Sane Bimihi Nɛ Je Ní Kaneli A Ngɔ

David ngma ngɛ La 61:8 ɔ ke e ma la kɛ je Mawu biɛ ɔ yi “daa.” Anɛ David ngɛ tsɔɔe kaa e be gboe gblegbleegble lo?

Dɛbi. Sisi numi ngɛ nɔ́ nɛ e ngma a he.

Mo susu nɔ́ nɛ David ngma ngɛ kuku nɛ ɔ kɛ ngmami kpahi nɛ a ngɛ kaa jã a mi ɔ he nɛ o hyɛ. E ngma ke: “Ma la kɛ je o biɛ ɔ yi daa, nɛ ma ye ye siwo ɔmɛ a nɔ daa ligbi.” “Oo Yehowa ye Mawu, i jeɔ o yi kɛ ye tsui tsuo, nɛ ma wo o biɛ ɔ hɛ mi nyami kɛ ya neneene.” “Ma je o yi kɛ maa ya neneene.”​—La 61:8; 86:12, NW; 145:1, 2.

Munyu nɛ ɔ nɛ David ngma a tsɔɔ we kaa e be gboe gblegbleegble. David le kaa Yehowa de ke adesahi ma gbo akɛnɛ a peeɔ yayami ɔ he je, nɛ e le kaa lɛ hu e ji yayami peelɔ. (1 Mose 3:3, 17-19; La 51:4, 5) E le kaa anɔkualetsɛmɛ komɛ kaa Abraham, Isak, kɛ Yakob po gbo. Enɛ ɔ he ɔ, David le kaa lɛ nitsɛ hu e ma ba gbo. (La 37:25; 39:4) Se munyu nɛ e ngma ngɛ La 61:8 ɔ tsɔɔ kaa e suɔ kaa e ma je Mawu yi daa, nɛ e fia e pɛɛ si kaa e maa pee jã e wami be tsuo.​—2 Sam. 7:12.

Be komɛ ɔ, David ngmaa níhi nɛ ya nɔ ngɛ e si himi mi kaa bɔ nɛ La 18, 51, kɛ 52 ɔ tsɔɔ ɔ. Ngɛ La 23 ɔ, David kale Yehowa kaa to nɔ hyɛlɔ. E tsɔɔ kaa Yehowa tsɔɔ e to ɔmɛ blɔ, e buu a he, nɛ e haa nɛ a jɔɔ a he. David hu ji to hyɛlɔ, enɛ ɔ he ɔ, e suɔ nɛ e sɔmɔ Mawu e “wami be ɔ tsuo.”​—La 23:6.

Mo kai hu kaa Yehowa lɛ ha nɛ David ngma níhi tsuo nɛ e ngma a nɛ. Gbamihi nɛ maa ba mi hwɔɔ se ɔ hu piɛɛ níhi nɛ e ngma a he. Kaa nɔ hyɛmi nɔ́ ɔ, ngɛ La 110, David tsɔɔ be nɛ e Nyɔmtsɛ ɔ maa ‘hi si ngɛ Mawu hiɔ nɔ’ ngɛ hiɔwe nɛ Yehowa ma ha lɛ he wami ngua. Mɛni e kɛ jamɛ a he wami ɔ maa pee? E kɛ maa ye Mawu he nyɛli ɔmɛ a nɔ, nɛ “e maa gbla je ma amɛ a tue” ngɛ zugba a nɔ. David nina ji jamɛatsɛ ɔ nɛ ji Mesia a nɛ. E maa ye matsɛ kɛ je hiɔwe, nɛ e maa pee ‘osɔfo kɛ ya neneene.’ (La 110:1-6) Yesu ma nɔ mi kaa gbami nɛ ngɛ La 110 kɔ e he, nɛ e maa ba mi hwɔɔ se.​—Mat. 22:41-45.

Enɛ ɔ tsɔɔ kaa Yehowa lɛ ha nɛ David ngma níhi nɛ ya nɔ ngɛ e be ɔ mi, kɛ níhi nɛ maa ya nɔ hwɔɔ se ke a tle lɛ si ɔ kɛ fɔ si. Jamɛ a be ɔ, e ma ná he blɔ kɛ je Yehowa yi kɛ ya daa. Enɛ ɔ ha nɛ wa na kaa munyu nɛ ngɛ La 37:10, 11, 29 ɔ kɔɔ níhi nɛ ya nɔ ngɛ blema Israel ɔ he, nɛ jehanɛ hu ɔ, e kɔɔ níhi nɛ maa ya nɔ ngɛ je ɔ mi tsuo hwɔɔ se benɛ Mawu si womi ɔmɛ maa ba mi ɔ hu he.​—Hyɛ munyu nɛ ji, “O Maa Piɛɛ Ye He Ngɛ Paradeiso” nɛ ngɛ Hwɔɔmi Mɔ nɛ ɔ mi ɔ.

Munyu nɛ David ngma ngɛ La 61:8 ɔ kɛ ngmami kpahi nɛ ngɛ kaa lɔ ɔ ha nɛ wa na kaa David suɔ kaa e ma je Yehowa yi ngɛ blema Israel kɛ ya si be nɛ e ma gbo. Jehanɛ hu ɔ, e tsɔɔ nɔ́ nɛ David ma nyɛ maa pee hwɔɔ se ke Yehowa tle lɛ si.