kɛ yemi ngɛ Bɔlɔ ɔ kɛ e Munyu ɔ mi. Se ke wa ngɛ fiɛɛe ngɛ he nɛ nihi ngɛ bu kɛ ha Baiblo ɔ, wa ma nyɛ ma ha mɛ womi nɛ waa kɛ Baiblo ɔ nɛ tsu ní. Ngɛ anɔkuale mi ɔ, wa ma nyɛ maa ngɔ Baiblo Tsɔɔmi womi ɔ loo Bu Mawu Tue loo Bu Mawu Tue Nɛ O Hi Si Kɛ Ya Neneene ɔ kɛ tsu ní be tsuaa be, e kɔ we he eko womi nɛ waa kɛ ngɛ ní tsue ngɛ jamɛ a nyɔhiɔ ɔ mi. Oti ɔ ji kaa wa maa gu blɔ nɛ maa wo yiblii nɔ kɛ tsu ní.
3. Mɛni blɔ nɔ nɛ nihi nɛ a ngɛ wa zugba kpɔ ɔ mi ɔ a tsui ngɛ kaa zu ngɛ?
3 Dla Zu ɔ: Adesa tsui ngɛ kaa zu. (Luka 8:15) Zu ko ngɛ nɛ e hia nɛ a dla lɛ saminya loko a ma nyɛ ma du Baiblo mi anɔkuale ngɛ mi nɛ e tsɛ̃ poku nɛ e wa. Kekle jeha lafa a mi sane kpakpa fiɛɛli ɔmɛ du ní ngɛ zu slɔɔtohi a mi nɛ enɛ ɔ ha nɛ a tsui nɔ a mi nɛ a ná bua jɔmi. (Níts. 13:48, 52) Wɔ hu wa ma nyɛ maa ye manye ke wa maa gu blɔ nɛ maa wo yiblii nɔ kɛ fiɛɛ.