O Bua Nɛ Jɔ Yehowa Su Ɔmɛ A He Saminya
“Akɛnɛ Mawu bimɛ nɛ e suɔ ji nyɛ heje ɔ, nyɛɛ bɔ mɔde nɛ nyɛɛ kase lɛ.”—EFE. 5:1.
1. (a) Mɛni ji Yehowa su komɛ nɛ Kristofono ko ma nyɛ ma susu he? (b) Ke o kase Mawu su ɔmɛ a he ní ɔ, mɛni se o ma ná?
KE O ngɛ suhi nɛ Yehowa ngɛ ɔ a he susue ɔ, a kpɛti te nɛɛ lɛ e baa o juɛmi mi? Wa kpɛti nihi fuu susuɔ e suɔmi, e dami sane yemi, e nile, kɛ e he wami ɔ he. Se wa le kaa Yehowa ngɛ su kpakpahi fuu. Ngɛ anɔkuale mi ɔ, asafo womi ɔmɛ tu Yehowa suhi nɛ hiɛ pe 40 a he munyu. Ke wa kase Yehowa su nɛ ɔmɛ a he ní ngɛ wa dɛhe aloo waa kɛ wa weku ɔ kase ɔ, wa maa le Yehowa he ní babauu! Mɛni blɔ nɔ nɛ wa ma ná nikasemi kaa jã a he se ngɛ? E ma ha nɛ wa ma ná wa hiɔwe Tsɛ ɔ he bua jɔmi wawɛɛ. Enɛ ɔ ma ha nɛ wa maa suɔ wawɛɛ kaa waa hɛ kɛ su e he nɛ waa kase lɛ.—Yos. 23:8; La 73:28.
2. (a) Mo ha nɔ hyɛmi nɔ́ nɛ tsɔɔ bɔnɛ wa maa pee ha konɛ wa bua nɛ jɔ Yehowa su ɔmɛ a he wawɛɛ. (b) Mɛni he wa ma susu?
2 Se ke a ke wa ná nɔ́ ko he “bua jɔmi” ɔ, mɛni e tsɔɔ? E tsɔɔ kaa e sa nɛ waa bu jamɛ a nɔ́ ɔ kaa nɔ́ ko nɛ he jua wa saminya. Bua jɔmi nɛ wa ma ná ngɛ nɔ́ ko he ɔ mi ma nyɛ maa wa bɔɔbɔɔbɔɔ. Kaa nɔ hyɛmi nɔ́ ɔ: Wa bua ma nyɛ maa jɔ niye ní nɛ wa yi eko hyɛ ɔ he bɔɔbɔɔbɔɔ kɛ gu e he via nɛ wa maa nu, kɛ wa nya nɛ wa maa sa, kɛ niye ní ɔ nɛ wɔ nitsɛmɛ wa maa kase hoomi ɔ nɔ. Jã nɔuu nɛ ke wa le Yehowa su ko, nɛ wa susuɔ he, nɛ wa jeɔ jamɛ a su ɔ kpo ngɛ wa si himi mi ɔ, lɔɔ ma ha nɛ wa bua maa jɔ jamɛ a su ɔ he wawɛɛ. (Efe. 5:1) Wa maa kase Mawu su komɛ a he ní ngɛ munyu nɛ ɔ nɛ wa ngɛ kasee ɔ, kɛ munyuhi enyɔ nɛ wa maa kase kɛ nyɛɛ enɛ ɔ se ɔ a mi. Wa pɔɛ Mawu su nɛ ɔmɛ a he susumi kaa bɔnɛ wa susuɔ e su titli ɔmɛ a he ɔ. Ke wa ngɛ su nɛ ɔ eko tsuaa eko he ní kasee ɔ, wa ma susu sane bimi nɛ nyɛɛ se nɛ ɔmɛ a he: Mɛni su nɛ ɔ tsɔɔ? Mɛni blɔ nɔ Yehowa guɔ kɛ jeɔ jamɛ a su ɔ kpo? Kɛ mɛni blɔ nɔ wa maa gu kɛ kase Yehowa konɛ wa je jamɛ a su ɔ kpo?
NIHI NYƐƆ SUƆ YEHOWA HE
3, 4. (a) Ke nihi nyɛɔ suɔ nɔ ko he ɔ, mɛni e tsɔɔ? (b) Mɛni blɔ nɔ Yehowa gu kɛ ma nɔ mi kɛ ha wɔ kaa e ji nɔ ko nɛ nihi nyɛɔ suɔ e he?
3 Kekleekle ɔ, nyɛ ha nɛ wa susu bɔnɛ nihi nyɛɔ suɔ Yehowa he ha a he nɛ waa hyɛ. Ke nihi nyɛɔ suɔ nɔ ko he ɔ, mɛni e tsɔɔ? E tsɔɔ kaa eko ɔ, nɔ ɔ mi mi hi, e ngɛ ni kpahi a he deka, nɛ nihi kɛ lɛ nyɛɔ tuɔ munyu faa. Behi fuu ɔ, wa ma nyɛ maa da munyu nɛ nɔ ko maa tu nɛ wa maa nu, bɔnɛ e peeɔ e nɔmlɔtso kɛ e hɛ mi ha a nɔ kɛ tsɔɔ kaa nɔ ɔ ji nɔ ko nɛ nihi nyɛɔ suu e he aloo nihi nyɛ we nɛ a suu e he.
4 Mɛni blɔ nɔ Yehowa guu kɛ tsɔɔ kaa e ji nɔ ko nɛ nihi nyɛɔ suɔ e he? E ngɛ mi kaa Yehowa ope ɔ ji je mluku ɔ Bɔlɔ mohu, se e wo wɔ si kaa e suɔ, nɛ e ngɛ he bua jɔmi wawɛɛ kaa e maa bu wa sɔlemi tue nɛ e ye bua wɔ. (Kane La 145:18; Yesaya 30:18, 19.) Waa kɛ Mawu ma nyɛ maa tu munyu be kɛkɛɛ, aloo be tsuaa be, aloo ngɛ he tsuaa he. Wa ma nyɛ maa sɔle ha Yehowa be tsuaa be, ejakaa wa le kaa e be he nue kaa wa ngɛ lɛ haoe. (La 65:2; Yak. 1:5) Mawu Munyu ɔ ngɔɔ munyuhi nɛ adesahi ma nyɛ maa nu sisi kɛ kaleɔ Yehowa ní peepee komɛ nɛ tsɔɔ kaa e suɔ kaa nihi nɛ a su e he. Kaa nɔ hyɛmi nɔ́ ɔ, la polɔ David ngma ke, ‘Yehowa hɛngmɛ ngɛ’ wa he, nɛ e “kɛ kɔni si wami hɛɛ” wa mi. (La 34:15; 63:8) Gbalɔ Yesaya ngɔ Yehowa kɛ to to hyɛlɔ he. E de ke: “E [Yehowa] ma bua e to bi ɔmɛ a nya, nɛ e maa hɛɛ mɛ ngɛ e bɔkɔ mi.” (Yes 40:11) Mo susu he nɛ o hyɛ! Yehowa suɔ kaa waa hi e kasa mi kaa bɔnɛ to bi hii to hyɛlɔ kpakpa kɔni bɔkɔ mi ɔ. Wa Tsɛ ɔ ji nɔ ko nɛ nihi nyɛɛ suu e he! Kɛ wa ma plɛ kɛ kase Yehowa kɛɛ?
SU KO NƐ E HE HIA WAWƐƐ
5. Mɛni heje nɛ e he hia kaa asafo mi nikɔtɔmahi nɛ a pee nihi nɛ nihi nyɛɔ suɔ a he ɔ?
5 Lingmi nɛ ɔ, a bi Odasefoli nɛ a ngɛ ma slɔɔtohi a nɔ ke, “Mɛni ji su nɛ o suɔ wawɛɛ ngɛ asafo mi nɔkɔtɔma ko he?” A kpɛti nihi babauu ha heto ke: “Ke asafo mi nɔkɔtɔma a pee e he nɔ nɛ nihi nyɛɔ suɔ e he ɔ, lɔɔ nɛ wa suɔ wawɛɛ.” E ngɛ mi kaa e sa nɛ Kristofoli tsuo nɛ a je su nɛ ɔ kpo mohu lɛɛ, se asafo mi nikɔtɔmahi ji nihi titli nɛ e sa kaa a je su nɛ ɔ kpo. (Yes 32:1, 2) Nyɛmiyo ko tsɔɔ nɔ́ heje nɛ e susu kaa su nɛ ɔ he hia wawɛɛ ɔ. E de ke: “Loko wa ma ná su kpakpahi nɛ asafo mi nɔkɔtɔma ko ngɛ ɔ he se ɔ, ja e pee e he nɔ nɛ nihi nyɛɔ suɔ e he.” Munyu nɛ ɔ ji anɔkuale. Se mɛni haa nɛ nihi nyɛɔ suɔ nɔ ko he?
6. Mɛni ji nɔ́ titli nɛ haa nihi nyɛɔ suɔ nɔ he?
6 Ke wa susuɔ ni kpahi a he ɔ, lɔɔ ji nɔ́ titli nɛ ma ha nɛ nihi maa su wa he. Ke asafo mi nɔkɔtɔma ko susuɔ ni kpahi a he, nɛ e suɔ kaa e maa ye bua mɛ ɔ, e nyɛmimɛ nyumuhi kɛ yihi kɛ jokuɛwi tsuo naa. (Mar. 10:13-16) Jokuɛ nyumuyo ko nɛ a tsɛɛ lɛ ke Carlos, nɛ e ye jeha 12 ɔ de ke: “Ke i na bɔnɛ asafo mi nikɔtɔma amɛ kɛ nɔ tsuaa nɔ muɔɔ nɛ a jeɔ mi mi himi kpo kɛ tsɔɔ nihi ngɛ Matsɛ Yemi asa a nɔ ha a, e muɔɔ ye hɛ.” Ngɛ anɔkuale mi ɔ, tsa pi nɛ asafo mi nɔkɔtɔma ko ma de kɛkɛ ke nihi nyɛɔ suɔ e he, e sa kaa e ní peepee hu nɛ tsɔɔ jã. (1 Yoh. 3:18) Mɛni blɔ nɔ e maa gu kɛ pee jã?
7. Mɛni heje nɛ behi fuu ɔ, ke wa ma kpe badge ngɛ wa gugue mi ɔ, nihi suɔ nɛ a kɛ wɔ maa sɛɛ ní ɔ, nɛ mɛni wa ma nyɛ maa kase ngɛ mi?
7 Mo susu nɔ́ hetomi nɔ́ nɛ ɔ he nɛ o hyɛ. Be ko ɔ, nyɛminyumu ko ya kpe ngua ko ngɛ ma kpa nɔ. Benɛ a gbe kpe ɔ nya nɛ e kuɔ kɔɔhiɔ mi lɛ kɛ yaa he nɛ e je ɔ, e ma kpe ɔ he badge nɛ a ngma ngɛ nɔ ke, ‘Mawu Matsɛ Yemi ɔ Nɛ Ba!’ a ngɛ e gugue mi. Nɔ ko nɛ e tsuɔ ní ngɛ kɔɔhiɔ mi lɛ ɔ mi ɔ na badge ɔ nɛ e de nyɛminyumu ɔ ke, “Ee, e ba.” Pee se ɔ, a sɛɛ ní, nɛ e ngɔ wa womi tɛtlɛɛ ɔmɛ eko. Wa kpɛti nihi fuu ná níhi a si kpamihi kaa kikɛ. Se mɛni heje nɛ ke wa ma kpe badge ɔ, e yi ha nihi kaa a kɛ wɔ maa sɛɛ ní ɔ? Ejakaa badge ɔ haa nɛ nihi hlaa kaa a maa le he nɛ wa yaa, nɛ e tsɔɔ mɛ hu kaa wa suɔ nɛ waa kɛ mɛ nɛ sɛɛ wa hemi kɛ yemihi a he ní. Jã nɔuu nɛ e sa kaa asafo mi nikɔtɔmahi hu a ha nɛ nyɛmimɛ nɛ a na kaa a suɔ nɛ a kɛ mɛ nɛ sɛɛ ní. Mɛni blɔhi a nɔ asafo mi nikɔtɔmahi maa gu kɛ pee jã?
8. Mɛni asafo mi nikɔtɔmahi peeɔ kɛ tsɔɔ kaa a susuɔ ni kpahi a he, nɛ kɛ enɛ ɔ haa nɛ nihi nɛ a ngɛ asafo ɔ mi ɔ nuɔ he ha kɛɛ?
8 Ngɛ mahi fuu a nɔ ɔ, o ma nyɛ maa tsɔɔ kaa o susuɔ nyɛmimɛ a he kɛ gu muɔmi nɛ o maa muɔ kɛ tsɔɔ mɛ, nɛ o maa ta a dɛ, aloo o ma fɔ mɛ ɔ nɔ. Mɛnɔmɛ nɛ e sa kaa a sɛ hlami nɛ a pee enɛ ɔ? Mo kadi nɔ hyɛmi nɔ́ nɛ Yesu pee ɔ. Mateo bɔ amaniɛ kaa ngɛ kpe nɛ Yesu kɛ e kaseli ɔmɛ pee ɔ sisi ɔ, “Yesu hɛ lɛ kɛ su a he” nɛ e kɛ mɛ tu munyu. (Mat. 28:18) Jã kɛ̃ nɛ mwɔnɛ ɔ, e sa kaa asafo mi nikɔtɔmahi nɛ a hɛ kɛ su a nyɛmimɛ Kristofoli a he nɛ a kɛ mɛ nɛ sɛɛ ní. Ke a pee jã a, kɛ nihi nɛ a ngɛ asafo ɔ mi ɔ maa nu he ha kɛɛ? Nyɛmiyo ko nɛ e ye jeha 88 nɛ e ji daa blɔ gbalɔ ɔ de ke: “Bɔnɛ muɔ hɛlii hiɔ asafo mi nikɔtɔma amɛ a nya he, kɛ bɔnɛ a woɔ mi he wami ke i ya Matsɛ Yemi Asa a nɔ ɔ ha a, ha nɛ i suɔ a sane wawɛɛ.” Nyɛmiyo ko hu de ke: “Ke i ya asafo mi kpe nɛ asafo mi nɔkɔtɔma ko kɛ bua jɔmi nya ye he ɔ, ye bua jɔɔ wawɛɛ nitsɛ.”
MO NÁ DEKA KƐ HA NYƐMIMƐ
9, 10. (a) Mɛni nɔ hyɛmi nɔ́ kpakpa Yehowa pee kɛ ha wɔ? (b) Mɛni blɔ nɔ asafo mi nikɔtɔmahi maa gu kɛ ná deka kɛ ha nihi?
9 E ngɛ heii kaa ke wa be deka ha nihi ɔ, a be nyɛe maa su wa he. Yehowa pee enɛ ɔ he nɔ hyɛmi nɔ́ kpakpa kɛ ha wɔ. Baiblo ɔ deɔ ke, “Mawu kɛ wa ti nɔ tsuaa nɔ kpɛti kɛ we kulaa.” (Níts. 17:27) Blɔ kake nɛ asafo mi nikɔtɔmahi ma nyɛ maa gu nɔ kɛ pee enɛ ɔ ji, nɛ́ a ma ná deka kɛ ha nyɛmimɛ nyumuhi kɛ yihi kɛ jokuɛwi tsuo, nɛ́ a kɛ mɛ nɛ sɛɛ ní loko a je asafo mi kpe sisi, kɛ jehanɛ se hu ke a kpa. Nyɛminyumu ko nɛ e ji blɔ gbalɔ ɔ de ke: “Ke asafo mi nɔkɔtɔma ko bi mi kaa kɛ i ngɛ kɛɛ, nɛ e bu heto nɛ ma ha a tue ɔ, e haa nɛ i naa kaa e susuɔ ye he.” Nyɛmiyo ko nɛ e ngɛ Yehowa sɔmɔe maa pee jeha 50 jinɛ ɔ de ke: “Asafo mi nikɔtɔmahi nɛ a náa deka nɛ a kɛ mi sɛɛɔ ní ke wa ya asafo mi kpe ɔ, haa nɛ i naa kaa se nami ngɛ ye he.”
10 E ji anɔkuale kaa asafo mi nikɔtɔmahi ngɛ blɔ nya nítsumihi fuu mohu. Se ke a ya asafo mi kpehi ɔ, e sa kaa a ná deka kɛ ha nyɛmimɛ nɛ a kɛ mɛ nɛ sɛɛ ní.
YEHOWA HYƐ WE NƆ HƐ MI
11, 12. (a) Ke a ke nɔ ko hyɛ we nɔ hɛ mi ɔ, mɛni e tsɔɔ? (b) Mɛni blɔ nɔ Baiblo ɔ tsɔɔ kaa Yehowa hyɛ we nɔ hɛ mi ngɛ?
11 Yehowa su kpakpa amɛ eko ji, e hyɛ we nɔ hɛ mi. Ke a ke nɔ ko hyɛ we nɔ hɛ mi ɔ, mɛni e tsɔɔ? E tsɔɔ kaa nɔ ɔ yeɔ dami sane, e hlɛ nɔ mi, aloo e bui nɔ ko kaa e hi pe nɔ ko. Níhi enyɔ nɛ nyɛɛ se nɛ ɔmɛ nɛ tsɔɔ kaa wa hyɛɔ nihi a hɛ mi aloo wa hyɛ we nihi a hɛ mi: wa su kɛ wa ní peepee. Mɛni heje nɛ wa su kɛ wa ní peepee he hia a? Ejakaa ke nɔ ko hyɛ we nihi a hɛ mi ɔ, e be nɔ ko bue kaa e he hia pe nɔ ko. Ngɛ Kristofoli a Hela Ngmami ɔ mi ɔ, ke nɔ ko “hyɛ we nɔ hɛ mi” ɔ, nɔ́ nɛ e tsɔɔ tutuutu ji, e “hlɛ nɔ mi,” e bui nɔ ko kaa e hi pe nɔ ko. (Níts. 10:34) Lɔɔ he ɔ, nɔ nɛ hyɛ we nɔ hɛ mi ɔ, nɔ́ nɛ e hyɛɛ ngɛ nɔ ko he ji, nɔ ɔ su, se pi si himi mi nɛ nɔ ɔ ngɛ.
12 Yehowa ji nɔ nɛ hyɛ we nɔ hɛ mi pe kulaa nɛ wa ma nyɛ maa kase lɛ. E Munyu ɔ tsɔɔ kaa Mawu “hyɛ we nɔ hɛ mi.” (Kane Bɔfo Ɔmɛ A Nítsumi 10:34, 35; 5 Mose 10:17.) Sane ko nɛ ba ngɛ Mose be ɔ mi ɔ haa wa naa enɛ ɔ saminya.
Zelofehad biyi ɔmɛ bua jɔ nɔ hɛ mi nɛ Mawu hyɛ we ɔ he (Hyɛ kuku 13, 14)
13, 14. (a) Mɛni haomi Zelofehad biyihi enuɔ ɔ kɛ kpe? (b) Mɛni Yehowa pee kɛ tsɔɔ kaa e hyɛ we nɔ hɛ mi?
13 Benɛ e piɛ bɔɔ nɛ Israelbi ɔmɛ maa su Si Womi Zugba a nɔ ɔ, nyumu ko nɛ a tsɛɛ lɛ ke Zelofehad ɔ biyihi enuɔ ɔ kɛ haomi ko kpe. Mɛni ji a haomi ɔ? A tsɛ Zelofehad gbo, nɛ a nine be nyɛe maa su a tsɛ ɔ zugba a nɔ. (4 Mose 26:52-55) Mɛni heje? Ejakaa ngɛ Mlaa a nya a, binyumuhi pɛ nɛ a nine nyɛɔ suɔ zugba nɔ. Se a tsɛ ɔ gbo nɛ e be binyumu. (4 Mose 26:33) Enɛ ɔ he ɔ, anɛ a kɛ zugba ma ha wekuli kpahi lo? Mɛni Zelofehad biyi ɔmɛ maa pee?
14 Yihewi enuɔ nɛ ɔmɛ ya na Mose nɛ a bi lɛ ke: “Ke wa tsɛ be binyumu ɔ, kɛkɛ e sa kaa e biɛ nɛ laa ngɛ Israel lo?” A kpa Mose pɛɛ ke: “Nyɛ ha wɔ hu weto ní ɔ eko kaa wa tsɛ nyɛmimɛ ɔmɛ.” Anɛ Mose de ke, ‘Nɔ́ nɛ mlaa a tsɔɔ ji lɔɔ nɛ, lɔɔ he ɔ, nɔ́ ko be nɛ ma pee ngɛ he’ lo? Dɛbi, Mose ‘ngɔ a sane ɔ kɛ ya fɔ Yehowa hɛ mi.’ (4 Mose 27:2-5) Mɛni Yehowa de ngɛ he? Yehowa de Mose ke: “Zelofehad biyi ɔmɛ a sane da. Ha mɛ hu weto ní ɔ eko kaa a tsɛ nyɛmimɛ ɔmɛ; ngɔɔ a tsɛ zugba a kɛ ha mɛ.” Yehowa ha nɛ a pee blɔ tsɔɔmi nɛ ɔ mlaa, nɛ e de Mose ke: “Ke nyumu ko gbo nɛ e be binyumu ɔ, e biyo nɛ ye e ní.” (4 Mose 27:6-8; Yos. 17:1-6) Kɛ je jamɛ a be ɔ mi ɔ, yihi tsuo nɛ a ji Israelbi nɛ a kɛ si himi ko kaa jã maa kpe ɔ, ma ná weto ní.
15. (a) Kɛ Yehowa kɛ e webi hiɔ si ha kɛɛ, titli ɔ, nihi nɛ balɔ be mɛ ɔ? (b) Mɛni amaniɛ bɔmi ko lɛ e ngɛ Baiblo ɔ mi nɛ tsɔɔ kaa Yehowa hyɛ we nɔ hɛ mi?
15 Enɛ ɔ tsɔɔ heii kaa Yehowa hyɛ we nɔ hɛ mi! Yehowa bu yihewi nɛ ɔmɛ nɛ a be yemi kɛ bualɔ ko ɔ kaa a he jua wa kaa bɔnɛ e buu Israelbi kpa amɛ ɔ nɔuu. (La 68:5) Enɛ ɔ ji amaniɛ bɔmihi nɛ ngɛ Baiblo ɔ mi nɛ́ tsɔɔ kaa Yehowa hyɛ we nɔ hɛ mi, nɛ e bui e sɔmɔli ɔmɛ a ti nɔ ko pe nɔ ko ɔ a kpɛti kake.—1 Sam. 16:1-13; Níts. 10:30-35, 44-48.
WA MA NYƐ MAA KASE YEHOWA
16. Mɛni wa ma nyɛ maa pee nɛ ma ha wɔ hu wa be nihi a hɛ mi hyɛe kaa bɔnɛ Yehowa hyɛ we nihi a hɛ mi ɔ?
16 Mɛni blɔ nɔ wa maa gu kɛ kase Yehowa konɛ wa ko hyɛ nihi a hɛ mi? Mo kai kaa ní enyɔ lɛ haa nɛ a naa kaa nɔ ko hyɛ we nɔ hɛ mi. Ke wa hyɛ we nihi a hɛ mi ɔ, wa be nɔ ko bue kaa e he hia pe nɔ ko. Eko ɔ, wɔɔ lɛɛ wa ma de ke wa hyɛ we nɔ hɛ mi. Se pi be tsuaa be nɛ e ngɛ gbɔjɔɔ kaa wa maa le bɔnɛ wa susuɔ ngɛ nihi a he ha tutuutu. Lɔɔ he ɔ, kɛ o ma plɛ kɛ le kaa o hyɛ we nɔ hɛ mi kɛɛ? Benɛ Yesu ngɛ hlae maa le bɔnɛ nihi susuɔ ngɛ e he ha a, e bi e huɛ ɔmɛ ke: “Mɛnɔ nihi deɔ ke Nɔmlɔ Bi ɔ ji?” (Mat. 16:13, 14) Mɛni heje nɛ mo hu o pee we kaa bɔnɛ Yesu pee ɔ? O ma nyɛ ma bi o huɛ ko nɛ o he lɛ ye kaa anɛ o hyɛɛ nɔ hɛ mi lo. Ke e de mo kaa o buu nihi nɛ a je ma komɛ a nɔ pe ni kpahi, aloo o buu nihi nɛ a ngɛ sika pe nihi nɛ a be nɔ́ ko, aloo o buu nihi nɛ a ya sukuu kɛ ya tsitsaa pe nihi nɛ a yɛ sukuu tsɔ ɔ, mɛni e sa kaa o pee? Moo sɔle kɛ bi Yehowa nɛ e ye bua mo nɛ o tsake o susumi ngɛ nihi a he, nɛ o ko hyɛ nɔ hɛ mi kaa bɔnɛ lɛ Yehowa a, e hyɛ we nɔ hɛ mi ɔ.—Mat. 7:7; Kol. 3:10, 11.
17. Mɛni níhi wa ma nyɛ maa pee kɛ tsɔɔ kaa wa hyɛ we nɔ hɛ mi?
17 Wa ma nyɛ maa kase Yehowa nɛ wa je bumi kɛ mi mi himi kpo kɛ tsɔɔ nihi tsuo ngɛ Kristofoli asafo ɔ mi. Kaa nɔ hyɛmi nɔ́ ɔ, ke wa to he nya buami ko he blɔ nya nɛ wa maa fɔ nihi nine ɔ, wa ma nyɛ maa fɔ wa nyɛmimɛ nɛ a tuɔ gbi kpa, ohiatsɛmɛ, awusahi, aloo yalɔyihi nine. (Kane Galatabi 2:10; Yakobo 1:27.) Jehanɛ se hu ɔ, ngɛ wa fiɛɛmi nítsumi ɔ mi ɔ, wa fiɛɛɔ kɛ haa nihi nɛ a je ma slɔɔtohi a nɔ. Yehowa asafo ɔ peeɔ Baiblo kasemi womihi ngɛ gbi maa pee 600 mi. Enɛ ɔ tsɔɔ kaa wa hyɛ we nihi a hɛ mi!
18. Mɛni o maa pee kɛ tsɔɔ kaa o bua jɔ bɔnɛ nihi nyɛɔ suɔ Yehowa he nɛ́ e hyɛ we nɔ hɛ mi ha a he?
18 Ke wa susu bɔnɛ nihi nyɛɔ suɔ Yehowa he nɛ́ e hyɛ we nɔ hɛ mi ha a he ɔ, wa bua jɔɔ Yehowa he wawɛɛ. Bua jɔmi nɛ ɔ ha nɛ wa kaseɔ Yehowa, nɛ wa jeɔ e su ɔmɛ kpo ngɛ bɔnɛ waa kɛ wa nyɛmimɛ kɛ nihi nɛ waa kɛ mɛ kpeɔ ngɛ fiɛɛmi mi ɔ hiɔ si ha a mi.
‘Nɔ tsuaa nɔ nɛ tsɛɔ Yehowa ngɛ anɔkuale mi ɔ, Yehowa hɛɛ lɛ kɛ suu e he.’—La 145:18 (Hyɛ kuku 9)
‘Yehowa Mawu hyɛ we nɔ hɛ mi.’—5 Mose 10:17 (Hyɛ kuku 17)